Kakacandi 24

Kākacaṇḍī 24

indravāruṇikāmūlamahorātramupoṣitaḥ
puṣyarkṣe coddharettacca saṃyojya kaṭubhistribhiḥ

ajāmūtreṇa piṣṭvā ca vaṭīṃ kuryād dviguñjikām
chāyāyāṃ śoṣayet samyak tataḥ khāded ghṛtena ca

candanena ca raktena vimardya viliheccanām
yaṃ yaṃ spṛśati sarvo'pi vaśyo'sya sa bhavennaraḥ

guṭikā sā mukhe kṣiptā śukraṃ stambhayati dhruvam
guṭikāṃ caṇakapatrasya rasena parimardayet

ślakṣṇena tena tāmrasya patrāṇi ca vilepayet
tato dadyādgajapuṭaṃ bhasmībhavati tad dhruvam

tāmraṃ tadbhasmasaṃyogāt svarṇatāṃ vrajati kṣaṇāt
indravāruṇikāmūlaṃ puṣyarkṣe ca samuddharet

kālatraye gavāṃ kṣīraiḥ piṣṭvā tadgolakaṃ kṛtam
chāyāśuṣkaṃ ca bhuktvā tat puṣṭimāyāti puruṣaḥ

indravāruṇikāmūlaṃ tryūṣaṇaṃ ca samaṃ haret
piṣṭvā ca dugdhena gavāṃ pūrvavatkārayedvaṭīm

vaktre dhṛtaṃ buddhibalaṃ vīryastambhaṃ karoti ca
indravāruṇikāyāstu phalaṃ saṃgṛhya tatra ca

maricāni vibhidyāntarnikṣipettacca lepayet
kalkenāsyaiva mūlasya śoṣayedātape tataḥ

uṣṇodakena tad bhuktvā samyagrecanamṛcchati
mantraḥ—āṃ namaḥ sarvārthasādhakāya svāhā | oṃ āṃ namaḥ sarvasattvānāṃmarthasādhini huṃ phaṭ svāhā

Linked texts (1)