Ayurvedadipika (Carakatatparyatika) 1.1.35
Āyurvedadīpikā (Carakatātparyaṭīkā) (ed. Yādavjī Trikamjī Ācārya, 1981 printing) 1.1.35
- Language
- Sanskrit
1.1.35.1
samprati doṣapraśamakāraṇamāha- praśāmyatītyādi| pūrva iti śārīraḥ| doṣagrahaṇena tajjanyā vyādhayo+api gṛhyante, vikṛtadoṣādananyatvādvyādhīnām| daivamadṛṣṭaṃ, tadāśritya yadvyādhipratīkāraṃ karoti taddaivavyapāśrayaṃ balimaṅgalādi; etacca prathamamuktaṃ sadyo+akleśena ca vyādhipraśamakatvāt| yuktiḥ yojanā; śarīrabheṣajayorhito yo yogastadapekṣaṃ saṃśodhanasaṃśamanādi yuktivyapāśrayamucyate| jñānam adhyātmajñānaṃ, vijñānaṃ śāstrajñānaṃ, dhairyam anunnatiścetasaḥ, smṛtiḥ anubhūtārthasmaraṇaṃ, samādhiḥ viṣayebhyo nivartyātmani manaso niyamanam||58||