Kakacandi 20: atha kākajaṅghākalpaḥ

Kākacaṇḍī 20

kākajaṅghāṃ samūlāgrāṃ puṣye samyak samuddharet
chāyāśuṣkāṃ tataḥ kuryāc ślakṣṇacūrṇaṃ samācaret

sitātṛṇapuṅkhāmūlena saghṛtaṃ tadrajo bhajet
ṣaṇmāsasevanāt karṣerastraśastranivāraṇam

kuryādvajrasamaṃ dehaṃ troṭanaṃ śastrasaṃhateḥ
kṣīreṇa pītaṃ taccūrṇaṃ vajrakāyaṃ karoti ca

maṇḍalaṃ sevate yastu vṛddho'pi taruṇāyate
dadhyānnena taccūrṇaṃ bhuktaṃ śastranivāraṇam

yāvadviṇmūtrayoḥ stambho na syāttāvacca bhujyatām
kakārādigaṇāṃstyaktvā tāvadanyāṃśca bhakṣayet

taccūrṇamīśvarīmūlayutaṃ goghṛtaveṣṭitam
pādalepena divyaḥ syāddinenaikena mānavaḥ

so'yaṃ vajraśarīrī syād dṛṣṭaḥ siddha ivāparaḥ
vraṇaṃ hantīśvarīmūlaṃ kākajaṅghārasaiḥ plutam

patrāṇi kākajaṅghāyā gomūtreṇa vimardayet
upayuñjyādāsyaroge suguṇastvaritaṃ bhavet

mūlaṃ ca kākajaṅghāyā bhṛṅgamāmalakīrasam
tilatailena vipacet tailaṃ lepe praśasyate

abhyaṅgena vinaśyecca khalvāṭapalitādikam
utpāṭya kākajaṅghāyā mūlaṃ meṣāsṛji kṣipet

tataḥ saṃmardya tattena rudhireṇa vilepayet
sūtramekaṃ ca tenaiva kārayed bandhanaṃ kare

jvarāt pramucyate kṣipraṃ pumān yāti sukhaṃ bhṛśam
mūlamuṣṇodakaiḥ pītaṃ stambhayedvīryamañjasā
tadevājyena pītaṃ sannāśayedudarāmayān

śītodakena madhunā pītaṃ chardiṃ nihanti ca
pītaṃ kṣīreṇa rudhisrāvaṃ stambhayati dhruvam

baddhaṃ karṇe tu tanmūlamakṣirogānapohayet
vaśīkaroti sarvāṃśca rocanātilakena ca

madhunā hiṅgalaiścāpi pītaṃ plīhodaraṃ haret
kaṭutailena tatpītaṃ pittaṃ vātaṃ ca nāśayet

guḍenoṣṇodakenāpi śleṣmāṇaṃ vinivārayet
tat pītaṃ guḍatakrābhyāṃ mūtrakṛcchramapohayet

mahiṣopayasā pītaṃ kṣayaṃ hanti na saṃśayaḥ
mūlaṃ tadekavarṇāyā goḥ pītaṃ payasā saha

ṛtusnātā hi vandhyāpi putraṃ sūte vadhūstathā
hemnā saha dhṛtaṃ haste śastrastambhaṃ karoti ca

dhṛtaṃ śirasi pīḍānāṃ śāntiṃ ca kurute sadā
bhallātakena tanmūlaṃ bhuktaṃ kuṣṭhān vināśayet

patrāṇi tasya piṣṭvā ca saptāhaṃ lepayecchiraḥ
punaḥ punaśca khalvāṭaḥ keśapūrṇaśirā bhavet

Linked texts (1)