Kathakallolini p89

p89

tadrūpākṛṣṭalocanā'lambuṣā'pi nālambabhūva hṛdgatabhāvaṃ nihnotumiti viditatadānīntanakamalodbhavabhāvena mayā'vinītau tau martyau jāyāpatī bhavitumabhiśaptau | tayoḥ he bhūpate, tvaṃ vidhūmo vasuḥ apsarāśca sā'yodhyāyāṃ kṛtavarmaṇo rājñastanayā mṛgāvatī nāmnotpannā te bhāvinī bhāminī | evaṃ vāsavavākyavāyuvidhūtabhūtapūrvavidhūmamadanadahanena jājvalyamānasasnehahṛdayo narapatiramarapatisatkṛtiṃ svīkṛtyamātalinā saha svapurīṃ pratasthe | gacchantaṃ taṃ tilottamā'psarāḥ prītyā kiñcidvivakṣyā pratīkṣitumīṣadācakāṃkṣa kintu na so'vadadhau mṛgāvatīsaṃlagnamanā manāgapyapyanubhūtāvamānanā vimanāstilottamā tamabhikrudhyai yayā hṛtamanāstvaṃ rājan, na vaco me'vadhatse tasyāścaturdaśasamāstava viyogo bhaviṣyatīti śaśāpa | taṃ śāpam mātaliraiva śuśrāva | narapatistu manorathenāyodhyāṃ, rathena ca kauśāmbīmupagamya, vāsavoktaṃ sarvaṃ mṛgāvatīsamvaddhamatyautsukyena yuganadharādibhyo mantribhyo'bhidadhattasyāḥ prāptyai caṇamapyanalpakalpamiva manvānastāṃ yācitumayodhyāṃ kṛtavarmaṇaḥ samīpe praiṣyaṃ praiṣayat | so'pi ca nijapatnyā saha sammantrya svānurūpakṛtotsavamaṅglodvāhavidhinā kāntālakāntāṃ tāṃ sutāṃ sahasrānīkāya dadau