Pramāṇa · Search · About · API

Kakacandi 29: atha citrakakalpaḥ

Kākacaṇḍī 29

Language
Sanskrit

atha citrakakalpaḥ

29.1

athātaḥ saṃpravakṣyāmi citrakaṃ kalpamuttamam
grāmānte vā śmaśāne vā vālmīke vā catuṣpathe

29.2

gṛhasyātisamīpe vā citrakaṃ parivarjayet
sūcīpatramukhaṃ śreṣṭhaṃ tathā maṇḍalapatrakam

29.3

ubhau tau citrakau grāhyau sūcīmaṇḍalapatrakau
kārtike mārgaśīrṣe vā citrakaṃ coddhared budhaḥ

29.4

tasya svarasakaṃ rātrau hime saṃsthāpya cāharet
dvitrimāsaprayogeṇa dṛḍhakāyo jitendriyaḥ

29.5

citrakaṃ māsamekaṃ tu takreṇa saha yaḥ pibet
naśyanti vyādhayaḥ sarve kāmadevopamo bhavet

29.6

kṣīreṇa māsamekaṃ tu citrakaṃ bhakṣayennaraḥ
vajradeho mahākāyo mahābalaparākramaḥ

29.7

kaṭutrayeṇa saṃyukto ghṛtena madhunāpi vā
citrakaṃ bhakṣayet prājño biḍālapadamātrayā

29.8

ṣaṇmāsayogato yānti valayaḥ palitāni ca
pāṇḍurogamapasmāraṃ jalodarabhagandarau

29.9

kṛcchrau tu mehakuṣṭhau ca hanti vahniṃniṣevitaḥ
citrakaṃ māsamekaṃ tu gomūtreṇa naraḥ pibet

29.10

sarve rogāḥ praśāmyanti kāntiśca nitarāṃ bhavet
citrakaṃ māsamekaṃ tu madhunā saha yaḥ pibet

29.11

medhāvī balasaṃpannastejasvī priyadarśanaḥ
jīvedvarṣaśataṃ so'yaṃ valīpalitavarjitaḥ

29.12

citrakaṃ kṣīramadhunārmuṣṭiñcūrṇojyayorapi
rasāyanamahorātraṃ sthāpayitvā'tha pūjayet

29.13

raktāmbaradharo maunī raktagandhānulepanaḥ
raktamālyānurakto'sau valiṃ dadyādvicakṣaṇaḥ

29.14

kṛṣṇāṣṭamyāṃ caturdaśyāṃ pañcamyāṃ śravaṇarkṣake
candratārābale caiva mantrametajjapennaraḥ

29.15

oṃ caṇḍi citrāya svāhā
anenaiva tu mantreṇa gandhamālyānulepanam
baliṃ dadyāt punarmantrametaduccārayed budhaḥ

29.16

oṃ satyavati mahauṣadhi mā calaḥ | samayamantraḥ-samaya huṃ phaṭa
svāhā
samūlametadutpāṭya chāyāśuṣkaṃ tu kārayet
sūkṣmacūrṇaṃ tataḥ kṛtvā ghṛtena madhunāpi vā

29.17

kaṭutrayasamāyuktaṃ viḍālapadamātrakam
saptāhaṃ bhakṣayet prātaḥ kṣīrasevī jitendriyaḥ

29.18

dīrghamārogyavān jīvedvalīpalitavarjitaḥ
saṃvatsaraprayogeṇa śatamāyuravāpnuyāt

Linked texts (3)