[Pramāṇa](https://indike.org/pramana/) › [Indian literature](https://indike.org/pramana/in) › [Medicine](https://indike.org/pramana/in.med) › [Early and ascribed compendia](https://indike.org/pramana/in.med.samhita) › [Aṣṭāṅgasaṃgraha](https://indike.org/pramana/in.med.samhita.astangasamgraha) › [Shashilekha](https://indike.org/pramana/in.med.samhita.astangasamgraha!indu) › 156 # Ashtangasamgraha 156: atha pañcacatvāriṃśodhyāyaḥ Śaśilekhā 156 - **Language:** Sanskrit ### atha pañcacatvāriṃśodhyāyaḥ ### [156.p1](https://indike.org/pramana/in.med.samhita.astangasamgraha!indu.156.p1) sāmānyena lūtānāṃ cikitsāvidhānamuktvā yathāpradhānaṃ pratyekaṃ cikitsāṃ pradarśayitumadhyāya ārabhyate | ### [156.4](https://indike.org/pramana/in.med.samhita.astangasamgraha!indu.156.4) kapilākhyayā lūtayā ādaṃśe tāmrā sthirā ca piṭakā bhavenmūrdhagauravāntaṃ ca | atra niśādikaṃ nākulyantaṃ pānādiṣu yojayedathavā kuṣṭhādikaṃ kuṅkumāntam | kakubhorjunaḥ | arkaparṇyarkaḥ | ### [156.7](https://indike.org/pramana/in.med.samhita.astangasamgraha!indu.156.7) agnimukhyākhyayā lūtayā ādaṃśe atiruksphoṭaḥ sambhavati yathāgnidagdhe | agnijvālāsadṛśena ca viṣoṣmaṇā puruṣaḥ prasvidyati | tṛḍādimāṃśca raktapittamatisāryate | tatrāgnimukhyāṃ pratyākhyānaṃ kṛtvā tvarayā pūrvavat kapilāvat pānādikaṃ yojayet | kuṣṭhādikaṃ ca yojayet | śītavīryāṇi candanośīrādīni ca lābhato yathālābham | tālīsādikaṃ ca | ### [156.9](https://indike.org/pramana/in.med.samhita.astangasamgraha!indu.156.9) pītākhyayā lūtayā ādaṃśe sati puruṣaḥ pītavarṇairpiḍādibhirmūrcchādibhiśca yukto bhavati | tatra kaṭabhādikaṃ pānādiṣu yojayet | athavā vanyādikam | kaṭabhā kaṭabhī | joṅgakaṃ kṛṣṇāgaru | ### [156.11](https://indike.org/pramana/in.med.samhita.astangasamgraha!indu.156.11) padmākhyayā ādaṃśe padmābhaḥ sphoṭo bhavati | bhinno'pi san punarabhinno bhavati | sa ca sphoṭa āśu klidyatyuṣṇaṃ ca kledaṃ sravati | sparśe cātirukkaro bhavati tatra padmotpalādikaṃ śarkarāntaṃ pānādiṣu | ### [156.13](https://indike.org/pramana/in.med.samhita.astangasamgraha!indu.156.13) mūtraviṣāyāḥ pūtirdaṃśo bhavati visarpādyanvitaśca | tatra manaśilādikaṃ pānādiṣu bheṣajam | ### [156.15](https://indike.org/pramana/in.med.samhita.astangasamgraha!indu.156.15) śvetākhyayā ādaṃśe śvetā kaṇḍūlā dāhyādikāriṇī ca piṭakā bhavati | tatra śītādikaṃ pānādiṣviṣṭaṃ | śītaṃ candanam | ### [156.16](https://indike.org/pramana/in.med.samhita.astangasamgraha!indu.156.16) kṛṣṇākhyayā ādaṃśaḥ kṛṣṇavarṇaḥ purīṣagandhaḥ kledaśophayuktaśca bhavati | duṣṭaṃ kṛṣṇaṃ cāsṛgutthāpyate virecyate | tatra mahāsugandhādikaṃ bheṣajam | mahāsugandhā rāsnā | vakraṃ tagaram | gandhanākuṃlī (ni) sūkṣmapatrā parā jñeyā sarpākṣī gandhanākulī | ### [156.17](https://indike.org/pramana/in.med.samhita.astangasamgraha!indu.156.17) pāṇḍurayā daṃśaḥ śūno bhavati | vaktraśopho gauravādikaṃ ca | tatra vāruṇapuṣpāṃmūlādi bheṣajam | vāruṇapuṣpā viśālā | ### [156.18](https://indike.org/pramana/in.med.samhita.astangasamgraha!indu.156.18) raktapādākhyayā daṃśa āpāṇḍubhiḥ piṭakābhiryuktaḥ śophavāṃśca bhavati | asrasrucca | tatra naladādikaṃ bheṣajam | naladaṃ māṃsī | sevyamuśīram | udīcyaṃ bālakam | himaṃ candanam | ### [156.19](https://indike.org/pramana/in.med.samhita.astangasamgraha!indu.156.19) bhṛṅgākhyayā daṃśo bhṛṅgābho bhramaravarṇaḥ piṭakā ca dāharukkarī bhavati | gātraṃ ca koṭhaiścīyate | tatrāṅkolasārādikaṃ bhiṣagjitamauṣadhaṃ śastam | phalinī priyaṅguḥ | misiḥ śatapuṣpā | gadaḥ kuṣṭham | aṅkolavṛkṣaḥ prasiddhastasya sāraḥ | ### [156.21](https://indike.org/pramana/in.med.samhita.astangasamgraha!indu.156.21) piṅgākhyayā daṃśo'snigdhāmo bhavati | sphoṭaśca bahusrutistīvraśophādibhiryukto bhavati | tatra sitādikamaṃgadaḥ | ### [156.23](https://indike.org/pramana/in.med.samhita.astangasamgraha!indu.156.23) trimaṇḍalākhyāyā daṃśo bahalo ghano bhavati | kṛṣṇavarṇe ca raktaṃ kṣarati sravati | arucyādikaṃ ca bhavati | asya cāturasya śarīraṃ vividhairnānāvidhairmaṇḍalairupacīyate | tatrārkamūlādikamagadaḥ | ### [156.25](https://indike.org/pramana/in.med.samhita.astangasamgraha!indu.156.25) pūtigandhākhyāyā ādaṃśo visarpādimānalajīsadṛśatvādiyuktaśca bhavati | bhāṅgaryādikaṃ tu pūtigandhāviṣāpaham | ### [156.27](https://indike.org/pramana/in.med.samhita.astangasamgraha!indu.156.27) vīrākhyāyā daṃśaścitrairmaṇḍalairyūkto bhavati | piṭakājālakairāvṛto mūrdharugādibhiryuktaśca | śvapittena piṣṭaṃ haridrādvayādikaṃ tu pānādibhirvīrāviṣāpahaṃ bhavati | ### [156.28](https://indike.org/pramana/in.med.samhita.astangasamgraha!indu.156.28) kumudākhyayā daṃśo dāhādimān picchilakledasrāvī śvāsagalagrahābhyāṃ yuktaśca bhavati | śvāsastamakaśvāsaḥ | atra pratyākhyānaṃ kṛtvā sāmānyoktaṃ pūrvādhyāyavihitaṃ kriyākramaṃ cikitsitaṃ kuryān | ### [156.30](https://indike.org/pramana/in.med.samhita.astangasamgraha!indu.156.30) alaviṣāyā daṃśe pītādiguṇāḥ sarṣapapramāṇāḥ piṭakā bhavanti | tāluśoṣādikaṃ ca | tatra sevyādikaṃ vaṭāṅkurāntaṃ bheṣajam | sevyamuśīram | vaṭāṅkuro vaṭaprarohaḥ | ### [156.31](https://indike.org/pramana/in.med.samhita.astangasamgraha!indu.156.31) raktākhyayā lūtayā daṃśo raktānto bhavati | pāṇḍuvarṇābhiḥ piṭakābhirjvareṇa ca yuktaḥ | atisāraśca śveto bhavati | śvasanādikaṃ ca | atra śleṣmātakatvagādikaṃ sinduvāramūlāntaṃ śastam | sinduvāraḥ prasiddhaḥ | ### [156.33](https://indike.org/pramana/in.med.samhita.astangasamgraha!indu.156.33) citrākhyayā ādaṃśe raktādiguṇā piṭakā bhavati | sā ca svayaṃ bhinnā kṛṣṇatvamabhyeti prāpnoti | pītāsrāvā mahāruṇā ca bhavati | tatra kuṣṭhādikamiṣṭam | ### [156.34](https://indike.org/pramana/in.med.samhita.astangasamgraha!indu.156.34) santānikākhyayā daṃśe śūlādikamākṣepakantaṃ bhavati | pradaraṃ strīyonirajaḥ | ākṣepako vātavyādhiḥ | tatra nāgakesarādikaṃ bheṣajam | mūlaśabdasyāgrādyaśmantakāntaiḥ sambandhaḥ | ### [156.35](https://indike.org/pramana/in.med.samhita.astangasamgraha!indu.156.35) mecakākhyāyāḥ sambadhino daṃśasya madhye jatukaṇopamā piṭakā jvaraḥ śophaśca bhavati | atra vāruṇyādikaṃ bheṣajam | vāruṇīndravāruṇī | ### [156.36](https://indike.org/pramana/in.med.samhita.astangasamgraha!indu.156.36) kasanākhyāyā daṃśo rājīmān śirorugādiyuktaśca bhavati | tatra raktākhyādaṃśoktaṃ bheṣajam | ### [156.37](https://indike.org/pramana/in.med.samhita.astangasamgraha!indu.156.37) kākāṇḍyā daṃśaḥ pāṇḍuraktatvādiguṇo bhavati | smṛtimoṣakṛcca | hidhmādayaśca bhavanti | itaḥ prabhṛtyasādhyatvāccikitsānocyate | ( nidrākṣepaḥ sahṛdgadaḥ iti ca pāṭhaḥ | ) ### [156.38](https://indike.org/pramana/in.med.samhita.astangasamgraha!indu.156.38) eṇapādāyā daṃśaḥ paryanteṣu lohitaḥ kṛṣṇatilākṛtirdāhādimāṃśca bhavati | ### [156.39](https://indike.org/pramana/in.med.samhita.astangasamgraha!indu.156.39) lājavaṇyāṃ daṃśaḥ pūtyādiguṇo bhavati | śītajvaraheturdāhādimāṃśca | ### [156.40](https://indike.org/pramana/in.med.samhita.astangasamgraha!indu.156.40) vaidehyā daṃśa agnidagdhanibhatvādiguṇo bhavati | ### [156.41](https://indike.org/pramana/in.med.samhita.astangasamgraha!indu.156.41) jālinyā daṃśa ūrdhvarājīcitatvādiyukto bhavati | uddīrṇā vṛddhāstṛṣṇādayo yasmin | avadīryate bhidyate | ### [156.43](https://indike.org/pramana/in.med.samhita.astangasamgraha!indu.156.43) mālāguṇāyā daṃśo dhūmagandhatvādiyukto bhavati | syāṃ ca lūtāyāmantardāhādayaḥ prāṇānāmantakāriṇa | ### [156.44](https://indike.org/pramana/in.med.samhita.astangasamgraha!indu.156.44) sauvarṇikākhyāyā daṃśo dhmātatvādiguṇo bhavati | śirorugādikaṃ ca | ### [156.45](https://indike.org/pramana/in.med.samhita.astangasamgraha!indu.156.45) yāsāmasādhyatvāccikitsānoktā tāsāmasādhyānāmapi pratyākhyānaṃ kṛtvā doṣocchrāyaviśeṣavaśena hitaṃ cikitsitaṃ yojayet | chedadāhādikaṃ varjayitvā | yasmin dehadeśe yā lūtā daśati sā kapiletyādinā krameṇa pradarśyate | ### [156.52](https://indike.org/pramana/in.med.samhita.astangasamgraha!indu.156.52) tatra tāsāṃ lūtānāṃ madhye kapilā nāma lṛtā nāsāyāṃ daśati | evamagnirityādi | ityetāni nāsādīni kṣetrāṇi kapilādīnāṃ lūtānāṃ niyatāni | yāstvatyudīrṇaviṣā bhavanti tā lūtāḥ parakṣetrepi vartante yathātivalā rājāna iti | || iti pañcacatvāriṃśodhyāyaḥ || ## Linked texts (1) - [Aṣṭāṅgasaṃgraha](https://indike.org/pramana/in.med.samhita.astangasamgraha.44.91) — Vāgbhaṭa, Sanskrit --- Source: [https://indike.org/pramana/in.med.samhita.astangasamgraha!indu.156](https://indike.org/pramana/in.med.samhita.astangasamgraha!indu.156) · Pramāṇa