[Pramāṇa](https://indike.org/pramana/) › [Indian literature](https://indike.org/pramana/in) › [Medicine](https://indike.org/pramana/in.med) › [Early and ascribed compendia](https://indike.org/pramana/in.med.samhita) › [The Compendium of Suśruta](https://indike.org/pramana/in.med.samhita.susruta) › 1.22 # The Compendium of Suśruta 1.22: dvāviṃśatitamo+adhyāyaḥ / Suśrutasaṃhitā 1.22 - **Language:** Sanskrit ### dvāviṃśatitamo+adhyāyaḥ / ### [1.22.1](https://indike.org/pramana/in.med.samhita.susruta.1.22.1) athāto vraṇāsrāvavijñānīyamadhyāyaṃ vyākhyāsyamaḥ // ### [1.22.2](https://indike.org/pramana/in.med.samhita.susruta.1.22.2) yathovāca bhagavān dhanvantariḥ // ### [1.22.3](https://indike.org/pramana/in.med.samhita.susruta.1.22.3) tvaṅnāṃsasirāsnāyvasthisandhikoṣṭhamarmāṇītyaṣṭau vraṇavastūni / atra sarvavraṇasanniveśaḥ // ### [1.22.4](https://indike.org/pramana/in.med.samhita.susruta.1.22.4) tatra ādyaikavastusanniveśī tvagbhedī vraṇaḥ sūpacaraḥ śeṣāḥ svayamavaddīryamāṇā durupacārāḥ // ### [1.22.5](https://indike.org/pramana/in.med.samhita.susruta.1.22.5) tatrāyataścaturasro vṛttastripuṭaka iti vraṇākṛtisamāsaḥ śeṣāstu vikṛtākṛtayo durupakramā bhavanti // ### [1.22.6](https://indike.org/pramana/in.med.samhita.susruta.1.22.6) sarva eva vraṇāḥ kṣipraṃ saṃrohantyātmavatāṃ subhiṣagbhiścopakrāntāḥ anātmavatāmajñaiścopakrāntāḥ praduṣyanti pravṛddhatvācca doṣāṇāṃ // ### [1.22.7](https://indike.org/pramana/in.med.samhita.susruta.1.22.7) tatrātisaṃvṛto+ativivṛto+atikaṭhino+atimṛdurutsanno+avasanno+atiśīto+atyuṣṇaḥ kṛṣṇaraktapītaśuklādīnāṃ varṇānāmanyatamavarṇo bhairavaḥ pūtipūyamāṃsasirāsnāyuprabhṛtibhiḥ pūrṇaḥ pūtipūyāsrāvyunmārgyutsaṅgyamanojñadarśanagandho+atyarthaṃ vedanāvān dāhapākarāgakaṇḍūśophapiḍakopadruto+atyarthaṃ duṣṭaśoṇitāsrāvī dīrghakālānubandhī ceti duṣṭavraṇaliṅgāni / tasya doṣocchrāyeṇa ṣaṭtvaṃ vibhajya yathāsvaṃ pratīkāre prayateta // ### [1.22.8](https://indike.org/pramana/in.med.samhita.susruta.1.22.8) ata ūrdhvaṃ sarvasrāvān vakṣyāmaḥ tatra ghṛṣṭāsu chinnāsu vā tvakṣu sphoṭeṣu bhinneṣu vidāriteṣu vā salilaprakāśo bhavatyāsrāvaḥ kiṃcidvisraḥ pītāvabhāsaśca māṃsagataḥ sadyaśchinnāsu sirāsu raktātipravṛttiḥ pakvāsu ca toyanāḍībhiriva toyāgamanaṃ pūyasya āsrāvaścātra tanurvicchinnaḥ picchilo+avalambī śyāvo+avaśyāyapratimaśca snāyugataḥ snigdho ghanaḥ siṃghāṇakapratimaḥ saraktaśca asthigato+asthanyabhihate sphuṭite bhinne doṣāvadārite vā doṣabhakṣitatvādasthi niḥsāraṃ śuktidhautamivābhāti āsrāvaścātra majjamiśraḥ sarudhiraḥ snigdhaśca saṃdhigataḥ pīḍyamāno na pravartate ākuñcanaprasāraṇonnamanavinamanapradhāvanotkāsanapravāhaṇaiśca sravati āsrāvaścātra picchilo+avalambī saphenapūyarudhironmathitaśca koṣṭhagato+asṛṅnūtrapurīṣapūyodakāni sravati marmagatastvagādiṣvavaruddhatvānnocyate / tatra tvagādigatānāmāsrāvāṇāṃ yathākramaṃ pāruṣyaśyāvāvaśyāyadadhimastukṣārodakamāṃsadhāvanapulākodakasannibhatvāni mārutādbhavanti pittādgomedagomūtrabhasmaśaṅkhakaṣāyodakamādhvīkatailasannibhatvāni pittavadraktādativisratvaṃ ca kaphānnavanītakāsīsamajjapiṣṭatilanārikelodakavarāhavasāsannibhatvāni sannipātānnārikelodakairvārukarasakāñjikaprasādārukodakapriyaṅguphalayakṛnmudgayūṣasavarṇatvānīti // ### [1.22.9](https://indike.org/pramana/in.med.samhita.susruta.1.22.9) ślokau cātra bhavataḥ / pakvāśayādasādhyastu pulākodakasannibhiḥ / kṣārodakanibhaḥ srāvo varjyo raktāśayātsravan // ### [1.22.10](https://indike.org/pramana/in.med.samhita.susruta.1.22.10) āmāśayāt kalāyāmbhonibhaśca trikasandhijaḥ / srāvānetān parīkṣyādau tataḥ karmācaredbhiṣak // ### [1.22.11](https://indike.org/pramana/in.med.samhita.susruta.1.22.11) ata ūrdhvaṃ sarvavraṇavedanā vakṣyāmaḥ todanabhedanatāḍanacchedanāyamanamanthanavikṣepaṇacum cumāyananirdahanāvabhañjanasphoṭanavidāraṇotpāṭanakampanavividhaśūlaviśleṣaṇavikiraṇapūraṇastambhanasvapnākuñcanāṅkuśikāḥ saṃbhavanti animittavividhavedanāprādurbhāvo vā muhurmuhuryatrāgacchanti vedanāviśeṣāstaṃ vātikamiti vidyāt oṣacoṣaparidāhadhūmāyanāni yatra gātramaṅgārāvakīrṇamiva pacyate yatra coṣmābhivṛddhiḥ kṣate kṣārāvasiktavacca vedanāviśeṣāstaṃ paittikamiti vidyāt pittavadraktasamutthaṃ jānīyāt kaṇḍūrgurutvaṃ suptatvamupadeho+alpavedanatvaṃ stambhaḥ śaityaṃ ca yatra taṃ ślaiṣmikamiti vidyāt yatra sarvāsāṃ vedanānāmutpattistaṃ sānnipātikamiti vidyāt // ### [1.22.12](https://indike.org/pramana/in.med.samhita.susruta.1.22.12) ata ūrdhvaṃ vraṇavarṇān vakṣyāmaḥ bhasmakapotāsthivarṇaḥ paruṣo+aruṇaḥ kṛṣṇa iti mārutajasya nīlaḥ pīto haritaḥ śyāvaḥ kṛṣṇo raktaḥ kapilaḥ piṅgala iti raktapittasamutthayoḥ śvetaḥ snigdhaḥ pāṇḍuriti śleṣmajasya sarvavarṇopetaḥ sānnipātika iti // ### [1.22.13](https://indike.org/pramana/in.med.samhita.susruta.1.22.13) bhavati cātra / ### [1.22.13\_2](https://indike.org/pramana/in.med.samhita.susruta.1.22.13_2) na kevalaṃ vraṇeṣūkto vedanāvarṇasaṃgrahaḥ / ### [1.22.13\_3](https://indike.org/pramana/in.med.samhita.susruta.1.22.13_3) sarvaśophavikāreṣu vraṇavallakṣayedbhiṣak // ## Commentaries (2) - [Nibandhasaṅgraha](https://indike.org/pramana/in.med.samhita.susruta!dalhana.25.4) — Ḍalhaṇa, Sanskrit - [Bhānumatī](https://indike.org/pramana/in.med.samhita.susruta!cakrapani.23.2) — Cakrapāṇidatta, Sanskrit --- Source: [https://indike.org/pramana/in.med.samhita.susruta.1.22](https://indike.org/pramana/in.med.samhita.susruta.1.22) · Pramāṇa