Ayurvedadipika (Carakatatparyatika) 1.2.4

1.2.4.1

pāṭalāmityādinā+anuvāsanāt prāṅnirūhābhidhānaṃ, nirūhasya doṣaharaṇapradhānatvāt| kattṛṇaṃ gandhatṛṇam| snehāḥ sarpistailavasāmajjānaḥ| lavaṇāni saindhavādīni rogabhiṣagjitīye (vi.a.8) bastyarthaṃ mukhyānyuktāni gaṇena| ata eveti nirūhoktapāṭalādigaṇāt| saṅkalpyamanuvāsanamityanena snehasādhanaṃ brūte; anuvāsanaṃ hi sneha eva bhavati| anuvāsanārthaṃ snehasādhanadravyaṃ pṛthaṅnoktaṃ, nirūhārthoktabheṣajagaṇenaiva tatsiddheḥ| mārutaghnamityanenānuvāsanapravṛttiviṣayaṃ darśayati; mārute hantavye+anuvāsanaṃ prakalpyamityarthaḥ| yadi vā pāṭalādermārutaharādgaṇānmārutaghnamanuvāsanaṃ prakalpyam; anyatra tu pittaharādgaṇāt pittaghnaṃ, tathā śleṣmaharādgaṇācchleṣmaghnamiti sūcayati| saṅgraha ityanena rogabhiṣagjitīye (vi.a.8) kalpe siddhau ca vakṣyamāṇapañcakarmaprapañcaṃ sūcayati||11-14||