Pramāṇa · Search · About · API

Ramayanakathasandoha 36

Rāmāyaṇakathāsandoha 36

Language
Sanskrit

36.1

35 jābālimatagarhaṇam
jābālestu vacaḥ śrutvā rāmaḥ satyaparākramaḥ
uvāca parayā sūktyā buddhyā vipratipannayā

36.2

bhavānme priyakāmārthaṃ vacanaṃ yādihoktavān
akāryaṃ kāryasaṃkāśamapathyaṃ pathyasaṃnibham

36.3

kulīnamakulīnaṃ vā vīraṃ puruṣamāninam
cāritrameva vyākhyāti śuciṃ vā yadi vāśucim

36.4

adharmaṃ dharmaveṣeṇa yadyahaṃ lokasaṃkaram
abhipattye śubhaṃ hitvā kriyāṃ vidhivivarjitām

36.5

kaścetayānaḥ puruṣaḥ kāryākāryavicakṣaṇaḥ
bahu manyeta māṃ loke durvṛttaṃ lokadūṣaṇam

36.6

yadvṛttāḥ santi rājānastadvṛttāḥ santi hi prajāḥ
satyamevānṛśaṃsaṃ ca rājavṛttaṃ sanātanam

36.7

ṛṣayaścaiva devāśca satyameva hi menire
satyavādī hi loke'sminparaṃ gacchati cākṣayam

36.8

udvijante yathā sarpānnarādanṛtavādinaḥ
dharmaḥ satyaparo loke mūlaṃ sarvasya cocyate

36.9

satyameveśvaro loke satye dharmaḥ sadāśritaḥ
satyamūlāni sarvāṇi satyānnāsti paraṃ padam

36.10

naiva mohānna lobhādvā na cājñānāttamo'nvitaḥ
setuṃ satyasya bhetsyāmi guroḥ satyapratiśravaḥ

36.11

sthirā mayā pratijñātā pratijñā gurusaṃnidhau
prahṛṣṭamānasā devī kaikeyī cābhavattadā

36.12

so'haṃ kathaṃ pratijñāya vanavāsamimaṃ guroḥ
bharatasya kariṣyāmi vaco hitvā gurorvacaḥ

36.13

vanavāsaṃ vasanneva śucirniyatabhojanaḥ
mūlapuṣpaphalaiḥ puṇyaiḥ pitṛndevāṃśca tarpayan

36.14

saṃtuṣṭapañcavargo'haṃ lokayātrāṃ pravāhaye
akuhaḥ śraddadhānaḥ sankāryākāryavicakṣaṇaḥ

36.15

nindāmyahaṃ karma kṛtaṃ pitustavattvāmagṛhṇādviṣamasthabuddhim
buddhvāneyaivaṃvidhayā carantaṃ sunāstikaṃ dharmapathādapetam

36.16

iti bruvantaṃ vacanaṃ sadoṣaṃ rāmaṃ mahātmānamadīnasattvam
uvāca pathyaṃ punarāstikaṃ ca satyaṃ vacaḥ sānunayaṃ sa vipraḥ

36.17

na nāstikānāṃ vacanaṃ bravīmyahaṃ na nāstiko'smīti ca saṃpradhāryatām
nivartanārthaṃ tava rāma kāraṇātprasādanārthaṃ ca mayaitadīritam

Linked texts (3)