Pramāṇa · Search · About · API

Kakacandi 3: atha nāgadamanaukalpaḥ

Kākacaṇḍī 3

Language
Sanskrit

atha nāgadamanaukalpaḥ

3.1

nāgasya damanī nāmnā vikhyātā bhuvanatraye
lakṣaṇaṃ tasya vakṣyāmi bhadre gotreśasundari

3.2

kṛṣṇanālā bhavet sā tu patraṃ tāmbūlasannibham
pītapuṣpā bhavedevaṃ lakṣaṇairlakṣayennaraḥ

3.3

nāgānāṃ damanī yasmānnāgadamanīti viśrutā
māṅgalyaṃ ca pavitraṃ ca śriyaṃ cāpi dhṛtiṃ smṛtim

3.4

vidyāṃ kīrtiṃ ca medhāṃ ca trailokye ca śrutismṛtīḥ
upabṛṃhayati kṣipraṃ sahasrāyurbhavennaraḥ

3.5

dāridrayaṃ nāśayedāśu saubhāgyaṃ kurute sadā
śāntidā puṣṭidā caiva sarvakarmakarī śubhā

3.6

raṇe rājakule dyūte vyavahāre parājite
oṣadhiṃ śravaṇe kaṇṭhe haste śirasi dhārayet

3.7

bāhubhyāṃ mudrike vāpi kaṇṭhyāṃ vā dhārayecchubhām
vaśīkaroti sarvāṃśca ratipuṣṭivivardhanī

3.8

mṛtyūnāṃ viddhi śamano yatra tiṣṭhati sā gṛhe
nāgnipraveśaṃ tasyaiva jaladhau ca mahāhave

3.9

vyāghrarākṣasasiṃheṣu vivāde śatrusaṅkaṭe
na bhayaṃ vidyate tasya yasya kaṇṭhe sadīśvarī

3.10

śaṅkhacakrāsivadhreṇa nāgapāśavimokṣaṇe
śūladhārāstavāpīyaṃ mokṣayedīśvarī dhṛtā

3.11

īśvarī harate kṣipraṃ viṣaṃ sthāvarajaṅgamam
viṣāṇyupaviṣāṇyevaṃ dṛṣṭvā naśyanti tatkṣaṇāt

3.12

doṣaṃ sā vārśvikaṃ sārpaṃ mocayedviṣamuttamam
apacīgaṇḍamālādipiḍakādivraṇeṣu ca

3.13

rohiṇyāṃ caiva na bhayaṃ yasya kaṇṭhe sadīśvarī
etānyanyāni ṛṣayo jñātvā''san nirbhayā viṣāt

3.14

vātagulmodaraṃ hatvā hṛdrogaṃ ca vināśayet
bhakṣayedvarṣamekaṃ ca ghṛtena madhunā saha

3.15

sarvarogavinirmukto valīpalitavarjitaḥ
jīvedvarṣasahasraṃ tu mahātejā mahābalaḥ

3.16

pañcavarṣaprayogeṇa lakṣāyurjñāyate naraḥ
nabanāgabalo bhūtvā mṛtyumātmecchayā jayet

3.17

sarvavyādhivinirmuktaḥ sarvakarmavivarjitaḥ
madhunā saha saṃyuktaṃ liṅge lepaṃ tu kārayet

3.18

avaśyaṃ sā bhavedvaśyā yāvadyauvanasaṃyutā
ghṛtena saha saṃyuktaṃ bandhyātvaṃ naśyati dhruvam

3.19

nāgaścābhrakasūtau ca grāhyaṃ gṛhṇanti tatkṣaṇāt
mardito vidhivatsūtaḥ sarvalohān bhinatti ca

3.20

nāgavaṅgau samau kṛtvā tatsamaṃ sūtakaṃ kṣipet
śanairyāvad graseyuste nāginyāḥ svarasena tu

3.21

mardayedrasamadhye tu tāvad bhramarasaṃnibham
tatastatṣoḍaśāṃśaṃ tu dīptyaṃ kāñcanavarṇakam

3.22

punarnavārasenaiva lavaṇena tu dāpayet
atha tat saptarātreṇa cābhrakaṃ grāsayet punaḥ

3.23

śirasphoṭirasenevamapāmārgarasena ca
nirguṇḍyāḥ svaraso grāhyaḥ snuhīkṣīraṃ tathaiva ca

3.24

takreṇa lavaṇaṃ caiva yatheṣṭaṃ mardayet punaḥ
īśvarīrasasaṃyuktamabhrakaṃ grāsayet punaḥ

3.25

īśvarīrahitaṃ devi na kiñcit karma sidhyati
na hi kāntābhrakādīni na ca nāgarasāvapi

3.26

rasatattvaṃ prayāntyatra na ca siddhyanti sādhakāḥ
pāradaḥ ṣaḍbalo grāhyaścābhrakāt ṣaḍbalaṃ tathā

3.27

nāginyāśca raso grāhyo hyajāmūtreṇa mardayet
kvāthayedvahninā prājñaḥ khalve piṣvādanantaram

3.28

evaṃ kuryādahorātrād guṭikāṃ tasya sundari
kramādbhāvanayā hyetat sarvalohāṃśca vedhayet

3.29

evaṃ sañcāritaṃ kṛtvā saptāhācchrutavedhikaḥ
saptasaptāhakenāpi lakṣavedhī bhavennaraḥ

3.30

aṣṭame'pi tu saptāhe sparśavedhī bhavennaraḥ
navame saptake prāpte codyotanakaro bhavet

3.31

daśame saptake prāpte sa mahārasa ucyate
mahārase tu samprāpte ko na muñcati bandhanāt

Linked texts (2)