[Pramāṇa](https://indike.org/pramana/) › [Indian literature](https://indike.org/pramana/in) › [Epic, Poetry, Drama & Narrative](https://indike.org/pramana/in.lit) › [Story collections and fables](https://indike.org/pramana/in.lit.short_stories) › [Vikramarkacaritra](https://indike.org/pramana/in.lit.short_stories.vikramarkacaritra) › 4.2 # Vikramarkacaritra 4.2 Vikramārkacaritra 4.2 - **Language:** Sanskrit ### [4.2](https://indike.org/pramana/in.lit.short_stories.vikramarkacaritra.4.2) ' iti purohitastadākarṇya rājasamīpamāgatya nyavedayat | tato rājā svayameva tatsandarśanārthamāgatya praṇamya tadājñayopaviṣṭastena saha nānāvidhā adhyātmakathāḥ kurvannekadā tamapṛcchat - 'bhoḥ svāmiṃstava kati varṣāṇi jātāni' iti | yogī prāha - 'kimevaṃ pṛcchasi | nītividā puruṣeṇa svasyāyurna kathanīyamiti kiṃ nāśrauṣīḥ ? | anyacca, yastu yogīśvaraḥ sa kālaṃ dagdhāyitvā suciraṃ jīvet | āstāmetat | yadi tvaṃ sādhayituṃ prabhavasi tarhi mantramekamupadiśāmi' iti | rājā 'kiṃ tena labhyate ?' | yogī 'anena tvaṃ jarāmaraṇavarjito bhaviṣyāsi' | rājā 'tarhyupadiśatu svāmī' | tato yogīśvaraḥ 'amuṃ mantraṃ varṣamekaṃ brahmacaryeṇa japtvā dūrvāṅkurairhomaṃ vidhehi | tataḥ pūrṇāhutisamaye homakuṇḍātkaścitpuruṣaḥ phalahasto nirgatya phalaṃ dāsyati | tadupabhujya jarāmaraṇavarjito bhaviṣyāsi' ityuktvā rājñe mantramekamupadiśya sa muniryathecchaṃ jagāma | rājāpyujjayinīṃ samayā hāyanamekaṃ brahmacaryeṇa mantraṃ japtvā dūrvādalairhutvā pūrṇāhutimakarot | tadā homakuṇḍātkaścitpuruṣo nirgatya divyamekaṃ phalaṃ | rājñe dadau | rājāpi tatphalaṃ gṛhītvā kṛtakṛtyaḥ puraṃ praviśya rājavīthyāṃ samāgacchankuṣṭhavyādhinā viśīrṇasarvāvayavaṃ kaścana brāhmaṇamadrākṣīt | sa ca rājānamupasṛtya kṛpaṇamevamavādīt — 'deva rājā nāma sarveṣāṃ lokānāṃ mātāpitṛvadavagantavyaḥ | tathā ca vadanti— rājā bandhurabandhūnāṃ rājā cakṣuracakṣuṣām rājā pitā ca mātā ca rājā cārtiharo guruḥ - [Previous: 4.1](https://indike.org/pramana/in.lit.short_stories.vikramarkacaritra.4.1) - [Next: 4.1-2](https://indike.org/pramana/in.lit.short_stories.vikramarkacaritra.4.1-2) - [Up: 4](https://indike.org/pramana/in.lit.short_stories.vikramarkacaritra.4) ## Linked texts (3) - [Mahāsubhāṣitasaṃgraha](https://indike.org/pramana/in.lit.subhasita.subhasita.mahasubhasitasangraha.2959) — Sanskrit - [Textus simplicior](https://indike.org/pramana/in.lit.short_stories.pancatantra*simplicior.1.377) — Sanskrit - [Southern recension](https://indike.org/pramana/in.lit.short_stories.simhasana*southern.10.4) — Sanskrit --- Source: [https://indike.org/pramana/in.lit.short_stories.vikramarkacaritra.4.2](https://indike.org/pramana/in.lit.short_stories.vikramarkacaritra.4.2) · Pramāṇa