[Pramāṇa](https://indike.org/pramana/) › [Indian literature](https://indike.org/pramana/in) › [Medicine](https://indike.org/pramana/in.med) › [Early and ascribed compendia](https://indike.org/pramana/in.med.samhita) › [The Compendium of Suśruta](https://indike.org/pramana/in.med.samhita.susruta) › 1.1 # The Compendium of Suśruta 1.1: prathamo+adhyāyaḥ / Suśrutasaṃhitā 1.1 - **Language:** Sanskrit ### prathamo+adhyāyaḥ / ### [1.1.1](https://indike.org/pramana/in.med.samhita.susruta.1.1.1) athāto vedotpattimadhyāyaṃ vyākhyāsyāmaḥ // ### [1.1.2](https://indike.org/pramana/in.med.samhita.susruta.1.1.2) yathovāca bhagavān dhanvantariḥ // ### [1.1.3](https://indike.org/pramana/in.med.samhita.susruta.1.1.3) atha khalu bhagavantamamaravaramṛṣigaṇaparivṛtamāśramasthaṃ kāśirājaṃ divodāsaṃ dhanvantarimaupadhenavavaitaraṇaurabhrapauṣkalāvata-†karavīryagopurarakṣitasuśrutaprabhṛtaya ūcuḥ // ### [1.1.4](https://indike.org/pramana/in.med.samhita.susruta.1.1.4) bhagavan śārīramānasāgantuvyādhibhirvividhavedanābhighātopadrutān sanāthānapyanāthavadviceṣṭamānān vikrośataśca mānavānabhisamīkṣya manasi naḥ pīḍā bhavati teṣāṃ sukhaiṣiṇāṃ rogopaśamārthamātmanaśca prāṇayātrārthaṃ pragāhitahetorāyurvedaṃ śrotumicchāma ihopadiśyamānaṃ atrā+āyattamaihikamāmuṣmikaṃ ca śreyaḥ tadbhagavantamupapannāḥ smaḥ śiṣyatveneti // ### [1.1.5](https://indike.org/pramana/in.med.samhita.susruta.1.1.5) tānuvāca bhagavān svāgataṃ vaḥ sarva evāmīmāṃsyā adhyāpyāśca bhavanto vatsāḥ // ### [1.1.6](https://indike.org/pramana/in.med.samhita.susruta.1.1.6) iha khalvāyurvedo nāmopāṅgamatharvavedasyānutpādyaivaprajāḥ ślokaśatasahasramadhyāyasahasraṃ ca kṛtavān svayambhūḥ tato+alpāyuṣṭvamalpamedhastvaṃ cālokya narāṇāṃ bhūyo+aṣṭadhā praṇītavān // ### [1.1.7](https://indike.org/pramana/in.med.samhita.susruta.1.1.7) tadyathā śalyaṃ śālākyaṃ kāyacikitsā bhūtavidyā kaumārabhṛtyaṃ agadatantraṃ rasāyanatantraṃ vājīkaraṇatantramiti // ### [1.1.8](https://indike.org/pramana/in.med.samhita.susruta.1.1.8) athāsya pratyaṅgalakṣaṇasamāsaḥ / ### [1.1.8\_2](https://indike.org/pramana/in.med.samhita.susruta.1.1.8_2) tatra śalyaṃ nāma vividhatṛṇakāṣṭhapāṣāṇapāṃśulohaloṣṭāsthibālanakhapūyāsrāvaduṣṭavraṇāntargarbhaśalyoddharaṇārthaṃ yantraśastrakṣārāgnipraṇidhānavraṇaviniścayārthaṃ ca // ### [1.1.8\_3](https://indike.org/pramana/in.med.samhita.susruta.1.1.8_3) śālākyaṃ nāmordhvajatrugatānāṃ śravaṇanayanavadanaghrāṇādisaṃśritānāṃ vyādhīnāmupaśamanārthaṃ // ### [1.1.8\_4](https://indike.org/pramana/in.med.samhita.susruta.1.1.8_4) kāyacikītsā nāma sarvāṅgasaṃśritānāṃ vyādhīnāṃ jvara{O.atīsāra}raktapittaśoṣonmādāpasmārakuṣṭhamehātisārādīnāmupaśamanārtham // ### [1.1.8\_5](https://indike.org/pramana/in.med.samhita.susruta.1.1.8_5) bhūtavidyā nāma devāsuragandharvayakṣarakṣaḥpitṛpiśācanāgagrahādyupasṛṣṭacetasāṃ śāntikarmabaloharaṇādigrahopaśamanārtham // ### [1.1.8\_6](https://indike.org/pramana/in.med.samhita.susruta.1.1.8_6) kaumārabhṛtyaṃ nāma kumārabharaṇadhātrīkṣīradoṣasaṃśodhanārthaṃ duṣṭastanyagrahasamutthānāṃ ca vyādhīnāmupaśamanārtham // ### [1.1.8\_7](https://indike.org/pramana/in.med.samhita.susruta.1.1.8_7) agadatantraṃ nāma sarpakīṭalūtāmūśikādidaṣṭaviṣavyañjanārthaṃ vividhaviṣasaṃyogopaśamanārthaṃ ca // ### [1.1.8\_8](https://indike.org/pramana/in.med.samhita.susruta.1.1.8_8) rasāyanatantraṃ nāma vayaḥsthāpanamāyurmedhābalakaraṃ rogāpaharaṇasamarthaṃ ca // ### [1.1.8\_9](https://indike.org/pramana/in.med.samhita.susruta.1.1.8_9) vājīkaraṇatantraṃ nāmālpaduṣṭakṣīṇaviśuṣkaretasāmāpyāyanaprasādopacayajanananimittaṃ praharṣajananārthaṃ ca // ### [1.1.9](https://indike.org/pramana/in.med.samhita.susruta.1.1.9) evamayamāyurvedo+aṣṭāṅga upadiśyate atra kasmai kimucyatāmiti // ### [1.1.10](https://indike.org/pramana/in.med.samhita.susruta.1.1.10) ta ūcuḥ asmākaṃ sarveṣāmeva śalyajñānaṃ mūlaṃ kṛtvopadiśatu bhagavāniti // ### [1.1.11](https://indike.org/pramana/in.med.samhita.susruta.1.1.11) sa uvācaivamastviti // ### [1.1.12](https://indike.org/pramana/in.med.samhita.susruta.1.1.12) ta ūcurbhūyo+api bhagavantam asmākamekamatīnāṃ matamabhisamīkṣya suśruto bhagavantaṃ prakṣyati asmai copadiśyamānaṃ vayamapyupadhārayiṣyāmaḥ // ### [1.1.13](https://indike.org/pramana/in.med.samhita.susruta.1.1.13) sa hovācaivamastviti // ### [1.1.14](https://indike.org/pramana/in.med.samhita.susruta.1.1.14) vatsa suśruta iha khalvāyurvedaprayojanaṃ vyādhyupasṛṣṭānāṃ vyādhiparimokaṣaḥ svasthasya rakṣaṇaṃ ca // ### [1.1.15](https://indike.org/pramana/in.med.samhita.susruta.1.1.15) āyurasmin vidyate+anena vā+āyurvindatītyāyurvedaḥ // ### [1.1.16](https://indike.org/pramana/in.med.samhita.susruta.1.1.16) tasyāṅgavaramādyaṃ pratyakṣāgamānumānopamānairaviruddhamucyamānamupadharaya // ### [1.1.17](https://indike.org/pramana/in.med.samhita.susruta.1.1.17) etaddhyaṅgaṃ prathamaṃ prāgabhighātavraṇasaṃrohāt yajñaśiraḥsandhānācca / śrūyate hi yathā rudreṇa yajñasya śiraśchinnamiti tato devā aśvināvabhigamyocuḥ bhagavantau naḥ śreṣṭhatamau yuvāṃ bhaviṣyathaḥ bhavadbhyāṃ yajñasyaśeraḥ sandhātavyamiti / tāvūcaturevamastviti / atha tayorarthe devā indraṃ yajñabhagena prāsādayan / tābhyāṃ yajñasya śiraḥ saṃhitam iti // ### [1.1.18](https://indike.org/pramana/in.med.samhita.susruta.1.1.18) aṣṭāsvapi cāyurvedatantreṣvetadevādhikamabhimataṃ āmāśukriyākaraṇādyantraśastrakṣārāgnipraṇidhānāt sarvatantrasāmānyācca // ### [1.1.19](https://indike.org/pramana/in.med.samhita.susruta.1.1.19) tadidaṃ śāśvataṃ puṇyaṃ svargyaṃ yaśasyamāyuṣyaṃ vṛttikaraṃ ceti // ### [1.1.20](https://indike.org/pramana/in.med.samhita.susruta.1.1.20) brahmā provāca tataḥ prajāpatiradhijage tasmādaśvinau aśvibhyāmindraḥ indrādaḥaṃ mayā tviha pradeyamarthibhyaḥ prajāhitahetoḥ // ### [1.1.21](https://indike.org/pramana/in.med.samhita.susruta.1.1.21) bhavati cātra ### [1.1.21\_2](https://indike.org/pramana/in.med.samhita.susruta.1.1.21_2) ahaṃ hi dhanvantarirādidevo jarārujāmṛtyuharo+amarāṇām / ### [1.1.21\_3](https://indike.org/pramana/in.med.samhita.susruta.1.1.21_3) śalyāṅgamaṅgairaparairupetaṃ prāpto+asmi gāṃ bhūya ihopadeṣṭum // ### [1.1.22](https://indike.org/pramana/in.med.samhita.susruta.1.1.22) asmin śāstre pañcamahābhūtaśarīrisamavāyaḥ puruṣa ityucyate / tasmin kriyā so+adhiṣṭhānaṃ kasmāt lokasya dvaividhyāt loko hi dvividhaḥ sthāvaro jaṅgamaśca dvividhātmaka evāgneyaḥ saumyaśca tadbhūyastvāt pañcātmako vā tatra caturvidho bhūtagrāmaḥ saṃsvedajarāyujāṇḍajodbhijjasaṃjñaḥ tatra puruṣaḥ pradhānaṃ tasyopakaraṇamanyat tasmāt puruṣo+adhiṣṭhānam // ### [1.1.23](https://indike.org/pramana/in.med.samhita.susruta.1.1.23) tadduḥkhasaṃyogā vyādhaya ucyante // ### [1.1.24](https://indike.org/pramana/in.med.samhita.susruta.1.1.24) te caturvidhāḥ āgantavaḥ śārīrāḥ mānasāḥ svābhāvikāśceti // ### [1.1.25](https://indike.org/pramana/in.med.samhita.susruta.1.1.25) teṣāmāgantavo+abhighātanimittāḥ // ### [1.1.25\_2](https://indike.org/pramana/in.med.samhita.susruta.1.1.25_2) śārīrāstvannapānamūlā vātapittakaphaśoṇitasannipātavaiṣamyanimittāḥ // ### [1.1.25\_3](https://indike.org/pramana/in.med.samhita.susruta.1.1.25_3) mānasāstu krodhaśokabhayaharṣaviṣāderṣyābhyasūyādainyamātsaryakāmalobhaprabhṛtaya icchādveṣabhedairbhavanti // ### [1.1.25\_4](https://indike.org/pramana/in.med.samhita.susruta.1.1.25_4) svābhāvikāstu kṣutpipāsājarāmṛtyunidrāprakṛtayaḥ // ### [1.1.26](https://indike.org/pramana/in.med.samhita.susruta.1.1.26) ta ete manaḥśarīrādhiṣṭhānāḥ // ### [1.1.27](https://indike.org/pramana/in.med.samhita.susruta.1.1.27) teṣāṃ saṃśodhanasaṃśamanāhārācārāḥ samyakprayuktā nigrahahetavaḥ // ### [1.1.28](https://indike.org/pramana/in.med.samhita.susruta.1.1.28) prāṇināṃ punarmūlamāhāro balavarṇaujasāṃ ca sa ṣaṭsu raseṣvāyattaḥ rasāḥ punardravyāśrayāḥ dravyāṇi punaroṣadhayaḥ / tāstu dvividhāḥ sthāvarā jaṅgamāśca // ### [1.1.29](https://indike.org/pramana/in.med.samhita.susruta.1.1.29) tāsāṃ sthāvarāścaturvidhāḥ vanaspatayo vṛkṣā vīrudha oṣadhaya iti / tāsu apuṣpāḥ phalavanto vanaspatayaḥ puṣpaphalavanto vṛkṣāḥ pratānavatyaḥ stambinyaśca vīrudhaḥ phalapākaniṣṭhā oṣadhaya iti // ### [1.1.30](https://indike.org/pramana/in.med.samhita.susruta.1.1.30) jaṅgamāḥ khalvapi catuvidhāḥ jarāyujāṇḍajasvedajodbhijjāḥ / tatra paśumanuṣyavyālādayo jarāyujāḥ khagasarpasarīsṛpaprabhṛtayo+aṇḍajāḥ kṛmikīṭapipīlikāprabhṛtayaḥ svedajāḥ indragopamaṇḍūkaprabhṛtaya udbhijjāḥ // ### [1.1.31](https://indike.org/pramana/in.med.samhita.susruta.1.1.31) tatra sthāvarebhyastvakpatrapuṣpaphalamūlakandaniryāsasvarasādayaḥ prayojanavantaḥ jaṅgamebhyaścarmanakharomarudhirādayaḥ // ### [1.1.32](https://indike.org/pramana/in.med.samhita.susruta.1.1.32) pārthivāḥ suvarṇarajatamaṇimuktāmanaḥśilāmṛtkapālādayaḥ // ### [1.1.33](https://indike.org/pramana/in.med.samhita.susruta.1.1.33) kālakṛtāḥ pravātanivātātapacchāyājyotsnātamaḥśītoṣṇavarṣāhorātrapakṣamāsartvayanādayaḥ saṃvatsaraviśeṣāḥ // ### [1.1.34](https://indike.org/pramana/in.med.samhita.susruta.1.1.34) ta ete svabhāvata eva doṣāṇāṃ sañcayaprakopapraśamapratīkārahetavaḥ prayojanavantaśca // ### [1.1.35](https://indike.org/pramana/in.med.samhita.susruta.1.1.35) bhavanti cātra ślokāḥ ### [1.1.35\_2](https://indike.org/pramana/in.med.samhita.susruta.1.1.35_2) śārīrāṇāṃ vikārāṇāmeṣa vargaścatuvidhaḥ / ### [1.1.35\_3](https://indike.org/pramana/in.med.samhita.susruta.1.1.35_3) prakope praśame caiva heturuktaścikitsakaiḥ // ### [1.1.36](https://indike.org/pramana/in.med.samhita.susruta.1.1.36) āgantavastu ye rogāste dvidhā nipatanti hi / ### [1.1.36\_2](https://indike.org/pramana/in.med.samhita.susruta.1.1.36_2) manasyanye śarīre+anye teṣāṃ tu dvividhā kriyā // ### [1.1.37](https://indike.org/pramana/in.med.samhita.susruta.1.1.37) śarīrapatitānāṃ tu śārīravadupakramaḥ / ### [1.1.37\_2](https://indike.org/pramana/in.med.samhita.susruta.1.1.37_2) mānasānāṃ tu śabdādiriṣṭo vargaḥ sukhāvahaḥ // ### [1.1.38](https://indike.org/pramana/in.med.samhita.susruta.1.1.38) evametat puruṣo vyādhirauṣadhaṃ kriyākāla iti catuṣṭayaṃ samāsena vyākhyātam / tatra puruṣagrahaṇāttatsaṃbhavadravyasamūho bhūtādiruktastadaṅgapratyaṅgavikalpāśca tvaṅnāṃsāsthisirāsnāyuprabhṛtayaḥ vyādhigrahaṇādvātapittakaphaśoṇitasannipātavaiṣamyanimittāḥ sarva eva vyādhayo vyākhyātāḥ oṣadhagrahaṇāddravyarasaguṇavīryavipākānāmādeśaḥ kriyāgrahaṇācchedyādīni snehādīni ca karmāṇi vyākhyātāni kālagrahaṇāt savakriyākālānāmādeśaḥ // ### [1.1.39](https://indike.org/pramana/in.med.samhita.susruta.1.1.39) bhavati cātra / ### [1.1.39\_2](https://indike.org/pramana/in.med.samhita.susruta.1.1.39_2) bījaṃ cikitsitasyaitatsamāsena prakīrtitam / ### [1.1.39\_3](https://indike.org/pramana/in.med.samhita.susruta.1.1.39_3) saviṃśamadhyāyaśatamasya vyākhyā bhaviṣyati // ### [1.1.40](https://indike.org/pramana/in.med.samhita.susruta.1.1.40) tacca saviṃśamadhyāyaśataṃ pañcasu sthāneṣu sūtranidānaśārīracikitsitakalpeṣvarthavaśāt saṃvibhajya uttare tantre śeṣānarthān vyākhyāsyāmaḥ // ### [1.1.41](https://indike.org/pramana/in.med.samhita.susruta.1.1.41) bhavati cātra / ### [1.1.41\_2](https://indike.org/pramana/in.med.samhita.susruta.1.1.41_2) svayambhuvā proktamidaṃ sanātanaṃ paṭheddhi yaḥ kāśipatiprakāśitam / ### [1.1.41\_3](https://indike.org/pramana/in.med.samhita.susruta.1.1.41_3) sa puṇyakarmā bhuvi pūjito nṛpairasukṣaye śakrasalokatāṃ vrajet // ### [1.1.41\_1](https://indike.org/pramana/in.med.samhita.susruta.1.1.41_1) iti suśrutasaṃhitāyāṃ sūtrasthāne vedotpattirnāma prathamo+adhyāyaḥ // ## Commentaries (2) - [Nibandhasaṅgraha](https://indike.org/pramana/in.med.samhita.susruta!dalhana.1.2) — Ḍalhaṇa, Sanskrit - [Bhānumatī](https://indike.org/pramana/in.med.samhita.susruta!cakrapani.1.2.1) — Cakrapāṇidatta, Sanskrit ## Linked texts (3) - [Āyurvedadīpikā (Carakatātparyaṭīkā) (ed. Yādavjī Trikamjī Ācārya, 1981 printing)](https://indike.org/pramana/in.med.samhita.caraka!cakrapani*jadavji.1.9.3.1) — Sanskrit - [Āyurvedīya Hitopadeśa](https://indike.org/pramana/in.med.sangraha.samhitasara.ayurvediyahitopadesa.2.8) — Raṇajitrāya Desāī, Sanskrit - [Anupānadarpaṇa](https://indike.org/pramana/in.med.pathya.anupanadarpana.2.2) — Jñānasarāmaśarman, Sanskrit --- Source: [https://indike.org/pramana/in.med.samhita.susruta.1.1](https://indike.org/pramana/in.med.samhita.susruta.1.1) · Pramāṇa