Rasaratnakara 2.2
Rasaratnākara 2.2
- Language
- Sanskrit
2.2.1
RRĀ, 2, 2
dharmajñaiḥ śivavatsalair nirjarair bhūpair mahāsādhakaiḥ samyagdivyarasāyanena satataṃ kalpāntasīmāvadhi /
rakṣyaṃ gātram anantapuṇyanicaye muktiś ca yasmād bhavet tad vakṣye paramādbhutaṃ sukhakaraṃ sāmrājyadaṃ dhīmatām //
2.2.2
abhrakaṃ bhakṣayed ādau māritaṃ cāmṛtīkṛtam /
māsaikaṃ niṣkaniṣkaṃ vai kṣetrīkaraṇahetave //
2.2.3
yasmād abhraṃ rasakṣetraṃ tataḥ kuryād rasāyanam /
akṣetrīkaraṇe sūto hy amṛto viṣatāṃ vrajet //
2.2.4
phalasiddhiḥ kutas tasya subījasyoṣare yathā /
vajrapāradayor bhasma samabhāgaṃ prakalpayet //
2.2.5
sūtapādaṃ mṛtaṃ svarṇaṃ sarvaṃ mardyaṃ dināvadhi /
haṃsapādyā dravair eva tadgolaṃ cāndhitaṃ puṭet //
2.2.6
arkakṣīraiḥ punar mardyaṃ tadvad gajapuṭe pacet /
bhakṣayet sarṣapavṛddhaṃ yāvan māṣaṃ vivardhayet //
2.2.7
śaraṇyaḥ sādhakānāṃ tu raso 'yaṃ vajrapañjaraḥ /
citrakārdrakasindhūtthamṛtatīkṣṇasuvarcalam //
2.2.8
samaṃ sarvaṃ sadā cānu bhakṣyaṃ syāt krāmaṇe hitam /
māsaṣaṭkaprayogeṇa jīved ācandratārakam //
2.2.9
valīpalitanirmukto divyakāyo mahābalaḥ /
mṛtasūtād dvādaśāṃśaṃ mṛtaṃ vajraṃ prakalpayet //
2.2.10
dvābhyāṃ tulyaṃ mṛtaṃ kāntaṃ kāntatulyaṃ mṛtābhrakam /
tat sarvaṃ bhṛṅgajair drāvair marditaṃ bhāvayet tryaham //
2.2.11
tryahaṃ gokṣurakadrāvaiḥ kṣaudrair māṣaṃ tato lihet /
raso vajreśvaro nāma vajrakāyakaro nṛṇām //
2.2.12
caturmāsair jarāṃ hanti jīved brahmadinaṃ kila /
bhṛṅgarājasya pañcāṅgaṃ cūrṇayet triphalāsamam //
2.2.13
palaikaṃ madhunā lehyaṃ krāmakaṃ paramaṃ rase /
vajrasūtābhrahemnāṃ tu bhasma śuddhaṃ tu mākṣikam //
2.2.14
tulyaṃ saptadinaṃ mardyaṃ divyauṣadhirasair dṛḍham /
ruddhvā taṃ tridinaṃ pacyād vālukāyantragaṃ punaḥ //
2.2.15
uddhṛtya tridinaṃ bhāvyaṃ bhṛṅgasarpākṣijair dravaiḥ /
māṣaikaṃ madhusarpirbhyāṃ vajradhārārasaṃ lihet //
2.2.16
māsaṣaṭkaprayogeṇa rudratulyo bhaven naraḥ /
valīpalitanirmukto vāyuvego mahābalaḥ //
2.2.17
punarnavābhṛṅgatilavājigandhāḥ samāṃśakāḥ /
sarvatulyā sitā yojyā cūrṇitaṃ bhakṣayet palam //
2.2.18
suvarṇaṃ pāradaṃ kāntaṃ mṛtaṃ sarvaṃ samaṃ bhavet /
śatāvaryāḥ śiphādrāvair bhāvayed divasatrayam //
2.2.19
tridinaṃ triphalākvāthair bhṛṅgadrāvair dinatrayam /
bhāvitaṃ madhusarpirbhyāṃ bhakṣayed bhairavaṃ rasam //
2.2.20
māṣaikaikaṃ varṣamātraṃ jīvec candrārkatārakam /
mūlacūrṇaṃ śatāvaryāḥ kṛṣṇājapayasā yutam //
2.2.21
palaikaikaṃ pibec cānu krāmakaṃ paramaṃ hitam /
rasabhasma samaṃ gandhaṃ śilājatvamlavetasam //
2.2.22
yāmaikaṃ mardayet sarvaṃ madhusarpiryutaṃ lihet /
niṣkaikaikaṃ varṣamātraṃ śilāvīro mahārasaḥ //
2.2.23
jarākālaṃ nihanty āśu jīved varṣaśatatrayam /
palārdhaṃ musalīcūrṇaṃ bhṛṅgarājarasaiḥ pibet //
2.2.24
dhātrīphalarasair vātha krāmakaṃ hy anupānakam /
meghanādadravair mardyaṃ śuddhasūtaṃ dinatrayam //
2.2.25
viḍaṅgaṃ dviniśaṃ vyoṣaṃ samaṃ cūrṇaṃ prakalpayet /
āragvadhasya mūlaṃ tu cūrṇasya dviguṇaṃ bhavet //
2.2.26
cūrṇasya dviguṇaṃ cājyaṃ kṣaudraṃ caiva caturguṇam /
sarvaṃ pūrvarase kṣiptvā mṛdvagnau cālayat pacet //
2.2.27
tatpiṇḍaṃ karṣam ekaikaṃ bhakṣayed amṛtārṇavaḥ /
varṣamātrāñ jarāṃ hanti jīved varṣaśatatrayam //
2.2.28
vākucīcūrṇakarṣaikaṃ dhātrīphalarasaiḥ pibet /
pāradād dviguṇaṃ gandhaṃ śuddhaṃ sarvaṃ vimardayet //
2.2.29
muṇḍyārdrakarasaiḥ khalve trisaptāhaṃ punaḥ punaḥ /
etat tulyaṃ śuddhatāmraṃ sampuṭe tan nirodhayet //
2.2.30
veṣṭayed vastrakhaṇḍena vajramṛttikayā bahiḥ /
liptvā viśoṣayet taṃ vai samyag gajapuṭe pacet //
2.2.31
uddhṛtya sampuṭaṃ cūrṇyaṃ devadālyā dravais tryaham /
bhaṅgīpunarnavādrāvaiḥ pṛthagbhāvyaṃ tryahaṃ tryaham //
2.2.32
tattulyaṃ nāgarāc cūrṇaṃ kṣiptvā madhvājyasaṃyutam /
lihen māṣadvayaṃ nityaṃ yāvat saṃvatsarāvadhi //
2.2.33
raso 'yam udayādityo jarāmṛtyuharaḥ paraḥ /
punarnavādevadālībhṛṅgacūrṇaṃ samaṃ samam //
2.2.34
madhvājyābhyāṃ lihet karṣam anu syāt krāmaṇaṃ param /
pārado gaganaṃ kāntaṃ tīkṣṇaṃ ca māritaṃ samam //
2.2.35
bhṛṅgadhātrīphaladrāvaiś chāyāyāṃ bhāvayet tryaham /
sitāmadhvājyakais tulyaṃ sarvaṃ bhāṇḍe nirodhayet //
2.2.36
dhānyarāśau sthitaṃ māsaṃ tato niṣkatrayaṃ samam /
bhakṣayec ca pibet kṣīraṃ karṣaikaṃ triphalām anu //
2.2.37
rātrau śuṇṭhīṃ kaṇāṃ khāded varṣaikād amaro bhavet /
jīved brahmadinaṃ vīraḥ syād raso gaganeśvaraḥ //
2.2.38
vaṭakṣīrais tryahaṃ mardyaṃ gandhaṃ śuddharasaṃ samam /
vaṭakāṣṭhāgninā pacyān mṛtpātre yāmapañcakam //
2.2.39
kṣipan kṣipan vaṭakṣīraṃ tatkāṣṭhenaiva cālayet /
samuddhṛtya tryahaṃ bhāvyaṃ devadālīdaladravaiḥ //
2.2.40
uṣṇakāle tu guñjaikaṃ tāmbūlapatrasaṃyutam /
candravṛddhyā sadā bhakṣyaṃ yāvat ṣoḍaśaguñjakam //
2.2.41
cūrṇam uttaravāruṇyā vākucyā devadālijam /
madhvājyābhyāṃ lihet karṣaṃ krāmakaṃ hy anupānakam //
2.2.42
varṣamātrāj jarāṃ hanti jīved varṣaśatatrayam /
raso vaṭeśvaro nāma vajrakāyakaro nṛṇām //
2.2.43
mṛtaṃ sūtaṃ śuddhagandhaṃ triphalāṃ gugguluṃ samam /
sarvaṃ vātāritailena miśraṃ karṣaṃ lihet sadā //
2.2.44
ṣaṇmāsena jarāṃ hanti jīved brahmadinatrayam /
tasya mūtrapurīṣeṇa śulbaṃ bhavati kāñcanam //
2.2.45
ajasya vṛṣaṇaṃ pācyaṃ gavāṃ kṣīreṇa taṃ niśi /
sitāyuktaṃ pibec cānu raso 'yam acaleśvaraḥ //
2.2.46
rasaṃ vajraṃ svarṇakānte muṇḍaṃ ca māritaṃ samam /
mākṣikaṃ gandhakaṃ śuddhaṃ sarvaṃ jambīrajair dravaiḥ //
2.2.47
saptāhaṃ mardayet khalve tadgolaṃ cāndhitaṃ puṭet /
bhūdhare dinam ekaṃ tu khyātaḥ siddharasaḥ paraḥ //
2.2.48
māṣaikaṃ madhunā lehyaṃ varṣān mṛtyujarāpaham /
divyakāyo naraḥ siddho bhaved viṣṇuparākramaḥ //
2.2.49
śvetapaunarnavaṃ mūlaṃ kṣīrapiṣṭaṃ sadā pibet /
bhakṣayed vā sitā sārdhaṃ krāmakaṃ parame rase //
2.2.50
mṛtasūtasya dviguṇaṃ śuddhaṃ gandhaṃ vimiśrayet /
dinaikaṃ kanyakādrāvair mardayitvā nirodhayet //
2.2.51
dinaikaṃ madhunā pacyān niṣkaikaṃ madhunā lihet /
gandhāmṛto raso nāma vatsarān mṛtyujid bhavet //
2.2.52
samūlaṃ bhṛṅgarājaṃ tu chāyāśuṣkaṃ vicūrṇayet /
tatsamaṃ triphalācūrṇaṃ sarvatulyā sitā bhavet //
2.2.53
ekīkṛtya palaikaikaṃ bhakṣayed anupānakam /
pāradābhraṃ mṛtaṃ tulyaṃ dvābhyāṃ tulyaṃ tu gandhakam //
2.2.54
tat sarvaṃ bhṛṅgajair drāvair mardayed dinasaptakam /
ṣaḍvāraṃ cāṅkulītailair bhāvayitvātha bhakṣayet //
2.2.55
māṣamātraṃ tu varṣaikaṃ raso 'yaṃ kālakaṇṭakaḥ /
piṣṭvā karañjapatrāṇi gavāṃ kṣīraiḥ pibed anu //
2.2.56
jarāmṛtyuvinirmukto jīved brahmadinaṃ naraḥ /
mṛtasūtābhrakaṃ kāntaṃ viṣaṃ tāpyaṃ śilājatu //
2.2.57
tulyāṃśaṃ madhusarpirbhyāṃ lihed guñjātrayaṃ sadā /
ṣaṇmāsena jarāṃ hanti jīved brahmadinaṃ naraḥ //
2.2.58
aśvagandhāmūlacūrṇaṃ saptabhāgaghṛtaiḥ samam /
bhāgāṣṭakaṃ guḍaṃ tasmin kṣiped bhāgaṃ ca pippalīm //
2.2.59
mṛdvagninā ca tat sarvaṃ piṇḍitaṃ bhakṣayet palam /
krāmakaṃ hy amṛteśasya rasarājasya siddhaye //
2.2.60
triguṇaṃ śuddhasūtasya yojayec chuddhagandhakam /
lohaparpaṭikācūrṇaṃ sūtatulyaṃ vinikṣipet //
2.2.61
snuhyarkapayasā mardyaṃ tat sarvaṃ divasatrayam /
tac chuṣkaṃ cāndhitaṃ pacyāt karīṣāgnau divāniśam //
2.2.62
tataś ca ṭaṅkaṇaṃ kācaṃ dattvā ruddhvā dhamed dṛḍham /
guñjaikaṃ madhunā khāded rasavīro mahārasaḥ //
2.2.63
abdaikena jarāṃ hanti jīved ācandratārakam /
musalīmūlacūrṇaṃ tu guñjāpatradravaiḥ pibet //
2.2.64
chāgīmūtreṇa vā taṃ vai karṣaikaṃ krāmakaṃ param /
mṛtasūtasamaṃ gandhaṃ kākamācyā dravair dinam //
2.2.65
marditaṃ cāndhitaṃ pacyāt karīṣāgnau divāniśam /
divyauṣadhadaladrāvair dinaṃ mardyaṃ tam andhayet //
2.2.66
dhmātaṃ tasmāt samuddhṛtya tattulyaṃ hāṭakaṃ mṛtam /
ekīkṛtya ghṛtair lehyaṃ māṣaikaṃ vatsarāvadhi //
2.2.67
jarāṃ mṛtyuṃ nihanty āśu satyaṃ kāñcāyano rasaḥ /
kākamācīdravair bhāvyaṃ cūrṇaṃ dhātrīphalodbhavam //
2.2.68
madhunā bhakṣayet karṣam anu syāt krāmakaṃ param /
mṛtasūtābhrakaṃ gandhaṃ tulyaṃ saptadināvadhi //
2.2.69
śigrumūladravair mardyaṃ tadgolaṃ bhāṇḍamadhyagam /
ruddhvā pacyāl laghutvena śākakāṣṭhair dināvadhi //
2.2.70
parānando raso nāma ghṛtair niṣkaṃ sadā lihet /
dinaikaṃ triphalākvāthaiḥ kuṣṭhaṃ samyag vipācayet //
2.2.71
tac chuṣkaṃ cūrṇitaṃ karṣaṃ madhvājyābhyāṃ lihed anu /
saṃvatsaraprayogeṇa jīved ācandratārakam //
2.2.72
mṛtasūtābhrakaṃ tulyaṃ mṛtalohaṃ tayoḥ samam /
lohāṃśaṃ śodhitaṃ gandhaṃ bhāvayed dinasaptakam //
2.2.73
tat sarvaṃ triphalākvāthair bhṛṅgaśigrukacitrakaiḥ /
dravaiḥ pṛthak pṛthag bhāvyaṃ saptadhā saptadhā kramāt //
2.2.74
saptadhā kaṭukīkvāthair bhāvitaṃ cūrṇayet punaḥ /
cūrṇatulyaṃ kaṇācūrṇaṃ purātanaguḍaiḥ samaiḥ //
2.2.75
sarvamekīkṛtaṃ khāden niṣkaikaṃ vatsarāvadhi /
mahākālo raso nāma jarākālabhayaṃkaraḥ //
2.2.76
tilakoraṇṭapattrāṇi guḍena bhakṣayedanu /
mṛtapāradasaṃtulyaṃ lohaparpaṭakaṃ bhavet //
2.2.77
triguṇaṃ gandhakaṃ sūtātsarvaṃ divyauṣadhadravaiḥ /
marditaṃ taddinaṃ ruddhvā dhmāto baddho bhavedrasaḥ //
2.2.78
tasmin pādaṃ mṛtaṃ svarṇaṃ kṣiptvā vahnyārdrakadravaiḥ /
mardyaṃ yāmaṃ vicūrṇyātha vyoṣajīrakasaindhavaiḥ //
2.2.79
tulyaṃ pūrvarasaṃ tulyaṃ niṣkaikaikaṃ ca bhakṣayet /
jarāmṛtyuṃ nihantyāśu hemaparpaṭako rasaḥ //
2.2.80
aśvagandhāsamāṃ yaṣṭiṃ dhātrīphalarasairdinam /
bhāvitāṃ lehayetkṣaudraiḥ palaikāṃ krāmakaṃ param //
2.2.81
svarṇatārārkakāntaṃ ca tīkṣṇaṃ vā māritaṃ samam /
kṛṣṇābhrasattvamākṣīkaṃ pratyekaṃ svarṇatulyakam //
2.2.82
tatsarvaṃ cāndhitaṃ dhāmyaṃ tatkhoṭaṃ mṛtapāradam /
samaṃ sūtānmṛtaṃ vajraṃ pādāṃśaṃ tatra yojayet //
2.2.83
sarvaṃ jambīrajairdrāvaistaptakhalve vimardayet /
dinaikaṃ taṃ nirudhyātha bhūdhare pāvayed dinam //
2.2.84
uddhṛtya gandhakaṃ tulyaṃ dattvā ruddhvā dhamed drutam /
taccūrṇaṃ madhunājyena māṣamātraṃ lihetsadā //
2.2.85
rasaḥ śrīkaṇṭhanāmāyaṃ khecaratvaṃ prayacchati /
saṃvatsaraprayogena jīvetkalpāntameva ca //
2.2.86
tasya mūtrapurīṣābhyāṃ sarvalohāni kāñcanam /
palaikaṃ gandhakaṃ kṣīraiḥ krāmakaṃ cānu pāyayet //
2.2.87
śuddhatāmrasya bhāgaikaṃ dviṣaṭ śuddharasasya ca /
trayaṃ bhūnāgasattvasya bhāgamekatra vārayet //
2.2.88
sarvaṃ mardyaṃ taptakhalve jambīrāṇāṃ dravairdinam /
tatsarvaṃ kacchape yantre kṣiptvā tatraiva gandhakam //
2.2.89
kāsamardarasaiḥ piṣṭaṃ tulyaṃ dattvā nirudhya ca /
yāvaj jīrṇaṃ puṭe pacyād evaṃ ṣaḍguṇagandhakam //
2.2.90
jārayetkramayogena samuddhṛtyātha mardayet /
yāmaṃ jambīrajairdrāvaistato niścandramabhrakam //
2.2.91
amlavetasasaṃtulyaṃ marditaṃ dāpayedrase /
ṣoḍaśāṃśaṃ taptakhalve caṇakāmlaṃ ca tālakam //
2.2.92
kāsīsaṃ ca daśāṃśena dattvā mardyaṃ dināvadhi /
tatsarvaṃ pakvamūṣāyāṃ kṣiptvā vastreṇa bandhayet //
2.2.93
dolāyantre sāranāle tryahaṃ laghvagninā pacet /
uddhṛtya kṣālayeduṣṇaiḥ kāñjikairjīryate yadi //
2.2.94
ajīrṇaṃ cetpacedyantre kacchapākhye viḍānvitam /
eva punaḥ punarjāryaṃ gaganaṃ sūtatulyakam //
2.2.95
śikhipittapraliptāni svarṇapattrāṇi tasya vai /
catuḥṣaṣṭyaṃśayogena dattvā khalve vimardayet //
2.2.96
svedayetpūrvavadyantre jīrṇe svarṇaṃ ca dāpayet /
ityevaṃ ṣoḍaśāṃśaṃ tu svarṇaṃ jāryaṃ rasasya vai //
2.2.97
tato jāryaṃ mṛtaṃ vajraṃ ṣoḍaśāṃśaṃ ca hemavat /
tālakāsīsajambīrayuktaṃ mardyaṃ ca tatparam //
2.2.98
tato divyauṣadhadrāvaistaṃ sūtaṃ mardayet tryaham /
vajramūṣāndhitaṃ dhāmyaṃ baddhaṃ syāc cūrṇayetpunaḥ //
2.2.99
madhuśarkarayā sārdhaṃ guñjāmātraṃ ca bhakṣayet /
rasaḥ khecarabaddho'yaṃ ṣaṇmāsānmṛtyujidbhavet //
2.2.100
valīpalitanirmukto mahābalaparākramaḥ /
saptāhaṃ bhṛṅgajairdrāvair nīlamuṇḍīphalatrayam //
2.2.101
bhāvayenmadhusarpirbhyāṃ karṣamātraṃ lihedanu /
śuddhasūtaṃ dvidhā gandhaṃ kuryātkhalvena kañjalam //
2.2.102
tayostulyaṃ kāntacūrṇaṃ tīkṣṇaṃ vā muṇḍameva vā /
sarvamekīkṛtaṃ khalve mardayetkanyakādravaiḥ //
2.2.103
dinaikaṃ golakaṃ kṛtvā tāmrapātre niveśayet /
ācchādyairaṇḍapattraistu yāmārdhe'tyuṣṇatāṃ vrajet //
2.2.104
dhānyarāśau nyasettaṃ tu dvidinānte samuddharet /
kanyābhṛṅgīkākamācīmuṇḍīnirguṇḍīcitrakam //
2.2.105
koraṇṭavākucībrāhmīsahadevīpunarnavāḥ /
śālmalīvijayādhūrtā dravaireṣāṃ pṛthakpṛthak //
2.2.106
saptadhā saptadhā bhāvyaṃ saptadhā triphalodbhavaiḥ /
kaṣāyairbhāvitaṃ cūrṇyaṃ jātīphalalavaṃgakam //
2.2.107
trikaṭu triphalā cailā cūrṇayen navakaṃ samam /
taccūrṇaṃ pūrvacūrṇaṃ ca samaṃ kṣaudreṇa karṣakam //
2.2.108
varṣaikaṃ lehayen nityaṃ jarākālapraśāntaye /
svayamagniraso nāma siddhānāṃ sumukhāgataḥ //
2.2.109
tilāśvagandhayoścūrṇaṃ palārdhaṃ madhunā lihet /
nirguṇḍī nīlikā vajrī brahmadaṇḍī tridaṇḍikā //
2.2.110
śatapuṣpā mudgaparṇī śvetārko vānarī jayā /
peṭārīkṛṣṇadhattūravijayākṣīrakandakam //
2.2.111
etaiḥ samastairvyastairvā dravyairmardyaṃ dinatrayam /
śuddhasūtaṃ taptakhalve tatkalkaṃ kṣīrakandake //
2.2.112
vajrakande'thavā ruddhvā tanmajjābhirmṛdā punaḥ /
taṃ kandaṃ vajramūṣāyāṃ ruddhvā laghupuṭe pacet //
2.2.113
punarmardyaṃ punaḥ pācyamityevaṃ saptadhā kramāt /
rasaḥ kakṣapuṭo nāma guñjaikaṃ madhunā lihet //
2.2.114
jīvedbrahmadinaikaṃ tu valīpalitavarjitaḥ /
varṣaikena na saṃdeho rasakāyo bhaven naraḥ //
2.2.115
bhallātabījacūrṇaṃ ca hayagandhāmṛtāghṛtaiḥ /
palaikaṃ bhakṣayec cānu krāmakaṃ paramaṃ hitam //
2.2.116
mṛtasūtābhrakaṃ vajraṃ kāntatārārkahāṭakam /
tīkṣṇaṃ ca tulyatulyāṃśaṃ sarveṣāṃ gandhakaṃ samam //
2.2.117
sarvaṃ pālāśatailena mardayed dinasaptakam /
mahāśaktiraso nāma kṣaudrairmāṣaṃ lihetsadā //
2.2.118
ṣaṇmāsena jarāṃ hanti jīvedbrahmadinatrayam /
vatsarāt saptakalpāni jīvatyeva na saṃśayaḥ //
2.2.119
icchāvegī mahāsiddhaḥ parāśaktisamo bhavet /
tasya mūtrapurīṣābhyāṃ tāmraṃ bhavati kāñcanam //
2.2.120
pālāśabījajaṃ tailaṃ kṣaudrairlehyaṃ palāṣṭakam /
krāmakaṃ hy anupānaṃ syāt samyakchaktyā prakāśitam //
2.2.121
lohitaṃ vātha vā kṛṣṇaṃ vaikrāntaṃ māritaṃ palam /
svarṇacūrṇapalaikaṃ ca dvipalaṃ śuddhapāradam //
2.2.122
bālaraṇḍājamūtrābhyāṃ tatsarvaṃ mardayed dinam /
śarapuṅkhā meṣaśṛṅgī sarpākṣīkaṭutumbikā //
2.2.123
indravāruṇikā caiṣāṃ dravairmardyaṃ dinatrayam /
tadgolaṃ garbhayantre tu ruddhvā pacyād dinatrayam //
2.2.124
tuṣāgninā laghutvena samuddhṛtya vicūrṇayet /
saptadhā bhṛṅgajairdrāvairbhāvitaṃ cūrṇayetpunaḥ //
2.2.125
triphalātryūṣamadhvājyaiḥ samaṃ cūrṇaṃ vimiśrayet /
māṣaikaikaṃ sadā khādedraso'yaṃ nāṭakeśvaraḥ //
2.2.126
sarvarogajarāmṛtyūn vatsarānnāśayatyalam /
divyatejā mahākāyo jīvedācandratārakam //
2.2.127
mūlatvacaṃ brahmavṛkṣācchāyāśuṣkāṃ vicūrṇitām /
piben niṣkadvayāṃ takraiḥ krāmakaṃ paramaṃ śubham //
2.2.128
suśuddhaṃ śvetavaikrāntaṃ saptāhaṃ bhāvyamātape /
amlavetasasampiṣṭaṃ tenaiva drutimāpnuyāt //
2.2.129
etaddrutiṃ śuddhasūtaṃ samaṃ kṣaudrairdinatrayam /
marditaṃ lehayenmāṣaṃ māsādbālo bhaven naraḥ //
2.2.130
vatsarādbrahmatulyaḥ syādraso'yaṃ bālasundaraḥ /
vākucībījakarṣaikaṃ madhvājyābhyāṃ lihedanu //
2.2.131
catuḥpalaṃ śuddhasūtaṃ palaikaṃ mṛtahāṭakam /
palāśakuḍmaladrāvaistattailaiśca dinatrayam //
2.2.132
mardayettaptakhalve tu svarṇatulyaṃ ca gandhakam /
śodhitaṃ nikṣipettasmin pūrvoktairmardayed dinam //
2.2.133
māṣamātrāṃ vaṭīṃ khādedvatsarān mṛtyujidbhavet /
jīvedbrahmadinaṃ vīro raso'yaṃ brahmapañjaraḥ //
2.2.134
vānarīkākatuṇḍyutthabījacūrṇaṃ samaṃ samam /
śālmalītvagdaladrāvair bhāvayed divasatrayam //
2.2.135
tryahaṃ ca bhṛṅgajairdrāvairbhāvitaṃ cūrṇayettataḥ /
purātanaguḍaistulyaṃ karṣaikamanu bhakṣayet //
2.2.136
raktabhūmau tu bhūnāgān grāhayitvā parīkṣayet /
chede niryāti raktaṃ cet tān svīkuryāt prayatnataḥ //
2.2.137
kṛṣṇavarṇāgavājyena samena saha tān pacet /
lohaje cālayan pātre yāvat sindūravarṇakam //
2.2.138
tatsarvaṃ jāyate bhasma tattulyaṃ mṛtapāradam /
madhunāloḍitaṃ sarvaṃ guñjārdhārdhaṃ vivardhayan //
2.2.139
paścādguñjāṃ sadā khādedyāvatsaṃvatsarāvadhi /
śivāmṛto raso nāma jarāmṛtyuharo nṛṇām /
āyur brahmadinaṃ datte śivāmbu pāyayedanu //
2.2.140
evaṃ divyarasāyanaiḥ samucitaiḥ sārātisāraiḥ śubhaiḥ siddhaṃ dehamanekasādhanabalād yeṣāṃ tu dṛṣṭaṃ mayā /
tānārādhya ca teṣu sāramakhilaṃ saṃgṛhya śāstrādapi bhūpānāṃ viduṣāṃ mahāmatimatāṃ proktaṃ hitārthāya vai //
Linked texts (3)
- Rasamañjarī — Śālinātha, Sanskrit
- Rasendracintāmaṇi — Ḍhuṇḍhukanātha, Sanskrit
- Nityanāthatantra — Sanskrit