[Pramāṇa](https://indike.org/pramana/) › [Indian literature](https://indike.org/pramana/in) › [Medicine](https://indike.org/pramana/in.med) › [Early and ascribed compendia](https://indike.org/pramana/in.med.samhita) › [Hārīta's Compendium of Medicine](https://indike.org/pramana/in.med.samhita.haritasamhita) › 3.3.2 # Hārīta's Compendium of Medicine 3.3.2: dvitīyo'dhyāyaḥ Hārītasaṃhitā 3.3.2 - **Language:** Sanskrit ## Contents - [3.3.2.17](https://indike.org/pramana/in.med.samhita.haritasamhita.3.3.2.17) — 1 part - [3.3.2.19](https://indike.org/pramana/in.med.samhita.haritasamhita.3.3.2.19) — 1 part - [3.3.2.25](https://indike.org/pramana/in.med.samhita.haritasamhita.3.3.2.25) — 1 part - [3.3.2.99](https://indike.org/pramana/in.med.samhita.haritasamhita.3.3.2.99) — 2 parts - [3.3.2.110](https://indike.org/pramana/in.med.samhita.haritasamhita.3.3.2.110) — 1 part - [3.3.2.111](https://indike.org/pramana/in.med.samhita.haritasamhita.3.3.2.111) — 1 part - [3.3.2.119](https://indike.org/pramana/in.med.samhita.haritasamhita.3.3.2.119) — 1 part - [3.3.2.124](https://indike.org/pramana/in.med.samhita.haritasamhita.3.3.2.124) — 1 part - [3.3.2.234](https://indike.org/pramana/in.med.samhita.haritasamhita.3.3.2.234) — 1 part - [3.3.2.245](https://indike.org/pramana/in.med.samhita.haritasamhita.3.3.2.245) — 1 part ### dvitīyo'dhyāyaḥ ### [3.3.2.1](https://indike.org/pramana/in.med.samhita.haritasamhita.3.3.2.1) ātreya uvāca anabhijñaścikitsāyāṃ śāstrāṇāṃ paṭhanena kim yathā palālaṃ bījaistu rahitaṃ niṣprayojakam > it is better to drink the venom of a serpent, or boiled copper, / or to eat iron balls heated red-hot by intense fire, > — English (machine translation) (machine translation) ### [3.3.2.2](https://indike.org/pramana/in.med.samhita.haritasamhita.3.3.2.2) varamāśīviṣaviṣaṃ kvathitaṃ tāmrameva ca pītamatyagnisantaptā bhakṣitā vāpyayoguḍāḥ ### [3.3.2.3](https://indike.org/pramana/in.med.samhita.haritasamhita.3.3.2.3) na tu śrutavatāṃ veśaṃ bibhratāṃ śaraṇāgatāt grahītumannapānaṃ vā vittaṃ vā rogapīḍitāt ### [3.3.2.4](https://indike.org/pramana/in.med.samhita.haritasamhita.3.3.2.4) tadeva yuktaṃ bhaiṣajyaṃ yadārogyāya jāyate sa caiva bhiṣajāṃ śreṣṭho rogebhyo yo vimokṣayet ### [3.3.2.5](https://indike.org/pramana/in.med.samhita.haritasamhita.3.3.2.5) tasmātsarvaprayatnena rogavāraṇahetunā yuktā nidānalakṣaistu saṃhitopāyasaṃyutā ### [3.3.2.6](https://indike.org/pramana/in.med.samhita.haritasamhita.3.3.2.6) paṭhitavyā samāsena saṃhitājñānahetave jñātvā rogapratīkāraṃ tataḥ kuryātpratikriyām ### [3.3.2.7](https://indike.org/pramana/in.med.samhita.haritasamhita.3.3.2.7) avijñāya rujaṃ samyaṅmohādārabhate kriyāḥ vidhānajño'tha śāstrajño na tatsiddhiḥ prajāyate ### [3.3.2.8](https://indike.org/pramana/in.med.samhita.haritasamhita.3.3.2.8) nidānaṃ rogavijñānaṃ bheṣajānāṃ guṇāguṇam vijñāya kurute yastu tasya siddhirna dūrataḥ ### [3.3.2.9](https://indike.org/pramana/in.med.samhita.haritasamhita.3.3.2.9) ādāveva rujāṃ jñānaṃ sādhyāsādhyaṃ vicakṣaṇaḥ yāpyaṃ sarvarujāñcaiva tataḥ kuryātpratikriyām ### [3.3.2.10](https://indike.org/pramana/in.med.samhita.haritasamhita.3.3.2.10) deśaṃ kālaṃ vayo vahnisātmyaṃ prakṛtibheṣajam evaṃ vijñāya sadvaidyastataḥ kuryātpratikriyām ### [3.3.2.11](https://indike.org/pramana/in.med.samhita.haritasamhita.3.3.2.11) nāsti rogo vinā doṣairdoṣā vātādayaḥ smṛtāḥ jvarādayaḥ smṛtā rogāstānsamyakparilakṣayet ### [3.3.2.12](https://indike.org/pramana/in.med.samhita.haritasamhita.3.3.2.12) āptānāñcopadeśena pratyakṣīkaraṇena ca āturādidṛśā sparśācchītādipraśnataḥ param ### [3.3.2.13](https://indike.org/pramana/in.med.samhita.haritasamhita.3.3.2.13) darśanasparśanapraśnai rogajñānāṃ tridhāmatam mukhākṣidarśanātsparśācchītādipraśnataḥ param ### [3.3.2.14](https://indike.org/pramana/in.med.samhita.haritasamhita.3.3.2.14) kṛcchrayāpyasukhopāyo dvividhaḥ sādhya ucyate asādhyo dvividho jñeyaḥ kṛcchraḥ kṛcchratamo'paraḥ ### [3.3.2.15](https://indike.org/pramana/in.med.samhita.haritasamhita.3.3.2.15) yāpyāḥ kecitprakṛtyaiva yāpyāḥ sādhyā upekṣayā svabhāvādvyādhayaḥ sādhyāḥ kecitsādhyā upekṣitāḥ ### [3.3.2.16](https://indike.org/pramana/in.med.samhita.haritasamhita.3.3.2.16) sādhyā yāpyatvamāyānti yāpyāścāsādhyatāṃ tathā ghnanti prāṇāṃśca sādhyāstu narāṇāmakriyāvatām ### [3.3.2.17](https://indike.org/pramana/in.med.samhita.haritasamhita.3.3.2.17) vyādherupari yo vyādhiḥ sopadrava udāhṛtaḥ sopadravā na jīvanti jīvanti nirupadravāḥ ### [3.3.2.17.p1](https://indike.org/pramana/in.med.samhita.haritasamhita.3.3.2.17.p1) jñātvālpako'pi bhiṣajāḥ paricintanīyo nopekṣaṇīya iti rogagaṇo hyasādhyaḥ ### [3.3.2.18](https://indike.org/pramana/in.med.samhita.haritasamhita.3.3.2.18) svalpo'pyarirgarala vahnisamānarūpa āptobalaṃ na śamatāmupayāti kāle ### [3.3.2.19](https://indike.org/pramana/in.med.samhita.haritasamhita.3.3.2.19) śatruḥ sthānabalaṃ prāpya vikramaṃ kurute balī tathā dhātvantaraṃ prāpya vikramaṃ kurute gadaḥ ### [3.3.2.19.p1](https://indike.org/pramana/in.med.samhita.haritasamhita.3.3.2.19.p1) bahuvidhaparikāryeṇāpi nītaṃ śamaṃ yat kṛśamapi hi na dhāryaṃ rogamūlaṃ vidhijña ### [3.3.2.20](https://indike.org/pramana/in.med.samhita.haritasamhita.3.3.2.20) kathamapi bahupathyairvyāvṛto vā baliṣṭho na śamayati hi rogaṃ bālyamātreṇa samyak ### [3.3.2.21](https://indike.org/pramana/in.med.samhita.haritasamhita.3.3.2.21) yathā svalpaṃ viṣaṃ tīvraṃ yathā svalpo bhujaṅgamaḥ yathā svalpataraścāgnistathā sūkṣmo'pi rugripuḥ ### [3.3.2.22](https://indike.org/pramana/in.med.samhita.haritasamhita.3.3.2.22) yāvatsthānaṃ samāśritya vikāraṃ kurute gadaḥ tāvattasya pratīkāraḥ sthānatyāgādbalīyasaḥ ### [3.3.2.23](https://indike.org/pramana/in.med.samhita.haritasamhita.3.3.2.23) karmajā vyādhayaḥ keciddoṣajāḥ santi cāpare sahajāḥ kathitāścānye vyādhayastrividhā matāḥ ### [3.3.2.24](https://indike.org/pramana/in.med.samhita.haritasamhita.3.3.2.24) bahubhirupacāraistu ye na yānti śamaṃ tataḥ te karmajāḥ samuddiṣṭā vyādhayo dāruṇāḥ punaḥ ### [3.3.2.25](https://indike.org/pramana/in.med.samhita.haritasamhita.3.3.2.25) doṣajā vātapittādyāḥ sahajāḥ kṣuttṛṣādayaḥ ### [3.3.2.25.p1](https://indike.org/pramana/in.med.samhita.haritasamhita.3.3.2.25.p1) tasmādvakṣyāmi cādau jvaramatulagadaṃ vājināṃ kuñjarāṇāṃ mānuṣyāṇāṃ paśūnāṃ mṛgamahiṣakharoṣṭrādivānaspatīnām ### [3.3.2.26](https://indike.org/pramana/in.med.samhita.haritasamhita.3.3.2.26) vallīnāmoṣadhīnāṃ kṣitidharaphaṇināṃ patriṇāṃ mūṣikāṇāmeṣa prāṇāpahārī jvara iti gadito durnivāro hi loke ### [3.3.2.27](https://indike.org/pramana/in.med.samhita.haritasamhita.3.3.2.27) asādhyo'yaṃ jvaro vyādhirgomahiṣyaśvakuñjare kiñcitkṛcchratamo nṝṇāmanyeṣāṃ jīvaghātakaḥ ### [3.3.2.28](https://indike.org/pramana/in.med.samhita.haritasamhita.3.3.2.28) yathā mṛgāṇāṃ mṛgayurbaliṣṭhastathā gadānāṃ prabalo jvaro'yam nānyo'pi śakto manujaṃ vihāya soḍhuṃ bhuvi prāṇabhṛtaḥ surādyāḥ ### [3.3.2.29](https://indike.org/pramana/in.med.samhita.haritasamhita.3.3.2.29) karmaṇā labhate yasmāddevatvaṃ mānuṣo divi tataścaivacyutaḥ svargānmānuṣyamapi varttate ### [3.3.2.30](https://indike.org/pramana/in.med.samhita.haritasamhita.3.3.2.30) tasmātsa devabhāvāttu sahate mānuṣo jvaram śeṣāḥ sarve vipadyante paśuvargā jvarārditāḥ ### [3.3.2.31](https://indike.org/pramana/in.med.samhita.haritasamhita.3.3.2.31) rogāṇāṃ rogarājo'yaṃ yathā mṛgapatirmṛge dāhātmasu yathā vahnistathā rogo jvaro'dhikaḥ rudrakrodhāgnisambhūtaḥ sarvabhūtapratāpanaḥ ### [3.3.2.32](https://indike.org/pramana/in.med.samhita.haritasamhita.3.3.2.32) pātakaḥ sa tu nāgānāmabhitāpastu vājinām gavāmīśvarasaṃjñastu mānavānāṃ jvaro mataḥ ### [3.3.2.33](https://indike.org/pramana/in.med.samhita.haritasamhita.3.3.2.33) dāridro mahiṣīṇāntu mṛgarogo mṛgeṣu ca ajāvīnāṃ pralāpākhyaḥ karabheṣvalaso bhavet ### [3.3.2.34](https://indike.org/pramana/in.med.samhita.haritasamhita.3.3.2.34) śuno'larkaḥ samākhyāto matsyeṣvindramato mataḥ pakṣiṇāmabhighātastu vyāleṣvaikṣitasaṃjñitaḥ ### [3.3.2.35](https://indike.org/pramana/in.med.samhita.haritasamhita.3.3.2.35) jalasya nīlikā prāyo bhūmiṣūṣaranāmataḥ vṛkṣasya koṭarākṣastu jvaraḥ sarvatra dṛśyate ### [3.3.2.36](https://indike.org/pramana/in.med.samhita.haritasamhita.3.3.2.36) tripādbhasmapraharaṇastriśirāḥ sumahodaraḥ vaiyāghracarmavasanaḥ kapilojjvalavigrahaḥ ### [3.3.2.37](https://indike.org/pramana/in.med.samhita.haritasamhita.3.3.2.37) piṅgekṣaṇo hyasvajaṅgho vimatsyo balavānayam puruṣo lokanāśāya cāsau jvara itismṛtaḥ ### [3.3.2.38](https://indike.org/pramana/in.med.samhita.haritasamhita.3.3.2.38) dagdhendhano yathā vahnirdhātūnhatvā yathā viṣam kṛtakṛtyo vrajecchāntiṃ dehaṃ hatvā tathā jvaraḥ ### [3.3.2.39](https://indike.org/pramana/in.med.samhita.haritasamhita.3.3.2.39) tasmāttasya samutpattiṃ vakṣyāmi śṛṇu putraka caturvidho mahāghoro jāto yena tu cāṣṭadhā ### [3.3.2.40](https://indike.org/pramana/in.med.samhita.haritasamhita.3.3.2.40) dakṣādūrdhvarapraśamanaḥ kupito hi maheśvaraḥ śvāsaṃ mumoca dayitāvidhuraśca tīvraṃ tena jvaro'ṣṭavidhasambhavato'ṣṭadhā syāt ### [3.3.2.41](https://indike.org/pramana/in.med.samhita.haritasamhita.3.3.2.41) vātādipittakaphaśoṇita sannidhānātsvecchānnapānaniratādṛtuvaiparītyāt doṣā malāśayagatā jaṭharāgnibāhyāḥ samprerayanti rudhirā śritavahnipātam ### [3.3.2.42](https://indike.org/pramana/in.med.samhita.haritasamhita.3.3.2.42) teṣāṃ tato hi dadhate jvaranāma siddhaṃvyāyāmakrodhabhuktyādijananācchītasambhavatvāt ### [3.3.2.43](https://indike.org/pramana/in.med.samhita.haritasamhita.3.3.2.43) viruddhānna viśeṣeṇa pānanirjharavāriṇā kūpodakena santuṣṭastigmatīvrāṃśuraśmibhiḥ ### [3.3.2.44](https://indike.org/pramana/in.med.samhita.haritasamhita.3.3.2.44) gandhavātena doṣāṇāmabhighātābhiśāpataḥ jvaronāma mahāghoro jāyate manuje bhṛśam ### [3.3.2.45](https://indike.org/pramana/in.med.samhita.haritasamhita.3.3.2.45) śramo jaḍatvaṃ nayanaplavaḥ syādromodgamo ghurghurakañca jṛmbhā vaivarṇatā dveṣasaśoṣatāsye jvarasya ca vyaktakalakṣaṇāni ### [3.3.2.46](https://indike.org/pramana/in.med.samhita.haritasamhita.3.3.2.46) samīraṇe ca vai jṛmbhā kaphāddainyaṃ niṣīdati pittānnayanasantāpaḥ sarvaṃ vai sānnipātike tasmādvakṣye pratīkāraṃ yena sampadyate sukham ### [3.3.2.47](https://indike.org/pramana/in.med.samhita.haritasamhita.3.3.2.47) vacā yavānī dhanikā saviśvā pibetkaṣāyaṃ niśi soṣṇamevam sa vātike vātaruje jvarāṇāṃ sampācake syānmanuje sukhāya ### [3.3.2.48](https://indike.org/pramana/in.med.samhita.haritasamhita.3.3.2.48) niśā sanimbā mṛtavallikā ca dhānyaṃ ca viśvā saguḍaḥ kaṣāyaḥ niśāsu ca kṣīrasakolamiśraṃ pānaṃ sapittajvarapācanāya ### [3.3.2.49](https://indike.org/pramana/in.med.samhita.haritasamhita.3.3.2.49) vacā yavānī triphalā saviśvā kvātho niśāyāṃ kaphaje jvare vā sapācanaṃ syānmanujasya doṣe śūle pratiśyāyakapīnaseṣu ### [3.3.2.50](https://indike.org/pramana/in.med.samhita.haritasamhita.3.3.2.50) śaṭhīvacānāgarakāphalānāṃ vatsādanīdhanvayavāsakānām kvāthohitaḥ sarvabhave jvare ca sampācanaṃ syānmanujatridoṣe ### [3.3.2.51](https://indike.org/pramana/in.med.samhita.haritasamhita.3.3.2.51) rātrau sukhoṣṇatoyena pracureṇa ca dhīmatām aṅgasammardanaṃ pathyaṃ nidrāvyāyāmavarjitam ### [3.3.2.52](https://indike.org/pramana/in.med.samhita.haritasamhita.3.3.2.52) vaipathurviṣamavegaśoṣaṇaṃ kaṇṭhatāluvadane virasyatā rūkṣatā vapuṣi bandhakukṣayorjṛmbhaṇaṃ śirasi rugvinidratā ### [3.3.2.53](https://indike.org/pramana/in.med.samhita.haritasamhita.3.3.2.53) kṛṣṇatākararuhāṃ pralāpako gātrabhaṅgabalavān bibhatsyati bhītavatsvapiti jāgrato naro lakṣaṇairbhavati vātakṛjjvaraḥ ### [3.3.2.54](https://indike.org/pramana/in.med.samhita.haritasamhita.3.3.2.54) nāgaraṃ surataruśca dhānyakaṃ kuṇḍalī bṛhatikā yuganniśam saptame niśi praśasyate jvare cāṣṭamāṃśagatako hi aṣṭavān ### [3.3.2.55](https://indike.org/pramana/in.med.samhita.haritasamhita.3.3.2.55) vīryādhikaṃ bhavati bheṣajamannahīnaṃ hanyāttadāmayamasaṃśayamāśu caiva tadbālavṛddhayuvatī mṛdubhiśca pītaṃ glāniṃ parāṃ nayati cāśu balakṣayañca ### [3.3.2.56](https://indike.org/pramana/in.med.samhita.haritasamhita.3.3.2.56) indriyāṇāṃ laghutvañca netrāsyasya prasādatā sodgāramuṣṇatā koṣṭhe jīrṇabheṣajalakṣaṇam ### [3.3.2.57](https://indike.org/pramana/in.med.samhita.haritasamhita.3.3.2.57) klamahṛllāsasadanaṃ śirorugbhraṃśameva ca utkledo jāyate yasya vidyādutkrāmamauṣadham ### [3.3.2.58](https://indike.org/pramana/in.med.samhita.haritasamhita.3.3.2.58) dāhāṅgasadanaṃ mūrcchā śirorukklamadīnatā bhramo rativiśeṣeṇa saviśeṣauṣadhākṛtiḥ ### [3.3.2.59](https://indike.org/pramana/in.med.samhita.haritasamhita.3.3.2.59) tasmādauṣadhaśeṣe tu na doṣaśamanaṃ kvacit kopantyanekadhā doṣā na deyaṃ pācanaṃ vinā ### [3.3.2.60](https://indike.org/pramana/in.med.samhita.haritasamhita.3.3.2.60) śīghraṃ vipākamupayāti balaṃ na hanyādannāvṛtaṃ na ca muhurvadanānnireti prāgbhuktasevitamahauṣadhametadeva dadyācca vṛddhaśiśubhīruvarāṅganābhyaḥ ### [3.3.2.61](https://indike.org/pramana/in.med.samhita.haritasamhita.3.3.2.61) bilvāgnimanthaśukanāsakapāṭalīnāṃ kumbhārikāprayutakaṃ kvathitaṃ kaṣāyam dantānviśodhayati vārayate samīraṃ nāśaṃ karoti marutajvaramāśu puṃsām ### [3.3.2.62](https://indike.org/pramana/in.med.samhita.haritasamhita.3.3.2.62) kirātamustamṛtavallikraṇāsavitryo gokaṇṭako bṛhatiyugmamudīcyatiktāḥ syācchāliparṇikalaśīkvathitaḥ samantātkvāthaḥ samīraṇa bhavaṃ jvaramāśu hanti ### [3.3.2.63](https://indike.org/pramana/in.med.samhita.haritasamhita.3.3.2.63) guḍūcī śatapuṣpā ca plakṣī rāsnā punarnavā trāyamāṇakakvāthaśca guḍairvātajvarāpahaḥ ### [3.3.2.64](https://indike.org/pramana/in.med.samhita.haritasamhita.3.3.2.64) mūrcchā dāho bhramamadatṛṣāvegatīkṣṇo'tisārastandrālasyaṃ pralayana vamīpākatāpaśca vaktre | svedaḥ śvāso bhavati kaṭukaṃ vihvalatvaṃ kṣudhā vā etairliṅgairbhavati manuje paittiko vai jvarastu ### [3.3.2.65](https://indike.org/pramana/in.med.samhita.haritasamhita.3.3.2.65) rodhrotpalāmṛtalatākamalaṃ sitāḍyaṃ tatsārivāsahitameva hi pācaneṣu niṣkvāthya kvāthamati cāśu nihanti pittaṃ pittajvarapraśamanaṃ prakaroti puṃsām ### [3.3.2.66](https://indike.org/pramana/in.med.samhita.haritasamhita.3.3.2.66) kvathitaṃ taṇḍulapayasā śakrāhve kaṭurohiṇīsahitam kvāthaṃ yaṣṭīmadhunā vināśanaṃ pittajjvarāṇāntu ### [3.3.2.67](https://indike.org/pramana/in.med.samhita.haritasamhita.3.3.2.67) durālabhāvāsakaparpaṭānāṃ priyaṃgunimbakaṭurohiṇīnām kirātatiktaṃ kvathitaṃ kaṣāyaṃ saśarkarāḍhyaṃ kathitañca pācanam ### [3.3.2.68](https://indike.org/pramana/in.med.samhita.haritasamhita.3.3.2.68) sadāhapittajvaraṃmāśu hanti tṛṣṇābhramaṃ śoṣavikārayuktam ### [3.3.2.69](https://indike.org/pramana/in.med.samhita.haritasamhita.3.3.2.69) eko'pi vai parpaṭako variṣṭhaḥ pittajvarāṇāṃ śamanāya yogyaḥ tasmātpunarnāgaravālakāḍhyaḥ siṃho yathā kaṅkaṭakapravṛttaḥ ### [3.3.2.70](https://indike.org/pramana/in.med.samhita.haritasamhita.3.3.2.70) nāgarośīramustā ca candanaṃ kaṭurohiṇī dhānyakānāṃ tu kvāthaśca pittajvaravināśanaḥ ### [3.3.2.71](https://indike.org/pramana/in.med.samhita.haritasamhita.3.3.2.71) amṛtaṃ parpaṭo dhātrī kvāthaḥ pittajvaraṃ haret ### [3.3.2.72](https://indike.org/pramana/in.med.samhita.haritasamhita.3.3.2.72) drākṣāparpaṭakatiktāpathyāragvadhamustakaiḥ kvāthastṛṣābhramadāhayuktapittajvarāpahaḥ ### [3.3.2.73](https://indike.org/pramana/in.med.samhita.haritasamhita.3.3.2.73) vidārikārodhradadhitthakānāṃ syānmātuluṅgasya ca dāḍimānām yathānulābhena ca tālulepo nihanti dāhaṃ tṛṣāmūrcchanañca ### [3.3.2.74](https://indike.org/pramana/in.med.samhita.haritasamhita.3.3.2.74) uttānasya prasuptasya kāṃsye vā tāmrabhājane nābhau nidhāya dhārāṃ nu śītāndāhaṃ nivārayet ### [3.3.2.75](https://indike.org/pramana/in.med.samhita.haritasamhita.3.3.2.75) ramyārāmākucabharanatāliṅganaṃ ceṣṭasaṅgāddrākṣāpānaṃ nigaditamatho śītalaṃ sevanaṃ syāt | śubhrāmbhojañca malayajalāsiktasaṃśītavāso muktāhāro viśadatuhinaṃ kaumudīyāmukhāya ### [3.3.2.76](https://indike.org/pramana/in.med.samhita.haritasamhita.3.3.2.76) ebhirhanti drutataranibhaṃ mānuṣāṇāṃ tu pittaṃ dāhaṃ śoṣaṃ klamamapi tathā tṛḍbhramaṃ mūrcchanāñca | etairyogairbhavati nitarāṃ pittadāhasya śāntiryogyā caivaṃ bhavati satatantatkriyāśrīmatāñca ### [3.3.2.77](https://indike.org/pramana/in.med.samhita.haritasamhita.3.3.2.77) yadi jihvāgalatāluśoṣaścenmanujasya ca kesaraṃ mātuluṅgasya madhusaindhavasaṃyutam peṣyamāṇaṃ tālulepe sadyaḥ pittajvarāpaham ### [3.3.2.78](https://indike.org/pramana/in.med.samhita.haritasamhita.3.3.2.78) staimityaṃ madhurāsyatā ca jaḍatā tandrā bhṛśañca tathā gātrāṇāṃ gurutārucirvismatā romodgamaḥ śītatā prasvedāḥ śrutirodhanañca kurute netre ca pāṇḍucchavī viṣṭabdha malavṛttikāsavamanaṃ śleṣmajvare te viduḥ ### [3.3.2.79](https://indike.org/pramana/in.med.samhita.haritasamhita.3.3.2.79) pippalādikakalkaṃ tu kaphaje pācanaṃ hitam ### [3.3.2.80](https://indike.org/pramana/in.med.samhita.haritasamhita.3.3.2.80) tadvadvyāghrī ca siṃhī ca rodhraṃ kuṣṭhapaṭolakam jvare kaphātmaje caitatpācanaṃ syāttaduttamam ### [3.3.2.81](https://indike.org/pramana/in.med.samhita.haritasamhita.3.3.2.81) vāsā guḍūcī triphalā paṭolī śaṭhī ca tiktā madhunīkaṣāyam śleṣmaprabhūteṣu rujeṣu samyag jvaraṃ nihanyātkaphajañca śīghram ### [3.3.2.82](https://indike.org/pramana/in.med.samhita.haritasamhita.3.3.2.82) āmalakyabhayā kṛṣṇā ṣaḍgranthā tritrikantathā malabhedī kaphāntako jvaranāśanadīpanaḥ ### [3.3.2.83](https://indike.org/pramana/in.med.samhita.haritasamhita.3.3.2.83) pippalī śṛṅgaverañca ṣaḍgranthā vatsakaṃ phalam kvātho madhupragāḍhaḥ syācchleṣmajvaravināśanaḥ ### [3.3.2.84](https://indike.org/pramana/in.med.samhita.haritasamhita.3.3.2.84) kṣodreṇa pippalīcūrṇaṃ lihyecchleṣmajvarāpaham plīhānāhaviṣaṃ hanti kāsaśvāsāmamardanam ### [3.3.2.85](https://indike.org/pramana/in.med.samhita.haritasamhita.3.3.2.85) tṛṣṇā mūrcchā vamiratha kaṭutā cānane rūkṣatā syādantardāho vapuṣi nayane raktatā kaṇṭhaśoṣaḥ nidrānāśaḥ śvasanaśiraso rukprabhedo'ṅgabhaṅgoromodgharṣastamakamiti cedvātapittajvaraḥ syāt ### [3.3.2.86](https://indike.org/pramana/in.med.samhita.haritasamhita.3.3.2.86) saṃsṛṣṭadoṣairvihitañca samyagvipācanaṃ pittamarujjvare ca phalatrikaṃ śālmalisamprayuktaṃ rāsnākirātasya pibetkaṣāyam ### [3.3.2.87](https://indike.org/pramana/in.med.samhita.haritasamhita.3.3.2.87) dvipañcamūlī saha nāgareṇa guḍūcibhūnimbaghanaiḥ sametā kalkaḥ praśastaḥ saguḍo marutsu sa pittavātajvaranāśahetuḥ ### [3.3.2.88](https://indike.org/pramana/in.med.samhita.haritasamhita.3.3.2.88) kirātatiktāmalakīśaṭhīnāṃ drākṣoṣaṇānāgarakāmṛtānām kvāthaḥ suśīto guḍasaṃyutaḥ syātsa pittavātajvaranāśahetuḥ ### [3.3.2.89](https://indike.org/pramana/in.med.samhita.haritasamhita.3.3.2.89) amṛtamustakavāsāparpaṭaviśvājalena kvāthaḥ pānaṃ pittamarutsu jvaraṃ nihanyācca bhadramuñjaḥ ### [3.3.2.90](https://indike.org/pramana/in.med.samhita.haritasamhita.3.3.2.90) nidrāgauravakātsasandhiśirarukcārttistathā parvaṇāṃ bhedo madhyamavegamatra nayane vātānvite śleṣmaṇi santāpaḥ śvasanaṃ ruciḥ śrutipathe kaṇṭhe ca śuṣkāvṛtistandrāmohamarocakabhramamatha śleṣmajvare pittale ### [3.3.2.91](https://indike.org/pramana/in.med.samhita.haritasamhita.3.3.2.91) nāgaraṃ bhadramustā vā guḍūcyāmalakāhvayam pāṭhāmṛṇālodīcyāśca kvāthaḥ pittajvare kaphe ### [3.3.2.92](https://indike.org/pramana/in.med.samhita.haritasamhita.3.3.2.92) pācano dīpanīyaḥ syādraktaśoṣanivāraṇaḥ ### [3.3.2.93](https://indike.org/pramana/in.med.samhita.haritasamhita.3.3.2.93) drākṣāmṛtāvāsakariṣṭakāśca bhūnimbatiktendrayavāḥ paṭolam mustāsabhārgā kvathitaḥ kaṣāyaḥ pittakaphasya jvaranāśanāya ### [3.3.2.94](https://indike.org/pramana/in.med.samhita.haritasamhita.3.3.2.94) guḍūcikā nimbadalāni śuṇṭhī mustañca kustumburucandanāni kvāthaṃ vidadhyātkaphapittavātajvaraṃ nihanyācca guḍūcikādyaḥ ### [3.3.2.95](https://indike.org/pramana/in.med.samhita.haritasamhita.3.3.2.95) eṣa sarvajvarānhanti hṛllāsādyānarocakān pratiśyāyapipāsāghnaḥ śoṣadāhanivāraṇaḥ ### [3.3.2.96](https://indike.org/pramana/in.med.samhita.haritasamhita.3.3.2.96) guḍūcīnimbacakravāsakañca śaṭhī kirātaṃ magadhāṣṭahalyau dārvīpaṭolaṃ kvathitaṃ kaṣāyaṃ pibennaraḥ pittakaphe jvare ca ### [3.3.2.97](https://indike.org/pramana/in.med.samhita.haritasamhita.3.3.2.97) paṭolī candanaṃ tiktā mūrvā pāṭhāmṛtāgaṇaḥ pittaśleṣmajvaracchardidāhakaṇḍūnivāraṇaḥ ### [3.3.2.98](https://indike.org/pramana/in.med.samhita.haritasamhita.3.3.2.98) paṭolavāsāpicumandakasya mūlāni yaṣṭīmadhukaṃ ghanā ca kaṣāyametatpratisādhitantu jvare kaphe pittabhave praśastaḥ ### [3.3.2.99](https://indike.org/pramana/in.med.samhita.haritasamhita.3.3.2.99) sandīpano pittakaphātmake ca tathaiva pittāsṛjasambhave ca jvare malānāṃ pratibhedanaḥ syātpaṭoladhānyāśritakaḥ praśastaḥ ### [3.3.2.99.p1](https://indike.org/pramana/in.med.samhita.haritasamhita.3.3.2.99.p1) śītaṃ vepathuparvabhaṅgavamathurgātre jaḍatvaṃ rujāṃ mandoṣmārucibandhanaṃ paruṣatā ### [3.3.2.99.p2](https://indike.org/pramana/in.med.samhita.haritasamhita.3.3.2.99.p2) kāsastamaḥ śūlavān ### [3.3.2.100](https://indike.org/pramana/in.med.samhita.haritasamhita.3.3.2.100) tandrā kūjanamātmalaulyamathavāstaimityajṛmbhāruciḥ prasvedomalamūtrarodhasahitaḥ syācchleṣmavātajvaraḥ ### [3.3.2.101](https://indike.org/pramana/in.med.samhita.haritasamhita.3.3.2.101) āragvadhastiktakarohiṇī ca harītakī pippalimūlamustā niṣkvāthya kalkaḥ kaphavātayukte jvare saśūle hitapācano'yam ### [3.3.2.102](https://indike.org/pramana/in.med.samhita.haritasamhita.3.3.2.102) kṣudrā guḍūcī saha nāgareṇa vāsājalaṃ parpaṭakañca pathyāḥ mustā ca duḥsparśayutaḥ kaṣāyaḥ pāno hito vātakaphajvarasya ### [3.3.2.103](https://indike.org/pramana/in.med.samhita.haritasamhita.3.3.2.103) parpaṭanāgākhyavacātantukakaṭphalailābhayāviśvabhūtike kvātho hiṃgumadhuyutaḥ kaphavāte sahikkāroge sagalagrahe ca ### [3.3.2.104](https://indike.org/pramana/in.med.samhita.haritasamhita.3.3.2.104) dvipañcamūlakaḥ kvāthaḥ kaṇācūrṇena bhāvitaḥ deyo vātakaphe śūle jvare śvāse ca pīnase ### [3.3.2.105](https://indike.org/pramana/in.med.samhita.haritasamhita.3.3.2.105) tandrālasyaṃ mukhamadhuratā ṣṭhīvanaṃ kaṇṭhaśoṣo nidrānāśaḥ śvasanavikalo mūrcchanā śocanā ca jihvājāḍyaṃ paruṣamatha vā pṛṣṭhaśīrṣe vyathā syādantardāho bhavati yadi vā viddhi doṣaṃ tridoṣam ### [3.3.2.106](https://indike.org/pramana/in.med.samhita.haritasamhita.3.3.2.106) dṛṣṭvā tridoṣajaṃ ghoraṃ jvaraṃ prāṇāpahārakam tasmādādau kaphasyāsya śoṣaṇaṃ parikīrttitam ### [3.3.2.107](https://indike.org/pramana/in.med.samhita.haritasamhita.3.3.2.107) na kuryātpittaśamanaṃ yadīcchedātmano yaśaḥ kaphavātairbalavataḥ sadyo hanti rujāturam ### [3.3.2.108](https://indike.org/pramana/in.med.samhita.haritasamhita.3.3.2.108) laṅghanaṃ damanaṃ vāpi ṣṭhīvanaṃ syāttridoṣaje trirātraṃ pañcarātraṃ vā saptarātramathāpi vā ### [3.3.2.109](https://indike.org/pramana/in.med.samhita.haritasamhita.3.3.2.109) laṅghanañca samuddiṣṭaṃ jñātvā doṣabalābalam kaphaṃ viśoṣitaṃ jñātvā tato vātanivāraṇam ### [3.3.2.110](https://indike.org/pramana/in.med.samhita.haritasamhita.3.3.2.110) pittasaṃśamanaṃ kāryaṃ jñātvā pittasya kopanam śoṣaṇīyau vātakaphau na tu pittaṃ vināśayet ### [3.3.2.110.p1](https://indike.org/pramana/in.med.samhita.haritasamhita.3.3.2.110.p1) tṛṣṇā ca śūlaśoṣaḥ śvasanamatha niśājāgaro vāsaraistu tandrā mohaśca śoṣo bhavati ca vadane ghrāṇajihvādharāṇām ### [3.3.2.111](https://indike.org/pramana/in.med.samhita.haritasamhita.3.3.2.111) pākaṃ niṣṭhīvate yaḥ kṛśatanuśca bhavenmaṇḍalānāñca dehe sambhūtiḥ śyāvanetrādha-ravadanamadasveda ādhmānaśoṣaḥ ### [3.3.2.111.p1](https://indike.org/pramana/in.med.samhita.haritasamhita.3.3.2.111.p1) kṣunnāśo vā bhramaṇamapi tathā śiraso loḍanaṃ vā śiro'rttiḥ srotorodho vamirvā galakaghuraghurāśūlakairvā vṛtastu ### [3.3.2.112](https://indike.org/pramana/in.med.samhita.haritasamhita.3.3.2.112) etairliṅgaiḥ prayuktaḥ prabhavati ca nṛṇāṃ sannipātetisaṃjñā rogāṇāmāśukārī jvara atiduḥkhado vājināṃ vā dvipānām ### [3.3.2.113](https://indike.org/pramana/in.med.samhita.haritasamhita.3.3.2.113) sannipātajvare pūrvaṃ kuryādvātakaphāpaham paścācchleṣmaṇi saṃkṣīṇe nirāme pittamārutau ### [3.3.2.114](https://indike.org/pramana/in.med.samhita.haritasamhita.3.3.2.114) sannipātajvare yatnaṃ kṛtvā tandrāṃ jayetparām upadravaḥ kaṣṭatamo jvarāṇāñca viśeṣataḥ ### [3.3.2.115](https://indike.org/pramana/in.med.samhita.haritasamhita.3.3.2.115) pathye kārayate yastu rogiṇāṃ kaphapūritam sa evāsya śatruḥ syānna pathyaṃ na ca bheṣajam ### [3.3.2.116](https://indike.org/pramana/in.med.samhita.haritasamhita.3.3.2.116) śaṭhī dvipañcamūlakaṃ durālabhā ca koṭajam paṭolaṃ pauṣkaraṃ vātha yuktā bhārgavī pippalī ### [3.3.2.117](https://indike.org/pramana/in.med.samhita.haritasamhita.3.3.2.117) nihanti sānnipātikajvarāgnimādyandaśāṅgaḥ ### [3.3.2.118](https://indike.org/pramana/in.med.samhita.haritasamhita.3.3.2.118) bhūnimba dārudaśamūlamahauṣadhābdatiktendrabīja dhanikabhadrakaṇṭakaṇākaṣāyaḥ tandrāpralāpabhramatṛṣārucidāhamohaśvāsāgnimāndyayuktamathajvaramāśu hanti ### [3.3.2.119](https://indike.org/pramana/in.med.samhita.haritasamhita.3.3.2.119) śaṇṭhīghanāgajakaṇāsuradārudhānyātiktākaliṅgadaśamūlasamo'pi kalkaḥ śreṣṭhastridoṣajanitajvaranāśanāya śvāsabhramārucivibandhahṛdāmayaghnaḥ ### [3.3.2.119.p1](https://indike.org/pramana/in.med.samhita.haritasamhita.3.3.2.119.p1) mustośīraniśāviśālamadhukaṃ pāṭhā balā rohiṇī nīlī dhanvayavāsa kaṭṛvaraśaṭhī śuṇṭhī samaṅgā vivṛt ### [3.3.2.120](https://indike.org/pramana/in.med.samhita.haritasamhita.3.3.2.120) yaṣṭīpippalimūlaparpaṭaphalā pippalyakaṃ dāru ca śyāmāhemaguḍūcikāsamapayaḥ kvātho jvarāntaḥ smṛtaḥ ### [3.3.2.121](https://indike.org/pramana/in.med.samhita.haritasamhita.3.3.2.121) dve bṛhatyau śaṭhī śṛṅgī kirātaṃ kaṭurohiṇī paṭolaṃ pauṣkaraṃ bhārṅgī vatsakañca durālabhā ### [3.3.2.122](https://indike.org/pramana/in.med.samhita.haritasamhita.3.3.2.122) etadbṛhatyādikapācanaṃ syātkāsādikopadravanāśanañca śīghraṃ nihanti jvarasannipātaṃ śūlārttitandrāśamane praśastam ### [3.3.2.123](https://indike.org/pramana/in.med.samhita.haritasamhita.3.3.2.123) śaṭhī kirātaṃ kaṭukā viśālā guḍūcibhṛṅgī bṛhatīdvayañca mahauṣadhaṃ pauṣkaradhanvayāsarāsnāsurāhvā gajapippalī ca ### [3.3.2.124](https://indike.org/pramana/in.med.samhita.haritasamhita.3.3.2.124) pītantu niṣkvāthya hitaṃ narāṇāṃ śaṭhyādicāturdaśakaṃ praśastam jaghāna tandrāśvasanaṃ śiro'rttijāḍyaṃ saśūlaṃ jvaramāśu hanti ### [3.3.2.124.p1](https://indike.org/pramana/in.med.samhita.haritasamhita.3.3.2.124.p1) bhūnimbasuradārunāgaraghanātiktākaliṅgāni ca tadvaddhastikaṇā dvipañcakagaṇairyuktaḥ kaṣāyo hitaḥ ### [3.3.2.125](https://indike.org/pramana/in.med.samhita.haritasamhita.3.3.2.125) pītaḥ sarvarujāṃ vināśanakaraḥ syātsannipātajvaraṃ hanti śvāsaviśoṣavakṣasirujaṃ tandrāṃ jaghāna drutam ### [3.3.2.126](https://indike.org/pramana/in.med.samhita.haritasamhita.3.3.2.126) rāsnā guḍūcighanaparpaṭakaṃ paṭolī bhūnimbavatsakaśaṭhīyutanāgarāṇām tiktāsurāhvagajamāgadhikāyavāsāvāsābalāgajabalākvathitaḥ samāṃśaḥ ### [3.3.2.127](https://indike.org/pramana/in.med.samhita.haritasamhita.3.3.2.127) kvātho nihanti marutaprabhavāmayānāṃ saśvāsa kāsajaṭharārtiviṣūcikānām śreṣṭho nṛṇāṃ bhuvi ca pācanasannipāte roge'thavā kaphasamīraṇake pradeyaḥ ### [3.3.2.128](https://indike.org/pramana/in.med.samhita.haritasamhita.3.3.2.128) rāsnātrikaṇṭaśatamauṣadhīnāntathā ca bhārṅgī sapuṣkaraghanā suradārudhānyāḥ kvātho hitaḥ sakalamārutajijjvareṣu syātsannipātaprabhaveṣvatidāruṇeṣu ### [3.3.2.129](https://indike.org/pramana/in.med.samhita.haritasamhita.3.3.2.129) trivṛdviśālā ca tathā surāhvamāragvadhastiktakarohiṇī ca kvātho bhavedbhedanako malānāṃ syādvātaśūle nayato bhayaghnaḥ ### [3.3.2.130](https://indike.org/pramana/in.med.samhita.haritasamhita.3.3.2.130) vacā yavānī ca mahauṣadhañca śuṣkañca cūrṇaṃ tanulepanāya śastaṃ vadanti jvaragharmaśāntiṃ karoti nūnaṃ parimardanañca ### [3.3.2.131](https://indike.org/pramana/in.med.samhita.haritasamhita.3.3.2.131) māgadhī ca suradāru tathā ca viśvakaṃ tiktā ca dīpyakayutaṃ tanulepanāya cūrṇaṃ praśastamapi vārayate śarīre svedañca śītalatanurbhavedāśu nūnam ### [3.3.2.132](https://indike.org/pramana/in.med.samhita.haritasamhita.3.3.2.132) madhūkasāraṃ samahauṣadhena vacoṣaṇā saindhavasaṃyutā ca mūtreṇa vā coṣṇa jalena piṣṭaṃ pranaṣṭajñānapratibodhanāya ### [3.3.2.133](https://indike.org/pramana/in.med.samhita.haritasamhita.3.3.2.133) śobhāñjanakamūlasya rasaṃ samaricānvitam visaṅgitānāṃ nasyaṃ syādbodhanaṃ cāśu rogiṇām ### [3.3.2.134](https://indike.org/pramana/in.med.samhita.haritasamhita.3.3.2.134) ekaṃ bṛhatyāḥ phalapippalīkaṃ śuṇṭhīyutaṃ cūrṇamidaṃ praśastam pradhāmayedghrāṇapuṭe tu saṃjñāceṣṭāṃ karoti kṣavathuprabodhaḥ ### [3.3.2.135](https://indike.org/pramana/in.med.samhita.haritasamhita.3.3.2.135) śirīṣabījaṃ maricopakulyā mūtreṇa ghṛṣṭaṃ saha saindhavena netrāñjanaṃ syānnayane narāṇāṃ pranaṣṭasaṃjñāṃ prakaroti bodhaḥ ### [3.3.2.136](https://indike.org/pramana/in.med.samhita.haritasamhita.3.3.2.136) trikaṭu tathā ca karañjabījaṃ triphalā suradāru saindhavam tulasī vartti dayanāñjanakaṃ tandrā nāśaṃ karoti nayanānām ### [3.3.2.137](https://indike.org/pramana/in.med.samhita.haritasamhita.3.3.2.137) kesaraṃ mātuluṅgasya śṛṅgaveraṃ sasaindhavam trikaṭusaṃyutaṃ kṛtvā ākaṇṭhāddhārayenmukhe ### [3.3.2.138](https://indike.org/pramana/in.med.samhita.haritasamhita.3.3.2.138) dantajihvāmukhaṃ tālugharṣaṇaṃ kārayedbudhaḥ kuryānniṣṭhīvanaṃ sarvaṃ vāraṃvāraṃ vidhānataḥ ### [3.3.2.139](https://indike.org/pramana/in.med.samhita.haritasamhita.3.3.2.139) tena kaṇṭhaviśuddhiḥ syācchleṣmāṇaṃ cāpakarṣati jihvāpaṭutvarucikṛtvāsaḥ śvāsaśca śāmyati ### [3.3.2.140](https://indike.org/pramana/in.med.samhita.haritasamhita.3.3.2.140) trakaṭucavyakāpathyā cūrṇaṃ saindhavasaṃyutam tena dantāṃstathā jihvāṃ gharṣayettālukāmalam ### [3.3.2.141](https://indike.org/pramana/in.med.samhita.haritasamhita.3.3.2.141) niṣṭhīvanaṃ galaśuddhirucikṛtkaphasūdanam hṛllāso nāśamāpnoti paṭutvaṃ kurute bhṛśam ### [3.3.2.142](https://indike.org/pramana/in.med.samhita.haritasamhita.3.3.2.142) yadi vā śītagātre ca tadā svedo vidhīyate svedāstrayodaśa jñeyāḥ svedavāraṇakāraṇāḥ ### [3.3.2.143](https://indike.org/pramana/in.med.samhita.haritasamhita.3.3.2.143) saṅkaraḥ prastuto nāḍīpariṣeko'pagāhanaḥ ātaṅko'smayanaḥ karṣaḥ kūṭī bhūkumbhireva ca ### [3.3.2.144](https://indike.org/pramana/in.med.samhita.haritasamhita.3.3.2.144) kūpo holāka ityete svedayanti trayodaśaḥ ### [3.3.2.145](https://indike.org/pramana/in.med.samhita.haritasamhita.3.3.2.145) kālasvedaṃ ghaṭīsvedaṃ vālukāsvedameva ca kārayeddhastapādābhyāṃ tathā śirasi cāture evaṃ no śāntiryadi vā dahellohaśalākayā ### [3.3.2.146](https://indike.org/pramana/in.med.samhita.haritasamhita.3.3.2.146) pādau dagdhe na cecchaityaṃ dahedvāṅguṣṭhamūlake tathā ca maṇibandhe ca hṛdi mūrdhni tathāpi vā ### [3.3.2.147](https://indike.org/pramana/in.med.samhita.haritasamhita.3.3.2.147) svedo lalāṭe himo vā narasya śītārditasyāpi sapicchalasya kaṇṭhasthito yasya na yāti vakṣo nūnaṃ samabhyeti gṛhaṃ hi mṛtyoḥ ### [3.3.2.148](https://indike.org/pramana/in.med.samhita.haritasamhita.3.3.2.148) saptāhe vā daśāhe vā dvādaśāhe'thavā punaḥ trayodaśe pañcadaśe praśamaṃ yāti hanti vā ### [3.3.2.149](https://indike.org/pramana/in.med.samhita.haritasamhita.3.3.2.149) atha pañcādaśāhe vā hanti rakṣati mānavam sannipāto mahāghoro jvaraḥ kālāgnisannibhaḥ ### [3.3.2.150](https://indike.org/pramana/in.med.samhita.haritasamhita.3.3.2.150) eṣā tridoṣamaryādā mokṣāya ca vadhāya ca sannipātasya doṣasya narasyāsya bhiṣagvara ### [3.3.2.151](https://indike.org/pramana/in.med.samhita.haritasamhita.3.3.2.151) sannipāte'ntardāhe manujaṃ yaḥ śītavāriṇā siñcet āturaḥ kathamapi jīvedvaidyaścāsau kathaṃ pūjyaḥ ### [3.3.2.152](https://indike.org/pramana/in.med.samhita.haritasamhita.3.3.2.152) yaḥ sannipātajaladhau patitaṃ manuṣyaṃ vaidyaḥ samuddharati kinna kṛtaṃ nu tena dharmeṇa vātha yaśasā vinayena yuktaḥ pūjāṃ ca kāṃ bhuvitale na labhettu vaidyaḥ ### [3.3.2.153](https://indike.org/pramana/in.med.samhita.haritasamhita.3.3.2.153) vātapittakaphaistribhiryuktastathā tridoṣajaḥ sa ca raktena saṃyukto jvaraḥ syātsānnipātikaḥ ### [3.3.2.154](https://indike.org/pramana/in.med.samhita.haritasamhita.3.3.2.154) na raktena vinā viddhi jvaraṃ vai sānnipātikam kvāthaiḥ pācanakairdoṣāḥ praśamaṃ yānti mānave ### [3.3.2.155](https://indike.org/pramana/in.med.samhita.haritasamhita.3.3.2.155) tasmātpraśamite doṣe raktaṃ naiva vilīyate tenaiva jāyate śophaḥ karṇamūle tu dāruṇaḥ ### [3.3.2.156](https://indike.org/pramana/in.med.samhita.haritasamhita.3.3.2.156) tasmāttasya pratīkāra kuryādraktavirecanam jalaukālābubhṛṅgaistu tataśca lepanaṃ hitam ### [3.3.2.157](https://indike.org/pramana/in.med.samhita.haritasamhita.3.3.2.157) bījapūrakamūlāni agnimanthastathaiva ca ālepanamidaṃ cāsya karṇamūlasya nāśanam ### [3.3.2.158](https://indike.org/pramana/in.med.samhita.haritasamhita.3.3.2.158) āgāradhūparajanīsumahauṣadhena siddhārthasaindhavavacāpayasā vimardya lepohitoraktavināśakārī śophavraṇasya śamano manujasya karṇe ### [3.3.2.159](https://indike.org/pramana/in.med.samhita.haritasamhita.3.3.2.159) yadā pāko bhavettasya kāryā tatra pratikriyā dhavārjunakadambatvagleplanaṃ vraṇarohaṇam ### [3.3.2.160](https://indike.org/pramana/in.med.samhita.haritasamhita.3.3.2.160) nimbāragvadhamūlānāṃ niśāyuktaṃ pralepanam srāvaṇaṃ pūyagandhānāṃ rohaṇaṃ syādvraṇeṣu ca ### [3.3.2.161](https://indike.org/pramana/in.med.samhita.haritasamhita.3.3.2.161) varjayecca divāsvapnaṃ yoṣitsaṅge bahūdakam śītāmbu jāgṛtiṃ rātrau vyāyāmaṃ śocanaṃ tathā ### [3.3.2.162](https://indike.org/pramana/in.med.samhita.haritasamhita.3.3.2.162) māṣāṃśca yavagodhūmatilaparṇīkameva ca masūratripuṭāṃścaitāṃstailañca dūratastyajet ### [3.3.2.163](https://indike.org/pramana/in.med.samhita.haritasamhita.3.3.2.163) māsamekaṃ vyavāyaṃ ca pakṣaikaṃ cātibhojanam varjayetkarṇamūlañca sukhaṃ tenopapadyate ### [3.3.2.164](https://indike.org/pramana/in.med.samhita.haritasamhita.3.3.2.164) ṣaṣṭikānnaṃ purāṇaṃ vā bālya sūpastathāḍhakī kulatthāmudgayūṣaṃ vā bhojane ca praśasyate ### [3.3.2.165](https://indike.org/pramana/in.med.samhita.haritasamhita.3.3.2.165) vārttākañca palāṇḍue ca kandaśākānparityajet etena sukhamāpnoti śīghraṃ rogādvimucyate ### [3.3.2.166](https://indike.org/pramana/in.med.samhita.haritasamhita.3.3.2.166) ante pittaṃ yadā tiṣṭhedbāhye śleṣmasamīraṇo tadāntardāhaśoṣaḥ syādbāhye sasvedaśītatā ### [3.3.2.167](https://indike.org/pramana/in.med.samhita.haritasamhita.3.3.2.167) tasyāmṛtāpayaḥ kvāthaṃ madhupippalisaṃyutam pāyayedāśu mucyeta jvarādvai sānnipātikāt ### [3.3.2.168](https://indike.org/pramana/in.med.samhita.haritasamhita.3.3.2.168) athavātiviṣā vālaṃ nāgaraṃ ghanaparpaṭam kvātho vā śarkarāyukta antardāhopaśāntaye ### [3.3.2.169](https://indike.org/pramana/in.med.samhita.haritasamhita.3.3.2.169) bāhye pittaṃ yadā tiṣṭhedante vā kaphamārutau tenoṣṇatvaṃ śarīrasya ante śaityaṃ ca jāyate ### [3.3.2.170](https://indike.org/pramana/in.med.samhita.haritasamhita.3.3.2.170) tasya śaṭhyādikaṃ kvāthaṃ prayuñjīyātkaphāpaham ### [3.3.2.171](https://indike.org/pramana/in.med.samhita.haritasamhita.3.3.2.171) yasyordhvāṅge vātakaphāvadhogaṃ pittameva ca tenārddhaṃ śītalaṃ gātramarddhe coṣṇaṃ ca jāyate ### [3.3.2.172](https://indike.org/pramana/in.med.samhita.haritasamhita.3.3.2.172) tasya rāsnādikaṃ kvāthaṃ prayuñjīyāttathoṣṇakam ### [3.3.2.173](https://indike.org/pramana/in.med.samhita.haritasamhita.3.3.2.173) yasyordhvaṃ raktapittañca madhye vātakaphāvubhau tenordhvaṃ jāyate coṣṇamadhaḥ śītaṃ prajāyate ### [3.3.2.174](https://indike.org/pramana/in.med.samhita.haritasamhita.3.3.2.174) tasya nāgarādikvāthaṃ yuñjīyādbhiṣaguttamaḥ ### [3.3.2.175](https://indike.org/pramana/in.med.samhita.haritasamhita.3.3.2.175) yasyoṣmā dṛśyate cāpi mandasraṣṭā ca jāyate bāhyavegaṃ vijānīyājjvaraḥ sādhyo vijānatā ### [3.3.2.176](https://indike.org/pramana/in.med.samhita.haritasamhita.3.3.2.176) yasyānte jāyate coṣmā tṛṣṇā dāhaḥ śirovyathā gambhīravegaṃ jānīyātkṛcchrasādhyo nṛṇāmapi ### [3.3.2.177](https://indike.org/pramana/in.med.samhita.haritasamhita.3.3.2.177) tasya kuryātpratīkāraṃ yogo'ṣṭādaśako nṛṇām ### [3.3.2.178](https://indike.org/pramana/in.med.samhita.haritasamhita.3.3.2.178) ante pittaṃ yadā tiṣṭheddehe vātakaphāvubhau tena śaityaṃ śarīrasya uṣṇatvaṃ karapādayoḥ ### [3.3.2.179](https://indike.org/pramana/in.med.samhita.haritasamhita.3.3.2.179) tasya rāsnādikaḥ kvāthaḥ pradeyaḥ pippalīyutaḥ ### [3.3.2.180](https://indike.org/pramana/in.med.samhita.haritasamhita.3.3.2.180) dehe pittaṃ yadā tiṣṭhedante vātakaphāvubhau tasyoṣmā jāyate dehe śītatvaṃ karapādayoḥ ### [3.3.2.181](https://indike.org/pramana/in.med.samhita.haritasamhita.3.3.2.181) tasya drākṣādikaḥ kvāthaḥ pradeyo guḍakānvitaḥ ### [3.3.2.182](https://indike.org/pramana/in.med.samhita.haritasamhita.3.3.2.182) yatra yatra bhavecchaityaṃ tatra svedo vidhīyate nātyuṣṇe svedanaṃ kāryaṃ jvarasyāsya vijānatā ### [3.3.2.183](https://indike.org/pramana/in.med.samhita.haritasamhita.3.3.2.183) kaphapittena niśceṣṭo bhavatyevānilaḥ sadā tasmādevānilādrogāḥ sambhavanti jvarādayaḥ ### [3.3.2.184](https://indike.org/pramana/in.med.samhita.haritasamhita.3.3.2.184) bhramaḥ śaityaṃ vihvalatā kampo viḍbhedanaṃ klamaḥ śramaḥ svedo jalpanañca jvaramokṣe bhavanti ca ### [3.3.2.185](https://indike.org/pramana/in.med.samhita.haritasamhita.3.3.2.185) prasvedakaṇḍū ca śirā ca puṣṭā tathā mukheṣu kṣavathurlaghutvam annābhilāṣo vipulendriyañca gataklamo gatarujo manuṣyaḥ ### [3.3.2.186](https://indike.org/pramana/in.med.samhita.haritasamhita.3.3.2.186) vimuktasyāpi hi śirogurutvaṃ naiva muñcati avimuktaṃ vijānīyājjvaraḥ punarupaiti tam ### [3.3.2.187](https://indike.org/pramana/in.med.samhita.haritasamhita.3.3.2.187) yadi dhātugataścaiva jvaro dehe prapadyate viṣamajvaraṃ jānīyātsa ca jñeyaścaturvidhaḥ ### [3.3.2.188](https://indike.org/pramana/in.med.samhita.haritasamhita.3.3.2.188) ekāhiko dvyāhikaśca tryāhikaśca tathāparaḥ velājvaraścaturtho'pi vijānīyādvicakṣaṇaḥ ### [3.3.2.189](https://indike.org/pramana/in.med.samhita.haritasamhita.3.3.2.189) śītaśca pūrvaṃ bhavati paścāduṣṇaśca jāyate sa sādhyo manuje proktaḥ śīghraṃ sidhyati bheṣajaiḥ ### [3.3.2.190](https://indike.org/pramana/in.med.samhita.haritasamhita.3.3.2.190) paścācca dāhamāpnoti jvaro bhavati dāruṇaḥ so'pi na mucyate śīghraṃ jvaro dhātukṣayaṅkaraḥ ### [3.3.2.191](https://indike.org/pramana/in.med.samhita.haritasamhita.3.3.2.191) trikorukaṭyāṃ rujavātapittaṃ syācca pittaṃ mastake sugbhramaśca pṛṣṭhe tanuśleṣmarujākaraṃ syāttridhā tṛtīyajvaralakṣaṇaṃ tat _First 200 of 257 passages. [Read on](https://indike.org/pramana/in.med.samhita.haritasamhita.3.3.2)_ ## Translations (1) - [English (machine translation)](https://indike.org/pramana/in.med.samhita.haritasamhita~en-mt.3.3.2) — English, machine translation ## Linked texts (13) - [Siddhayoga (Vṛndamādhava)](https://indike.org/pramana/in.med.sangraha.siddhayoga.1.11) — Vṛnda, Sanskrit - [Bhāvaprakāśa (another edition)](https://indike.org/pramana/in.med.sangraha.bhavaprakasa*alt.1.6.8) — Sanskrit - [Cakradatta (Cikitsāsaṅgraha)](https://indike.org/pramana/in.med.sangraha.cakradatta.1.57) — Cakrapāṇidatta, Sanskrit - [Suśrutasaṃhitā](https://indike.org/pramana/in.med.samhita.susruta.6.40.163) — Suśruta & Nāgārjuna (siddha/alchemist), Sanskrit - [Aṣṭāṅgasaṃgraha](https://indike.org/pramana/in.med.samhita.astangasamgraha.2.75) — Vāgbhaṭa, Sanskrit - [Āyurvedadīpikā (Carakatātparyaṭīkā) (ed. Yādavjī Trikamjī Ācārya, 1981 printing)](https://indike.org/pramana/in.med.samhita.caraka!cakrapani*jadavji.6.4.10.1) — Sanskrit - [Bhaiṣajyaratnāvalī (ed. Rājeśvaradatta Śāstrī)](https://indike.org/pramana/in.med.cikitsa.gauda.bhaisajyaratnavali*sastri1978.5.52) — Sanskrit - [Cikitsāsārasaṅgraha (Vaṅgasena)](https://indike.org/pramana/in.med.sangraha.vangasena.1.32) — Vaṅgasena, Sanskrit - [Gadanigraha](https://indike.org/pramana/in.med.sangraha.gadanigraha.14.153) — Soḍhala, Sanskrit - [Bṛhadyogataraṅgiṇī](https://indike.org/pramana/in.med.yoga.brhadyogatarangini.85.61) — Trimalla, Sanskrit - [Yogataraṅgiṇī (Trimalla)](https://indike.org/pramana/in.med.yoga.yogatarangini-trimalla-bhatta.83.61) — Trimalla, Sanskrit - [Vīrasiṃha](https://indike.org/pramana/in.med.sangraha.karmavipaka.virasimha.1.p12) — Bhoja, Sanskrit - [Vīrasiṃhāvalokana](https://indike.org/pramana/in.niti.dharma.prayascitta.karmavipaka.virasimhavalokana.p1.3) — Vīrasiṃha, Sanskrit --- Source: [https://indike.org/pramana/in.med.samhita.haritasamhita.3.3.2](https://indike.org/pramana/in.med.samhita.haritasamhita.3.3.2) · Pramāṇa