Ramayanakathasandoha 34

Rāmāyaṇakathāsandoha 34

33 bharatavacanānaṅgīkāraḥ
taṃ mattamiva mātaṅgaṃ niḥśvasantaṃ punaḥ punaḥ
bhrātaraṃ bharataṃ rāmaḥ pariṣvajyedamabravīt

kulīnaḥ sattvasaṃpannastejasvī caritavrataḥ
rājyahetoḥ kathaṃ pāpamācarenmadvidho janaḥ

na doṣaṃ tvayi paśyāmi sūkṣmamapyarisūdana
na cāpi jananīṃ bālyāttvaṃ vigarhitumarhasi

etābhyāṃ dharmaśīlābhyāṃ vanaṃ gaccheti rāghava
mātāpitṛbhyāmukto'haṃ kathamanyatsamācare

tvayā rājyamayodhyāyāṃ prāptavyaṃ lokasatkṛtam
vastavyaṃ daṇḍakāraṇye mayā valkalavāsasā

evamuktvā mahārājo vibhāgaṃ lokasaṃnidhau
dharmātmā naḥ pitā tāta svargataḥ satkṛtaḥ satām

na mayā śāsanaṃ tasya tyaktuṃ nyāyyamariṃdama
sa tvayāpi sadā mānyaḥ sa vai bandhuḥ sa naḥ pitā

dhārmikeṇānṛśaṃsena nareṇa guruvartinā
bhavitavyaṃ naravyāghra paralokaṃ jigīṣatā

lakṣmīścandrādpeyādvā himavānvā himaṃ tyajet
atīyātsāgaro velāṃ na pratijñāmahaṃ pituḥ

ayodhyāṃ gaccha bharata prakṛtīruparañjaya
mātaraṃ rakṣa kaikeyīṃ mā roṣaṃ kuru tāṃ prati

tvaṃ rājā bharata bhava svayaṃ narāṇāṃ vanyānāmahamapi rājarāṇmṛgāṇām
gaccha tvaṃ puravaramadya saṃprahṛṣṭaḥ saṃhṛṣṭastvahamapi daṇḍakānpravekṣye

chāyāṃ te dinakarabhāḥ prabādhamānāṃ varṣatraṃ bharata karotu mūrdhni śītām
eteṣāmahamapi kānanadrumāṇāṃ chāyāṃ tāmatiśayinīṃ śanaiḥ śrayiṣye

śatrughnastvatulamatistu te sahāyaḥ saumitrirmama viditaḥ pradhānamitram
catvārastanayavarā vayaṃ narendraṃ satyasthaṃ bharata carāma mā viṣīd

Linked texts (3)