[Pramāṇa](https://indike.org/pramana/) › [Indian literature](https://indike.org/pramana/in) › [Medicine](https://indike.org/pramana/in.med) › [Early and ascribed compendia](https://indike.org/pramana/in.med.samhita) › [Hārīta's Compendium of Medicine](https://indike.org/pramana/in.med.samhita.haritasamhita) › 3.3.1 # Hārīta's Compendium of Medicine 3.3.1: atha tṛtīyasthānam — prathamo'dhyāyaḥ Hārītasaṃhitā 3.3.1 - **Language:** Sanskrit ## Contents - [3.3.1.74](https://indike.org/pramana/in.med.samhita.haritasamhita.3.3.1.74) — 1 part ### atha tṛtīyasthānam — prathamo'dhyāyaḥ ### [3.3.1.1](https://indike.org/pramana/in.med.samhita.haritasamhita.3.3.1.1) ātreya uvāca athātaḥ sampravakṣyāmi rogasaṅkarakāraṇam śramādvyāyāmarodhādvā cintāśokabhayādapi > Ātreya said: / For one ignorant of therapeutics, what is the use of reciting the treatises? / Just as straw devoid of grains is useless, > — English (machine translation) (machine translation) ### [3.3.1.2](https://indike.org/pramana/in.med.samhita.haritasamhita.3.3.1.2) krodhādauṣadhagandhena kṣayādghātorviśeṣataḥ udīrya koṣṭādagniñca raktapittaṃ tathā bahiḥ tvacāśritañca sambhūya jvaraṃ tasmātkaroti hi ### [3.3.1.3](https://indike.org/pramana/in.med.samhita.haritasamhita.3.3.1.3) uktaheturjvaro vāpi jvarānmandajvaro bhavet ### [3.3.1.4](https://indike.org/pramana/in.med.samhita.haritasamhita.3.3.1.4) mandānmandatamo jñeyastasmādamlātisevanāt jāyate kāmalastasmātprarūḍhe syāddhalīmakam ### [3.3.1.5](https://indike.org/pramana/in.med.samhita.haritasamhita.3.3.1.5) halīmakādbhavetpāṇḍustasmādyasmātprakīrttitāḥ yakṣmaṇo jāyate śophaḥ śophādudarameva ca ### [3.3.1.6](https://indike.org/pramana/in.med.samhita.haritasamhita.3.3.1.6) tasmādgulmañca vātādyaṃ gulmācchvāso'thaśūlitā mandāgnitvaṃ bhavettasmātsvarabhedo'tha rodhanaḥ ### [3.3.1.7](https://indike.org/pramana/in.med.samhita.haritasamhita.3.3.1.7) eteṣāṃ sarvarogāṇāmutpattiḥ syājjvareṇa tu jvareṇa mṛtyurvijñeyo na mṛtyuḥ syājjvaraṃ vinā ### [3.3.1.8](https://indike.org/pramana/in.med.samhita.haritasamhita.3.3.1.8) śṛṇu bheṣajarogajña dvitīyaṃ rogasaṅkaram mandajvaro bhavennṝṇāmatīsārastato jvaraḥ ### [3.3.1.9](https://indike.org/pramana/in.med.samhita.haritasamhita.3.3.1.9) tena cāpi bhaveddhikkā śoṣo moho bhramo'ruciḥ eteṣāṃ śophato mṛtyustṛtīyaḥ kathyate'dhunā ### [3.3.1.10](https://indike.org/pramana/in.med.samhita.haritasamhita.3.3.1.10) divāsvapnādidoṣairvā pratiśyāyaśca jāyate tasmātkāsaḥ samuddiṣṭaḥ kāsātpīnasa eva ca ### [3.3.1.11](https://indike.org/pramana/in.med.samhita.haritasamhita.3.3.1.11) tasmātkṣayaḥ kṣayācchopho śophenā'pi mṛtiṃ vrajet jvaraḥ kṣayaśca yakṣmā ca kuṣṭhagulmārśasaṃgrahāḥ ### [3.3.1.12](https://indike.org/pramana/in.med.samhita.haritasamhita.3.3.1.12) śarkarā meha unmāda apasmāro bhagandaraḥ ete mahāghoratarā yāpyaṃ kurvanti mānavam ### [3.3.1.13](https://indike.org/pramana/in.med.samhita.haritasamhita.3.3.1.13) vātapittādayo doṣāstathā ślaiṣmasamudbhavāḥ jāyante vyādhayaḥ sarve teṣāṃ vakṣyāmyupakramam ### [3.3.1.14](https://indike.org/pramana/in.med.samhita.haritasamhita.3.3.1.14) vātaḥ pacati saptāhāttrirātrātpittameva ca śleṣmā sārddhadinenāpi vipacedbhiṣajāṃ vara ### [3.3.1.15](https://indike.org/pramana/in.med.samhita.haritasamhita.3.3.1.15) dvandvajaṃ vātapittañca navarātreṇa pacyate śleṣmavātau daśāhena pañcāhātpittaślaiṣmikam ### [3.3.1.16](https://indike.org/pramana/in.med.samhita.haritasamhita.3.3.1.16) śamanāya ca dvandvānāṃ turyāhātpācanaṃ tathā tridoṣasya ca ghorasya pācanaṃ dvādaśe dine ### [3.3.1.17](https://indike.org/pramana/in.med.samhita.haritasamhita.3.3.1.17) sannipātaśca pacati caturdaśadinairapi jñātvā doṣabalaṃ pakvaṃ tasmāddeyantu pācanam ### [3.3.1.18](https://indike.org/pramana/in.med.samhita.haritasamhita.3.3.1.18) yuktaṃ nidānalakṣaistu tasmātsaṃśamanakriyā saptāhenāpi pacyante saptadhātugatā malāḥ ### [3.3.1.19](https://indike.org/pramana/in.med.samhita.haritasamhita.3.3.1.19) cirādapi hi pacyante sannipātajvare malāḥ virāmaścāpyataḥ prokto jvaraḥ prāyo'ṣṭame'hani na bhavetsaptame'hani virāmajvarakāraṇam ### [3.3.1.20](https://indike.org/pramana/in.med.samhita.haritasamhita.3.3.1.20) vicārya bheṣajaṃ dadmādajīrṇe matimānbhiṣak mando hi sutarāmagnirbheṣajaṃ na vipācayet ### [3.3.1.21](https://indike.org/pramana/in.med.samhita.haritasamhita.3.3.1.21) sarveṣu doṣaśāmeṣu pācanaṃ laṅghanaṃ smṛtam laṅghitaṃ madhyalaṅghitaṃ syādatilaṅghitameva ca ### [3.3.1.22](https://indike.org/pramana/in.med.samhita.haritasamhita.3.3.1.22) lakṣaṇaṃ vakṣyate caiṣāṃ manuṣyāṇāṃ śṛṇuṣva hi ### [3.3.1.23](https://indike.org/pramana/in.med.samhita.haritasamhita.3.3.1.23) gataklamo'rucimlānirindriyāṇāṃ prasannatā laṅghane doṣapākastu śuddhalaṅghitalakṣaṇam ### [3.3.1.24](https://indike.org/pramana/in.med.samhita.haritasamhita.3.3.1.24) kiñcitklamo'ruciglānirindriyāṇāṃ vivarṇatā bahutṛṣṇālpakṣuccāpi śramaścaiva bhiṣagvara ### [3.3.1.25](https://indike.org/pramana/in.med.samhita.haritasamhita.3.3.1.25) kiñcitsaṃsnigdhatā gātre rucibādhātibandhatā madhyapākī ca doṣaḥ syānmadhyalaṅghitalakṣaṇam ### [3.3.1.26](https://indike.org/pramana/in.med.samhita.haritasamhita.3.3.1.26) vaikalyaṃ jāyate tandrā viḍbhedaśca vinidratā vepathuśca śiro'rttiśca kṣutkṣāmaṃ śūlameva ca ### [3.3.1.27](https://indike.org/pramana/in.med.samhita.haritasamhita.3.3.1.27) śyāmāsyaṃ plāvanaṃ netre mūrcchāmohaśramāturam atilaṅghitametaistu lakṣaṇaṃ saṃvibhāvayet ### [3.3.1.28](https://indike.org/pramana/in.med.samhita.haritasamhita.3.3.1.28) velājvare bhūtajvare tathā pittajvare'pi ca āyāse krodhaje vāpi bhayakāmajvare'pi ca ### [3.3.1.29](https://indike.org/pramana/in.med.samhita.haritasamhita.3.3.1.29) eteṣāṃ laṅghanaṃ naiva kārayedbhiṣaguttamaḥ ### [3.3.1.30](https://indike.org/pramana/in.med.samhita.haritasamhita.3.3.1.30) bālaṃ vṛddhaṃ kṛśaṃ kṣīṇamatīsāravraṇāturam gurviṇīṃ sukumārañca laṅghayenna kadācana ### [3.3.1.31](https://indike.org/pramana/in.med.samhita.haritasamhita.3.3.1.31) sāme mandajvare tīvre ruciviḍbandhake'pi ca ajīrṇe tu praśastañca laṅghanaṃ mātrayānvitam ### [3.3.1.32](https://indike.org/pramana/in.med.samhita.haritasamhita.3.3.1.32) snigdhatvañcātigātrāṇāmudaraṃ garjayedbhṛśam śiro'rttirjaṭharādhmānaḥ prataptaṃ kaṇṭhakūjanam ### [3.3.1.33](https://indike.org/pramana/in.med.samhita.haritasamhita.3.3.1.33) aruciḥ pītatā mūtre nidrātandrāturaṃ naram āmajvarañca vijñāya laṅghayedbhiṣaguttamaḥ ### [3.3.1.34](https://indike.org/pramana/in.med.samhita.haritasamhita.3.3.1.34) anaśanavamanavirecanaraktasrutitaptatoyapānaiḥ svedanakarmasahitaiḥ ṣaḍvidhaṃ laṅghanaṃ gaditam ### [3.3.1.35](https://indike.org/pramana/in.med.samhita.haritasamhita.3.3.1.35) kṣutkṣāmaṃ śramaśaithilyaṃ bhramavegajvarāturam antardāhaṃ raktamūtraṃ virāmajvaralakṣaṇam ### [3.3.1.36](https://indike.org/pramana/in.med.samhita.haritasamhita.3.3.1.36) vātiko laṅghanaiḥ ṣaḍbhiḥ paittikastu dinatrayam saptabhiḥ pacate śleṣmā dṛṣṭvā laṅghanamācaret ### [3.3.1.37](https://indike.org/pramana/in.med.samhita.haritasamhita.3.3.1.37) tridoṣo daśarātrāṇi pacate laṅghanaistu saḥ dine pañcadaśe prāpte pacate sānnipātikaḥ ### [3.3.1.38](https://indike.org/pramana/in.med.samhita.haritasamhita.3.3.1.38) muñcedvā āturaṃ hanti bhavedvā viṣamajvaraḥ bālye raktamayā doṣāḥ kaphapittādanantaram ### [3.3.1.39](https://indike.org/pramana/in.med.samhita.haritasamhita.3.3.1.39) ṣoḍaśe tu same prāpte tridoṣaprabhavā gadāḥ pañcaviṃśatime prāpte jvaro vai sānnipātikaḥ ### [3.3.1.40](https://indike.org/pramana/in.med.samhita.haritasamhita.3.3.1.40) vātapittakaphaireva rasaraktasamuccayāt jāyate yo jvaraḥ samyak pakke kvāthaṃ tu dāpayet ### [3.3.1.41](https://indike.org/pramana/in.med.samhita.haritasamhita.3.3.1.41) kvāthaḥ saptavidhaḥ proktaḥ pācanaḥ śamanastathā dīpanaḥ kledanaḥ śoṣī santarpaṇo viśeṣataḥ ### [3.3.1.42](https://indike.org/pramana/in.med.samhita.haritasamhita.3.3.1.42) pācanañca nare deyaṃ niśāsu pravijānatā pūrvāhṇe śamano deyo'parāhṇe dīpanaḥ smṛtaḥ ### [3.3.1.43](https://indike.org/pramana/in.med.samhita.haritasamhita.3.3.1.43) santarpaṇo bhedanaśca kalye pānāya dāpayet śoṣaṇopi prabhāte ca kvāthaḥ pāne prakīrttitaḥ ### [3.3.1.44](https://indike.org/pramana/in.med.samhita.haritasamhita.3.3.1.44) rātrau yaḥ prathamo yāmo bhūtavelā prakīrttitā dvitīyaṃ niśi ityāhurniśīthañca tataḥ param ### [3.3.1.45](https://indike.org/pramana/in.med.samhita.haritasamhita.3.3.1.45) gaṇarātraṃ tato jñeyaṃ kālamaprāptarāśinam pūrvāparāhṇamadhyāhnāḥ parārddhadinaśeṣakāḥ ### [3.3.1.46](https://indike.org/pramana/in.med.samhita.haritasamhita.3.3.1.46) pūrve dināvasāne ca bheṣajānāmupakramaḥ ### [3.3.1.47](https://indike.org/pramana/in.med.samhita.haritasamhita.3.3.1.47) pācano dīpanīyaśca śodhanaḥ śamanastathā tarpaṇaḥ kledanaḥ śoṣī kvāthaḥ saptavidhaḥ smṛtaḥ ### [3.3.1.48](https://indike.org/pramana/in.med.samhita.haritasamhita.3.3.1.48) pācano'rddhāvaśeṣī syācchodhano dvādaśāṃśakaḥ kledanaścaturaṅgaśca śamano'ṣṭāvaśeṣitaḥ ### [3.3.1.49](https://indike.org/pramana/in.med.samhita.haritasamhita.3.3.1.49) dīpanīyo daśāṃśastu tarpaṇaśca samāṃśakaḥ viśoṣī ṣoḍaśāṃśaśca kvāthabhedāḥ prakīrttitāḥ ### [3.3.1.50](https://indike.org/pramana/in.med.samhita.haritasamhita.3.3.1.50) pācanaḥ pacate doṣāndīpano dīpyate'nalam śodhano malaśodhī syācchamanaḥ śamate gadān ### [3.3.1.51](https://indike.org/pramana/in.med.samhita.haritasamhita.3.3.1.51) tarpaṇastarpate dhātūnkledī hṛtkledakārakaḥ viśoṣī śoṣamādhatte tasmātkvāthaṃ parīkṣayet ### [3.3.1.52](https://indike.org/pramana/in.med.samhita.haritasamhita.3.3.1.52) kledī viśoṣī vijñāya vāmanaṃ kārayennaram na laṅghayetkvāthakṛtaṃ nāntarāṇi ca cālayet ### [3.3.1.53](https://indike.org/pramana/in.med.samhita.haritasamhita.3.3.1.53) na śoṣayetpunaḥ sthāpyo nāśucau ca cakāsate sa ca kvātho na śastaḥ syādrogasaṅkarakāraṇam ### [3.3.1.54](https://indike.org/pramana/in.med.samhita.haritasamhita.3.3.1.54) na śoṣayetpunaḥ kvāthaṃ na ca bhūmigataṃ punaḥ doṣasaṃśamanenaite praśastā gadakarmaṇi ### [3.3.1.55](https://indike.org/pramana/in.med.samhita.haritasamhita.3.3.1.55) vidīryate patate'pi sphuṭate kvāthato janaḥ ete'niṣṭakarāḥ kvāthā na doṣaśamanāya ca ### [3.3.1.56](https://indike.org/pramana/in.med.samhita.haritasamhita.3.3.1.56) etairhilakṣaṇairhīnaṃ kvāthaṃ dṛṣṭvā parīkṣayet ### [3.3.1.57](https://indike.org/pramana/in.med.samhita.haritasamhita.3.3.1.57) kṛṣṇaṃ nīlaṃ ghanaṃ raktaṃ picchilaṃ śithilañca yat dagdhaṃ kuṇapagandhañca visragandhaṃ vivarjayet ### [3.3.1.58](https://indike.org/pramana/in.med.samhita.haritasamhita.3.3.1.58) etairasādhyaṃ jānīyādrogiṇaṃ nātra saṃśayaḥ dravyaguṇānuvarṇena dravyagandhaṃ vinirdiśet ### [3.3.1.59](https://indike.org/pramana/in.med.samhita.haritasamhita.3.3.1.59) tadvadviśuddhaṃ sacchāyaṃ kaṣāyamamṛtopamam vātajvare laṅghanānte dattvā cānnaṃ tathopari niśāsu pācanaṃ deyaṃ jñātvā doṣabalābalam ### [3.3.1.60](https://indike.org/pramana/in.med.samhita.haritasamhita.3.3.1.60) trirātre paittike deyaṃ ślaiṣmike prathame'hani avijñāte ca doṣe ca pācanaṃ na pradāpayet ### [3.3.1.61](https://indike.org/pramana/in.med.samhita.haritasamhita.3.3.1.61) saptarātrāddhi maryādā jvareṇaivopalakṣyate tasmānnavajvare pītaṃ doṣakṛnna ca doṣahṛt ### [3.3.1.62](https://indike.org/pramana/in.med.samhita.haritasamhita.3.3.1.62) tasmādādau pradeyantu pācanañca dinatrayam śamanīyaṃ pradeyantu pañcarātraṃ tataḥ param ### [3.3.1.63](https://indike.org/pramana/in.med.samhita.haritasamhita.3.3.1.63) śodhanaṃ dīpanīyantu ekarātraṃ pradāpayet ### [3.3.1.64](https://indike.org/pramana/in.med.samhita.haritasamhita.3.3.1.64) kvāthapāne klamo mūrcchā vaiklavyañca pradṛśyate vamanañca yadā proktaṃ śamanaṃ pathyake'pi vā ### [3.3.1.65](https://indike.org/pramana/in.med.samhita.haritasamhita.3.3.1.65) sadā pathyaṃ prayoktavyaṃ nāpathyena sa sidhyati auṣadhena vinā pathyaiḥ sidhyate bhiṣaguttamaiḥ ### [3.3.1.66](https://indike.org/pramana/in.med.samhita.haritasamhita.3.3.1.66) vinā pathyaṃ na sādhyaḥ syādauṣadhānāṃ śatairapi jvarito hitamaśnīyādyadyapyasyārucirbhavet ### [3.3.1.67](https://indike.org/pramana/in.med.samhita.haritasamhita.3.3.1.67) annakāleṣvabhuñjāno hīyate mriyate'pi vā sa kṣīṇaḥ kṛcchratāṃ yāti yātyasādhyatvameva ca ### [3.3.1.68](https://indike.org/pramana/in.med.samhita.haritasamhita.3.3.1.68) tasmādrakṣedbalaṃ puṃsāṃ balaśāntirhijīvitam laṅghite caiva doṣe ca yavāgūpānamācaret ### [3.3.1.69](https://indike.org/pramana/in.med.samhita.haritasamhita.3.3.1.69) śāliṣaṣṭikamudgañca yūṣaṃ śastaṃ vadanti hi ### [3.3.1.70](https://indike.org/pramana/in.med.samhita.haritasamhita.3.3.1.70) pañcakolakasaṃsiddhā yavāgūrmadhyalaṅghite bhavetpraśastā satataṃ tasya santarpaṇaṃ hitam ### [3.3.1.71](https://indike.org/pramana/in.med.samhita.haritasamhita.3.3.1.71) ājaṃ dugdhaṃ guḍopetaṃ pānāya jvaraśāntaye tena klamavināśaḥ syātsukhamāśu prapadyate ### [3.3.1.72](https://indike.org/pramana/in.med.samhita.haritasamhita.3.3.1.72) udīcyāṃ vā pūrvasyāṃ vā'bhimukhañcopaveśayet pāyayetkvāthapānañca kṛtvā brāhmaṇavācanam ### [3.3.1.73](https://indike.org/pramana/in.med.samhita.haritasamhita.3.3.1.73) pānapātramadhaḥ kṛtvā śayītā jñānameva ca pītvā caiva tṛṣārtto'pi na jalaṃ pāyayetkṣaṇam ### [3.3.1.74](https://indike.org/pramana/in.med.samhita.haritasamhita.3.3.1.74) gataklamaṃ naraṃ dṛṣṭvā tadā sampadyate sukham ### [3.3.1.74.p1](https://indike.org/pramana/in.med.samhita.haritasamhita.3.3.1.74.p1) iti ātreyabhāṣite hārītottare tṛtīyasthāne bheṣajaparijñānavidhirnāma prathamo'dhyāyaḥ ## Translations (1) - [English (machine translation)](https://indike.org/pramana/in.med.samhita.haritasamhita~en-mt.3.3.1) — English, machine translation ## Linked texts (5) - [Suśrutasaṃhitā](https://indike.org/pramana/in.med.samhita.susruta.6.39.146) — Suśruta & Nāgārjuna (siddha/alchemist), Sanskrit - [Cakradatta (Cikitsāsaṅgraha)](https://indike.org/pramana/in.med.sangraha.cakradatta.1.42) — Cakrapāṇidatta, Sanskrit - [Āyurvedadīpikā (Carakatātparyaṭīkā) (ed. Yādavjī Trikamjī Ācārya, 1981 printing)](https://indike.org/pramana/in.med.samhita.caraka!cakrapani*jadavji.6.3.45.1) — Sanskrit - [Jvaratimirabhāskara (Cāmuṇḍa Kāyastha)](https://indike.org/pramana/in.med.cikitsa.jvara.jvaratimirabhaskara.3.5) — Cāmuṇḍa Kāyastha 1598, Sanskrit - [Bhaiṣajyaratnāvalī (ed. Rājeśvaradatta Śāstrī)](https://indike.org/pramana/in.med.cikitsa.gauda.bhaisajyaratnavali*sastri1978.5.36-2) — Sanskrit --- Source: [https://indike.org/pramana/in.med.samhita.haritasamhita.3.3.1](https://indike.org/pramana/in.med.samhita.haritasamhita.3.3.1) · Pramāṇa