Kakacandi 8: atha śailodakakalpaḥ
Kākacaṇḍī 8
- Language
- Sanskrit
Contents
- 8.76 — 1 part
atha śailodakakalpaḥ
8.1
ataḥ paraṃ pravakṣyāmi śailodakavidhiṃ priye
kardamāyomahīśailaiḥ śailodakacaturvidham
8.2
kānicit kṣaṇavedhīni dinavedhīni kānicit
pakṣamāsādiṣaṇmāsavedhakāni mahītale
8.3
kṣiptaṃ yadā bhavet kāṣṭhaṃ śailībhūtaṃ ca dṛśyate
bahirantaśca tadvidha vedhakaṃ tat prakītitam
8.4
hiṅgulaṃ haritālaṃ ca gandhakañca manaḥśilā
rasakarasābhyāṃ vimalaviṣāṇābhyāṃ ca mardayet
8.5
ahorātreṇa caite hi kurvate vedhamuttamam
gandhakaṃ tālakaṃ caiva toyapūrṇe bhaṭe kṣipet
8.6
yadā te ca ghanākāre tadā śailodakaṃ bhavet
anyathā ceṣṭakaṃ devi tadā tat syānnirarthakam
vāsare mānavarte tu kṣaṇavedhi ca tatra tu
8.7
śrīśaile śrīvanaprānte paryaṅkākhye śilātale
tatrasthaṃ kṣaṇavedhi śrīnadyāṃ bhagavatītaṭe
8.8
ekāhavedhakaṃ tatra gokarṇaṃ ca dinatrayam
bhadrānte dinavedhi syādvilānte ca trivāsare
8.9
tāreśvare māsakaṃ syāddarṣārdāyodaye tathā
brahmeśvare māsakaṃ syāt vyāghrapāde'ṣṭavāsare
8.10
aghorākhye māsakaṃ tu siṃhadvīpe tathā punaḥ
dinamekaṃ brahmagirau vindhye tu kṣaṇavedhakam
8.11
vāsarānmālyakarṇe tu kṣaṇavedhi tilodake
kiṣkindhāparvate ramye paṃpātīre kṣaṇādbhavet
8.12
tasya paścātto devi yojanadvitaye punaḥ
bhrūśaile tridinairevaṃ tridinairvedparvate
8.13
siṃhācale pure devyā dattātreyasya sannidhau
śailodakaṃ koṭivedhi durgadeśe'pi vāsarāt
8.14
lakṣavedhi nṛsiṃhasya nagare ca kalāgirau
kalindanadyāḥ pūrve tu yojanadvitaye punaḥ
8.15
tatrāṅgirasakuṇḍe ca kṣaṇavedhi śilodakam
varṣākāle bhavetpītaṃ śītakāle ca lohitam
8.16
uṣṇakāle bhavetkṛṣṇaṃ traividhyaṃ tasya vidyate
anyatra yatra yatrāpi brahmaviṣṇuśivodbhavam
8.17
amṛtaṃ tanna tatrāpi vajrīkaraṇamuttamam
tasyotpattiṃ pravakṣyāmi yathā jānanti sādhakāḥ
8.18
mahīṃ samuddhṛtavato vārāhasya kalevarāt
yaḥ svedaḥ patitastasmājjātaṃ śailodakaṃ param
8.19
tanmukhotthaḥ kṣaṇādvedhī vāsārātkroḍadeśajaḥ
bāhubhyāṃ kṣaṇavedhī syānmāsavedhī catuṣpade
8.20
ṣaṇmāsādaparājaṅge ca sarvaṃ samaphalaṃ bhavet
ahorātreṇa tatkṣetrarakṣāṃ kṛtvā diśāṃ balim
8.21
kṛtvā lakṣaṃ japitvā tu gṛhṇīyādamṛtaṃ param
śaradgrīṣmavasanteṣu hemante vāpi carcitā
8.22
āyase tāmrapātre ca tattailāmbumaye'thavā
śailodakapaḷānyaṣṭau palaṃ kṣīraṃ vinikṣipet
8.23
kṣīrāvaśeṣaṃ saṃkvāthya triḥsaptāhaṃ pibennaraḥ
jīvedvarṣasahasraṃ tu valopalitavarjitaḥ
8.24
kulatthādaṣṭaguṇaṃ vāri pacedaṣṭāvaśeṣataḥ
caturguṇena tenātha pācayecca punarghṛtam
8.25
lihyāt samena madhunā trisaptāhaṃ tamanvaham
dviraṣṭavārṣiko bālaḥ sahasrāyurbhaved dhruvam
8.26
avaśiṣṭaṃ kulatthaṃ tu saṃyojya madhusarpiṣā
bhakṣayedvarṣamekaṃ tu prāpnotyayutajīvitam
8.27
tatsiddhatailenābhyaṅgaṃ bhakṣaṇaṃ caiva kārayet
pāmāṃ vicarcikāṃ dadru kuṣṭhaṃ ca sahasā jayet
8.28
valīpalitanirmuktaḥ sahasrāyurbhavennaraḥ
yaḥ pibet prātarutthāya śailāmbuculakatrayam
8.29
ṣaṇmāsena sahasrāyurvalīpulitavarjitaḥ
athavā sūtakaṃ devi vāriṇā saha mardayet
8.30
māsenekena deveśi naṣṭapiṣṭaṃ bhaviṣyati
māsamātraṃ samaśnīyāt sa bhavedvajarāmaraḥ
8.31
athavā taṃ rasaṃ hemnā pācayet khadirāgninā
guṭikā sundarī nāmnā sarvāmayanivāraṇī
8.32
kartā hartā svayaṃ siddho jīvedācandratārakam
atha tenodakenaitat kṣīrārdhaṃ pāyasaṃ pacet
8.33
māsamātraprayogeṇa valīpalitavarjitaḥ
paktvā tenāmbhasā pathyāṃ ṣaṣṭitriśatasaṅkhyayā
8.34
madhunā bhāṇḍamāpūrya vidhāya ca vidhānakam
dine dine tathaikaikaṃ pratyahaṃ bhakṣayennaraḥ
8.35
valīpalitanirmukto jīvedvarṣasahasrakam
jale kṣiptaistu lauhaiśca śailodbhūtāni bhakṣayet
8.36
kṣīrāhāraṃ ca jīrṇānte vajrakāyo bhavennaraḥ
tenodakena saṃmardya cābhrakaṃ kvāthayet priye
8.37
kaṭutrayayutaṃ khādejjīvedvarṣasahasrakam
athavā rasakarṣaikaṃ tajjalena vimardayet
8.38
iṅgudīphalamadhyasthaṃ tacchailodakamadhyagam
kālena svaguṇairvaśyā kāminī tasya jāyate
8.39
ṣaṇmāsaṃ tanmukhe dhāryaṃ vajrakāyaṃ karoti tam
daśanāgasamaprāṇo devaiḥ saha sa modate
8.40
gṛhītvā triphalāṃ tatra śailavāriṇi nikṣipet
yadā śileva tacca syād gṛhītvā cūrṇayettataḥ
8.41
kāntajīrṇaṃ rasaṃ tena sārdhaṃ rasaghṛtaplutam
bhakṣayedvarṣamekaṃ tu tataḥ kṣīrāśano bhavet
8.42
udayādityasaṅkāśo medhāvī priyadarśanaḥ
nīlakuñcitakeśaśca jīvedācandratārakam
8.43
pāradaṃ haritālaṃ ca śilāṃ mākṣikameva ca
gandhakaṃ ca viṣaṃ caiva sarvamekatra kārayet
8.44
mardayet khalvapāṣāṇe mātuluṅgarasena tu
tena pramarditaṃ śulvaṃ kāñcanaṃ bhavati dhruvam
8.45
upayuñjīta māsaikaṃ valīpalitavarjitaḥ
sahasramāyuṣāṃ jīvenmahābalaparākramaḥ
8.46
śailodbhūtāṃ haridrāṃ ca cūrṇayettasya yogataḥ
hematvaṃ labhate nāgo bālārkasadṛśaprabhaḥ
8.47
śailodake vinikṣipya bhūśaileyakrame'pi vā
jñātvā kālapramāṇene vedhayetpāradaṃ tataḥ
8.48
raktakṣārayutaṃ dhmātaṃ suvarṇena ca māritam
śatāṃśena tu lohānāṃ sarveṣāṃ hemakārakam
8.49
dvitīyasāraṇaṃ prāpya sahastrāṃśena siddhyati
taṃ poḍhā dhārayedvaktre divyatvaṃ labhate dhruvam
8.50
nicule vakule caiva kiṃśuke madhuke'pi ca
iṅgudīphalamadhye ca rajanīdvayamadhyake
8.51
amṛtāsvarase vātha mustākandauṣadheṣu ca
vidhāya choṭakaṃ tatra kṣiptvā tena ca mardayet
8.52
triphalāvyoṣakalkena peṣayitvā prayatnataḥ
pādena kanakaṃ datvā pāradaṃ tatra yojayet
8.53
kṣipecchailāmbumadhyasthaṃ guṭikā vajravadbhavet
pūrvavat sāraṇā kāryā pūrvavat siddhidaṃ bhavet
8.54
mukhe tāṃ ca vidhṛtyātra sahasrāyurbhavecchive !
dvitīyasāraṇāyogājjāyate lakṣavedhikaḥ
8.55
taṃ choṭaṃ (golaṃ) dhārayedvaktre lakṣāyurjāyate naraḥ
caturthasāraṇāṃ prāpya koṭivedhī bhavecca yaḥ
8.56
koṭyāyurrjāyate tasya khecaratvaṃ ca labhyate
pañcame daśakūṭiśca ṣaṣṭhe koṭiśataṃ bhavet
8.57
yāvaccandrārkajīvitvaṃ labhate manujaśca saḥ
dadāti saptame vāpi sāraṇā guṭikā parā
8.48-2
khecarī nāma vikhyātā bhairaveṇa prayojitā
yaḥ ko'pi rājikāmātrāṃ māsamekaṃ tu bhakṣayet
8.59
vajradehasya siddhiḥ syāddivyastrījanavallabhaḥ
kriyayā cānayā sarvaḥ svecchayā śivatāṃ vrajet
8.60
nānāvidhaphalāṃ cānyāṃ guṭikāṃ śṛṇu sundari !
śuddhaṃ vidhāya ca rasaṃ gandhakaṃ tatra jārayet
8.61
triguṇe gandhake jīrṇe tena hema tu kārayet
kārayedbhasma sūtaṃ tu kāñcanaṃ ttattu sūtakam
8.62
bhasmanyatra ca sūtasya śilāṃ sāmyena saṅkṣipet
jīrṇena tena sūtena vajraratnaṃ tu jārayet
8.63
jārayedvajrabhasmaitat sindūrāruṇasannibham
tadbhasma jīryate sūte triguṇe tu surārcite
8.64
hāṭake sā nayetsamyag guṭikāṃ tena kārayet
tathā lohān samāveṣṭya kṛtvosye tāṃ ca sādhakaḥ
8.65
naṣṭakṣayo bhavet so'pi cādṛśyo devadānavaiḥ
lakṣavarṣasahasrāṇi nirbalo balavān bhavet
8.66
śūlinīśaktisaṃyuktā ratnaiśca guṇabhūṣaṇaiḥ
vaktre kare ca vidhṛtā sarvāmaya nivāriṇī
8.67
guṭikā sā varārohe madhuratritāyanvitā
vaktrasthā nāśayet sākṣāt palitaṃ valitaṃ tathā
8.68
śivaśaktiśca deveśi ! rasāśritatayocyate
hema tāraṃ tathā bhānuḥ samabhāgāndvi kārayet
8.69
strīrajo'ntaḥ sthāpayitvā padmasūtreṇa veṣṭayet
siñcecchītodakenaitadyantrasthāne nidhāpayet
8.70
raṇe rājakule dūte divyakāryeṣu yojayet
vaikrāntamabhrakaṃ kānto rasakañca tathāyasam
8.71
vibhītakena saṃyuktaṃ mākṣikaṃ hematulyakam
samāvartya tataḥ sūtaṃ yojayet pādayogataḥ
8.72
kumārīrasasaṃyuktā kṛtā hi guṭikā śubhā
rogānmṛtyuṃ jarāṃ hanti vaktrasthā nātra saṃśayaḥ
8.73
paścatārādvarārohe ! sūtakadvayameva ca
trayo gaganabhāgāḥ syurekaikaṃ hemakāntayoḥ
8.74
ardhaṃ śulbādbidhāyaitadguṭikāṃ kāmasundarīm
bhakṣayedajaraścaiva bhavettena mahābalaḥ
8.75
sūtabhasma palaikaṃ ca mṛtakāntaḥ palonmitaḥ
ekīkṛtya ca tatsarvaṃ madhvājyābhyāṃ tu peṣayet
8.76
guṭikāṃ kārayed devi ! trivāraṃ tadanantaram
ekaikaṃ bhakṣayennityaṃ varṣamekaṃ nirantaram
8.76.p1
jīvedvarṣasahasrāṇi rudratulyo mahābalaḥ
Linked texts (4)
- Rasārṇava — Sanskrit
- Ānandakanda — Sanskrit
- Kākacaṇḍīśvarakalpatantra — Kākacaṇḍīśvara, Sanskrit
- Rasārṇava (Maheśvara) — Maheśvara, Sanskrit