[Pramāṇa](https://indike.org/pramana/) › [Indian literature](https://indike.org/pramana/in) › [Medicine](https://indike.org/pramana/in.med) › [Early and ascribed compendia](https://indike.org/pramana/in.med.samhita) › [The Compendium of Suśruta](https://indike.org/pramana/in.med.samhita.susruta) › 2.12 # The Compendium of Suśruta 2.12: dvādaśo+adhyāyaḥ/ Suśrutasaṃhitā 2.12 - **Language:** Sanskrit ### dvādaśo+adhyāyaḥ/ ### [2.12.1](https://indike.org/pramana/in.med.samhita.susruta.2.12.1) athāto vṛddhyupadaṁśaślīpadānāṁ nidānaṁ vyākhyāsyāmaḥ// ### [2.12.2](https://indike.org/pramana/in.med.samhita.susruta.2.12.2) yathovāca bhagavān dhanvantariḥ// ### [2.12.3](https://indike.org/pramana/in.med.samhita.susruta.2.12.3) vātapittaśleṣmaśoṇitamedomūtrāntranimittāḥ sapta vṛddhayo bhavanti/ tāsāṁ† mūtrāntranimitte vṛddhī vātasamutthe kevalamutpattiheturanyatamaḥ// ### [2.12.4](https://indike.org/pramana/in.med.samhita.susruta.2.12.4) adhaḥ prakupito+anyatamo hi doṣaḥ phalakośavāhinīrabhiprapadya dhamanīḥ phalakoṣayorvṛddhiṁ janayati tāṁ vṛddhimityācakṣate// ### [2.12.5](https://indike.org/pramana/in.med.samhita.susruta.2.12.5) tāsāṁ bhaviṣyatīnāṁ pūrvarūpāṇi bastikaṭīmuṣkameḍhreṣu vedanā mārutanigrahaḥ phalakośaśophaśceti// ### [2.12.6](https://indike.org/pramana/in.med.samhita.susruta.2.12.6) tatrānilaparipūrṇāṁ bastimivātatāṁ paruṣāmanimittānilarujāṁ vātavṛddhimācakṣate; pakvodumbarasaṅkāśāṁ jvaradāhoṣmavatīṁ cāśusamutthānapākāṁ pittavṛddhiṁ; kaṭhināmalpavedanāṁ †śītāṁ kaṇḍūmatīṁ śleṣmavṛddhiṁ; kṛṣṇasphoṭāvṛtāṁ pittavṛddhiliṅgāṁ raktavṛddhiṁ, mṛdusnigdhāṁ kaṇḍūmatīmalpavedanāṁ tālaphalaprakāśāṁ medovṛddhiṁ; mūtrasaṁdhāraṇaśīlasya mūtravṛddhirbhavati, sā gacchato+ambupūrṇā dṛtiriva kṣubhyati mūtrakṛcchravedanāṁ vṛṣaṇayoḥ śvayathuṁ kośayoścāpādayati, tāṁ mūtravṛddhiṁ vidyāt; bhāraharaṇabalavadvigrahavṛkṣaprapatanādibhirāyāsaviśeṣair †vāyurabhipravṛddhaḥ prakupitaśca sthūlāntrasyetarasya† caikadeśaṁ †viguṇamādāyādho gatvā vaṅkṣaṇasandhimupetya granthirūpeṇa sthitvā+apratikriyamāṇe ca kālāntareṇa phalakośaṁ praviśya muṣkaśophamāpādayati, ādhmāto bastirivātataḥ pradīrghaḥ sa śopho bhavati, saśabdamavapīḍitaścordhvamupaiti, vimuktaśca †punarādhmāyate, tāmantravṛddhimasādhyāmityācakṣate// ### [2.12.7](https://indike.org/pramana/in.med.samhita.susruta.2.12.7) tatrātimaithunādatibrahmacaryādvā† tathā+atibrahmacāriṇīṁ cirotsṛṣṭāṁ rajasvalāṁ dīrgharomāṁ karkaśaromāṁ saṅkīrṇaromāṁ nigūḍharomāmalpadvārāṁ mahādvārāmapriyāmakāmāmacaukṣasalilaprakṣālitayonimaprakṣālitayoniṁ yonirogopasṛṣṭāṁ svabhāvato vā duṣṭayoniṁ viyoniṁ vā nārīmatyarthamupasevamānasya tathā karajadaśanaviṣaśūkanipātanādbandhanāddhastābhighātāccatuṣpadīgamanādacaukṣasalilaprakṣālanādavapīḍanācchrukravegavighāraṇānmaithunānte vā+†aprakṣālanādibhirmeḍhramāgamya prakupitā doṣāḥ kṣate+akṣate vā śvayathumupajanayanti, tamupadaṁśamityācakṣate// ### [2.12.8](https://indike.org/pramana/in.med.samhita.susruta.2.12.8) sa pañcavidhastribhirdoṣaiḥ pṛthak samastairasṛjā †ceti// ### [2.12.9](https://indike.org/pramana/in.med.samhita.susruta.2.12.9) tatra vātike pāruṣyaṁ tvakparipuṭanaṁ stabdhameḍhratā paruṣaśophatā vividhāśca† vātavedanāḥ; paittike jvaraḥ śvayathuḥ pakvoḍumbarasaṅkāśastīvradāhaḥ kṣiprapākaḥ pittavedanāśca; ślaiṣmike śvayathuḥ kaṇḍūmān kaṭhinaḥ snigdhaḥ śleṣmavedanāśca; raktaje kṛṣṇasphoṭaprādurbhāvo+atyarthamasṛkpravṛttiḥ pittaliṅgānyatyarthaṁ jvaradāhau śoṣaśca, yāpyaścaiva kadācit; sarvaje sarvaliṅgadarśanamavadaraṇaṁ ca śephasaḥ kṛmiprādurbhāvo maraṇaṁ ceti// ### [2.12.10](https://indike.org/pramana/in.med.samhita.susruta.2.12.10) kupitāstu doṣā vātapittaśleṣmāṇo+adhaḥprapannā vaṅkṣaṇorujānujaṅghāsvavatiṣṭhamānāḥ kālāntareṇa pādamāśritya śanaiḥ śophaṁ janayanti, taṁ †ślīpadamityācakṣate/ tattrividhaṁ vātapittakaphanimittamiti// ### [2.12.11](https://indike.org/pramana/in.med.samhita.susruta.2.12.11) tatra vātajaṁ kharaṁ kṛṣṇaṁ paruṣamanimittānilarujaṁ parisphuṭati ca bahuśaḥ; pittajaṁ tu pītāvabhāsamīṣanmṛdu jvaradāhaprāyaṁ ca; śleṣmajaṁ tu śvetaṁ snigdhāvabhāsaṁ mandavedānaṁ bhārikaṁ mahāgranthikaṁ kaṇṭakairupacitaṁ ca// ### [2.12.12](https://indike.org/pramana/in.med.samhita.susruta.2.12.12) tatra saṁvatsarātītamatimahadvalmīkajātaṁ prasṛtamiti varjanīyāni// ### [2.12.13](https://indike.org/pramana/in.med.samhita.susruta.2.12.13) bhavanti cātra trīṇyapyetāni jānīyācchlīpadāni kaphocchrayāt/ gurutvaṁ ca mahattvaṁ ca yasmānnāsti vinā kaphāt// ### [2.12.14](https://indike.org/pramana/in.med.samhita.susruta.2.12.14) purāṇodakabhūyiṣṭhāḥ sarvartuṣu ca śītalāḥ/ ye deśāsteṣu jāyante ślīpadāni viśeṣataḥ// ### [2.12.15](https://indike.org/pramana/in.med.samhita.susruta.2.12.15) pādavaddhastayoścāpi ślīpadaṁ jāyate nṛṇām/ karṇākṣināsikauṣṭheṣu kecidicchanti tadvidaḥ// ### [2.12.15\_1](https://indike.org/pramana/in.med.samhita.susruta.2.12.15_1) iti suśrutasaṁhitāyāṁ nidānasthāne vṛddhyupadaṁśaślīpadanidānaṁ nāma dvādaśo+adhyāyaḥ //12// ## Commentaries (1) - [Nibandhasaṅgraha](https://indike.org/pramana/in.med.samhita.susruta!dalhana.70.3) — Ḍalhaṇa, Sanskrit ## Linked texts (2) - [Cikitsāsārasaṅgraha (Vaṅgasena)](https://indike.org/pramana/in.med.sangraha.vangasena.57.5) — Vaṅgasena, Sanskrit - [Mādhavacikitsā](https://indike.org/pramana/in.med.nidana.madhavacikitsa.50.5) — Mādhava Bhaṭṭa, Sanskrit --- Source: [https://indike.org/pramana/in.med.samhita.susruta.2.12](https://indike.org/pramana/in.med.samhita.susruta.2.12) · Pramāṇa