Ayurvedadipika (Carakatatparyatika) 1.4.2

1.4.2.1

saṅgraheṇa uddeśamātreṇa| kalpa evopaniṣat kalpopaniṣat; upaniṣadityatyupayuktarahasyavidyopadeśasthānamucyate vede; tadvadihāpi kalpasyātyupayuktatvena rahasyavamanavirecanaprayogopadeśakatvāt kalpa evopaniṣadityucyate| na ca vācyaṃ kalpa eva vistareṇa ṣaḍvirecanaśatānyabhidhāsyante, tena tadevāstu, alamanena saṅkṣepābhidhānena samyagavabodhānupāyatvāt; yatastantradharmo+ayaṃ- yat prathamaṃ sūtraṇaṃ bhavati, tadanu tadvivaraṇaṃ prapañcena; ucyate ca nyāyavidbhiḥ- “te vai viṣayāśca susaṅgṛhītā bhavanti yeṣāṃ samāso vyāsaśca” iti| trayastriṃśatā+adhikaṃ yogaśataṃ trayastriṃśadyogaśatam| kṛtavedhanayogāntā yogā vamanasya, śeṣā virecanasya| atreti śyāmātrivṛtoreva| śyāmeti śyāmamūlā trivṛt, trivṛditi aruṇamūlā trivṛt||4||