[Pramāṇa](https://indike.org/pramana/) › [Indian literature](https://indike.org/pramana/in) › [Medicine](https://indike.org/pramana/in.med) › [Early and ascribed compendia](https://indike.org/pramana/in.med.samhita) › [The Compendium of Suśruta](https://indike.org/pramana/in.med.samhita.susruta) › 1.21 # The Compendium of Suśruta 1.21: ekaviṃśatitamo+adhyāyaḥ / Suśrutasaṃhitā 1.21 - **Language:** Sanskrit ### ekaviṃśatitamo+adhyāyaḥ / ### [1.21.1](https://indike.org/pramana/in.med.samhita.susruta.1.21.1) athāto vraṇapraśnamadhyāyaṃ vyākhyāsyāmaḥ // ### [1.21.2](https://indike.org/pramana/in.med.samhita.susruta.1.21.2) yathovāca bhagavān dhanvantariḥ // ### [1.21.3](https://indike.org/pramana/in.med.samhita.susruta.1.21.3) vātapittaśleṣmāṇa eva dehasaṃbhavahetavaḥ / tairevāvyāpannairadhomadhyordhvasanniviṣṭaiḥ śarīramidaṃ dhāryate+agāramiva sthūṇābhistisṛbhirataśca tristhūṇamāhureke / ta eva ca vyāpannāḥ pralayahetavaḥ / tadebhireva śoṇitacaturthaiḥ saṃbhavasthitipralayeṣvapyavirahitaṃ śarīraṃ bhavati // ### [1.21.4](https://indike.org/pramana/in.med.samhita.susruta.1.21.4) bhavati cātra / ### [1.21.4\_2](https://indike.org/pramana/in.med.samhita.susruta.1.21.4_2) narte dehaḥ kaphādasti na pittānna ca mārutāt / ### [1.21.4\_3](https://indike.org/pramana/in.med.samhita.susruta.1.21.4_3) śoṇitādapi vā nityaṃ deha etaistu dhāryate // ### [1.21.5](https://indike.org/pramana/in.med.samhita.susruta.1.21.5) tatra vā gatigandhanayoriti dhātuḥ tapa santāpe śliṣa āliṅgane eteṣāṃ kṛdvihitaiḥ pratyayairvātaḥ pittaṃ śleṣmeti ca rūpāṇi bhavanti // ### [1.21.6](https://indike.org/pramana/in.med.samhita.susruta.1.21.6) doṣasthānānyata ūrdhvaṃ vakṣyāmaḥ tatra samāsena vātaḥ śroṇigudasaṃśrayaḥ taduparyadho nābheḥ pakvāśayaḥ pakvāmāśayamadhyaṃ pittasya āmāśayaḥ śleṣmaṇaḥ // ### [1.21.7](https://indike.org/pramana/in.med.samhita.susruta.1.21.7) ataḥ paraṃ pañcadhā vibhajyante / tatra vātasya vātavyādhau vakṣyāmaḥ pittasya yakṛtplīhānau hṛdayaṃ dṛṣtistvak pūrvoktaṃ ca śleṣmaṇastūraḥśiraḥkaṇṭhasandhaya iti pūrvoktaṃ ca etāni khalu doṣāṇāṃ sthānānyavyāpannānām // ### [1.21.8](https://indike.org/pramana/in.med.samhita.susruta.1.21.8) visargādānavikṣepaiḥ somasūryānilā yathā / ### [1.21.8\_2](https://indike.org/pramana/in.med.samhita.susruta.1.21.8_2) dhārayanti jagaddehaṃ kaphapittānilāstathā // ### [1.21.9](https://indike.org/pramana/in.med.samhita.susruta.1.21.9) tatra jijñāsyaṃ kiṃ pittavyatirekādanyo+agniḥ āhosvit pittamevāgniriti / atrocyate na khalu pittavyatirekādanyo+agnirupalabhyate āgneyatvāt pitte dahanapacanādiṣvabhipravartamāneṣvagnivadupacāraḥ kriyate+antaragniriti kṣiṇe hyagniguṇe tatsamānadravyopayogādativṛddhe śītakriyopayogādāgamācca paśyāmo na khalu pittavyatirekādanyo+agniriti // ### [1.21.10](https://indike.org/pramana/in.med.samhita.susruta.1.21.10) taccādṛṣṭahetukena viśeṣeṇa pakvāmāśayamadhyasthaṃ pittaṃ caturvidhamannapānaṃ pacati vivecayati ca doṣarasamūtrapurīṣāṇi tatrasthameva cātmaśaktyā śeṣāṇāṃ pittasthānānāṃ śarīrasya cāgnikarmaṇā+anugrahaṃ karoti tasmin pitte pācako+agniriti saṃjñā yattu yakṛtplīhnoḥ pittaṃ tasmin rañjako+agniriti saṃjñā sa rasasya rāgakṛduktaḥ yat pittaṃ hṛdayasaṃsthaṃ tasmin sādhako+agniriti saṃjñā so+abhiprārthitamanorathasādhanakṛduktaḥ yaddṛṣṭyāṃ pittaṃ tasminnālocako+agniriti saṃjñā sa rūpagrahaṇādhikṛtaḥ yattu tvaci pittaṃ tasmin bhrājako+agniriti saṃjñā so+abhyaṅgapariṣekāvagāhāvalepanādīnāṃ kriyādravyāṇāṃ paktā chāyānāṃ ca prakāśakaḥ // ### [1.21.11](https://indike.org/pramana/in.med.samhita.susruta.1.21.11) pittaṃ tīkṣṇaṃ dravam pūti nīlaṃ pītaṃ tathaiva ca / ### [1.21.11\_2](https://indike.org/pramana/in.med.samhita.susruta.1.21.11_2) uṣṇaṃ kaṭurasaṃ caiva vidagdhaṃ cāmlameva ca // ### [1.21.12](https://indike.org/pramana/in.med.samhita.susruta.1.21.12) ata ūrdhvaṃ śleṣmasthānānyanuvyākhyāsyāmaḥ / tatra āmāśayaḥ pittāśayasyopariṣṭhāttatpratyanīkatvādūrdhvagatitvāttejasaścandra iva ādityasya sa caturvidhasyāhārasyādhāraḥ sa ca tatraudakairguṇairāhāraḥ praklinno bhinnasaṃghātaḥ sukhajaraśca bhavati // ### [1.21.13](https://indike.org/pramana/in.med.samhita.susruta.1.21.13) mādhuryāt picchilatvācca prakleditvāttathaiva ca / ### [1.21.13\_2](https://indike.org/pramana/in.med.samhita.susruta.1.21.13_2) āmāśaye saṃbhavati śleṣmā madhuraśītalaḥ // ### [1.21.14](https://indike.org/pramana/in.med.samhita.susruta.1.21.14) sa tatrastha eva svaśaktyā śeṣāṇāṃ śleṣmasthānānāṃ śarīrasya codakakarmaṇā+anugrahaṃ karoti uraḥsthastrikasandhāraṇamātmavīryeṇānnarasasahitena hṛdayāvalambanaṃ karoti jihvāmūlakaṇṭhastho jihvendriyasya saumyatvāt samyagrasajñāne vartate śiḥrasthaḥ snehasaṃtarpaṇādhikṛtatvādindriyāṇāmātmavīryeṇānugrahaṃ karoti sandhisthastu śleṣmā sarvasandhisaṃśleṣāt sarvasandhyagranuhaṃ karoti // ### [1.21.15](https://indike.org/pramana/in.med.samhita.susruta.1.21.15) śleṣmā śveto guruḥ snigdhaḥ picchilaḥ śīta eva ca / ### [1.21.15\_2](https://indike.org/pramana/in.med.samhita.susruta.1.21.15_2) madhurastvavigdhaḥ syādvidagdho lavaṇaḥ srṃtaḥ // ### [1.21.16](https://indike.org/pramana/in.med.samhita.susruta.1.21.16) śoṇitasya sthānaṃ yakṛtplīhānau tacca prāgabhihitaṃ tatrasthameva śeṣāṇāṃ śoṇitasthānānāmanugrahaṃ karoti // ### [1.21.17](https://indike.org/pramana/in.med.samhita.susruta.1.21.17) anuṣṇaśītaṃ madhuraṃ snigdhaṃ raktaṃ ca varṇataḥ / ### [1.21.17\_2](https://indike.org/pramana/in.med.samhita.susruta.1.21.17_2) śoṇitaṃ guru visraṃ syādvidāhaścāsya pittavat // ### [1.21.18](https://indike.org/pramana/in.med.samhita.susruta.1.21.18) etāni khalu doṣasthānāni eṣu saṃcīyante doṣāḥ / prāk saṃcayaheturuktaḥ / tatra saṃcitānāṃ khalu doṣāṇāṃ stabdhapūrṇakoṣṭhatā pītāvabhāsatā mandoṣmatā cāṅgānāṃ gauravamālasyaṃ cayakāraṇavidveṣaśceti liṅgāni bhavanti / tatra prathamaḥ kriyākālaḥ // ### [1.21.19](https://indike.org/pramana/in.med.samhita.susruta.1.21.19) ata ūrdhvaṃ prakopaṇāni vakṣyāmaḥ / tatra balavadvigrahātivyāyāmavyavāyādhyayanaprapatanapradhāvanaprapīḍanābhighātalaṅghanaplavanataraṇarātrijāgaraṇabhāraharaṇagajaturagarathapadāticaryākaṭukaṣāyatiktarūkṣalaghuśītavīryaśuṣkaśākavallūravarakoddālakakoradūṣaśyāmākanīvāramudgamasūrāḍhakīhareṇukalāyaniṣpāvānaśanaviṣamāśanādhyaśanavātamūtrapurīṣaśukracchardikṣavathūdgārabāṣpavegavighātādibhirviśeṣairvāyuḥ prakopamāpadyate // ### [1.21.20](https://indike.org/pramana/in.med.samhita.susruta.1.21.20) sa śītābhrapravāteṣu gharmānte ca viśeṣataḥ / ### [1.21.20\_2](https://indike.org/pramana/in.med.samhita.susruta.1.21.20_2) pratyūṣasyaparāhṇe tu jīrṇe+anne ca prakupyati // ### [1.21.21](https://indike.org/pramana/in.med.samhita.susruta.1.21.21) krodhaśokabhayāyāsopavāsavidagdhamaithunopagamanakaṭvamlalavaṇatīkṣṇoṣṇalaghuvidāhitilatailapiṇyākakulatthasarṣapātasīharitakaśākagodhāmatsyājāvikamāṃsadadhitakrakūrcikāmastusauvīrakasurāvikārāmlaphalakaṭvaraprabhṛtibhiḥ pittaṃ prakopamāpadyate // ### [1.21.22](https://indike.org/pramana/in.med.samhita.susruta.1.21.22) taduṣṇairuṣṇakāle ca meghānte ca viṣeśataḥ / ### [1.21.22\_2](https://indike.org/pramana/in.med.samhita.susruta.1.21.22_2) madhyāhne cārdharātre ca jīryatyanne ca kupyati // ### [1.21.23](https://indike.org/pramana/in.med.samhita.susruta.1.21.23) divāsvapnāvyāyāmālasyamadhurāmlalavaṇaśītasnigdhagurupicchilābhiṣyandihāyanakayavakanaiṣadhetkaṭamāṣamahāmāṣagodhūma-tila-piṣṭa-vikṛtidadhidugdhakṛśarāpāyasekṣu-vikārānūpaudakamāṃsavasābisamṛṇālakaserukaśṛṅgāṭakamadhura-vallī-phalasamaśanādhyaśanaprabhṛtibhiḥ śleṣmā prakopamāpadyate // ### [1.21.24](https://indike.org/pramana/in.med.samhita.susruta.1.21.24) sa śītaiḥ śītakāle ca vasante ca viśeṣataḥ / ### [1.21.24\_2](https://indike.org/pramana/in.med.samhita.susruta.1.21.24_2) pūrvāhṇe ca pradoṣe ca bhuktamātre prakupyati // ### [1.21.25](https://indike.org/pramana/in.med.samhita.susruta.1.21.25) pittaprakopaṇaireva cābhīkṣṇaṃ dravasnigdhagurubhirāhārairdivāsvapnakrodhānalātapaśramābhighātājīrṇaviruddhādhyaśanādibhirviśeṣairasṛk prakopamāpadyate // ### [1.21.26](https://indike.org/pramana/in.med.samhita.susruta.1.21.26) yasmādraktmaṃ vinā doṣairnā kadācit prakupyati / ### [1.21.26\_2](https://indike.org/pramana/in.med.samhita.susruta.1.21.26_2) tasmāttasya yathādoṣaṃ kālaṃ vidyātprakopaṇe // ### [1.21.27](https://indike.org/pramana/in.med.samhita.susruta.1.21.27) teṣāṃ prakopāt koṣṭhatodasaṃcaraṇāmlikāpipāsāparidāhānnadveṣahṛdayotkledāśca jāyante / tatra dvitīyaḥ kriyākālaḥ // ### [1.21.28](https://indike.org/pramana/in.med.samhita.susruta.1.21.28) ata ūrdhvaṃ prasaraṃ vakṣyāmaḥ teṣāmebhirātaṅkaviśeṣaiḥ prakupitānāṃ(paryuṣita) kiṇvodakapiṣṭasamavāya ivodriktānāṃ prasaro bhavati / teṣāṃ vāyurgatimattvāt prasaraṇahetuḥ satyapyacaitanye / sa hi rajobhūyiṣṭhaḥ rajaśca pravartakaṃ sarvabhāvānām / yathā mahānudakasaṃcayo+ativṛddhaḥ setumavadāryāpareṇodakena vyāmiśraḥ sarvataḥ pradhāvati evaṃ doṣāḥ kadācidekaśo dviśaḥ samastāḥ śoṇitasahitā vā+anekadhā prasaranti / tadyathā vātaḥ pittaṃ śleṣmā śoṇitaṃ vātapitte vātaśleṣmāṇau pittaśleṣmāṇau vātaśoṇite pittaśoṇite śleṣmaśoṇite vātapittaśoṇitāni vātaśleṣmaśoṇitāni pittaśleṣmaśoṇitāni vātapittakaphāḥ vātapittakaphaśoṇitāni ityevaṃ pañcadaśadhā prasanti // ### [1.21.29](https://indike.org/pramana/in.med.samhita.susruta.1.21.29) kṛtsne+ardhe+avayave vā+api yatrāṅge kupito bhṛśam / ### [1.21.29\_2](https://indike.org/pramana/in.med.samhita.susruta.1.21.29_2) doṣo vikāraṃ nabhasi meghavattatra varṣati // ### [1.21.30](https://indike.org/pramana/in.med.samhita.susruta.1.21.30) nātyarthaṃ kupitaścāpi līno mārgeṣu tiṣṭhati / ### [1.21.30\_2](https://indike.org/pramana/in.med.samhita.susruta.1.21.30_2) niṣpratyanīkaḥ kālena hetumāsādya kupyati // ### [1.21.31](https://indike.org/pramana/in.med.samhita.susruta.1.21.31) tatra vāyoḥ pittasthānagatasya pittavat pratīkāraḥ pittasya ca kaphasthānagatasya kaphavat kaphasya ca vātasthānagatasya vātavat eṣa kriyāvibhāgaḥ // ### [1.21.32](https://indike.org/pramana/in.med.samhita.susruta.1.21.32) evaṃ prakupitānāṃ prasaratāṃ ca vāyorvimārgagamanāṭopau oṣacoṣaparidāhadhūmāyanāni pittasya arocakāvipākāṅgasādāśchardiśceti śleṣmaṇo liṅgāni bavanti tatra tṛtīyaḥ kriyākālaḥ // ### [1.21.33](https://indike.org/pramana/in.med.samhita.susruta.1.21.33) ata ūrdhvaṃ sthānasaṃśrayaṃ / evaṃ prakupitāḥ tāṃstān śarīrapradeśānāgamya tāṃstān vyādhīn janayanti / te yadodarasanniveśaṃ kurvanti tadā gulmavidradhyudarāgnisaṅgānāhavisūcikātisāraprabhṛtīn janayanti bastigatāḥ pramehāśmarīmūtrāghātamūtradoṣaprabhṛtīn vṛṣaṇagatā vṛddhīḥ meḍhragatā niruddhaprakaśopadaṃśaśūkadoṣaprabhṛtīn gudagatā bhagandarārśaḥprabhṛtīn ūrdhvajatrugatāstūrdhvajān tavaṅnāṃsaśoṇitasthāḥ kṣudrarogān kuṣṭhāni visarpāṃśca medogatā granthyapacyarbudagalagaṇḍālajīprabhṛtīn asthigatā vidradhyanuśayīprabhṛtīn pādagatāḥ ślīpadavātaśoṇitavātakaṇṭakaprabhṛtīn sarvāṅgāgatā jvarasaravāṅgarogaprabhṛtīn teṣāmevamabhiniviṣṭānāṃ pūrvarūpaprādurbhāvaḥ taṃ pratirogaṃ vakṣyāmaḥ / tatra pūrvarūpagateṣu caturthaḥ kriyākālaḥ // ### [1.21.34](https://indike.org/pramana/in.med.samhita.susruta.1.21.34) ata ūrdhvaṃ vyādherdarśanaṃ vakṣyāmaḥ śophārbudagranthividradhivisarpaprabhṛtīnāṃ pravyaktalakṣaṇatā jvarātīsāraprabhṛtīnāṃ ca / tatra pañcamaḥ kriyākālaḥ // ### [1.21.35](https://indike.org/pramana/in.med.samhita.susruta.1.21.35) ata ūrdhvameteṣāmavadīrṇānāṃ braṇabhāvamāpannānāṃ ṣaṣṭhaḥ kriyākālaḥ jvarātisāraprabhṛtīnāṃ ca dīrghakālānubandhaḥ / tatrāpratikriyamāṇe+asādhyatāmupayānti // ### [1.21.36](https://indike.org/pramana/in.med.samhita.susruta.1.21.36) bhavanti cātra / ### [1.21.36\_2](https://indike.org/pramana/in.med.samhita.susruta.1.21.36_2) saṃcayaṃ ca prakopaṃ ca prasaraṃ sthānasaṃśrayam / ### [1.21.36\_3](https://indike.org/pramana/in.med.samhita.susruta.1.21.36_3) vyaktiṃ bhedaṃ ca yo vetti doṣāṇāṃ sa bhavedbhiṣak // ### [1.21.37](https://indike.org/pramana/in.med.samhita.susruta.1.21.37) saṃcaye+apahṛtā doṣā labhante nottarā gatīḥ / ### [1.21.37\_2](https://indike.org/pramana/in.med.samhita.susruta.1.21.37_2) te tūttarāsu gatiṣu bhavanti balavattarāḥ // ### [1.21.38](https://indike.org/pramana/in.med.samhita.susruta.1.21.38) sarvairbhāvaistribhirvā+api dvābhyāmekena vā punaḥ / ### [1.21.38\_2](https://indike.org/pramana/in.med.samhita.susruta.1.21.38_2) saṃsarge kupitaḥ kruddhaṃ doṣaṃ doṣo+anudhāvati // ### [1.21.39](https://indike.org/pramana/in.med.samhita.susruta.1.21.39) saṃsarge yo garīyān syādupakramyaḥ sa vai bhavet / ### [1.21.39\_2](https://indike.org/pramana/in.med.samhita.susruta.1.21.39_2) śeṣadoṣāvirodhena sannipāte tathaiva ca // ### [1.21.40](https://indike.org/pramana/in.med.samhita.susruta.1.21.40) vṛṇoti yasmāt rūḍhe+api vraṇavastu na naśyati / ### [1.21.40\_2](https://indike.org/pramana/in.med.samhita.susruta.1.21.40_2) ādehadhāraṇāttasmāddraṇa ityucyate budhaiḥ // ### [1.21.40\_1](https://indike.org/pramana/in.med.samhita.susruta.1.21.40_1) iti suśrutasaṃhitāyāṃ sūtrashtāne vraṇapraśnādhyāyo nāmaikaviṃśodhyāyaḥ ## Commentaries (2) - [Nibandhasaṅgraha](https://indike.org/pramana/in.med.samhita.susruta!dalhana.24.2) — Ḍalhaṇa, Sanskrit - [Bhānumatī](https://indike.org/pramana/in.med.samhita.susruta!cakrapani.22.2) — Cakrapāṇidatta, Sanskrit ## Linked texts (1) - [Bhāvaprakāśa (another edition)](https://indike.org/pramana/in.med.sangraha.bhavaprakasa*alt.1.5.343) — Sanskrit --- Source: [https://indike.org/pramana/in.med.samhita.susruta.1.21](https://indike.org/pramana/in.med.samhita.susruta.1.21) · Pramāṇa