Kakacandi 49

Kākacaṇḍī 49

brahmadaṇḍīti vikhyātā bhuvi kācinmahauṣadhiḥ
tatra bhedadvayaṃ cāste śvetakṛṣṇāmanā tathā

āśvine kārtike māse grāhayettāṃ mahauṣadhim
yasyā rasaṃ ca saṃgṛhya guggulena vimiśrayet

kuryāllepaṃ śarīre'tha kaṇḍūpāmādayo'pi ca
visarpārūṃṣikādyāśca tvagdoṣā yānti saṃkṣayam

kṛṣṇapakṣe gṛhītā sā bhūtavetālaḍākinīḥ
uccāṭayeddhṛtā haste grahapīḍāṃ tathā haret

mūlaṃ tu brahmadaṇḍyāstu puṣyarkṣe grāhayecchuciḥ
tvacaṃ tasya vicūrṇyātha bhakṣayedbhānuvāsare

tatrānupānaṃ pālāśakvāthamevopayojayet
retaḥ saṃvardhayatyetadrajaḥ strīṇāmapi dhruvam

brahmadaṇḍīṃ kumārīṃ ca gomayena vibhāvayet
tatastadubhayaṃ khalve mṛditvā kalkamāharet

dadhnā'thavā kāñjikena bhoktavyaṃ karṣamātrayā
rajodoṣān śukradoṣānapohyāpatyadaṃ bhavet

bṛhatīṃ brahmadaṇḍīṃ ca samāṃśena samuddharet
aśvagandhā dvayostulyā śrīnekatra vicūrṇayet

navanītena taccūrṇaṃ sevyaṃ niṣkapramāṇataḥ
mahadvīryaṃ striyāścāpi puruṣasyāpi jāyate

kṣīraṃ pravardhate nāryāḥ puṣṭistuṣṭistathā bhavet
mūlaṃ tu brahmadaṇḍyāśca kare sūtreṇa baddhayatām

tṛtīyakaṃ jvaraṃ hanti cāturthikamapi svayam
nirguṇḍyāḥ svarase brahmadaṇḍīmūlarasaṃ kṣipet

dvayostulyaṃ yojayecca dugdhamaudumbaraṃ tathā
prātaḥ pītvā pramehādimūtrarogairvimucyate

tenaiva kriyatāṃ nasyaṃ kṣayaṃ yānti galāmayāḥ
śirorogāśca naśyanti lāghavaṃ śiraso bhavet

Linked texts (1)