Kathakallolini p40

p40

atha vasantotsavāvasaravāsateyyā ādime yāme mahārhaveṣaḥ kumārasacivaḥ samāgamat | alakṣitapraveśamupakośā tamabravīd yannāhamakṛtasnānaṃ tvāṃ spṛśāmītyabhyantaraṃ praviśya sampāditasnāno bhava | sa ca mūḍhastadaṅgīkurvannandhatamasācchennābhyantaragṛhaṃ ceṭībhiḥ praveśitastatprāntāntarvastrābharaṇo'ntarvāsasaḥ kṛte pradattaikacailakhaṇḍaḥ, āśiraḥpādamaṅgeṣvabhyaṅgabhaṅgyā vilepitatailakajalo vihitaḥ | pratyaṅgamasya mardayantyo yāvacceṭyo'tiṣṭham̐stāvad dvitīye prahare'sau purodhā apyupāgamat | ceṭyaśca 'vararuceḥ suhṛtkaścitpurohitaḥ samāgata iti tvamiha praviśa' ityuktvā parihitacaturaṅgalakajalamalinamalamallakamātraṃ taṃ kumārasacivaṃ mañjūṣāyāṃ nikṣipya bahistāmargalenāvadhnan | evameva snānamiṣeṇābhyantaragṛhaṃ nītaḥ purohito'pi hṛtavastrādiścailakhaṇḍadharastailakajalamardanaiśceṭībhirvimohitastṛtīye prahare daṇḍādhipatau samāyāte sahasā rahasyodbhedabhayabhītābhiriva vipralabdho yathāpūrvaṃ mañjūṣāyāṃ nikṣipto mañjūṣā ca sārgalīkṛtā | tato daṇḍādhipo'pi snānopadhiyāntaragṛhaṃ praveśya paridhāpitacelakhaṇḍaikakarpaṭo yadā tailakajalābhyaṅgasukhamanubhavannāsīttadaiva turīye yāme sa vaṇigapi tatra samāgacchaditi daṇḍādhipo'pi tadbhayaṃ pradarśya ceṭībhirmañjūṣāyāṃ nikṣipto bahirargalañca pradattam