Ramayanakathasandoha 31
Rāmāyaṇakathāsandoha 31
- Language
- Sanskrit
31.1
rāmaḥ:— kimatra dhanuṣā kāryamasinā vā sacarmaṇā
mahābale mahotsāhe bharate svayamāgate
31.2
pituḥ satyaṃ pratiśrutya hatvā bharatamāhave
kiṃ kariṣyāmi rājyena sāpavādena lakṣmaṇa
31.3
yaddravyaṃ bāndhavānāṃ vā mitrāṇāṃ vā kṣaye bhavet
nāhaṃ tatpratigṛhṇīyāṃ bhakṣyānviṣakṛtāniva
31.4
dharmamarthaṃ ca kāmaṃ ca pṛthivīṃ cāpi lakṣmaṇa
icchāmi bhavatāmarthaṃ etatpratiśṛṇomi te
31.5
bhrātṝṇāṃ saṃgrahārthaṃ ca sukhārthaṃ cāpi lakṣmaṇa
rājyamapyahamicchāmi satyenāyudhamālabhe
31.6
neyaṃ mama mahī saumya durlabhā sāgarāmbarā
na hīccheyamadharmeṇa śaktatvamapi lakṣmaṇa
31.7
yadvinā bharataṃ tvāṃ ca śatrughnaṃ vāpi mānada
bhavenmama sukhaṃ kiṃcidramma tatkurutāṃ śikhī
31.8
snehenākrāntahṛdayaḥ śokenākulitendriyaḥ
draṣṭumabhyāgato hyeṣa bharato nānyathāgataḥ
31.9
vipriyaṃ kṛtapūrvaṃ te bharatena kadā nu kim
asmāsu manasāpyeṣa nāhitaṃ kiṃcidācaret
31.10
na hi te niṣṭhuraṃ vācyo bharato nāpriyaṃ vacaḥ
ahaṃ hyapriyamuktaḥ syāṃ bharatasyāpriye kṛte
31.11
kathaṃ nu putrāḥ pitaraṃ hanyuḥ kasyāṃcidāpadi
bhrātā vā bhrātaraṃ hanyātsaumitre prāṇamātmanaḥ
31.12
yadi rājyasya hetostvamimāṃ vācaṃ prabhāṣase
vakṣyāmi bharataṃ dṛṣṭvā rājyamasmai pradīyatām
31.13
ucyamāno hi bharato mayā lakṣmaṇa tadvacaḥ
rājyamasmai prayaccheti bāḍhamityeva maṃsyate
31.14
tathokto dharmaśīlena bhrātrā tasya hite rataḥ
lakṣmaṇaḥ praviveśeva svāni gātrāṇi lajjayā
Linked texts (3)
- Critical edition, Ayodhyā- and Araṇyakāṇḍa (revised e-text) — Sanskrit
- Bhāvārtharāmāyaṇa — Ekanātha, Sanskrit
- Vālmīkiratna — Vālmīki, Sanskrit