Ramayanakathasandoha 9

Rāmāyaṇakathāsandoha 9

9 pravatsyato rāmasya māturanujñāprāptiḥ
kausalyā- addṛṣṭaduḥkho dharmātmā sarvabhūtapriyaṃvadaḥ
mayi jāto daśarathātkathamuñchena vartayet

yasya bhṛtyāśca dāsāśca mṛṣṭānyannāni bhuñjate
kathaṃ sa bhokṣyate rāmo vane mūlaphalānyayam

kathaṃ hi dhenuḥ svaṃ vatsaṃ gacchantamanugacchati
ahaṃ tvānugamiṣyāmi yatra vatso gamiṣyasi

rāmaḥ:- kaikeyyā vañcito rājā mayi cāraṇyamāśrite
bhavatyā ca parityakto na nūnaṃ vartayiṣyati

bhartuḥ punaḥ parityāgo nṛśaṃsaḥ kevalaṃ striyāḥ
sa bhavatyā na kartavyo manasāpi vigarhitaḥ

yāvajjīvati kākutsthaḥ pitā me jagatīpatiḥ
śuśrūṣā kriyatāṃ tāvatsa hi dharmaḥ sanātanaḥ

bhartuḥ śuśrūṣayā nārī labhate svargamuttamam
api yā nirnamaskārā nivṛttā devapūjanāt

kausalyā- gamane sukṛtāṃ buddhiṃ na te śaknomi putraka
vinivartayituṃ vīra nūnaṃ kālo duratyayaḥ

gaccha putra tvamekāgro bhadraṃ te'stu sadā vibho
punastvayi nivṛtte tu kṛtārthe caritavrate
piturānṛṇyatā prāpte svapiṣye paramaṃ sukham

gacchedānīṃ mahābāho kṣemeṇa punarāgataḥ
vadhvāśca mama nityaṃ tvaṃ kāmānsaṃvardhayeha bhoḥ

yaṃ pālayasi dharmaṃ tvaṃ prītyā ca niyamena ca
sa vai rāghavaśārdūla dharmastvāmabhirakṣatu

yāni dattāni te'strāṇi viśvāmitreṇa dhīmatā
tāni tvāmabhirakṣantu guṇaiḥ samuditaṃ sadā

pitṛśuśrūṣayā putra mātṛśuśrūṣayā tathā
satyena ca mahābāho ciraṃ jīvābhirakṣitaḥ

lokapālāśca te sarve vāsavapramukhāstathā
śrutiḥ smṛtiśca dharmaśca pāntu tvāṃ putra sarvataḥ

mahāvane'pi carato muniveṣasya dhīmataḥ
tathā devāśca daityāśca bhavantu sukhadāḥ sadā

mahādvipāśca siṃhāśca vyāghrā ṛkṣāśca daṃṣṭriṇaḥ
mahiṣāḥ śāṅgiṇo raudrā na te druhyantu putraka

āgamāste śivāḥ santu sidhyantu ca parākramāḥ
sarvasaṃpattayo rāma svastimāngaccha putraka

yanmaṅgalaṃ suparṇasya vinatākalpayatpurā
amṛtaṃ prārthayānasya tatte bhavatu maṅgalam

iti
ānamya mūrdhnī cāghrāya pariṣvajya yaśasvinī
avadatputramiṣṭārthaṃ gaccha rāma yathāsukham

mayārcitā devagaṇāḥ śivādyo maharṣayo bhūtagaṇāḥ suroragāḥ
ābhiprayātasya vanaṃ cirāya te hitāni kāṅkṣantu diśaśca rāghava

Linked texts (4)