Kathakallolini p98

p98

kālakrameṇa kālanemirapyaparimitadhanaḥ samutpannasūnuśca saṃjātaḥ, putrasya ca śrīvarātprāptimākalayya śriyai ślāghamānaḥ kālanemistasya śrīdatta iti nāma cakre| kramādyauvanamavatīrṇaḥ śrīdatto, vipraḥ sannapyastreṣu, bāhuyuddheṣu, cāpratimaḥ pṛthivyāṃ saṃvṛttaḥ | kālanemerbhrāturvigatabhayasya ca bhāryā bhujaṅgadaṣṭā naṣṭeti tīrthārthī sa deśāntaramiyāya, kālanemiputrasya śrīdattasya ca tadānīṃtanaguṇajñabhūpatervallabhaśakteḥ putreṇa vikramaśaktinā maitrī samajāyata, kintvatitarasvitayā, tasyābhimānitvena duryodhanabhīmayorivānayoḥ sahavāsaḥ śaiśave samavartata, anantarañca viprasyāsya vajramuṣṭibāhuśālināmānau dvāvavantijau kṣatriyau mitratāpannau, athānye'pi guṇagrāhiṇo dākṣiṇātyāḥ mantriputrāścāsya maitrīmāpannāḥ