Ramayanakathasandoha 35

Rāmāyaṇakathāsandoha 35

34 jābālervacanam
āśvāsayantaṃ bharataṃ jābālirbrāhmaṇottamaḥ
uvāca rāmaṃ dharmajñaṃ dharmāpetamidaṃ vacaḥ

sādhu rāghava mā bhūtte buddhirevaṃ nirarthikā
prākṛtasya narasyeva hyāryabuddhestapasvinaḥ

kaḥ kasya puruṣo bandhuḥ kimāpyaṃ kasya kenacit
eko hi jāyate jantureka eva vinaśyati

tasmānmātā pitā ceti rāma sajjeta yo naraḥ
unmatta iva sa jñeyo nāsti kaściddhi kasyacit

yathā grāmāntaraṃ gacchannaraḥ kaścidvahirvaset
utsṛjya ca tamāvāsaṃ pratiṣṭhetāpare'hani

evameva manuṣyāṇāṃ pitā mātā gṛhaṃ vasu
āvāsamātraṃ kākutstha sajjante nātra sajjanāḥ

pitryaṃ rājyaṃ samutsṛjya sa nārhasi narottama
āsthātuṃ kāpathaṃ duḥkhaṃ viṣamaṃ bahukaṇṭakam

rājabhogānanubhavanmahārhānpārthivātmaja
vihara tvamayodhyāyāṃ yathā śakrastriviṣṭape

na te kaściddaśarathastvaṃ ca tasya na kaścana
anyo rājā tvamanyastu tasmātkuru yaducyate

gataḥ sa nṛpatistatra gantavyaṃ yatra tena vai
pravṛttireṣā bhūtānāṃ tvaṃ tu mithyā vihanyase

arthe dharmaparā ye ye tāṃstāñśocāmi netarān
te hi duḥkhamiha prāpya vināśaṃ pretya lebhire

aṣṭakāpitṛdaivatyamityayaṃ prasṛto janaḥ
annasyopadravaṃ paśya mṛto hi kimāśiṣyati

yadi bhuktamihānyena dehamanyasya gacchāti
dadyātpravasatāṃ śrāddhaṃ na tatpathyaśanaṃ bhavet

dānasaṃvananā hyete granthā medhāvibhiḥ kṛtāḥ
yajasva dehi dīkṣasva tapastapyasva saṃtyaja

sa nāsti paramityetatkuru buddhiṃ mahāmate
pratyakṣaṃ yattadātiṣṭha parokṣaṃ pṛṣṭhataḥ kuru

satāṃ buddhiṃ puraskṛtya sarvalokanidarśinīm
rājyaṃ sa tvaṃ nigṛhṇīṣva bharatena prasāditaḥ

Linked texts (3)