[Pramāṇa](https://indike.org/pramana/) › [Indian literature](https://indike.org/pramana/in) › [Medicine](https://indike.org/pramana/in.med) › [Early and ascribed compendia](https://indike.org/pramana/in.med.samhita) › [The Compendium of Suśruta](https://indike.org/pramana/in.med.samhita.susruta) › 2.15 # The Compendium of Suśruta 2.15: pañcadaśo+adhyāyaḥ/ Suśrutasaṃhitā 2.15 - **Language:** Sanskrit ### pañcadaśo+adhyāyaḥ/ ### [2.15.1](https://indike.org/pramana/in.med.samhita.susruta.2.15.1) athāto bhagnānāṁ nidānaṁ vyākhyāsyāmaḥ// ### [2.15.2](https://indike.org/pramana/in.med.samhita.susruta.2.15.2) yathovāca bhagavān dhanvantariḥ// ### [2.15.3](https://indike.org/pramana/in.med.samhita.susruta.2.15.3) patanapīḍanaprahārakṣepaṇavyālamṛgadaśanaprabhṛtibhirabhighātaviśeṣairanekavidhamasthnāṁ †bhaṅgamupadiśanti// ### [2.15.4](https://indike.org/pramana/in.med.samhita.susruta.2.15.4) †tatra bhaṅga(gna)jātamanekavidhamanusāryamāṇaṁ dvividhamevopapadyate sandhimukataṁ kāṇḍabhagnaṁ ca/ tatra ṣaḍvidhaṁ sandhimuktaṁ dvādaśavidhaṁ kāṇḍabhagnaṁ bhavati// ### [2.15.5](https://indike.org/pramana/in.med.samhita.susruta.2.15.5) tatra sandhimuktam utpiṣṭaṁ viśliṣṭaṁ vivartitam avakṣiptam atikṣiptaṁ tiryakkṣiptamiti ṣaḍvidham// ### [2.15.6](https://indike.org/pramana/in.med.samhita.susruta.2.15.6) tatra prasāraṇākuñcanavivartanākṣepaṇāśaktirugrarujatvaṁ sparśāsahatvaṁ ceti sāmānyaṁ sandhimuktalakṣaṇamuktam// ### [2.15.7](https://indike.org/pramana/in.med.samhita.susruta.2.15.7) vaiśeṣikaṁ tūtpiṣṭe sandhāvumayataḥ śopho vedanāprādurbhāvo viśeṣataśca nānāprakārā vedanā rātrau prādurbhavanti; viśliṣṭe+alpaḥ śopho vedanāsātatyaṁ sandhivikriyā ca; vivartite tu sandhipārśvāpagamanādviṣamāṅgatā vedanā ca; avakṣipte sandhiviśleṣastīvrarujatvaṁ ca; atikṣipte dvayoḥ sandhyasthnoratikrāntatā vedanā ca; tiryakkṣipte tvekāsthipārśvāpagamanamatyarthaṁ vedanā ceti// ### [2.15.8](https://indike.org/pramana/in.med.samhita.susruta.2.15.8) kāṇḍabhagnamata ūrdhvaṁ vakṣyāmaḥ karkaṭakam aśvakarṇaṁ cūrṇitaṁ piccitam asthicchallitaṁ kāṇḍabhagnaṁ majjānugatam atipātitaṁ vakraṁ chinnaṁ pāṭitaṁ sphuṭitamiti dvādaśavidham// ### [2.15.9](https://indike.org/pramana/in.med.samhita.susruta.2.15.9) †śvayathubāhulyaṁ spandanavivartanasparśāsahiṣṇutvamavapīḍyamāne śabdaḥ srastāṅgatā vividhavedanāprādurbhāvaḥ sarvāsvavasthāsu na śarmalābha iti samāsena kāṇḍabhagnalakṣaṇamuktam// ### [2.15.10](https://indike.org/pramana/in.med.samhita.susruta.2.15.10) viśeṣastu saṁmūḍhamubhayato+asthi madhye bha(la)gnaṁ granthirivonnataṁ karkaṭakam aśvakarṇavadudgatamaśvakarṇakaṁ, †spṛśyamānaṁ śabdavaccūrṇitamavagacchet, piccitaṁ pṛthutāṁ gatamanalpaśophaṁ†, pārśvayorasthi hīnodgatamasthicchalitaṁ, vellate prakampamānaṁ kāṇḍabhagnam, asthyavayavo+asthimadhyamanupraviśya majjānamunnahyatīti majjānugatam, asthi niḥśeṣataśchinnamatipātitam, ābhugnamavimuktāsthi vakram, anyatarapārśvāvaśiṣṭaṁ chinnaṁ, pāṭitamaṇubahuvidāritaṁ vedanāvacca, śūkapūrṇamivādhmātaṁ vipulaṁ visphuṭitaṁ sphuṭitamiti// ### [2.15.11](https://indike.org/pramana/in.med.samhita.susruta.2.15.11) teṣu cūrṇitacchinnātipātitamajjānugatāni kṛcchrasādhyāni †kṛśavṛddhabālānāṁ kṣatakṣīṇakuṣṭhiśvāsināṁ †sandhyupagataṁ ceti// ### [2.15.12](https://indike.org/pramana/in.med.samhita.susruta.2.15.12) bhavanti cātra bhinnaṁ kapālaṁ kaṭhyāṁ tu sandhimuktaṁ tathā cyutam/ jaghanaṁ prati piṣṭaṁ ca varjayettaccikitsakaḥ// ### [2.15.13](https://indike.org/pramana/in.med.samhita.susruta.2.15.13) asaṁśliṣṭaṁ kapālaṁ tu lalāṭe cūrṇitaṁ ca yat/ bhagnaṁ stanāntare śaṅkhe pṛṣṭhe mūrdhni ca varjayet// ### [2.15.14](https://indike.org/pramana/in.med.samhita.susruta.2.15.14) ādito yacca durjātamasthi sandhirathāpi vā/ †samyagyamitamapyasthi †durnyāsāddurnibandhanāt// ### [2.15.15](https://indike.org/pramana/in.med.samhita.susruta.2.15.15) saṅkhobhādvā+api yadgacchedvikriyāṁ tacca varjayet/ madhyasya vayaso+avasthāstisro yāḥ parikīrtitāḥ// ### [2.15.16](https://indike.org/pramana/in.med.samhita.susruta.2.15.16) tatra sthiro bhavejjanturupakrānto vijānatā†/ taruṇāsthīni namyante bhajyante nalakāni tu// ### [2.15.17](https://indike.org/pramana/in.med.samhita.susruta.2.15.17) kapālān vibhidyante† sphuṭanti rucakāni ca// ### [2.15.17\_1](https://indike.org/pramana/in.med.samhita.susruta.2.15.17_1) iti suśrutasaṁhitāyāṁ nidānasthāne bhagnanidānaṁ nāma pañcadaśo+adhyāyaḥ //15// ## Commentaries (1) - [Nibandhasaṅgraha](https://indike.org/pramana/in.med.samhita.susruta!dalhana.73.14) — Ḍalhaṇa, Sanskrit --- Source: [https://indike.org/pramana/in.med.samhita.susruta.2.15](https://indike.org/pramana/in.med.samhita.susruta.2.15) · Pramāṇa