[Pramāṇa](https://indike.org/pramana/) › [Indian literature](https://indike.org/pramana/in) › [Epic, Poetry, Drama & Narrative](https://indike.org/pramana/in.lit) › [Story collections and fables](https://indike.org/pramana/in.lit.short_stories) › [Vikramarkacaritra](https://indike.org/pramana/in.lit.short_stories.vikramarkacaritra) › 1.20 # Vikramarkacaritra 1.20 Vikramārkacaritra 1.20 - **Language:** Sanskrit ### [1.20](https://indike.org/pramana/in.lit.short_stories.vikramarkacaritra.1.20) iti bhavatu | tatkarmāryattamabhūt | kimanena gatacintanena | idānīṃ mahānprayatnaḥ kartavyaḥ’ iti | mantrī ‘kathaṃ kartavyaḥ ?’ ityapṛcchat | rājābravīt—‘yaḥ ko'pi kumārasya cikitsāṃ kariṣyati tasyārdharājyaṃ dāsyāmi | sarvānanyāṃścābhīṣṭānpradāsyāmītyamito nagaramudghoṣaya’ iti | tato mantrī tathaiva vidhāya svabhavanamāgatya śāradānandāya sarvaṃ nivedayāmāsa | tatsarvaṃ śrutvā śāradānando bahuśruta ‘mama gṛhe kāpi kanyā vartate | sā yadyenaṃ paśyetkamapyupāyaṃ kuryāt’ iti rājñe nivedayetyavādīt | tacchrutvā mantrī rājñe tannivedayāmāsa | tato rājā saputraḥ saparivāro mantrigṛhamāgatyopaviveśa | rājaputro'pi ‘sasemirā’ iti vadannupaviṣṭaḥ | tadākarṇya yavanikāntarvartī śāradānandaḥ ‘bho rājaputra’ ityāmantrayata | tadā bhūyo'pi ‘sasemirā’ iti vadantaṃ rājatanayamuddiśyaivaṃ padyaṃ papāṭha— sadbhāvaṃ pratipannānāṃ vañcane kā vidagdhatā aṅkamāruhya suptānāṃ hanane kiṃ nu pauruṣam - [Previous: 1.19](https://indike.org/pramana/in.lit.short_stories.vikramarkacaritra.1.19) - [Next: 1.21](https://indike.org/pramana/in.lit.short_stories.vikramarkacaritra.1.21) - [Up: 1](https://indike.org/pramana/in.lit.short_stories.vikramarkacaritra.1) --- Source: [https://indike.org/pramana/in.lit.short_stories.vikramarkacaritra.1.20](https://indike.org/pramana/in.lit.short_stories.vikramarkacaritra.1.20) · Pramāṇa