Ashtangahridayasamhita 1.5.23: Sarvāṅgasundarā

1.5.23.1

himavāṃśca malayaśca himavanmalayau, tābhyāmudbhūtāḥ-sañjātāḥ pathyāḥ| kiṃ sarvā eva ? netyāha-upaletyādi| upalānāmāsphālanaṃ-ullālanaṃ, tenākṣepaḥ-kṣobhaḥ, tena vicchedāḥ-viśleṣāḥ, upalāsphālanākṣepavicchedāḥ taiḥ| kheditaṃ-jātakṣobhamudakaṃ yāsāṃ tāḥ kheditodakāḥ, yā himavanmalayodbhūtāstā eva pathyā| yāstvevaṃbhūtā na bhavanti tā apathyāḥ| sthirā iti| tā evā+avahantyaḥ satyaḥ kṛmyādīn kurvate| hṛcca kaṇṭhaśca śiraśca teṣāṃ rogāḥ, kṛmayaśca ślīpadaṃ ca hṛtkaṇṭhaśirorogāśceti dvandvaḥ| munirapi himavatprabhavānāṃ pathyatvamāha| kṛṣṇātreyasuśrutau tvapathyatvamāhatuḥ| ata evāyaṃ granthakāro yuktyā matadvayamapi saṅgiramāṇo viśeṣaṇamupanyastavān- 'upalāsphālanākṣepavicchedai kheditodakā' iti| tena yā evaṃvidhā na bhavanti, tā na pathyā iti|