[Pramāṇa](https://indike.org/pramana/) › [Indian literature](https://indike.org/pramana/in) › [Medicine](https://indike.org/pramana/in.med) › [Early and ascribed compendia](https://indike.org/pramana/in.med.samhita) › [Suśrutasaṃhitā](https://indike.org/pramana/in.med.samhita.susruta) › [Bhanumati](https://indike.org/pramana/in.med.samhita.susruta!cakrapani) › 38.36 # The Compendium of Suśruta 38.36 Bhānumatī 38.36 - **Language:** Sanskrit ### [38.36](https://indike.org/pramana/in.med.samhita.susruta!cakrapani.38.36) saṃprati atrādhyāye kathitauṣadhavārgāṇāṃ tathā dravyasaṃgrahaṇīye tathā saṃśodhanaśamanīye ca ye vargāḥ paṭhanīyāstatra sarvālābhai'rdhavargeṇa yathālabdhena vā dvitrādidravyavargeṇa cikitsāprayogārthaṃ paribhāṣāmāha - samastaṃ vargamityādi | atra vargaśabdena prakaraṇāt samānakriyāṇāṃ dravyāṇāṃ samūha ucyate | tenātraivādhyāyatraye prāyeṇa samānakāryā vargā uktāḥ, teṣveveyaṃ paribhāṣā; yatra tu saṃyogaśaktyā prayogopadarśanaṃ na tatrārdhavargādiprayogaḥ, saṃyogāśakteranyatarasaṃyogānupapattāvapyarthakatvāt | na hi pānīyakalyāṇaghṛtādau yathālābhaṃ pāko bhavati; yatra tu samānavīryatayā ekatra prayogo gaṇokteṣu dravyeṣu bhavati, tatrānyatarāpāye'pi tacchaktīnāṃ dravyāṇāṃ prayogo'rthasādhako bhavatyeva, ata eva carake'pyetadviṣaya evoktaṃ- "vargamapi vargeṇopasṛjet, uktamapi yadyaugikaṃ manyeta tadapoddharet" (ca. vi. a. 8) ityādi| etaddravyasamūhānāṃ tulyavīryatayā vā prayogaṃ tathā saṃyogaśaktyā vā prayogaṃ vivekena jñātumuktamatrāpi-bhiṣak prājña iti| atra ca yadyapyardhavargaprayogo yathālābhaṃ prayogo'pi samastavargaprayogatulyatayā uktaḥ, tathā'pi samastavargaprayogasyaiva mahāphalatvaṃ jñeyaṃ, tasyaiva bahudravyaśaktiyogena mahāguṇatvāt; samastālābhe'rdhavārgādiprayogaścireṇālpakāryasādhako vā jñeyaḥ; anyathā yadi tulyaphalatvaṃ syāt sarvavargasyārdhādibhiḥ samaṃ tadā bahuprayāsasādhyaṃ sarvamardhavargādau svalpaprayāsasādhye samānaphale sati ko bāliśa upadiśedanutiṣṭhedvā, tasmāt sarvavargālābhe'rdhavārgādividhānametat | 33 ||iti śrīcakrapāṇidattaviracitāyāṃ suśrutatātparyadīpikāyāṃ bhānumatyāṃ sūtrasthāne miśrakādhyāyo nāma ṣaṭtriṃśattamo'dhyāyaḥ|| - [Previous: 37.32](https://indike.org/pramana/in.med.samhita.susruta!cakrapani.37.32) - [Next: 39.2](https://indike.org/pramana/in.med.samhita.susruta!cakrapani.39.2) - [Up: 38](https://indike.org/pramana/in.med.samhita.susruta!cakrapani.38) ## Linked texts (1) - [Suśrutasaṃhitā](https://indike.org/pramana/in.med.samhita.susruta.1.37.34) — Suśruta & Nāgārjuna (siddha/alchemist), Sanskrit --- Source: [https://indike.org/pramana/in.med.samhita.susruta!cakrapani.38.36](https://indike.org/pramana/in.med.samhita.susruta!cakrapani.38.36) · Pramāṇa