Kakacandi 33: athāmalakīkalpaḥ

Kākacaṇḍī 33

pañcāṅgānāmamalakyāḥ kvāthaṃ maṇḍalamāpibet
aṣṭādaśavidhānāṃ ca kuṣṭhānāṃ praśamo bhavet

āmalakyāḥ samādāya mūlaṃ saṃśodhya cūrṇayet
tanmūlasya tvaco vāpi cūrṇaṃ samyak tathācaret

madhunā copabhuktaṃ sat pradaraṃ nāśayet striyām
taccūrṇaṃ madhunā caiva ghṛtena ca samāharet

audumbaraphalākāramātrayā pratyahaṃ tridhā
māsaiḥ ṣaḍbhirmahākuṣṭhamasādhyaṃ vijayedidam

nakhāḥ keśāśca dantāśca navyāḥ syuḥ punareva ca
tailena saha taccūrṇaṃ vipācyābhyaṅgamācaret
kaṇḍūṃ vicarcikāṃ pāmāṃ maṇḍalaṃ ca praśāmayet

gomūtreṇa ca taccūrṇaṃ nityajvaramapohayet
tadeva ca sitādugdhaiḥ kārayedadhikaṃ balam

punarnavārasairnaitadvātavyādhiṃ vināśayet
kūṣmāṇḍasvarasai naitadudaraṃ ca nivārayet

kvāthena triphalāyāśca raktapittaṃ harettathā
vacayā saha tad bhuktaṃ kuryād balamanuttamam

Linked texts (1)