Kakacandi 2
Kākacaṇḍī 2
- Language
- Sanskrit
Contents
- 2.23 — 1 part
2.1
oṃ amṛte amṛtaprabhe sarvasiddheśvari amitaprabhe svāhā--iti
mantreṇa satadhābhimantritaṃ kṛtvā yathoktamupayojayet
athoccaṭākalpaḥ
rasāyanaṃ pravakṣyāmi yatsurairapi durlabham
uccaṭetyoṣadhī kācijjāyate pṛthivītale
2.2
vartulaṃ parṇamasyāśca rūpamevaṃ pradṛśyate
ekanālā bhavet sā tu varṇenākṛṣṇanīlikā
2.3
tasyāḥ puṣpaṃ bhaved bhugnaṃ śukatuṇḍasamaprabham
kandaṃ kūrmapratīkāśaṃ tasyā lakṣaṇamīdṛśam
2.4
uparyaruhya tasyā apyantarikṣaṃ nirīkṣayet
devayakṣagaṇāḥ sarve dṛśyante nātra saṃśayaḥ
2.5
rasaśca sravate devi madhuraśca viśeṣataḥ
sādṛśyaṃ sarvalohānāṃ sakṛllepena yāti saḥ
2.6
kāñcanaṃ kurute divyaṃ kṣipraṃ caiva ca vahninā
majjayitvāṅguliṃ tatra lihet taṃ tu sakṛt pumān
2.7
vimānāni ca sarvāṇi tatra patrasthitā narāḥ
paśyanti nātra sandeha oṣadhyāstu prabhāvataḥ
2.8
pradyumnasadṛśaṃ rūpaṃ nāgāyutaparākramaḥ
kāntyā candrasamaḥ prājño vegena pavanopamaḥ
2.9
medhāvī sarvaśāstrajño balīpalitavarjitaḥ
mārkaṇḍa iva dīrghāyuḥ satyaṃ saubhāgyavān bhavet
2.10
atha vai patrapuṣpāṇi phalamūlaṃ tathaiva ca
sūkṣmacūrṇaṃ prakurvīta prativāraṃ ca dāpayet 1
2.11
chede dāhe kaṣaṇe ca hemībhavati niścitam
śūlapatrāṇi lepena vedhayennātra saṃśayaḥ
2.12
kāñcanaṃ kurute divyaṃ tribhirdoṣairvivarjitam
athaitadoṣadhisthānaṃ kathayāmi samāsataḥ
2.13
kuberanagara ramye śaṅkhatīrthe tathaiva ca
himālaye girau ramye tathā jālandhare girau
2.14
savye vindhye mahānāge naranārāyaṇācale
candrakāntagirau vāpi hemapuṣṭe ca susthale
2.15
eṣu sthāneṣu vijñeyā hyoṣadhī surapūjitā
vijayā nāma vikhyātā triṣu lokeṣu sundarī
2.16
āyuṣyaṃ sādhakendrasya dadāti surapūjitā
kāntajīrṇaṃ rasaṃ kṛtvā hemajīrṇaṃ tayā yutam
2.17
uccaṭāyā rasaṃ dattvā rasakarṣaṃ vimardayet
piven madhughṛtairyuktaṃ nidrā bhavati tatkṣaṇāt
2.18
upayukte tataścūrṇe tadyogācca jagatyasau
māsaikainaiva deveśi saṃśayān sarvatastyajet
2.19
svayaṃ nigṛhyate siddhiḥ sūryatejassamaprabhaḥ
trāsayecca jagatsarvaṃ sayakṣoragarākṣasam
2.20
amarānapi nirjitya balena kuliśādhipaḥ
hatvā vidyādharān sarvān ye cānye jayakāṅkṣiṇaḥ
2.21
svayameva bhavedindraḥ kalpasyāsya prabhāvataḥ
athavā seṭakaṃ sūtāccaturthāṃśaṃ nidhāya ca
2.22
uccaṭāyā rasaṃ dattvā mardayet pāṇimadhyataḥ
mardite ravitāpena raso divyauṣadhībalāt
2.23
bhinatti sarvalohāṃśca lakṣāṃśena varānane
athavā tāṃ kṣipedvaktre so'dṛśyo bhavati kṣaṇāt
2.23.p1
vrajecca kinnaraṃ lokaṃ tatrādau jāyate nṛpaḥ
Linked texts (2)
- Kākacaṇḍīśvarakalpatantra — Kākacaṇḍīśvara, Sanskrit
- Rasārṇavakalpa — Sanskrit