Kakacandi 23: atha nirguṇḍīkalpaḥ
Kākacaṇḍī 23
- Language
- Sanskrit
atha nirguṇḍīkalpaḥ
23.1
śṛṇu devi pravakṣyāmi cauṣadhiṃ paramādbhutām
dhanadhānyakarīṃ devi āyurārogyavardhanīm
23.2
śāntipuṣṭikarīṃ devi sākṣāddevasvarūpiṇī
nirguṇḍīti samākhyātā sarvalokasukhāvahā
23.3
tasyāhaṃ sampravakṣyāmi prayogaṃ śṛṇu sundari !
nirguṇḍīmūlamuddhṛtya puṣyārke śobhane dine
23.4
nirguṇḍomūlacūrṇaṃ tu gavāṃ sarpiḥ palāṣṭakam
ghṛtaṃ caiva tathā kṣaudraṃ ṣoḍaśaṃ kṣīrakaṃ tathā
23.5
snigdhabhāṇḍe samāloḍya dhānyarāśau nidhāpayet
pūrṇe māse taduddhṛtya sudine puṣyasaṃyute
23.6
biḍālapadamātraṃ tu māsamātraṃ pradāpayet
valīpalitanirmukto jīvedvarṣaśatatrayam
23.7
nirguṇḍīmūlamādāya yo'jāmūtreṇa saṃpibet
nakhadantaṃ ca keśāśca saptarātrāt patanti hi
23.8
māsamātraprayogeṇa nāgninā dahyate naraḥ
tasya mūtrapurīṣeṇa śulvaṃ bhavati kāñcanam
23.9
nirguṇḍīmūlamādāya tilatailena bhakṣayet
aṣṭādaśavidhān kuṣṭhān nāśayedekamāsataḥ
23.10
nirguṇḍīmūlamādāya ghṛtena saha yaḥ pibet
māsamātraprayogeṇa sa syādākāśago dhruvam
23.11
puṣyarkṣe grāhayet prātarnirguṇḍīmūlajāṃ tvacam
śuṣkāṃ kṛtvā vicūrṇyātha karṣaṃ karṣaṃ bhajet sadā
23.12
ajāmūtrapralepena ṣaṇmāsādamaro bhavet
varṣamātraprayogeṇa śivatulyo bhavennaraḥ
23.13
ardhavarṣamidaṃ cājyairlihet syāt pūrvavatphalam
taccūrṇaṃ triphalā muṇḍī bhṛṅgo nimbaguḍūcike
23.14
vacā imāḥ samā kṛtvā madhvājyābhyāṃ lihet palam
guḍena tu vipācyaitat pītaṃ samyagvirekakṛt
23.15
niryānti kṛmayastasya mukhādapi gudādapi
rājayakṣmādirogāṃśca saptāhena vināśayet
23.16
māsatraye jarāṃ hanti jīvedvarṣaśatatrayam
nirguṇḍīmūlamādāya chāyāśuṣkaṃ vicūrṇayet
23.17
saptāhaṃ gojale bhuktaṃ hanti sarvān gadānapi
aṣṭādaśapalaṃ caitaccūrṇaṃ dvādaśa sarpiṣaḥ
23.18
madhunaḥ ṣoḍaśapalamekīkṛtya vidhānataḥ
saṃsthāpayeddhānyarāśau māsāddhvaṃ samuddharet
23.19
samabhyarcya guruṃ devaṃ pūjayecca vidhānataḥ
brāhmaṇāṃśca kumārīśca bhojayet paṇḍitānapi
23.20
gṛhītvā vijane deśe śucirbhūtvā samāhitaḥ
biḍālapadamātraṃ tu bhojayenniyato naraḥ
23.21
ahanyahani bhoktavyaṃ māsamekaṃ nirantaram
tato māse vyatikrānte so'yaṃ bhavati sundaraḥ
23.22
pīvaraskandhagātraśca bhavet kuliśasannibhaḥ
valīpalitanirmukto dīrghajīvī bhavennaraḥ
23.23
bhavatyevākṣayaṃ reto rantuṃ syāt strīśataṃ kṣamaḥ
prakāmaṃ bhojanaṃ tasya bhaved bhoktavyamanvaham
23.24
vikārā manasaḥ śāmyantyakṣayaḥ sa ca vardhate
yaḥ prasthacūrṇaṃ nirguṇḍyā gomūtreṇa pibennaraḥ
23.25
dasarātraprayogeṇa kuṣṭhānyaṣṭādaśāpi ca
nāśayecca mahādevi ! vāyurmeghamivāmbaram
23.26
ajāmūtreṇa nirguṇḍyāścūrṇamevaṃ ca yo bhajet
nakhāḥ keśāśca dantāśca saptāhānnipatanti hi
23.27
dvisaptāhaprayogeṇa jāyante te punarnavāḥ
na cāgninā dahyate'sau na jale mriyate'pi ca
23.28
taddehasparśanāllohaḥ svarṇaṃ bhavati tatkṣaṇāt
catussaptāhayogena siddhirākāśagāminī
23.29
nirguṇḍīcūrṇamādāya ghṛtena saha saṃpibet
kṛṣṇavarṇo naro yastu svarṇatejāḥ sa jāyate
23.30
nirguṇḍīcūrṇamādāya pibed gopayasā pumān
saptarātraprayogeṇa syāt kinnarasamadhvaniḥ
23.31
nirguṇḍīcūrṇamādāya pibecchiśiravāriṇā
saptarātraprayogeṇa balavīryaṃ pravardhate
23.32
catussaptāhayogena vardhate teja uttamam
nirguṇḍīmūlamuddhṛtya gṛhe saṃsthāpayed budhaḥ
23.33
naśyanti sarvavighnāśca gṛhe nāgāśca sarvadā
atha nirguṇḍībhakṣaṇamantraḥ- oṃ hrīṃ huṃ phaṭ svāhā | anenāṣṭottaraśataṃ japet
oṃ namo nānārūpāya śāntapāpāya kuberāya svāhā | iti mantreṇa
saptavāramabhimantrya nirguṇḍīṃ bhakṣayet
ṣāṣṭikaṃ ca sagokṣīraṃ muṣṭikaudanabhakṣaṇam
bhūgṛhānte sthitirmāsaparyantaṃ bhakṣayaṃstvidam
Linked texts (4)
- Rasaratnākara — Nityanātha Siddha, Sanskrit
- Rasāyanakhaṇḍa — Nityanātha Siddha, Sanskrit
- Kākacaṇḍīśvarakalpatantra — Kākacaṇḍīśvara, Sanskrit
- Gaurīkāñcalikātantra — Sanskrit