[Pramāṇa](https://indike.org/pramana/) › [Indian literature](https://indike.org/pramana/in) › [Epic, Poetry, Drama & Narrative](https://indike.org/pramana/in.lit) › [Story collections and fables](https://indike.org/pramana/in.lit.short_stories) › [Vikramarkacaritra](https://indike.org/pramana/in.lit.short_stories.vikramarkacaritra) › 8.1-5 # Vikramarkacaritra 8.1-5 Vikramārkacaritra 8.1-5 - **Language:** Sanskrit ### [8.1-5](https://indike.org/pramana/in.lit.short_stories.vikramarkacaritra.8.1-5) ato'vaśyamidānīmagniṃ pravekṣyāmi' | evamabhidhāya hutāśanadānāya rājñaḥ pādayoḥ papāta | rājāpi patibhaktipavitraṃ tasyā vacanaṃ śrutvā karuṇārdrāntaḥkaraṇaḥ śrīkhaṇḍādimiśritāṃ viracayya tāmanujajñe | sāpi rājño'nujñāmadāpya bhartṛśarīreṇa saha pāvakaṃ praviveśa | tataḥ sūryo'pi saṃkucitakarasahasraścaramagirigahvaramavajagāhe | rājāpi sāyantanaṃ karmakalāpaṃ nirvartya krameṇa tāṃ niśāmanaiṣīt | atha prabhāte tigmabhānāvudayamahīdharaśekharāyitatanau rājā siṃhāsanopaviṣṭaḥ sakalasāmantasamūhapraṇatīryāvadaṅgīkurvannāsta tāvatsa vīro yathāpūrvaṃ khaḍgahasto dedīpyamānavigraho nabhaḥsthalādavatīrya rājñaḥ kaṇṭhe suratarukusuvanirmitāṃ parimalalubdhamadhukaranikurumbantaramamlānāṃ divyamālāṃ samarpya mahendrasandeśaṃ tasmai nivedya nānāvidhāḥpradhanānubaddhāḥ kathāḥ kathayitumupacakrame | tadā sarvāpi sabhā vismitā babhūva | vīro'vadat — “ahamito nirgatya nākalokaṃ gataḥ | tatra devānāṃ dānavānāṃ ca saṅgrāmaḥ pravṛttaḥ tatra ca mayā bahavo dānavā nipātitāḥ | kecana kāndiśīkā āsan samāpte ca saṅgrāme bhagavānsahasrākṣaḥ sarvairdevaiḥ saha saprasādaṃ māmavalokya jagāda — ‘aho vīra cirāddṛṣṭo'si | etāvantaṃ kālaṃ kutra sthito'si ?’ iti | tato'hamavādiṣam — ‘svāminaḥ śāpādiyantaṃ kālaṃ bhūloke sthitaḥ adya svāmino daityaiḥ saha yuddhaṃ prāptamākarṇya sāhyārthamāgato'smi’ iti tato mahendraḥ prasannacittaḥ 'ayaṃ vīrāya yuddhavṛttāntastvayā madhyamaloke mā prāpnotu | adya tava śāpāvasānamabhūt | paraṃ prasanno'smi | gṛhāṇedaṃ kanakavalayam | ' ityabhidhāya svakarātkanakavalayamunmucya mama haste svayamevākalayāṃcakāra | punarahaṃ vyajijñapam - 'bhoḥ svāminnahaṃ martyalokabhūṣaṇe vikramamahīpāle bhāryāṃ nikṣipya samāgato'smi | tasmātpunastatra gatvā bhāryā gṛhītvā samāgantumanujānātu māṃ devaḥ' iti | mahendro'pyanujajñe | tatastvarayā samāgato'smi | jhaḍiti mayā tatra gantavyam | kutra me bhāryā'sti " iti | tacchrutvā paraṃ vismayamāranno rājā tūṣṇīṃ sthitaḥ | tadā sa aindrajālikaḥ 'kimiti joṣamāsyate ?' ityapṛcchat | tadā sabhyaḥ kaścidāha - 'tava bhāryāgniṃ praviṣṭā' iti | aindrajālikaḥ 'hanta kimetat ?' iti papraccha | tadā sabhyāḥ parasparavadanāni vilokayanto niruttarā babhūvuḥ | aindrajāliko rājānamadhikṣeptumārebhe- 'rājāvataṃsa paradārasahodaraḥ sakalārthilokakalpataruriti prasiddhiṃ prāpya mama prāṇapriyāmantaḥpure saṅgopya kimevaṃ tūṣṇīṃ sthito'si ?' iti | rājāpi saṃkucitamanāḥ śuddhāntacarānsauvidallānāhūyāpṛcchat - 'sauvidallāḥ satyaṃ brūta | kimasya dayitāntarvartate ?' iti | sauvidallāḥ 'svāminnasmajjananyā devyā saṃlapantī sukhamāste' ityūcuḥ | rājā 'tarhi tāmatrānayata' ityāha | tataste mahāprasāda iti satvaramantaḥpuraṃ praviśya tāmāninyuḥ | rājā tāṃ dṛṣṭvā sāmājikaiḥ saha paramaṃ vismayamavāpa | atrāntare sa vīraḥ smitvā rājānamastauṣīt - 'jaya mahārāja | jaya sakalamahīpālamakuṭakoṭimāṇikyamaṇikiraṇapāṭallitapādapīṭha jaya nirgaladdānodakadhārāpūraplavamānanikhilamārgaṇa | jaya cojjayinībhāgyapariṇāma | ahamaindrajālikaḥ mayaivamindrajālavidyālāghavaṃ pradarśitam |' iti | tato rājā paramāścaryataraṅgittaraṅgo babhūva | tasminsamaye bhāṇḍārika āgatya rājānamuvāca - 'bho rājanpāṇḍyarājena sāṃvatsarikaḥ karaḥ preṣitaḥ' iti ! rājā 'kiṃ preṣitam ?' ityapṛcchat | bhāṇḍārikaḥ - deva, aṣṭau hāṭakakoṭayastrinavatirmuktāphalānāṃ tulāḥ pañcāśanmadagandhalubdhamadhupā dhauṃdharāḥ sindhurāḥ aśvānāṃ triśataṃ caturdaśa rathāḥ paṇyāṅganānāṃ śataṃ caitadvikramabhūmipāla bhavatastatpāṇḍyarāṭrapreṣitam - [Previous: 8.3-2](https://indike.org/pramana/in.lit.short_stories.vikramarkacaritra.8.3-2) - [Next: 8.1-6](https://indike.org/pramana/in.lit.short_stories.vikramarkacaritra.8.1-6) - [Up: 8](https://indike.org/pramana/in.lit.short_stories.vikramarkacaritra.8) ## Linked texts (3) - [Southern recension](https://indike.org/pramana/in.lit.short_stories.simhasana*southern.30.16) — Sanskrit - [Vikramacaritra (Pandit Somasūri)](https://indike.org/pramana/in.jaina.post.prabandha.prabandha.vikramacaritra.6.328) — Pandit Somasūri, Sanskrit - [Vārāhagṛhya](https://indike.org/pramana/in.vedanga.kalpa.grhya.varahagrhya.17.323) — Sanskrit --- Source: [https://indike.org/pramana/in.lit.short_stories.vikramarkacaritra.8.1-5](https://indike.org/pramana/in.lit.short_stories.vikramarkacaritra.8.1-5) · Pramāṇa