Ramayanakathasandoha 8

Rāmāyaṇakathāsandoha 8

8 rāmalakṣmaṇokto daivapauruṣaprabhāvaḥ
āsādya rāmaḥ saumitriṃ suhṛdaṃ bhrātaraṃ priyam
uvācedaṃ sa dhairyeṇa dhārayansattvamātmavān

nigṛhya roṣaṃ śokaṃ ca dhairyamākramya kevalam
mātā naḥ sā yathā na syātsaviśaṅkā tathā kuru
paralokabhayādbhīto nirbhayo'stu pitā mama

mama pravājanādadya kṛtakṛtyā nṛpātmajā
mṛtaṃ bharatamavyagramābhiṣecayatāṃ tataḥ

kṛtānta eva saumitre draṣṭavyo matpravāsane
kaikeyyāḥ pratipattirhi kathaṃ syānmama vedane
yadi tasyā na bhāvo'yaṃ kṛtāntavihito bhavet

jānāsi hi yathā saumya na mātṛṣu mamāntaram
bhūtapūrvaṃ viśeṣo vā tasyā mayi sute'pi vā

kaśca daivena saumitre yoddhumutsahate pumān
yasya nu grahaṇaṃ kiṃcitkarmaṇo'nyatra dṛśyate

ṛṣayo'pyugratapaso daivenābhipracoditāḥ
utsṛjya niyamāṃstīvānbhraśyante kāmamanyubhiḥ

asaṃkalpitameveha yadakasmātpravartate
nivāryārabdhamārambhairnu daivasya karma tat

vyāhate'pyabhiṣeke me paritāpo na vidyate
mā ca lakṣmaṇa saṃtāpaṃ kārṣīrlakṣmyā viparyaye

lakṣmaṇaḥ–kiṃ nāma kṛpaṇaṃ daivamaśaktamabhiśaṃsasi
kathaṃ tvaṃ karmaṇā śaktaḥ kaikeyīvaśavartinaḥ
kariṣyasi piturvākyamadharmiṣṭhaṃ vigarhitam

yadyapi pratipattiste daivī cāpi tayormatam
tathāpyupekṣaṇīyaṃ te na me tadbhirocate

viklavo vīryahīno yaḥ sa daivamanuvartate
vīrāḥ saṃbhāvitātmāno na daivaṃ paryupāsate

daivaṃ puruṣakāreṇa yaḥ samarthaḥ prabādhitum
na daivena vipannārthaḥ puruṣaḥ so'vasīdati

drakṣyanti tvadya daivasya pauruṣaṃ puruṣasya ca
daivamānuṣayoradya vyaktā vyaktirbhaviṣyati

atyaṅkuśamivoddhāmaṃ gajaṃ madabaloddhatam
pradhāvitamahaṃ daivaṃ pauruṣeṇa nivartaye

na śobhārthāvimau bāhū na dhanurbhūṣaṇāya me
nāsirābandhanārthāya na śarāḥ stambhahetavaḥ
āmitramathanārthāya sarvametaccatuṣṭayam

yairvivāsastvayāraṇye mitho rājansamarthitaḥ
araṇye te vivatsyanti caturdaśa samāstathā

adya me'straprabhāvasya prabhāvaḥ prabhaviṣyati
rājñśvāprabhutāṃ kartuṃ prabhutvaṃ ca tava prabho

adya candanasārasya keyūrāmokṣaṇasya ca
vasūnāṃ ca vimokṣasya suhṛdāṃ pālanasya ca
anurūpamimau bāhū rāma karma kariṣyataḥ

iti
vimṛjya bāṣpaṃ parisāntvaya cāsakṛtsa lakṣmaṇaṃ rāghavavaṃśavardhanaḥ
uvāca pitrorvacane vyavasthitaṃ nibodha māmeṣa hi saumya satpathaḥ

Linked texts (2)