The Compendium of Suśruta 57

Bhānumatī 57

Language: Sanskrit

57.228

dravapāriśeṣyānmūtrāṇyāha-mūtrāṇītyādi | viśeṣaṇamiti gomūtrādīnāṃ viśeṣakaṃ bhedakadharmam | mūtraprayogasādhyeṣvityanenāviśeṣitamūtraprayoge gomūtrameva grāhyam | cetovikāraḥ unmādāpasmārau | kṣārapāke ye gārdabhaṃ mūtraṃ na paṭhanti te'tragrahaṇenaikaśaphatvāttatra grahaṇaṃ vadanti | mānuṣamabahuviṣayatayā uddeśānuktamapi viṣahantṛtayā'nyūnatārthaṃ paṭhyate |
atra mūtragrahaṇe vyavahārasiddhatvālloke vede ca strīgavīmūtrameva gṛhyate | yattu puṃliṅgānāṃ śukrasaṃbandhatayā gauravārnna grāhyaṃ mūtramucyate, tanna, śukrasaṃbandhasya strīṣvapi vidyamānatvāt; yadā'pi strītvena laghutvaṃ strīgavāṃ, tataśca tanmūtraṃ laghutvād grāhyaṃ tadapi na, yena sekādau vāte ca mūtrasya gauravamapyupayuktaṃ, tasmādyathoktameva sādhu || 217-228 ||

57.229

adhyāyamupasaṃharati—dravetyādi | samāsādityanena vistarasyāśakyatvād granthavistarabhayāccānabhidhānaṃ gamayati | uktānāṃ dravadravyāṇāṃ kālādibhāgena yogyatayā yojanaṃ viśeṣato rājñi sakalaprajāpālake kartavyamityāha—deśetyādi | dātuṃ dravadravyāṇi arhatīti yojyam |
iti śrīcakrapāṇidattaviracitāyāṃ suśrutatātparyadīpikāyāṃ bhānumatyāṃ sūtrasthāne dravadravyavidhirnāma pañcacatvāriṃśo'dhyāyaḥ |
45 ||

Linked texts (1)

Suśrutasaṃhitā — Suśruta & Nāgārjuna (siddha/alchemist), Sanskrit