[Pramāṇa](https://indike.org/pramana/) › [Indian literature](https://indike.org/pramana/in) › [Epic, Poetry, Drama & Narrative](https://indike.org/pramana/in.lit) › [Story collections and fables](https://indike.org/pramana/in.lit.short_stories) › [Vikramarkacaritra](https://indike.org/pramana/in.lit.short_stories.vikramarkacaritra) › 8.4-2 # Vikramarkacaritra 8.4-2 Vikramārkacaritra 8.4-2 - **Language:** Sanskrit ## Contents - [8.4-2.p1](https://indike.org/pramana/in.lit.short_stories.vikramarkacaritra.8.4-2.p1) — 5 parts ### [8.4-2](https://indike.org/pramana/in.lit.short_stories.vikramarkacaritra.8.4-2) ato brāhmaṇāḥ sarve'pi pūjanīyāḥ | tathā ca bhagavān— yaśca māṃ parayā bhaktyā hyārādhayitumicchati tena pūjyā dvijāḥ samyaktena tuṣṭo bhavāmyaham ### [8.4-2.p1.1](https://indike.org/pramana/in.lit.short_stories.vikramarkacaritra.8.4-2.p1.1) iti evamuktvā sa rājā svaputro yena hastena brāhmaṇamatāḍayattasya hastasya chedena tatpratīkāraṃ nirṇināya | tadā ca brāhmaṇo rājasamīpametya 'bho mahārāja bāliśo'yaṃ bhavataḥ suto'jñānādeva kṛtavān | itaḥparamīdṛśamanucitaṃ na kuryāt | ādyo'yamasyāparādho marṣaṇīyaḥ' iti vijñāpayāmāsa | tato rājā tadvacanamanurudhya svaputraṃ visasarja | brāhmaṇo'pi yathāgatamagāt ” iti | itthaṃ kathāṃ kathayitvā vetālo rājānamapṛcchat — ' anayorbrāhmaṇabhūpālayoḥ kataro guṇādhikaḥ ?' iti | rājā ' bhūpāla eva guṇādhikaḥ' iti pratyabravīt | tacchrutvā vetālo maunabhaṅgo jāta iti nivṛtya śamītaruṃ jagāma rājāpi punastatra gatvā taṃ skandhe samāropya yāvadājagāma tāvadvetālaḥ punarapyekāṃ kathāṃ kathayāmāsa | avasāne ca rājñā maunabhaṅgaḥ kṛtaḥ | vetālo'pi nivṛtya śamītarumāsasāda | punastatra gatvā rājā taṃ skandhe samāropya yāvadājagāma tāvadvetālaḥ kathāmanyāṃ kathayati sma | itthaṃ sumanoharāḥ pañcaviṃśatiṃ kathāḥ kathayitvā vetālo vikramasya buddhikauśalaṃ kathāgrahaṇavaidagdhyaṃ kṛpārasaudāryādīnguṇāṃśca nirīkṣya paraṃ santuṣṭo vikramamavādīt — “bho rājannayaṃ digambarastvāṃ hantuṃ prayatate | yadā tvaṃ māṃ tatra neṣyasi tadā sa tvamevaṃ vadiṣyati — 'rājannatiśrānto'si | tadimamagnikuṇḍaṃ pradakṣiṇīkṛtya daṇḍavatpraṇamya nijasthānaṃ gaccha' iti | tataḥ praṇāmāya namraṃ bhavantaṃ prahṛtya tāvakena māṃsena homaṃ kṛtvā pūrṇāhutiṃ ca vidhāya tatra home māṃ brahmaṇaṃ kṛtvānte svānuṣṭhitaṃ karma brahmārpaṇaṃ kariṣyati | evaṃ kriyamāṇe'sya ### [8.4-2.p1.2](https://indike.org/pramana/in.lit.short_stories.vikramarkacaritra.8.4-2.p1.2) digambarasyāṇimādayo'ṣṭa siddhayo bhaviṣyanti | ato yadā sa digambaro namaskartuṃ tvāmādiśati tadā tvam 'ahaṃ sārvabhaumaḥ | sarve rājāno māṃ praṇamanti mayā tu na kadāpi praṇāmaḥ kṛtaḥ | ato'haṃ praṇantuṃ na jāne | prathamaṃ tvameva praṇāmamanuṣṭhāya darśaya' iti brūhi | tataḥ sa yadā praṇāmāya namro bhaviṣyati tadā tvaṃ tasya śiraśchinddhi | ahaṃ tatra brahmā bhūtvā havanaṃ pūrayiṣyāmi tena ca tavāṣṭa mahāsiddhayo vaśaṃvadā bhaviṣyanti ” | iti | evaṃ vetālena bodhito vikramastathaiva kṛtavān | tato vetālaḥ svayaṃ havanaṃ nirvartya digambarasya śiraḥ pūrṇāhutiṃ kṛtvā sarvaṃ brahmārpaṇaṃ vidhāyāṇimādīraṣṭa mahāsiddhī rājasātkṛtvā jagāda — ‘vikramamahīpāla tavāhaṃ prasanno'smi varaṃ vṛṇīṣva’ iti | rājāpi ‘yadi mama prasanno jāto'si tarhīmaṃ digambaraṃ samuddhara | yadā cāhaṃ tvāṃ smariṣyāmi tadā tvaṃ saṃnidhātumarhasi’ iti prārthayata | vetālo'pi tatheti pratijñāya digambaraṃ samuddhṛtya nijaniveśaṃ viveśa | vikramo'pi tasmai digambarāya tā aṣṭa mahāsiddhīrdattvā svanagaraṃ viveśa ” | iti sāḷabhañjikākathitāṃ kathāṃ śrutvā bhojastāmāha — ‘satyamāha bhavatī | nāhaṃ vikramasārvabhaumasya śatatamīmapi kalāmarhāmi | vṛthaivāyamudyamo mayā bahuvāramakāri’ iti | evamuktvā mlānavadano nijajanma garhayanyathāgataṃ nivṛvṛte ityekatriṃśamupākhyānam atha dvātriṃśamupākhyānam bhūyo'pi bhojabhūpālaṃ jñātvāpi vikramamahimānaṃ tadīyasiṃhāsanamāroḍhuṃ samāgate kāpi pāñcālikā nivārya jagāda — hanta, kathamiyaṃ te durāśā ### [8.4-2.p1.3](https://indike.org/pramana/in.lit.short_stories.vikramarkacaritra.8.4-2.p1.3) nivṛttakāmo gato'pi punarāgato'si | adyāpi samākarṇaya tadīyadivyaguṇān — tasya vikramasya sadṛśaṃ kamapi bhūmaṇḍale na paśyāmi | yaḥ kāṣṭhamayakhaṅgena sarvānnṛpatīnvijitya niḥsapatnaṃ rājyaṃ kṛtavān | yaḥ pareṣāṃ śakaṃ nirākṛtyātmaśakaṃ pravartayāmāsa | yaḥ samastāndurjaṇānnigṛhītavān , yācakalokadurgatiṃ ca parihṛtavān | avagrahādikaṃ ca nirasitavān | etādṛśasyāparimeyamahimasamalaṃkṛtasya vikramasārvabhaumasya sadṛśaḥ puruṣaḥ ko'pi nāstyeveti samābhiprāyaḥ | yadi tvaṃ tādṛśaguṇamātmānaṃ jānāsi tarhi kāmamasminbhadrāsane samupaviśa’ iti | tacchrutvā rājāvanatamukhastūṣṇīmavatasthe iti dvātriṃśamupākhyānam atrāntare kācana putrikā apābhrārcitrāpitamiva sthitaṃ bhojamavādīt — ‘bho bhojabhūpa bhavānapi vikramārkapratīkāśa ityevaṃ manye | ato yuvāṃ dvāvapi naranārāyaṇātmadhāriṇau | idānīṃ tvattaḥ paraḥ pavitracaritraḥ sakalaka‌lāpravīṇaḥ śauryaudāryādiguṇabhūṣaṇo rājā ko'pi nāsti | adhunā tava prasādādasmākaṃ dvātriṃśataḥ putrikāṇāṃ pāpaparihāro jātaḥ | śāpācca vimuktāḥ smaḥ’ iti | anantaraṃ bhojaḥ ‘kathaṃ vaḥ śāpo jātaḥ ?’ iti putrikāmapṛcchata | sāpyevaṃ kathayāmāsa — ‘rājanvayaṃ dvātriṃśatsurāṅganāḥ pārvatyāḥ sakhyaḥ | tasyāḥ paramapremāspadabhūtāḥ | asmākaṃ pratyekaṃ nāmadheyāni śrūyantām — sukeśī, prabhāvatī, suprabhā, indrasenā, anaṅgajayā, indumatī, ### [8.4-2.p1.4](https://indike.org/pramana/in.lit.short_stories.vikramarkacaritra.8.4-2.p1.4) kuraṅganayanā, lāvaṇyavatī, kāmakārikā, candrikā, vidyādharī, prabodhavatī, nirupamā, harimadhyā, madanasundarī, vilāsarasikā, manmathajīvanī, ratilīlā, madanavatī, citrarekhā, suratagahvarā, priyadarśanī, kāmonmādinī, candrarekhā, haṃsaprabodhā, kāmaśaronmādinī, sukhasāgarā, madanamohinī, candramukhī, lāvaṇyalaharī, marālagamanā, jaganmohinī, iti | vayamekadā kutrāpi rajatācalaśilātale samupaviṣṭāḥ kimapi kimapi saṃlapantyaḥ sukhamāsma | tadā parameśvaraḥ sānando'smāsvanurāgaramaṇīyāṃ dṛṣṭiṃ nyaveśayat | atrāntare taṃ dṛṣṭvā devī pārvatī sakopāsmānevamaśapat — ‘bhoḥ sakhyaḥ, bhavatyo nirjīvāḥ putrikā bhūtvā vāsavāsiṃhmāsane tiṣṭhantu’ iti tato'smābhiḥ praṇipatya śāpāvasānaṃ yācitā devī kṛpārasārdrāntaḥkaraṇāsmānevamavadat — ‘kaliyuge vikramādityastatsiṃhāsanaṃ vāsavāllokādbhūlokaṃ nītvā tatropaviṣṭo bahūni varṣāṇi rājyaṃ pālayiṣyati | tasmiṃśca paralokaṃ gate tatsacivāstatsiṃhāsanaṃ kutrāpi pavitre kṣetre niveśayiṣyanti | tataḥ katipayairdivasaistadbhojarājahastagataṃ bhaviṣyati | bhojo'pi tannagaraṃ nītvā pratiṣṭhāpya tadāroḍhuṃ samāgamiṣyati | tadā ca vikramasya caritraṃ tasmai kathayitvā śāpādvimuktā bhaviṣyatha' iti | ato bahoḥ kālādbhavantaṃ pratīkṣamāṇānāmasmākamadya bhavadanugraheṇa śāpādvimocanamāsīt | idānīṃ tvayi vayaṃ prasannāḥ smaḥ | varaṃ vṛṇīṣva' iti | anantaraṃ bhojaḥ ‘mama kiṃ nāmāpekṣaṇīyam ? saṃpūrṇakāmo'smi | tathāpi paropakārārthamidaṃ mayā prārthyate — 'ye martyā ### [8.4-2.p1.5](https://indike.org/pramana/in.lit.short_stories.vikramarkacaritra.8.4-2.p1.5) etaccaritraṃ śṛṇvanti likhanti vā teṣāṃ prauḍhapratāpakīrttidhairyādāryādiguṇāḥ pravardhantām | etaccaritramākalpamavicchinnaṃ mahīmaṇḍale vartatām | śrotṝṇāṃ bhūtapretapiśācaḍhākinīśākinīmārikāyakṣarākṣasādibhyo bhayaṃ manāgapi mā bhūt vyāghrabhallūkapramukhaśarārunikarādapi bhītirmā jāyatām' iti | evaṃ prārthitāḥ sālabhañjikāḥ ‘yathābhilaṣitamastu' iti rājñe varaṃ dattvā sarvā api parigṛhītasurasundarīvigrahā divamutpetuḥ | tato bhojarājastatsiṃhāsanaṃ navaratnakhacite hāṭakamaye vicitre prāsādasya śikhare saṃsthāpya tadupari parameśvaraṃ nidhāya devaṃ siṃhāsanaṃ ca pratidinamarcayansukhena mahīṃ suciraṃ śaśāsa ## Linked texts (1) - [Southern recension](https://indike.org/pramana/in.lit.short_stories.simhasana*southern.31.12) — Sanskrit --- Source: [https://indike.org/pramana/in.lit.short_stories.vikramarkacaritra.8.4-2](https://indike.org/pramana/in.lit.short_stories.vikramarkacaritra.8.4-2) · Pramāṇa