Ayurvedadipika (Carakatatparyatika) 6.4.19

6.4.19.1

vakṣyate ityādinā saṃśodhanāni pradhānabheṣajatvāducyante| akṣīṇabalamāṃsasyetyanena sahajā balāhānirucyate, balavata ityanena kālakṛtaṃ balamucyate| kāle saṃśodhanayogye+anatyuṣṇaśītakāle| nirupadravamiti kriyāviśeṣaṇaṃ, kiṃvā raktapittaviśeṣaṇam| virecanenordhvabhāgamityādinā anulomaharaṇaṃ raktapitte niṣedhayati| uktaṃ ca- “pratimārgaṃ ca haraṇaṃ raktapitte vidhīyate” (ni.a.2) iti| raktapitte viśeṣata ityanena raktapittādanyatra kalkādayo+apyeṣāṃ bhavanti| vamanamiti vamanakārako yogo vamanamucyate| madanasya doṣādyapekṣayā karṣādikā mātrā kalpe vakṣyamāṇā jñeyā| saśarkare salile tathekṣurase madanayogādeva vamanakartṛtvaṃ jñeyam| adhovahe ityatrāpi śuddhakoṣṭhasyeti yojyam| na cet syānmāruto balītyanena yadi māruto balī syāttadā māṃsaudana eva deya iti jvaroktaṃ vidhiṃ sūcayati||54-61||