[Pramāṇa](https://indike.org/pramana/) › [Indian literature](https://indike.org/pramana/in) › [Medicine](https://indike.org/pramana/in.med) › [Early and ascribed compendia](https://indike.org/pramana/in.med.samhita) › [The Compendium of Suśruta](https://indike.org/pramana/in.med.samhita.susruta) › 2.10 # The Compendium of Suśruta 2.10: daśamo+adhyāyaḥ/ Suśrutasaṃhitā 2.10 - **Language:** Sanskrit ### daśamo+adhyāyaḥ/ ### [2.10.1](https://indike.org/pramana/in.med.samhita.susruta.2.10.1) athāto visarpanāḍīstanaroganidānaṁ vyākhyāsyāmaḥ// ### [2.10.2](https://indike.org/pramana/in.med.samhita.susruta.2.10.2) yathovāca bhagavān dhanvantariḥ// ### [2.10.3](https://indike.org/pramana/in.med.samhita.susruta.2.10.3) tvaṅmāṁsaśoṇitagatāḥ kupitāstu doṣāḥ sarvāṅgasāriṇamihāsthitamātmaliṅgam/ kurvanti †vistṛtamanunnatamāśu śophaṁ taṁ sarvato visaraṇācca visarpamāhuḥ// ### [2.10.4](https://indike.org/pramana/in.med.samhita.susruta.2.10.4) vātātmako+asitamṛduḥ paruṣo+aṅgamardasaṁbhedatodapavanajvaraliṅgayuktaḥ/ gaṇḍairyadā tu viṣamairatidūṣitatvādyuktaḥ sa eva kathitaḥ khalu varjanīyaḥ// ### [2.10.5](https://indike.org/pramana/in.med.samhita.susruta.2.10.5) pittātmako drutagatirjvaradāhapākasphoṭaprabhedabahulaḥ kṣatajaprakāśaḥ/ doṣapravṛddhihatamāṁsasiro yadā syāt srotojakardamanibho na tadā sa sidhyet// ### [2.10.6](https://indike.org/pramana/in.med.samhita.susruta.2.10.6) śleṣmātmakaḥ sarati mandamaśīghrapākaḥ snigdhaḥ sitaśvayathuralparugugrahaṇḍuḥ/ sarvātmakastrividhavarṇarujo+avagāḍhaḥ pakvo na sidhyati ca māṁsasirāpraśātāt†// ### [2.10.7](https://indike.org/pramana/in.med.samhita.susruta.2.10.7) sadyaḥkṣatavraṇamupetya narasya pittaṁ raktaṁ ca doṣabahulasya karoti śoham/ śyāvaṁ salohitamatijvaradāhapākaṁ sphoṭaiḥ kulatthasadṛśairasitaiśca kīrṇam// ### [2.10.8](https://indike.org/pramana/in.med.samhita.susruta.2.10.8) sidhyanti vātakaphapittakṛtā visarpāḥ sarvātmakaḥ kṣatakṛtaśca na siddhimeti/ paittānilāvapi ca darśitapūrvaliṅgau sarve ca marmasu bhavanti hi kṛcchrasādhyāḥ// ### [2.10.9](https://indike.org/pramana/in.med.samhita.susruta.2.10.9) śophaṁ na †pakvamiti pakvamupekṣate yo yo vā vraṇaṁ pracurapūyamasādhuvṛttaḥ/ abhyantaraṁ praviśati pravidārya tasya sthānāni pūrvavihitāni† tataḥ sa pūyaḥ// ### [2.10.10](https://indike.org/pramana/in.med.samhita.susruta.2.10.10) tasyātimātragamanādgatirityataśca nāḍīva yadvahati tena matā tu nāḍī/ doṣaistribirbhavati sā pṛthagekaśaśca saṁmūrcchitairapi ca śalyanimittato+anyā// ### [2.10.11](https://indike.org/pramana/in.med.samhita.susruta.2.10.11) tatrānilāt paruṣasūkṣmamukhī saśūlā phenānuviddhamadhikaṁ sravati kṣapāyām/ tṛṭtāpatodasadanajvarabhedahetuḥ pītaṁ sravatyadhikamuṣṇamahaḥsu pittāt// ### [2.10.12](https://indike.org/pramana/in.med.samhita.susruta.2.10.12) jñeyā kaphādbahughanārjunapicchilāsrā rātrisrutiḥ stimitarukkaṭhinā sakaṇḍūḥ/ doṣadvayābhihitalakṣaṇadarśanena tisro gatīrvyatikaraprabhavāstu vidyāt// ### [2.10.13](https://indike.org/pramana/in.med.samhita.susruta.2.10.13) dāhajvaraśvasanamūrcchanavaktraśoṣā yasyāṁ bhavantyabhihitāni ca lakṣaṇāni/ tāmādiśet pavanapittakaphaprakopādghorāmasukṣayakarīmiva kālarātrim// ### [2.10.14](https://indike.org/pramana/in.med.samhita.susruta.2.10.14) naṣṭaṁ †kathaṁcidanumārgamudīriteṣu sthāneṣu śalyamacireṇa gatiṁ karoti/ sā phenilaṁ mathitamacchamasṛgvimiśramuṣṇaṁ sraveta sahasā sarujā ca nityam// ### [2.10.15](https://indike.org/pramana/in.med.samhita.susruta.2.10.15) yāvatyo gatayo yaiśca kāraṇaiḥ saṁbhavanti hi/ tāvantaḥ stanarogāḥ syuḥ strīṇāṁ taireva hetubhiḥ// ### [2.10.16](https://indike.org/pramana/in.med.samhita.susruta.2.10.16) dhamanyaḥ saṁvṛtadvārāḥ kanyānāṁ stanasaṁśritāḥ/ †doṣāvisaraṇāttāsāṁ na bhavanti stanāmayāḥ// ### [2.10.17](https://indike.org/pramana/in.med.samhita.susruta.2.10.17) tāsāmeva prajātānāṁ garbhiṇīnāṁ ca tāḥ punaḥ/ svabhāvādeva vivṛtā jāyante saṁbhavantyataḥ// ### [2.10.18](https://indike.org/pramana/in.med.samhita.susruta.2.10.18) rasaprasādo madhuraḥ pakvāhāranimittajaḥ/ kṛtsnadehāt stanau prāptaḥ stanyamityabhidhīyate// ### [2.10.19](https://indike.org/pramana/in.med.samhita.susruta.2.10.19) viśasteṣvapi gātreṣu yathā śukraṁ na dṛśyate/ †sarvadehāśritatvācca śukralakṣaṇamucyate// ### [2.10.20](https://indike.org/pramana/in.med.samhita.susruta.2.10.20) tadeva ceṣṭayuvaterdarśanāt smaraṇādapi/ śabdasaṁśravaṇāt sparśāt saṁharṣācca pravartate// ### [2.10.21](https://indike.org/pramana/in.med.samhita.susruta.2.10.21) suprasannaṁ manastatra harṣaṇe heturucyate/ †āhārarasayonitvādevaṁ stanyamapi striyāḥ// ### [2.10.22](https://indike.org/pramana/in.med.samhita.susruta.2.10.22) tadevāpatyasaṁsparśāddarśanāt smaraṇādapi/ grahaṇācca śarīrasya śukravat saṁpravartate// ### [2.10.23](https://indike.org/pramana/in.med.samhita.susruta.2.10.23) sneho nirantarastatra prasrave heturucyate/ tat kaṣāyaṁ bhavedvātāt kṣiptaṁ ca plavate+ambhasi// ### [2.10.24](https://indike.org/pramana/in.med.samhita.susruta.2.10.24) pittādamlaṁ sakaṭukaṁ rājyo+ambhasi ca pītikāḥ/ kaphādghanaṁ picchilaṁ ca jale cāpyavasīdati/ sarvairduṣṭaiḥ sarvaliṅgamabhighātācca duṣyati// ### [2.10.25](https://indike.org/pramana/in.med.samhita.susruta.2.10.25) yat kṣīramudake kṣiptamekībhavati† pāṇḍuram/ madhuraṁ cāvivarṇaṁ ca prasannaṁ tadvinirdiśet// ### [2.10.26](https://indike.org/pramana/in.med.samhita.susruta.2.10.26) sakṣīrau vā+apyadugdhau vā prāpya doṣaḥ stanau striyāḥ/ raktaṁ māṁsaṁ ca sandūṣya stanarogāya kalpate// ### [2.10.27](https://indike.org/pramana/in.med.samhita.susruta.2.10.27) pañcānāmapi teṣāṁ tu hitvā śoṇitavidradhim/ lakṣaṇāni samānāni bāhyavidradhilakṣaṇaiḥ// ### [2.10.27\_1](https://indike.org/pramana/in.med.samhita.susruta.2.10.27_1) iti suśrutasaṁhitāyāṁ nidānasthāne visarpanāḍīstanaroganidānaṁ nāma daśamo+adhyāyaḥ //10// ## Commentaries (1) - [Nibandhasaṅgraha](https://indike.org/pramana/in.med.samhita.susruta!dalhana.68.3) — Ḍalhaṇa, Sanskrit ## Linked texts (1) - [Mādhavanidāna (Rugviniścaya)](https://indike.org/pramana/in.med.sangraha.madhavanidana.49.1) — Mādhavakara, Sanskrit --- Source: [https://indike.org/pramana/in.med.samhita.susruta.2.10](https://indike.org/pramana/in.med.samhita.susruta.2.10) · Pramāṇa