[Pramāṇa](https://indike.org/pramana/) › [Indian literature](https://indike.org/pramana/in) › [Medicine](https://indike.org/pramana/in.med) › [Early and ascribed compendia](https://indike.org/pramana/in.med.samhita) › [The Compendium of Suśruta](https://indike.org/pramana/in.med.samhita.susruta) › 1.6 # The Compendium of Suśruta 1.6: śaṣṭho+adhyāyaḥ / Suśrutasaṃhitā 1.6 - **Language:** Sanskrit ### śaṣṭho+adhyāyaḥ / ### [1.6.1](https://indike.org/pramana/in.med.samhita.susruta.1.6.1) athāta ṛtucaryamadhyāyaṃ vyākhyāsyāmaḥ // ### [1.6.2](https://indike.org/pramana/in.med.samhita.susruta.1.6.2) yathovāca bhagavān dhanvantariḥ // ### [1.6.3](https://indike.org/pramana/in.med.samhita.susruta.1.6.3) kālo hi nāma bhagavān svayambhuranādimadhyanidhano+atra rasavyāpatsampattī jīvitamaraṇe ca manuṣyāṇāmāyatte / sa sūkṣmāmapi kalāṃ na līyata iti kālaḥ saṃkalayati kālayati vā bhūtānīti kālaḥ // ### [1.6.4](https://indike.org/pramana/in.med.samhita.susruta.1.6.4) tasya saṃvatsarātmano bhagavānādityo gativiśeṣeṇa nimeṣakāṣṭhākalāmuhūrtāhorātrapakṣamāsartvayanasaṃvatsarayugapravibhāgaṃ karoti // ### [1.6.5](https://indike.org/pramana/in.med.samhita.susruta.1.6.5) tatra laghvakṣaroccāraṇamātro+akṣinimeṣaḥ pañcadaśā+akṣinimeṣāḥ kāṣṭhā triṃśatkāṣṭhāḥ kalā viṃśatikalo muhūrtaḥ kalādaśabhāgaśca triṃśanmuhūrtamahorātraṃ pañcadaśāhorātrāṇi pakṣaḥ sa ca dvividhaḥ śuklaḥ kṛṣṇaśca tau māsaḥ // ### [1.6.6](https://indike.org/pramana/in.med.samhita.susruta.1.6.6) tatra māghādayo dvādaśa māsāḥ saṃvatsaraḥ dvimāsikamṛtuṃ kṛtva ṣaḍṛtavo bhavanti te śiśiravasantagrīṣmavarṣāśaraddhemantāḥ teṣaṃ tapastapsyau śiśiraḥ madhumādhavau vasantaḥ śuciśukrau grīṣmaḥ nabhonabhasyau varśāḥ iṣorjau śarat sahaḥsahasyau hemanta iti // ### [1.6.7](https://indike.org/pramana/in.med.samhita.susruta.1.6.7) ta ete śītoṣṇavarṣalakṣaṇāścandrādityayoḥ kālavibhāgakaratvādayane dve bhavato dakṣiṇamuttaraṃ ca / tayordakṣiṇaṃ varṣāśaraddhemantāḥ teṣu bhaganānāpyāyate somaḥ amlalavaṇamadhurāśca rasā balavanto bhavanti uttarottaraṃ ca sarvaprāṇināṃ balamabhivardhate / uttaraṃ ca śiśiravasantagrīṣmāḥ teṣu bhagavānāpyāyate+arkaḥ tiktakaṣāyakaṭukāśca rasā balavanto bhavanti uttarottaraṃ ca sarvaprāṇināṃ balamapahīyate // ### [1.6.8](https://indike.org/pramana/in.med.samhita.susruta.1.6.8) bhavati cātra / ### [1.6.8\_2](https://indike.org/pramana/in.med.samhita.susruta.1.6.8_2) śītāṃśuḥ kledayatyurvīṃ vivasvān śoṣayatyapi / ### [1.6.8\_3](https://indike.org/pramana/in.med.samhita.susruta.1.6.8_3) tāvubhāvapi saṃśritya vāyuḥ pālayati prajāḥ // ### [1.6.9](https://indike.org/pramana/in.med.samhita.susruta.1.6.9) atha khalvayane dve yugapat saṃvatsaro bhavati te tu pañca yugamiti saṃjñāṃ labhante sa eṣa nimeṣādiryugaparyantaḥ kālaścakravat parivartamānaḥ kālacakramucyata ityeke // ### [1.6.10](https://indike.org/pramana/in.med.samhita.susruta.1.6.10) iha tu varṣāśaraddhemantavasantagrīṣmaprāvṛṣaḥ ṣaḍṛtavo bhavanti doṣopacayaprakopopaśamanimittaṃ te tu bhādrapadādyena dvimāsikena vyākhyātāḥ tadyathā bhādrapadāśvayujau varṣāḥ kārtikamārgaśīrṣau śarat pauṣamāghau hemantaḥ phālgunacaitrau vasantaḥ vaiśākhajyeṣṭhau grīṣmaḥ āṣāḍhaśrāvaṇau prāvṛḍiti // ### [1.6.11](https://indike.org/pramana/in.med.samhita.susruta.1.6.11) tatra varṣāsvoṣadhayastaruṇyo+alpavīryā āpaścāprasannāḥ kṣitimalaprāyāḥ tā upayujyamānā nabhasi meghāvatate jalapraklinnāyāṃ bhūmau klinnadehānāṃ prāṇināṃ śītavātaviṣṭambhitāgnīnāṃ vidahyante vidāhāt pittasaṃcayamāpādayanti sa saṃcayaḥ śaradi praviralameghe viyatyupaśuṣyati paṅke+arkakiraṇapravilāyitaḥ paittikān vyādhīn janayati / tā evauṣadhayaḥ kālapariṇāmāt pariṇatavīryā balavatyo hemante bhavantyāpaśca prasannāḥ snigdhā atyarthaṃ gurvyaśca tā upayujyamānā mandakiraṇatvādbhānoḥ satuṣārapavanopastambhitadehānāṃ dehināmavidagdhāḥ snehācchaityādgauravādupalepācca śleṣmasaṃcayamāpādayanti sa saṃcayo vasante+arakraśmipravilāyita īṣatstabdhadehānāṃ dehināṃ ślaiṣmikān vyādhīn janayati / tā evauṣadhayo nidāghe niḥsārā rūkṣā atimātraṃ laghvyo bhavantyāpaśca tā upayujyamānāḥ sūryapratāpopaśoṣitadehānāṃ dehināṃ raukṣyāllaghutvādvaiśadyācca vāyoḥ saṃcayamāpādyanti sa saṃcayaḥ prāvṛṣi cātyarthaṃ jalopaklinnāyāṃ bhūmau klinnadehānāṃ prāṇināṃ śītavātavarṣerito vātikān vyādhīn janayati / evameṣa doṣāṇāṃ saṃcayaprakopaheturuktaḥ // ### [1.6.13](https://indike.org/pramana/in.med.samhita.susruta.1.6.13) tatra varśāhemantagrīṣmeṣu saṃcitānāṃ doṣāṇāṃ śaradvasantaprāvṛṭsu ca prakupitānāṃ nirharaṇaṃ kartavyam // ### [1.6.14](https://indike.org/pramana/in.med.samhita.susruta.1.6.14) tatra paittikānāṃ vyādhīnāmupaśamo hemante ślaiṣmikāṇāṃ nidāghe vātikānāṃ śaradi svabhāvata eva ta ete saṃcayaprakopopaśamā vyākhyātāḥ // ### [1.6.15](https://indike.org/pramana/in.med.samhita.susruta.1.6.15) tatra pūrvāhṇe vasantasya liṅgaṃ madhyāhne grīṣmasya aparāhṇe prāvṛṣaḥ pradoṣe vārṣikāṃ śāradamardharātre pratyuṣasi haimantamupalakṣayet evamahorātramapi varṣamiva śītoṣṇavarṣalakṣaṇaṃ doṣopacayaprakopopaśamairjānīyāt // ### [1.6.16](https://indike.org/pramana/in.med.samhita.susruta.1.6.16) tatra avyāpanneṣvṛtuṣvavyāpannā oṣadhayo bhavantyāpaśca tā upayujyamānāḥ prāṇāyurbalavīryaujaskaryo bhavanti // ### [1.6.17](https://indike.org/pramana/in.med.samhita.susruta.1.6.17) teṣāṃ punarvyāpado+adṛṣṭakāritāḥ ṣītoṣṇavātavarṣāṇi khalu viparītānyoṣadhīrvyāpādayantyapaśca // ### [1.6.18](https://indike.org/pramana/in.med.samhita.susruta.1.6.18) tāsāmupayogādvividharogaprādurbhāvo marako vā bhavediti // ### [1.6.19](https://indike.org/pramana/in.med.samhita.susruta.1.6.19) tatra avyāpannānāmoṣadhīnāmapāṃ copayogaḥ // ### [1.6.20](https://indike.org/pramana/in.med.samhita.susruta.1.6.20) kadācidavyāpanneṣvapyṛtuṣu kṛtyābhiśāparakṣaḥkrodhādharmairupadhvasyante janapadāḥ viṣauṣadhipuṣpagandhena vāyunopanītenākramyate to deśastatra doṣaprakṛtyaviśeṣeṇa kāsaścāsavamathupratiśyāyaśirorugjvarairupatapyante grahanakṣatracaritairvā gṛhadāraśayanāsanayānavāhanamaṇiratnopakaraṇagarhitalakṣaṇanimittaprādurbhāvairvā // ### [1.6.21](https://indike.org/pramana/in.med.samhita.susruta.1.6.21) tatra sthānaparityāgaśāntikarmaprāyaścittamaṅgalajapahomopahārejyāñjalinamaskārataponiyamadayādānadīkṣābhyupagamadevatābrāhmaṇaguruparairbhavitavyaṃ evaṃ sādhu bhavati // ### [1.6.22](https://indike.org/pramana/in.med.samhita.susruta.1.6.22) ata ūrdhvamavyāpannānāmṛtūnāṃ lakṣaṇānyupadekṣyāmaḥ // ### [1.6.23](https://indike.org/pramana/in.med.samhita.susruta.1.6.23) vāyurvātyuttaraḥ śīto rajodhūmākulā diśaḥ / ### [1.6.23\_2](https://indike.org/pramana/in.med.samhita.susruta.1.6.23_2) channastuṣāraiḥ saviyā himānaddhā jalāśayāḥ // ### [1.6.24](https://indike.org/pramana/in.med.samhita.susruta.1.6.24) darpitā dhvāṅkṣakhaṅgāhvamahiṣorabhrakuñjarāḥ / ### [1.6.24\_2](https://indike.org/pramana/in.med.samhita.susruta.1.6.24_2) rodhrapriyaṅgupunnāgāḥ puṣpitā himasāhvaye // ### [1.6.25](https://indike.org/pramana/in.med.samhita.susruta.1.6.25) śiśire śītamadhikaṃ vātavṛṣṭyākulā diśaḥ / ### [1.6.25\_2](https://indike.org/pramana/in.med.samhita.susruta.1.6.25_2) śeṣaṃ hemantavat sarvaṃ vijñeyaṃ lakṣaṇaṃ budhaiḥ // ### [1.6.26](https://indike.org/pramana/in.med.samhita.susruta.1.6.26) siddhavidyādharavadhūcaraṇālaktakāṅkite / ### [1.6.26\_2](https://indike.org/pramana/in.med.samhita.susruta.1.6.26_2) malaye candanalatāpariṣvaṅgādhivāsite // ### [1.6.27](https://indike.org/pramana/in.med.samhita.susruta.1.6.27) vāti kāmijanānandajanano+anaṅgadīpanaḥ / ### [1.6.27\_2](https://indike.org/pramana/in.med.samhita.susruta.1.6.27_2) dampatyormānabhiduro vasante dakṣiṇo+anilaḥ // ### [1.6.28](https://indike.org/pramana/in.med.samhita.susruta.1.6.28) diśo vasante vimalāḥ kānanairupaśobhitāḥ / ### [1.6.28\_2](https://indike.org/pramana/in.med.samhita.susruta.1.6.28_2) kiṃśukāmbhojabakulacūtāśokādipuṣpitaiḥ // ### [1.6.29](https://indike.org/pramana/in.med.samhita.susruta.1.6.29) kokilāṣaṭpadagaṇairupagītā manoharāḥ / ### [1.6.29\_2](https://indike.org/pramana/in.med.samhita.susruta.1.6.29_2) dakṣiṇānilasaṃvītāḥ sumukhāḥ pallavojjvalāḥ // ### [1.6.30](https://indike.org/pramana/in.med.samhita.susruta.1.6.30) grīṣme tīkṣṇāṃśurādityo māruto nairṛto+asukhaḥ / ### [1.6.30\_2](https://indike.org/pramana/in.med.samhita.susruta.1.6.30_2) bhūstaptā saritastanvyo diśaḥ prajvalitā iva // ### [1.6.31](https://indike.org/pramana/in.med.samhita.susruta.1.6.31) bhrāntacakrāhvayugalāḥ payaḥpānākulā mṛgāḥ / ### [1.6.31\_2](https://indike.org/pramana/in.med.samhita.susruta.1.6.31_2) dhvastavīruttṛṇalatā viparṇāṅkitapādapāḥ // ### [1.6.32](https://indike.org/pramana/in.med.samhita.susruta.1.6.32) prāvṛṣyambaramānaddhaṃ paścimānilakarṣitaiḥ / ### [1.6.32\_2](https://indike.org/pramana/in.med.samhita.susruta.1.6.32_2) ambudairvidyududdyotaprasrutaistumulasvanaiḥ // ### [1.6.33](https://indike.org/pramana/in.med.samhita.susruta.1.6.33) komalaśyāmaśaṣpāḍhyā śakragopojjvalā mahī / ### [1.6.33\_2](https://indike.org/pramana/in.med.samhita.susruta.1.6.33_2) kadambanīpakuṭajasarjaketakibhūṣitā // ### [1.6.34](https://indike.org/pramana/in.med.samhita.susruta.1.6.34) tatra varṣasu nadyo+ambhaśchanno{O.-t}khātataṭadrumāḥ / ### [1.6.34\_2](https://indike.org/pramana/in.med.samhita.susruta.1.6.34_2) vāpyaḥ protphullakumudanīlotpalavirājitāḥ // ### [1.6.35](https://indike.org/pramana/in.med.samhita.susruta.1.6.35) bhūravyaktasthalaśvabhrā bahuśasyopaśobhitā / ### [1.6.35\_2](https://indike.org/pramana/in.med.samhita.susruta.1.6.35_2) nātigarjatsravanmeghaniruddhārkagrahaṃ nabhaḥ // ### [1.6.36](https://indike.org/pramana/in.med.samhita.susruta.1.6.36) babhruruṣṇaḥ śaradyarkaḥ śvetābhravimalaṃ nabhaḥ / ### [1.6.36\_2](https://indike.org/pramana/in.med.samhita.susruta.1.6.36_2) tathā sarāṃsyamburuhairbhānti haṃsāṃsaghaṭṭitaiḥ // ### [1.6.37](https://indike.org/pramana/in.med.samhita.susruta.1.6.37) paṅkaśuṣkadrumākīrṇā nimnonnatasameṣu bhūḥ / ### [1.6.37\_2](https://indike.org/pramana/in.med.samhita.susruta.1.6.37_2) bāṇasaptāhvabandhūkakāśāsanavirājitā // ### [1.6.38](https://indike.org/pramana/in.med.samhita.susruta.1.6.38) svaguṇairatiyukteṣu viparīteṣu vā punaḥ / ### [1.6.38\_2](https://indike.org/pramana/in.med.samhita.susruta.1.6.38_2) viṣameṣvapi vā doṣāḥ kupyantyṛtuṣu dehinām // ### [1.6.39](https://indike.org/pramana/in.med.samhita.susruta.1.6.39) haredvasante śleṣmāṇaṃ pittaṃ śaradi nirharet / ### [1.6.39\_2](https://indike.org/pramana/in.med.samhita.susruta.1.6.39_2) varṣāsu śamayedvāyuṃ prāgvikārasamucchrayāt // ### [1.6.39\_1](https://indike.org/pramana/in.med.samhita.susruta.1.6.39_1) iti suśrutasaṃhitāyāṃ sūtrasthāne ṛtucaryā nāma ṣasṭho+adhyāyaḥ // ## Commentaries (2) - [Nibandhasaṅgraha](https://indike.org/pramana/in.med.samhita.susruta!dalhana.8.2) — Ḍalhaṇa, Sanskrit - [Bhānumatī](https://indike.org/pramana/in.med.samhita.susruta!cakrapani.6.1) — Cakrapāṇidatta, Sanskrit ## Linked texts (1) - [Caryācandrodaya](https://indike.org/pramana/in.med.pathya.caryacandrodaya.p3) — Dattarāma, Sanskrit --- Source: [https://indike.org/pramana/in.med.samhita.susruta.1.6](https://indike.org/pramana/in.med.samhita.susruta.1.6) · Pramāṇa