Pramāṇa · Search · About · API

Ramayanakathasandoha 37

Rāmāyaṇakathāsandoha 37

Language
Sanskrit

37.1

36 nirānandāyāmayodhyāyāṃ bharatasya praveśaḥ
snigdhagambhīraghoṣeṇa syandanenopayānprabhuḥ
ayodhyāṃ bharataḥ kṣipraṃ praviveśa mahāyaśāḥ

37.2

biḍālolūkacaritāmālīnanaravāraṇām
timirābhyāhatāṃ kālīmaprakāśāṃ niśāmiva

37.3

alpoṣṇakṣubdhasālilāṃ gharmataptavihaṃgamām
līnamīnajhaṣagrāhāṃ kṛśāṃ girinadīmiva

37.4

vidhvastakavacāṃ rugṇagajavājirathadhvajām
hatapravīrāmāpannāṃ camūmiva mahāhave

37.5

saphenāṃ sasvanāṃ bhūtvā sāgarasya samutthitām
praśāntamārutoddhūtāṃ jalormimiva niḥsvanām

37.6

prabhākaraiḥ susnigdhaiḥ prajvaladbhirivottamaiḥ
viyuktāṃ maṇibhirjātyairnavāṃ muktāvalīmiva

37.7

sahasā calitāṃ sthānānmahīṃ puṇyakṣayādvatām
saṃhatadyutivistārāṃ tārāmiva divaścyutām

37.8

puṣpanaddhāṃ vasantānte mattabhramaraśālinīm
drutadāvāgniviṣṭuṣṭāṃ krāntāṃ vanalatāmiva

37.9

saṃmūḍhanigamāṃ sarvāṃ sāṃkṣiptavipaṇāpaṇām
pracchannaśaśinakṣatrāṃ dyāmivāmbudharairyutām

37.10

kṣīṇapānottamairbhagnaiḥ śarāvairabhisaṃvṛtām
hataśauṇḍāmiva dhvastāṃ pānabhūmimasaṃskṛtām

37.11

vṛkṣaṇabhūmitalāṃ nimnāṃ vṛkṣapātraiḥ samāvṛtām
upayuktodakāṃ bhagnāṃ prapāṃ nipatitāmiva

37.12

vipulāṃ vitatāṃ caiva yuktapāśāṃ tarasvinām
bhūmau bāṇairvinikṛtāṃ patitāṃ jyāmivāyudhāt

37.13

sahasā yuddhaśauṇḍena hayāroheṇa vāhitām
nihatāṃ pratisainyena vaḍavāmiva pātitām

37.14

bharatastu rathasthaḥ sañśrīmāndṛśarathātmajaḥ
vāhayantaṃ rathaśreṣṭhaṃ sārathiṃ vākyamabravīt

37.15

kiṃ nu khalvadya gambhīro mūrchito na niśāmyate
yathāpuramayodhyāyāṃ gītavāditranisvanaḥ

37.16

vāruṇīmadagandhaśca mālyagandhaśca mūrcchitaḥ
candanāgurugandhaśca na pravāti samantataḥ

37.17

yānapravaraghoṣaśca susnigdhahayanisvanaḥ
nedānīṃ śrūyate puryāmasyāṃ rāme vivāsite

37.18

bahiryātrāṃ na gacchanti citramālyadharā narāḥ
notsavāḥ saṃpravartante rāmaśokārdite pure

37.19

sā hi nūnaṃ mama bhrātrā purasyāsya dyutirgatā
na hi rājatyayodhyeyaṃ sāsārevārjunī kṣapā

37.20

kadā nu khalu me bhrātā mahotsava ivāgataḥ
janayiṣyatyayodhyāyāṃ harṣaṃ grīṣma ivāmbudaḥ

37.21

taruṇaiścāruveṣaiśca narairunnatagāmibhiḥ
saṃpatadbhirayodhyāyāṃ nābhibhānti mahāpathāḥ

37.22

iti bruvansārathinā duḥkhito bharatastadā
ayodhyāṃ saṃpraviśyaiva viveśa vasatiṃ pituḥ

37.23

tadā tadantaḥpuramujjhitaprabhaṃ suraurivotkuṣṭamabhāskaraṃ dinam
nirīkṣya sarvatra viviktamātmavānmumoca bāṣpaṃ bharataḥ suduḥkhitaḥ

Linked texts (3)