Kakacandi 47: athairaṇḍakalpaḥ

Kākacaṇḍī 47

eraṇḍakalpastvatyantamuttamaḥ śaṃkaro nṛṇām
caturvidhaśca sa jñeyo raktapītādibhedataḥ

tattailaṃ vāsare bhānogrāhayedvidhivattataḥ
raktairaṇḍakatailena śuddhasūtakagandhakaiḥ

pūrayitvā lohapātraṃ pacenmṛdvagninā bhiṣak
yāmamātreṇa tatsarvaṃ bhaved guñjānibhaṃ dhruvam

tattāranāgatāmreṣu daśāṃśena ca vedhayet
tattailaṃ madhunā yuktaṃ gandhakena samanvitam

bhuvi māsaṃ vinikṣipya tataścoddhṛtya buddhimān
prātarniṣkaṃ tu vilihet tadarthaṃ cāhni niśyapi

taruṇādityasaṃkāśo bhavenmāsaprayogataḥ
śuddhakoṣṭhaḥ prakurvīta guruvandanamāditaḥ

auṣadhaṃ cātha bhuñjīta kṣīrāhāro jitendriyaḥ
māsadvayaprayogeṇa balamāyuśca vindati

kṛṣṇairaṇḍakatailaṃ tu kṛṣṇāgokṣīrasaṃyutam
śuddhakoṣṭhaḥ pibet sadyaḥ karṣadvayamitaṃ kṛśaḥ

brāhmīrasena ca tathā puṣṭiṃ māsena vindati
śvetairaṇḍasya mūlaṃ tu gṛhītvā puṣyatārake

sakarpūraṃ ghṛtaṃ tena sakṣīraṃ ca vipācayet
añjayennetrayugalaṃ naśyantyakṣigatāmayāḥ

siddhāñjanamidaṃ siddhaṃ kāmalāmapi nāśayet
tanmūlaṃ cāpi pāṣāṇaśuddhasūtasamanvitam

śilācandravasāyuktaṃ dhameddhandhākhyamūṣake
śālmalīkhadirāṅgāraiḥ kriyābaddhaṃ bhavatyalam

tad vaṅgeṣu drutaṃ kṣiptaṃ sahasrāṃśena vedhayet
śvetagokṣīrasaṃyuktaṃ tanmūlaṃ niṣkamātrakam

lihedgogṛtamiśraṃ vā kṣīrāśī vijitendriyaḥ
māsaikasya prayogeṇa candravannirmalo bhavet

māsadvayaprayogeṇa balavānnātra saṃśayaḥ
māsatrayaprayogeṇa dīrghamāyuravāpnuyāt

pītairaṇḍasya mūlaṃ tu grāhayedarkavāsare
chāyāśuṣkaṃ tataḥ kṛtvā navanītena peṣayet

trikaṭutriphalāyuktaṃ sitayā madhunānvitam
snigdhabhāṇḍe vinikṣipya śītalāyāṃ bhuvi kṣipet

māsāduddhṛtya tad dravyaṃ lihenniṣkapramāṇataḥ
nivātaśāyī kṣīrāśī tiṣṭhedamlānamānasaḥ

ekamāsaprayogeṇa balī vṛddho'pi jāyate
māsatrayaprayogeṇa dīrghamāyuravāpnuyāt

malagrahaḥ svayaṃ yāti vināśaṃ sarvadehinām
aśītirāmayāścāpi vātajā yānti saṃkṣayam

snigdhapuṣṭasamastāṅgaḥ sukhī saṃdhukṣitānalaḥ
jīvejjīvasamo buddhyā bahukālaṃ naro bhuvi

Linked texts (2)