[Pramāṇa](https://indike.org/pramana/) › [Indian literature](https://indike.org/pramana/in) › [Medicine](https://indike.org/pramana/in.med) › [Early and ascribed compendia](https://indike.org/pramana/in.med.samhita) › [The Compendium of Suśruta](https://indike.org/pramana/in.med.samhita.susruta) › 2.1 # The Compendium of Suśruta 2.1: prathamo+adhyāyaḥ/ Suśrutasaṃhitā 2.1 - **Language:** Sanskrit ### prathamo+adhyāyaḥ/ ### [2.1.1](https://indike.org/pramana/in.med.samhita.susruta.2.1.1) athāto vātavyādhinidānaṁ vyākhyāsyāmahaḥ// ### [2.1.2](https://indike.org/pramana/in.med.samhita.susruta.2.1.2) yathovāca bhagavān dhanvantariḥ// ### [2.1.3](https://indike.org/pramana/in.med.samhita.susruta.2.1.3) dhanvantariṁ dharmabhṛtāṁ variṣṭhamamṛtodbhavam/ caraṇāvupasaṁgṛhya suśrutaḥ paripṛcchati// ### [2.1.4](https://indike.org/pramana/in.med.samhita.susruta.2.1.4) vāyoḥ prakṛtibhūtasya vyāpannasya ca kopanaiḥ/ sthānaṁ karma ca rogāṁśca vada me vadatāṁ vara// ### [2.1.5](https://indike.org/pramana/in.med.samhita.susruta.2.1.5) tasya tadvacanaṁ †prābravīdbhiṣajaṁ varaḥ/ svayaṁbhūreṣa bhagavān vāyurityabhiśabditaḥ// ### [2.1.6](https://indike.org/pramana/in.med.samhita.susruta.2.1.6) svātantryānnityabhāvācca sarvagatvāttathaiva ca/ sarveṣāmeva sarvātmā sarvalokanamaskṛtaḥ// ### [2.1.7](https://indike.org/pramana/in.med.samhita.susruta.2.1.7) sthityutpattivināśeṣu bhūtānāmeṣa kāraṇam/ avyakto vyaktakarmā ca rūkṣaḥ† śīto laghuḥ kharaḥ// ### [2.1.8](https://indike.org/pramana/in.med.samhita.susruta.2.1.8) tiryaggo dviguṇaścaiva rajobahula eva ca/ acintyavīryo doṣāṇāṁ netā rogasamūharāṭ// ### [2.1.9](https://indike.org/pramana/in.med.samhita.susruta.2.1.9) āśukārī muhuścārī pakvādhānagudālayaḥ/ dehe vicaratastasya lakṣaṇāni nibodha me// ### [2.1.10](https://indike.org/pramana/in.med.samhita.susruta.2.1.10) doṣadhātvagnisamatāṁ saṁprāptiṁ viṣayeṣu ca/ kriyāṇāmānulomyaṁ ca karotyakupito+anilaḥ// †/ indriyārthopasaṁprāptiṁ doṣadhātvagnyavaikṛtam/ kriyāṇāmānulomyaṁ ca kuryādvāyuradūṣitaḥ//) ### [2.1.11](https://indike.org/pramana/in.med.samhita.susruta.2.1.11) yathā+agniḥ pañcadhā bhinno nāmasthānakriyāmayaiḥ/ bhinno+anilastasthā hyeko nāmasthānakriyāmayaiḥ// ### [2.1.12](https://indike.org/pramana/in.med.samhita.susruta.2.1.12) prāṇodānau samānaśca vyānaścāpāna eva ca/ sthānasthā mārutāḥ pañca yāpayanti śarīriṇam// ### [2.1.13](https://indike.org/pramana/in.med.samhita.susruta.2.1.13) yo vāyurvaktrasaṁcārī sa prāṇo nāma dehadhṛk/ so+annaṁ praveśayatyantaḥ prāṇāṁścāpyavalambate// ### [2.1.14](https://indike.org/pramana/in.med.samhita.susruta.2.1.14) prāyaśaḥ kurute duṣṭo hikkāśvāsādikān gadān// udāno nāma yastūrdhvamupaiti pavanottamaḥ// ### [2.1.15](https://indike.org/pramana/in.med.samhita.susruta.2.1.15) tena bhāṣitagītādiviśeṣo+abhipravartate/ ūrdhvajatrugatān rogān karoti ca viśeṣataḥ// ### [2.1.16](https://indike.org/pramana/in.med.samhita.susruta.2.1.16) āmapakvāśayacaraḥ samāno †vahnisaṅgataḥ/ so+annaṁ pacati tajjāṁśca †viśeṣānvivinakti hi// ### [2.1.17](https://indike.org/pramana/in.med.samhita.susruta.2.1.17) gulmāgnisādātīsāraprabhṛtīn† kurute gadān/ kṛtsnadehacaro vyāno rasasaṁvahanodyataḥ// ### [2.1.18](https://indike.org/pramana/in.med.samhita.susruta.2.1.18) svedāsṛksrāvaṇaścāpi pañcadhā ceṣṭayatyapi/ kruddhaśca kurute rogān prāyaśaḥ sarvadehagān// ### [2.1.19](https://indike.org/pramana/in.med.samhita.susruta.2.1.19) pakvādhānālayo+apānaḥ kāle karṣati cāpyadhaḥ/ †samīraṇaḥ śakṛnmūtraṁ śukragarbhārtavāni ca// ### [2.1.20](https://indike.org/pramana/in.med.samhita.susruta.2.1.20) kuddhaśca kurute rogān ghorān bastigudāśrayān/ śukradoṣapramehāstu vyānāpānaprakopajāḥ// ### [2.1.21](https://indike.org/pramana/in.med.samhita.susruta.2.1.21) yugapat kupitāścāpi dehaṁ bhindyurasaṁśayam/ ata ūrdhvaṁ pravakṣyāmi nānāsthānāntarāśritaḥ// ### [2.1.22](https://indike.org/pramana/in.med.samhita.susruta.2.1.22) bahuśaḥ kupito vāyurvikārān kurute hi yān/ vāyurāmāśaye kruddhaśchardyādīn kurute gadān// ### [2.1.23](https://indike.org/pramana/in.med.samhita.susruta.2.1.23) mohaṁ mūrcchāṁ pipāsāṁ ca hṛdgrahaṁ pārśvavedanām/ pakvāśayastho+antrakūjaṁ †śūlaṁ nābhau karoti ca// ### [2.1.24](https://indike.org/pramana/in.med.samhita.susruta.2.1.24) kṛcchramūtrapurīṣatvamānāhaṁ trikavedanām/ śrotrādiṣvindriyavadhaṁ kuryāt kruddhaḥ samīraṇaḥ// ### [2.1.25](https://indike.org/pramana/in.med.samhita.susruta.2.1.25) vaivarṇyaṁ sphuraṇaṁ raukṣyaṁ suptiṁ cumucumāyanam/ tvakstho nistodanaṁ kuryāt tvagbhedaṁ paripoṭanam// ### [2.1.26](https://indike.org/pramana/in.med.samhita.susruta.2.1.26) vraṇāṁśca raktago granthīn †saśūlān māṁsasaṁśritaḥ/ tathā medaḥśritaḥ kuryādgrandhīnmandarujo+avraṇān// ### [2.1.27](https://indike.org/pramana/in.med.samhita.susruta.2.1.27) kuryāt sirāgataḥ śūlaṁ sirākuñcanapūraṇam/ snāyuprāptaḥ †stambhakampau śūlamākṣepaṇaṁ tathā// ### [2.1.28](https://indike.org/pramana/in.med.samhita.susruta.2.1.28) hanti sandhigataḥ sandhīn śūlaśophau karoti ca/ asthiśoṣaṁ prabhedaṁ ca kuryācchūlaṁ ca tacchritaḥ// ### [2.1.29](https://indike.org/pramana/in.med.samhita.susruta.2.1.29) tathā majjagate ruk ca na kadācit praśāmyati/ apravṛttiḥ pravṛttirvā vikṛtā† śukrage+anile// ### [2.1.30](https://indike.org/pramana/in.med.samhita.susruta.2.1.30) hastapādaśirodhātūṁstathā saṁcarati kramāt/ vyāpnuyādvā+akhilaṁ dehaṁ vāyuḥ sarvagato nṛṇām// ### [2.1.31](https://indike.org/pramana/in.med.samhita.susruta.2.1.31) stambhanākṣepaṇasvāpaśophaśūlāni sarvagaḥ†/ sthāneṣūkteṣu saṁmiśraḥ saṁmiśrāḥ kurute rujaḥ// ### [2.1.32](https://indike.org/pramana/in.med.samhita.susruta.2.1.32) kuryādavayavaprāpto† mārutastvamitān gadān/ dāhasaṁtāpamūrcchāḥ syurvāyau pittasamanvite// ### [2.1.33](https://indike.org/pramana/in.med.samhita.susruta.2.1.33) śaityaśophagurutvāni tasminneva kaphāvṛte/ sūcībhiriva nistodaḥ sparśadveṣaḥ prasuptatā// ### [2.1.34](https://indike.org/pramana/in.med.samhita.susruta.2.1.34) śeṣāḥ pittavikārāḥ syurmārute śoṇitānvite/ prāṇe pittāvṛte chardirdāhaścaivopajāyate// ### [2.1.35](https://indike.org/pramana/in.med.samhita.susruta.2.1.35) daurbalyaṁ sadanaṁ tandrā vaivarṇyaṁ† ca kaphāvṛte/ udāne pittasaṁyukte mūrcchādāhabhramaklamāḥ// ### [2.1.36](https://indike.org/pramana/in.med.samhita.susruta.2.1.36) asvedaharṣau mando+agniḥ śītastambhau kaphāvṛte/ samāne pittasaṁyukte svedadāhauṣṇyamūrcchanam// ### [2.1.37](https://indike.org/pramana/in.med.samhita.susruta.2.1.37) †kaphādhikaṁ ca viṇmūtraṁ romaharṣaḥ kaphāvṛte/ apāne pittasaṁyukte dāhauṣṇye syādasṛgdaraḥ†// ### [2.1.38](https://indike.org/pramana/in.med.samhita.susruta.2.1.38) adhaḥkāyagurutvaṁ ca tasminneva† kaphāvṛte/ vyāne pittāvṛte dāho gātravikṣepaṇaṁ klamaḥ// ### [2.1.39](https://indike.org/pramana/in.med.samhita.susruta.2.1.39) †gurūṇi sarvagātrāṇi stambhanaṁ cāsthiparvaṇām/ liṅgaṁ kaphāvṛte vyāne ceṣṭāstambhastathaiva ca// ### [2.1.40](https://indike.org/pramana/in.med.samhita.susruta.2.1.40) prāyaśaḥ sukumārāṇāṁ mithyā++āhāravihāriṇām/ †rogādhvapramadāmadyavyāyāmaiścātipīḍanāt// ### [2.1.41](https://indike.org/pramana/in.med.samhita.susruta.2.1.41) ṛtusātmyaviparyāsāt snehādīnāṁ ca vibhramāt/ avyavāye tathā sthūle vātaraktaṁ prakupyati†//) ### [2.1.42](https://indike.org/pramana/in.med.samhita.susruta.2.1.42) hastyaśvoṣṭrairgacchato+anyaiśca vāyuḥ kopaṁ yātaḥ kāraṇaiḥ sevitaiḥ svaiḥ/ tīkṣṇoṣṇāmlakṣāraśākādibhojyaiḥ saṁtāpādyairbhūyasā sevitaiśca// ### [2.1.43](https://indike.org/pramana/in.med.samhita.susruta.2.1.43) kṣipraṁ raktaṁ duṣṭimāyāni† tacca vāyormārgaṁ saṁruṇaddhyāśu yātaḥ/ kruddho+atyarthaṁ mārgarodhāt sa †vāyuratyudriktaṁ dūṣayedraktamāśu†// ### [2.1.44](https://indike.org/pramana/in.med.samhita.susruta.2.1.44) tat saṁpṛktaṁ vāyunā dūṣitena tatprāvalyāducyate vātaraktam/ tadvat pittaṁ dūṣitenāsṛjā++āktaṁ śleṣmā duṣṭo dūṣitenāsṛjā++āktaḥ// ### [2.1.45](https://indike.org/pramana/in.med.samhita.susruta.2.1.45) †sparśodvignau todabhedapraśoṣasvāpopetau vātaraktena pādau/ pittāsṛgbhyāmugradāhau bhavetāmatyarthoṣṇau raktaśophau mṛdū ca// ### [2.1.46](https://indike.org/pramana/in.med.samhita.susruta.2.1.46) kaṇḍūmantau śvetaśītau saśophau pīnastabdhau śleṣmaduṣṭe tu rakte/ †sarvairduṣṭe śoṇite cāpi doṣāḥ svaṁ svaṁ rūpaṁ pādayordarśayanti// ### [2.1.47](https://indike.org/pramana/in.med.samhita.susruta.2.1.47) prāgrūpe śithilau svinnau †śītalau saviparyayau/ vaivarṇyatodasuptatvagurutvauṣasamanvitau// ### [2.1.48](https://indike.org/pramana/in.med.samhita.susruta.2.1.48) pādayormūlamāsthāya kadāciddhastayorapi/ āsvorviṣamiva kruddhaṁ taddehamanusarpati// ### [2.1.49](https://indike.org/pramana/in.med.samhita.susruta.2.1.49) ājānusphuṭitaṁ yacca prabhinnaṁ prasrutaṁ ca yat/ upadravaiśca yajyuṣṭaṁ prāṇamāṁsakṣayādibhiḥ// ### [2.1.50](https://indike.org/pramana/in.med.samhita.susruta.2.1.50) śoṇitaṁ tadasādhyaṁ syādyāpyaṁ saṁvatsarotthitam/ yadā tu dhamanīḥ sarvāḥ kupito+abhyeti mārutaḥ// ### [2.1.51](https://indike.org/pramana/in.med.samhita.susruta.2.1.51) tadākṣipatyāśu muhurmuhurdehaṁ muhuścaraḥ/ muhurmuhustadākṣepādākṣepaka iti smṛtaḥ// ### [2.1.52](https://indike.org/pramana/in.med.samhita.susruta.2.1.52) so+apatānakasaṁjño yaḥ pātayatyantarā+antarā/ kaphānvito bhṛśaṁ vāyustāsveva yadi tiṣṭhati// ### [2.1.53](https://indike.org/pramana/in.med.samhita.susruta.2.1.53) sa daṇḍavat stambhayati kṛcchro daṇḍāpatānakaḥ/ hanugrahastadā+atyarthaṁ kṛcchrānniṣevate// ### [2.1.54](https://indike.org/pramana/in.med.samhita.susruta.2.1.54) dhanustulyaṁ namedyastu sa dhanuḥstambhasaṁjñakaḥ/ aṅgulīgulphajaṭharahradvakṣogalasaṁśritaḥ// ### [2.1.55](https://indike.org/pramana/in.med.samhita.susruta.2.1.55) snāyupratānamanilo yadā++ākṣipati vegavān/ viṣṭabdhākṣaḥ stabdhahanurbhagnapārśvaḥ kaphaṁ vaman// ### [2.1.56](https://indike.org/pramana/in.med.samhita.susruta.2.1.56) abhyantaraṁ dhanuriva yadā namati mānavaḥ/ tadā+asyābhyantarāyāmaṁ kurute māruto balī// ### [2.1.57](https://indike.org/pramana/in.med.samhita.susruta.2.1.57) bāhyasnāyupratānastho bāhyāyāmaṁ karoti ca/ tamasādhyaṁ budhāḥ prāhurvakṣaḥkaṭhyūrubhañjanam// ### [2.1.58](https://indike.org/pramana/in.med.samhita.susruta.2.1.58) kaphapittānvito vāyurvāyureva ca kevalaḥ/ kuryādākṣepakaṁ tvanyaṁ caturthamabhighātajam// ### [2.1.59](https://indike.org/pramana/in.med.samhita.susruta.2.1.59) garbhapātanimittaśca śoṇitātisravācca yaḥ/ abhighātanimittaśca na sidhyatyapatānakaḥ// ### [2.1.60](https://indike.org/pramana/in.med.samhita.susruta.2.1.60) adhogamāḥ satiryaggā dhamanīrūrdhvadehagāḥ/ yadā prakupito+atyarthaṁ mātariśvā prapadyate// ### [2.1.61](https://indike.org/pramana/in.med.samhita.susruta.2.1.61) tadā+anyatarapakṣasya sandhibandhān vimokṣayan/ hanti pakṣaṁ tamāhurhi pakṣāghātaṁ bhiṣagvarāḥ// ### [2.1.62](https://indike.org/pramana/in.med.samhita.susruta.2.1.62) yasya kṛtsnaṁ śarīrārdhamakarmaṇyamacetanam/ †tataḥ patasyasūn vā+api †tyajatyanilapīḍitaḥ// ### [2.1.63](https://indike.org/pramana/in.med.samhita.susruta.2.1.63) śuddhavātahataṁ pakṣaṁ kṛcchrasādhyatamaṁ viduḥ/ sādhyamanyena saṁsṛṣṭamasādhyaṁ kṣayahetukam// ### [2.1.64](https://indike.org/pramana/in.med.samhita.susruta.2.1.64) vāyurūrdhvaṁ vrajet sthānāt kupito hṛdayaṁ śiraḥ/ śaṅkhau ca pīḍayatyaṅgānyākṣipennamayecca saḥ// ### [2.1.65](https://indike.org/pramana/in.med.samhita.susruta.2.1.65) nimīlitākṣo niśceṣṭaḥ stabdhākṣo vā+api kūjati/ nirucchvāso+athavā kṛcchrāducchvasyānnaṣṭacetanaḥ// ### [2.1.66](https://indike.org/pramana/in.med.samhita.susruta.2.1.66) svasthaḥ syāddhṛdaye mukte hyāvṛte tu pramuhyati/ kaphānvitena vātena jñeya eṣo+apatantrakaḥ// ### [2.1.67](https://indike.org/pramana/in.med.samhita.susruta.2.1.67) divāsvapnāsanasthānavivṛtādhvanirīkṣaṇaiḥ†/ manyāstambhaṁ prakurute sa eva śleṣmaṇā++āvṛtaḥ// ### [2.1.68](https://indike.org/pramana/in.med.samhita.susruta.2.1.68) (†garbhiṇīsūtikābālavṛddhakṣīṇeṣvasṛkkṣaye/) uccairvyāharato+atyarthaṁ svādataḥ kaṭhināni vā/ hasato †jṛmbhato bhārādviṣamācchayanādapi// ### [2.1.69](https://indike.org/pramana/in.med.samhita.susruta.2.1.69) śironāsauṣṭhacibukalalāṭekṣaṇasandhigaḥ/ ardayitvā+anilo vaktramarditaṁ janayatyataḥ// ### [2.1.70](https://indike.org/pramana/in.med.samhita.susruta.2.1.70) vakrībhavati vaktrārdhaṁ grīvā cāpyapavartate/ śiraścalati vāksaṅgo netrādīnāṁ ca vaikṛtam// ### [2.1.71](https://indike.org/pramana/in.med.samhita.susruta.2.1.71) grīvācibukadantānāṁ tasmin pārśve tu vedanā/ yasyāgrajo romaharṣo vepathurnetramāvilam// ### [2.1.72](https://indike.org/pramana/in.med.samhita.susruta.2.1.72) vāyurūrdhvaṁ tvaci svāpastodo manyāhanugrahaḥ/ tamarditamiti grāhurvyādhiṁ vyādhiviśāradāḥ// ### [2.1.73](https://indike.org/pramana/in.med.samhita.susruta.2.1.73) kṣīṇasyānimiṣākṣasya prasaktaṁ† saktabhāṣiṇaḥ/ na sidhyatyarditaṁ bāḍhaṁ trivarṣaṁ vepanasya ca// ### [2.1.74](https://indike.org/pramana/in.med.samhita.susruta.2.1.74) †pārṣṇipratyaṅgulīnāṁ tu kaṇḍarā yā+anilārditāḥ/ †sakthnaḥ kṣepaṁ nigṛhṇīyādgṛdhrasīti hi sā smṛtā// ### [2.1.75](https://indike.org/pramana/in.med.samhita.susruta.2.1.75) †talapratyaṅgulīnāṁ tu kaṇḍarā bāhupṛṣṭhataḥ/ bāhvoḥ karmakṣayakarī viśvācīti hi sā smṛtā// ### [2.1.76](https://indike.org/pramana/in.med.samhita.susruta.2.1.76) vātaśoṇitajaḥ śopho jānumadhye mahārujaḥ/ śiraḥ kroṣṭukapūrvaṁ tu sthūlaḥ kroṣṭukamūrdhavat// ### [2.1.77](https://indike.org/pramana/in.med.samhita.susruta.2.1.77) vāyuḥ †kaṭyāṁ sthitaḥ sakthnaḥ kaṇḍarāmākṣipedyadā/ svañjastadā bhavejjantuḥ, paṅguḥ sakthnordvayorvadhāt// ### [2.1.78](https://indike.org/pramana/in.med.samhita.susruta.2.1.78) prakrāman vepate yastu svañjanniva ca gacchati/ kalāyasvañjaṁ taṁ vidyānmuktasandhiprabandhanam// ### [2.1.79](https://indike.org/pramana/in.med.samhita.susruta.2.1.79) nyaste tu viṣamaṁ(me) pāde rujaḥ kuryāt samīraṇaḥ/ vātakaṇṭaka ityeṣa vijñeyaḥ khaḍu(la)kāśritaḥ// ### [2.1.80](https://indike.org/pramana/in.med.samhita.susruta.2.1.80) pādayoḥ kurute dāhaṁ pittāsṛksahito+anilaḥ/ viśeṣataścaṅkramaṇāt pādadāhaṁ tamādiśet// ### [2.1.81](https://indike.org/pramana/in.med.samhita.susruta.2.1.81) hṛṣyataścaraṇau yasya bhavataśca prasuptavat†/ pādaharṣaḥ sa vijñeyaḥ kaphavātaprakopajaḥ// ### [2.1.82](https://indike.org/pramana/in.med.samhita.susruta.2.1.82) aṁsadeśasthito vāyuḥ śoṣayitvāṁ+asabandhanam/ sirāścākuñcya tatrastho janayatyavabāhukam// ### [2.1.83](https://indike.org/pramana/in.med.samhita.susruta.2.1.83) yadā śabdavahaṁ sroto vāyurāvṛtya tiṣṭhati/ śuddhaḥ śleṣmānvito vā+api bādhiryaṁ tena jāyate// ### [2.1.84](https://indike.org/pramana/in.med.samhita.susruta.2.1.84) hanuśaṅkhaśirogrīvaṁ yasya bhindannivānilaḥ/ karṇayoḥ kurute śūlaṁ karṇaśūlaṁ taducyate// ### [2.1.85](https://indike.org/pramana/in.med.samhita.susruta.2.1.85) āvṛtya sakapho vāyurdhamanīḥ śabdavāhīnīḥ/ narān karotyakriyakānmūkaminmiṇagadgadān// ### [2.1.86](https://indike.org/pramana/in.med.samhita.susruta.2.1.86) adho yā vedanāṁ yāti varcomūtrāśayotthitā/ bhindatīva gudopasthaṁ sā tūnītyabhidhīyate// ### [2.1.87](https://indike.org/pramana/in.med.samhita.susruta.2.1.87) gudopasthotthitā saiva pratilomavisarpiṇī/ vegaiḥ pakvāśayaṁ yāti pratitūnīti sā smṛtā// ### [2.1.88](https://indike.org/pramana/in.med.samhita.susruta.2.1.88) sāṭopamatyugrarujamādhmātamudaraṁ bhṛśam/ ādhmānamiti jānīyādghoraṁ vātanirodhajam// ### [2.1.89](https://indike.org/pramana/in.med.samhita.susruta.2.1.89) vimuktapārśvahṛdayaṁ tadevāmāśayotthitam/ pratyādhmānaṁ vijānīyāt kaphavyākulitānilam// ### [2.1.90](https://indike.org/pramana/in.med.samhita.susruta.2.1.90) aṣṭhīlāvadghanaṁ granthimūrdhvamāyatamunnatam/ vātāṣṭhīlāṁ vijānīyādbahirmārgavarodhinīm†// ### [2.1.91](https://indike.org/pramana/in.med.samhita.susruta.2.1.91) enāmeva rujāyuktāṁ vātaviṇmūtrarodhinīm/ pratyaṣṭhīlāmiti vadejjāṭhare tiryagutthitām// ### [2.1.91\_1](https://indike.org/pramana/in.med.samhita.susruta.2.1.91_1) iti suśrutasaṁhitāyāṁ nidānasthāne vātavyādhinidānaṁ nāma prathamo+adhyāyaḥ //1// ## Commentaries (1) - [Nibandhasaṅgraha](https://indike.org/pramana/in.med.samhita.susruta!dalhana.59.2) — Ḍalhaṇa, Sanskrit ## Linked texts (5) - [Mādhavanidāna (Rugviniścaya)](https://indike.org/pramana/in.med.sangraha.madhavanidana.26.21.p1) — Mādhavakara, Sanskrit - [Bhāvaprakāśa (another edition)](https://indike.org/pramana/in.med.sangraha.bhavaprakasa*alt.3.2-21.253) — Sanskrit - [Gadanigraha](https://indike.org/pramana/in.med.sangraha.gadanigraha.32.16) — Soḍhala, Sanskrit - [Mādhavacikitsā](https://indike.org/pramana/in.med.nidana.madhavacikitsa.28.15) — Mādhava Bhaṭṭa, Sanskrit - [Cikitsāsārasaṅgraha (Vaṅgasena)](https://indike.org/pramana/in.med.sangraha.vangasena.31.167) — Vaṅgasena, Sanskrit --- Source: [https://indike.org/pramana/in.med.samhita.susruta.2.1](https://indike.org/pramana/in.med.samhita.susruta.2.1) · Pramāṇa