Bhaishajyaratnavali 7: atha dugdhaprakaraṇam

Bhaiṣajyaratnāvalī (ed. Rājeśvaradatta Śāstrī) 7

Language: Sanskrit

atha dugdhaprakaraṇam

7.1402

jīrṇajvare kṣīrapānamjīrṇajvare kaphe kṣīṇe kṣīraṃ syādamṛtopamam
tadeva taruṇe pītaṃ viṣavaddhanti mānavam

7.1403

caturgunenāmbhasā ca śṛtaṃ jvaraharaṃ payaḥ
dhāroṣṇaṃ vā payaḥ śītaṃ pītaṃ sadyo jvaraṃ jayet

7.1404

jīrṇajvarāṇāṃ sarveṣāṃ payaḥ praśamanaṃ param
peyaṃ taduṣṇaṃ śītaṃ vā yathāsvamauṣadhaiḥ śṛtam

7.1405

pañcamūlīpayaḥ -
kāsācchvāsācchiraḥ śūlātpārśvaśūlāccirajvarāt
mucyate jvaritaḥ pītvā pañcamūlīśṛtaṃ payaḥ

7.1406

dravyādaṣṭaguṇaṃ kṣīraṃ kṣīrāttoyaṃ caturguṇam
kṣīrāvaśeṣaḥ kartavyaḥ kṣīrapāke tvayaṃ vidhiḥ

7.1407

trikaṇṭakavalāṃvyāghrīguḍanāgarasādhitam
varcomūtravibandhaghnaṃ śothajvaraharaṃ param

7.1408

vṛścīrabilvavarṣābhūpayaścodakameva ca
pacet kṣīrāvaśiṣṭantu taddhi sarvajvarāpaham

7.1404-2

śītaṃ koṣṇaṃ jvare kṣīraṃ yathāsvamauṣadhaiḥ śṛtam
eraṇḍamūlasiddhaṃ vā jvare saparikarttike

7.1410

sūkṣmailā tathā pathyā kaṇā'yo vyoma kharparam
samāṃśaṃ tu grahītavyaṃ pāradasta dvabhāgikaḥ

7.1411

droṇapuṣpīrasairnaitat sarvamekatra mardayet
raktidvayamitā mātrā syācchothaghnīrasānvitā

7.1412

plīhāyakṛcchothavahnimandatā'rocakāni ca
viṣamajvaro viśeṣeṇa dāruṇo nāsikājvaraḥ

7.1413

āhakārirasasyāsya prayogeṇa yathāvidhi
vilayaṃ tvarayā yānti nātra kāryā vicāraṇā

7.1414

dūrvāpathyādāḍimapuṣkarajātai rasairnūnam
svāduphalāmalakījasvarasopetairidaṃ nasyam

7.1415

prātaḥ kāle tridinaṃ sevitamāhakarujaṃ hanyād
iti bahuvāraṃ bhiṣajāṃ vandyairanubhūya saṃproktam

7.1416

dūrvā śleṣmātakaphalaṃ kulatthaḥ pitṛbhojanaḥ
veṇupatrī jalodbhūtasthalajau karṇamoraṭau

7.1417

apāmārgastathā daṇḍotpalāmūlaṃ bhiṣagvaraḥ
kalkametatsamudgṛhya militaṃ dviśarāvakam

7.1418

arddhaprasthamite taile prasthadvayamite jale
vipācayettailatulyaṃ tatkaṣāyaṃ ca buddhimān

7.1419

dūrvādyatailenānena nūnaṃ nasyaprayogataḥ
avaśyaṃ tvaritaṃ naśyedāhakāhvaya āmayaḥ

7.1420

jvarāmayagṛhītasya muṣṭibhirnavabhiḥ kṛtam
taṇḍulairodanaṃ tena kuryātputtalakaṃ śubham

7.1421

taṃ haridrā'valiptāṅgaṃ catuḥpītadhvajānvitam
haridrārasapūrṇābhiḥ puṭikābhiścatasṛbhiḥ

7.1422

maṇḍitaṃ gandhapuṣpādyairavakīrya visarjayet
evaṃ dinatrayaṃ kuryājjvararogopaśāntaye

svastyastu vastutaḥ svāhā oṃ kaṃ taṃ paṃ śaṃ bainateyāya
namaḥ | oṃ hrīṃ kṣaḥ kṣetrapālāya namaḥ | oṃ ṭha ṭha o so
jvara śṛṇu śṛṇu hala hala garja garja paikāhikaṃ dvayāhikaṃ tryāhikaṃ cāturthikaṃ sāptāhikam arddhamāsikaṃ naimeṣikaṃ mauhūrttikaṃ phaṭ phaṭ hūṃ phaṭ phaṭ halahala muñca
muñca bhūmyāṃ gaccha svāhā | iti paṭhitvā ekavṛkṣe
śmaśāne catuṣpathe vā visarjayet | etat karma vāstudeśasya pavitre dakṣiṇe pradeśe vidadhyāt ||1420-1422
atha nakṣatrajanmaphalamkṛttikāyāṃ yadā vyādhirutpanno bhavati svayam
navarātraṃ bhavetpīḍā trirātraṃ rohiṇīṣu ca

7.1424

mṛgaśīrṣe saptarātramārdrāyāṃ mucyate'subhiḥ
punarvasau tathā puṣye saptarātreṇa mocanam

7.1425

navarātraṃ tathāśleṣe śmaśānāntaṃ maghāsu ca
dvau māsau pūrvaphālgunyāmuttarāsa tripañcakam

7.1426

haste ca saptame mokṣaścitrāyāmarddhamāsakam
māsadvayaṃ tathā svātyāṃ viśākhe dinaviṃśatiḥ

7.1427

maitre caiva daśāhāni jyeṣṭhāyāmarddhamāsakam
mūlena jāyate mokṣaḥ pūrvāṣāḍhe tripañcakam

7.1428

uttare dinaviṃśatyā dvau māsau śravaṇe tathā
dhaniṣṭhāyāmarddhamāso vāruṇe ca daśāhakam

7.1426-2

pūrvabhādrapade devi ! ūnaviṃśativāsaram
tripañcañcāhirbudhne ca revatyāṃ daśarātrikam

7.1430

ahorātraṃ tathā'śvinyāṃ bharaṇyāntu gatāyuṣaḥ
evaṃ krameṇa jānīyānnakṣatreṣu yathocitam

7.1431

jvaramuktalakṣaṇānisvedo laghutvaṃ śirasaḥ kaṇḍūḥ pāko mukhasya ca
kṣavathuścānnalipsā ca jvaramuktasya lakṣaṇam

7.1432

anyaccadeho laghurvyapagataklamamohatāpaḥ
pāko mukhe karaṇasauṣṭhavamavyathatvam
svedaḥ kṣavaḥ prakṛtigāmimano'nnalipsā
kaṇḍūśca mūrdhni vigatajvaralakṣaṇāni

7.1433

jvaramuktāvasthāyāṃ varjanīyānivyāyāmañca vyavāyañca snānaṃ caṅkramaṇāni ca
jvaramukto na seveta yāvanno balavān bhavet

7.1442

pathyāpathyavidhiḥ
navajvare'pathyamsnānaṃ virekaṃ surataṃ kaṣāyaṃ vyāyāmamabhyañjanamahi nidrām
dugdhaṃ ghṛtaṃ vaidalamāmiṣaṃ ca takraṃ surāsvādugurūdravaṃ ca
annaṃ pravātaṃ śramaṇaṃ ruṣāṃ ca tyajetprayatnāttaruṇajvarārttaḥ
madhyajvare pathyampurātanāḥ ṣaṣṭikaśālayaśca vārttākuśobhāñjanakāravellam
vetrāgramāṣāḍhaphalaṃ paṭolaṃ karkoṭa kaṃ mūlakapūtike ca
mudgairmasūraiścaṇakaiḥ kulatthairmakuṣṭhakairvā vihitaśca yūṣaḥ
pāṭhā'mṛtāvāstukataṃḍulīyaṃjīvaṃtikāśāmi ca kākamācī
drākṣākapitthāni ca dāḍimāni vaikaṅkatānyeva pacelimāni
laghūni sātmyāni ca bheṣajāni pathyānimadhyajvariṇāmamūni
purātanajvare pathyamvirecanaṃ charddanamañjanaṃ ca nasyaṃ ca dhūmo'pyanuvāsanaṃ ca
śirāvyadhaḥ saṃśamanaṃ pradeho'bhyaṅgo'vagāhaḥśiśiropacāra.
eṇaḥkuliṅgo hariṇo mayūro lāvaḥ śaśastaittirikukkuṭau ca
krauñcaḥ kuraṅgaḥ pṛṣataścakoraḥ kapiñjalo varttakakālapucchau
gavāmajāyāśca payo ghṛtaṃ ca harītakī parvatanirjharāmbhaḥ
eraṇḍatailaṃ sitacandanaṃ ca dravyāṇi sarvāṇi purerītāni
jyotsnāpriyāliṅganamapyayaṃ syādgaṇaḥ purāṇajvariṇāṃ hitāya
jvare'pathyamadhivāsanakarmāṇi raktasragvastradhāraṇam
vamivegaṃ dantakāṣṭhamasātmyamatibhojanam

Linked texts (9)

Cakradatta (Cikitsāsaṅgraha) — Cakrapāṇidatta, Sanskrit
Agnipurāṇa (Nag Publishers edition, Delhi) — Sanskrit
Carakasaṃhitā — Agniveśa (Āyurveda) & Caraka, Sanskrit
Siddhayoga (Vṛndamādhava) — Vṛnda, Sanskrit
Aṣṭāṅgahṛdayasaṃhitā — Vāgbhaṭa, Sanskrit
Pathyāpathyaviniścaya (Viśvanātha) — Viśvanātha, Sanskrit
Jvaratimirabhāskara (Cāmuṇḍa Kāyastha) — Cāmuṇḍa Kāyastha 1598, Sanskrit
Cikitsāsārasaṅgraha (Vaṅgasena) — Vaṅgasena, Sanskrit
Basavarājīya — Nīlakaṇṭhakoṭṭūru Basavarāja 1500, Sanskrit