Kakacandi 19: atha śālmalīkalpaḥ
Kākacaṇḍī 19
- Language
- Sanskrit
atha śālmalīkalpaḥ
19.1
sitāruṇaharitapītavarṇai sā syāccaturvidhā
mūlaṃ saṃpīḍya śālmalyāstrilohapariveṣṭitam
19.2
vaktrāntaragataṃ tat sapādadṛśyakaraṇaṃ dhruvam
tanmūlavatphalaṃ tailaṃ sitayā saha sevitam
19.3
saptāhaṃ tena saṃsiddhaṃ bhavet ṣoḍaśavadvayaḥ
anekanārīramaṇo dīrghajīvī smaropamaḥ
19.4
tadvṛkṣarandhre nikṣipya sarandhrāṃ lohanālikām
yāvat pūryeta lohasya dvāraṃ tatpayasā tataḥ
19.5
vikṛṣyātra vimardyenaṃ dahed gajapuṭāgninā
taṃ miśritarasaṃ vastu maṇḍalaṃ madhunā pivet
19.6
anekakāmarūpī syānnānārūpaṃ prayacchati
adṛśyatvaṃ svayaṃ prāpya devatulyo bhavedayam
19.7
tadrasena drutaṃ tāraṃ kṛṣṇavarṇatvamāpnuyāt
trivāraṃ tadrasāliptaṃ tatpuṣpaṃ samamiśritam
19.8
nīlīrasena netrasthamadṛśyaṃ kurute naram
tatpuṣpabhṛṅgarājābhyāṃ tailamutpalakandajam
19.9
pācayedāyase pātre svakeśaṃ lepayennaraḥ
saptāhāt palitaṃ hanti kapālatalarañjanam
19.10
mūlaṃ ca śvetaśālmalyāḥ kharparaṃ hemamākṣikam
madhunā netrayornyasya kadalīpatraveṣṭanāt
19.11
naṣṭadravyaṃ nidhānaṃ vā bhūgataṃ tena paśyati
tatkṣīramiśratailena palaṃ sūtaṃ sumarditam
19.12
lavaṅgatulayā sārdhaṃ vaṅgaṃ stambhayate dhruvam
sasitaṃ tadbhavaṃ mūlaṃ payasā saha sevitam
19.13
anekanārīramaṇaṃ karoti smarasannibham
tanmūlavājigandhābhyāṃ pūgābhyāṃ vāsasā bhṛśam
19.14
ghṛtena pācitāpūpān ekaviṃśadinaṃ bhajet
navanagabalaḥ śrīmān syādamalkṣāravarjanāt
19.15
pragalbhakāminīvṛndamadanirmathanakṣamaḥ
haritasvarṇaśālmalyāḥ pūrvavattailamāharet
19.16
viliptaṃ rajataṃ tena sādhitaṃ svarṇatāṃ vrajet
ājyena pītaṃ tattailaṃ kārayeddivyadehatām
19.17
tattailaṃ kṣaudrasaṃyuktaṃ sarvarogaharaṃ nṛṇām
mahotpalasugandhī syāt kanakadyutibhāsvaraḥ
19.18
tatpuṣpasvarasaṃ pītvā bālārkakarasaṃnibhaḥ
anekakālajīvī syādamṛtena yathā surāḥ
19.19
ādāyāruṇaśālmalyāstaruṇāṅghribhavaṃ rasam
sitākṣaudrayutaṃ pītvā vindedvajranibhaṃ vapuḥ
19.20
pūrvavattadrasaṃ pītvā kṣaudreṇa ca vibhāvitam
mahāyruvatvaṃ vṛddho'pi svayaṃ kālena yāti ca
19.21
puṣyarkṣe madhunā tasya prasūnajanitaṃ rajaḥ
ājyena sevitaṃ kuryād balaṃ tadvatsarāt kramāt
19.22
yaḥ ko'pi sevate nityaṃ śālmalīkalpamuttamam
jarāmaraṇahīnasya dāridryaṃ tasya naśyati
Linked texts (3)
- Kākacaṇḍīśvarakalpatantra — Kākacaṇḍīśvara, Sanskrit
- Rasārṇavakalpa — Sanskrit
- Pāradasaṃhitā (Bābū Nirañjanadāsa) — Bābū Nirañjanadāsa, Sanskrit