[Pramāṇa](https://indike.org/pramana/) › [Indian literature](https://indike.org/pramana/in) › [Medicine](https://indike.org/pramana/in.med) › [Early and ascribed compendia](https://indike.org/pramana/in.med.samhita) › [The Compendium of Suśruta](https://indike.org/pramana/in.med.samhita.susruta) › 2.2 # The Compendium of Suśruta 2.2: dvitīyo+adhyāyaḥ/ Suśrutasaṃhitā 2.2 - **Language:** Sanskrit ### dvitīyo+adhyāyaḥ/ ### [2.2.1](https://indike.org/pramana/in.med.samhita.susruta.2.2.1) athāto+arśasāṁ nidānaṁ vyākhyāsyāmaḥ// ### [2.2.2](https://indike.org/pramana/in.med.samhita.susruta.2.2.2) yathovāca bhagavān dhanvantariḥ// ### [2.2.3](https://indike.org/pramana/in.med.samhita.susruta.2.2.3) ṣaḍarśāṁsi bhavanti vātapittakaphaśoṇitasannipātaiḥ sahajāni cet// ### [2.2.4](https://indike.org/pramana/in.med.samhita.susruta.2.2.4) tatrānātmavatāṁ yathoktaiḥ prakopaṇairviruddhādhyaśanastrīprasaṅgotkaṭukāsanapṛṣṭhayānavvegavidhāraṇādibhirviśeṣaiḥ prakupitā doṣā ekaśo dviśaḥ samastāḥ śoṇitasahitā vā yathoktaṁ prasṛtāḥ pradhānadhamanīranuprapadyādho gatvā gudamāgamya pradūṣya gudavalīrmāṁsaprarohāñjanayanti viśeṣato mandāgneḥ, tathā tṛṇakāṣṭhopalaloṣṭhavastrādibhiḥ† śītodakasaṁsparśanādvā kandāḥ parivṛddhimāsādayanti, tānyarśāṁsītyācakṣate// ### [2.2.5](https://indike.org/pramana/in.med.samhita.susruta.2.2.5) tatra sthūlāntrapratibaddhamardhapañcāṅgulaṁ gudamāhuḥ, tasmin valayastisro+adhyāṅgulāntarasaṁbhūtāḥ pravāhaṇī visarjanī saṁvaraṇī ceti caturaṅgulāyatāḥ†; sarvāstiryagekāṅgulocchritāḥ// ### [2.2.6](https://indike.org/pramana/in.med.samhita.susruta.2.2.6) śaṅkhāvartanibhāścāpi uparyupari saṁsthitāḥ/ gajatālunibhāścāpi varṇataḥ saṁprakīrtitāḥ/ romāntebhyo yavādhyardho gudauṣṭhaḥ parikīrtitaḥ// ### [2.2.7](https://indike.org/pramana/in.med.samhita.susruta.2.2.7) prathamā tu gudauṣṭhādaṅgulamātre// ### [2.2.8](https://indike.org/pramana/in.med.samhita.susruta.2.2.8) teṣāṁ tu bhaviṣyatāṁ pūrvarūpāṇi anne+aśraddhā kṛcchrāt paktiramlīkā paridāho viṣṭambhaḥ pipāsā sakthisadanamāṭopaḥ kārśyamudgārabāhulyamakṣṇoḥ śvayathurantrakūjanaṁ gudaparikartanamāśaṅkā pāṇḍurogagrahaṇīdoṣaśoṣāṇāṁ kāsaśvāsau balahānirmramastandrā nidrendriyadaurbalyaṁ ca// ### [2.2.9](https://indike.org/pramana/in.med.samhita.susruta.2.2.9) jāteṣvetānyeva lakṣaṇāni pravyaktatarāṇi bhavanti// ### [2.2.10](https://indike.org/pramana/in.med.samhita.susruta.2.2.10) tatra mārutāt pariśuṣkāruṇavivarṇāni viṣamamadhyāni †kadambapuṣpatuṇḍikerīnāḍīmukulasūcīmukhākṛtīni ca bhavanti; tairupadrutaḥ saśūlaṁ saṁhatamupaveśyate, kaṭīpṛṣṭhapārśvameḍhragudamābhipradeśeṣu cāsya vedanā bhavanti, gulmāṣṭhīlāplīhodarāṇi cāsya tannimittānyeva bhavanti, kṛṣṇatvaṅnakhanayanadaśanavadanamūtrapurīṣaśca puruṣo bhavati// ### [2.2.11](https://indike.org/pramana/in.med.samhita.susruta.2.2.11) pittānnīlāgrāṇi tanūni visarpīṇi pītāvabhāsāni yakṛtprakāśāni śukajihvāsaṁsthānāni yavamadhyāni jalaukovaktrasadṛśāni praklinnāni ca bhavanti; tairupadrutaḥ sadāhaṁ sarudhiramatisāryate, jvaradāhapipāsāmūrcchāścāsyopadravā bhavanti, pītatvaṅnakhanayanadaśanavadanamūtrapurīṣaśca puruṣo bhavati// ### [2.2.12](https://indike.org/pramana/in.med.samhita.susruta.2.2.12) śleṣmajāni śvetāni mahāmūlāni sthirāṇi vṛttāni snigdhāni pāṇḍūni karīrapanasāsthigostanākārāṇi, na bhidyante na sravanti kaṇḍūbahulāni ca bhavanti; tairupadrutaḥ saśleṣmāṇamanalpaṁ māṁsadhāvanaprakāśamatisāryate, śophaśītajvarārocakāvipākaśirogauravāṇi cāsya tannimittānyeva bhavanti, śuklatvaṅgakhanayanadaśanavadanamūtrapurīṣaśca puruṣo bhavati// ### [2.2.13](https://indike.org/pramana/in.med.samhita.susruta.2.2.13) raktajāni nyagrodhaprarohavidrumakākaṇantikāphalasadṛśāni† pittalakṣaṇāni ca, yadā+avagāḍhapurīṣapīḍitāni bhavanti tadā+atyarthaṁ duṣṭamanalpamasṛk sahasā visṛjanti, tasya cātipravṛttau śoṇitāti yogopadravā bhavanti// ### [2.2.14](https://indike.org/pramana/in.med.samhita.susruta.2.2.14) sannipātajāni sarvadoṣalakṣaṇayuktāni†// ### [2.2.15](https://indike.org/pramana/in.med.samhita.susruta.2.2.15) sahajāni duṣṭaśoṇitaśukranimittāni, teṣāṁ doṣata eva prasādhanaṁ kartavyaṁ, viśeṣataścaitāni durdarśanāni paruṣāṇi †pāṁsūni dāruṇānyantarmukhāni; tairupadrutaḥ kṛśo+alpabhuk sirāsantatagātro+alpaprajaḥ kṣīṇaretāḥ kṣāmasvaraḥ krodhano+alpāgniprāṇaḥ† paramalasaśca, tathā ghrāṇaśiro+akṣināsāśravaṇarogī, satatamantrakūjāṭopahṛdayopalepārocakaprabhṛtibhiḥ pīḍyate// ### [2.2.16](https://indike.org/pramana/in.med.samhita.susruta.2.2.16) bhavati cātra--- bāhyamadhyavalisthānāṁ pratikuryādbhiṣagvaraḥ/ antarvalisamutthānāṁ pratyākhyāyācaret kriyām// ### [2.2.17](https://indike.org/pramana/in.med.samhita.susruta.2.2.17) parkupitāstu doṣā meḍhramabhiprapannā māṁsaśoṇite pradūṣya kaṇḍūṁ janayanti, tataḥ kaṇḍūyanāt kṣataṁ samupajāyate, tasmiṁśca kṣate duṣṭamāṁsajāḥ prarohāḥ picchilalarudhirasrāviṇo jāyante kūrcakino+abhyantaramupariṣṭādvā, te tu śepho vināśayantyupaghnanti ca puṁstvaṁ; yonimabhiprapannāḥ sukumārān durgandhān picchilarudhirasrāviṇaśchatrākārān karīrāñjanayanti, te tu yonimupaghnantyārtavaṁ ca; nābhimabhiprapannāḥ sukumārān durgandhān picchilān gaṇḍūpadamukhasadṛśān karīrāñjanayanti; ta evordhvamāgatāḥ śrotrākṣighrāṇavadaneṣvarśāṁsyupanirvartayanti; tatra karṇajeṣu bādhiryaṁ śūlaṁ pūtikarṇatā ca, netrajeṣu vartmā varodho vedanā srāvo darśananāśaśca, ghrāṇajeṣu pratiśyāyo+atimātraṁ kṣavathuḥ kṛcchrocchvāsatā pūtinasyaṁ sānunāsikavākyatvaṁ śiroduḥkhaṁ ca; vaktrajeṣu kaṇṭhauṣṭhatālūnāmanyatamasmiṁstairgadgadavākyatā rasājñānaṁ mukharogāśca bhavanti// ### [2.2.18](https://indike.org/pramana/in.med.samhita.susruta.2.2.18) vyānastu prakupitaḥ śleṣmāṇaṁ parigṛhya bahiḥ sthirāṇi kīlavadarśāṁsi nirvartayati, tāni carmakīlānyarśāṁsītyācakṣate// ### [2.2.19](https://indike.org/pramana/in.med.samhita.susruta.2.2.19) bhavanti cātra--- teṣu kīleṣu nistodo mārutenopajāyate/ śleṣmaṇā tu savarṇatvaṁ granthitvaṁ ca vinirdiśet// ### [2.2.20](https://indike.org/pramana/in.med.samhita.susruta.2.2.20) pittaśoṇitajaṁ †raukṣyaṁ kṛṣṇatvaṁ ślakṣṇatā tathā/ samudīrṇakharatvaṁ ca carmakīlasya lakṣaṇam// ### [2.2.21](https://indike.org/pramana/in.med.samhita.susruta.2.2.21) arśasāṁ lakṣaṇaṁ vyāsāduktaṁ sāmānyatastu† yat/ tatsarvaṁ prāgvinirdiṣṭātsādhayedbhiṣajāṁ varaḥ// ### [2.2.22](https://indike.org/pramana/in.med.samhita.susruta.2.2.22) arśaḥsu dṛśyate rūpaṁ yadā doṣadvayasya† tu/ saṁsargaṁ taṁ vijānīyāt saṁsargaḥ sa ca ṣaḍvidhiḥ// ### [2.2.23](https://indike.org/pramana/in.med.samhita.susruta.2.2.23) tridoṣāṇyalpaliṅgāni yāpyāni tu vinirdiśet/ dvandvajāni dvitīyāyāṁ valau yānyāśritāni ca// ### [2.2.24](https://indike.org/pramana/in.med.samhita.susruta.2.2.24) kṛcchrasādhyāni tānyāhuḥ parisaṁvatsarāṇi ca/ sannipātasamutthāni sahajāni tu varjayet// ### [2.2.25](https://indike.org/pramana/in.med.samhita.susruta.2.2.25) sarvāḥ syurvalayo yeṣāṁ durnāmabhirupadrutāḥ/ taistu pratihato vāyurapānaḥ sannivartate// ### [2.2.26](https://indike.org/pramana/in.med.samhita.susruta.2.2.26) tato vyānena saṅgamya †jyotirmṛdgāti dehinām// ### [2.2.26\_1](https://indike.org/pramana/in.med.samhita.susruta.2.2.26_1) iti suśrutasaṁhitāyāṁ nidānasthāne+arśonidānaṁ nāma dvitīyo+adhyāyaḥ//2// ## Commentaries (1) - [Nibandhasaṅgraha](https://indike.org/pramana/in.med.samhita.susruta!dalhana.60.3) — Ḍalhaṇa, Sanskrit --- Source: [https://indike.org/pramana/in.med.samhita.susruta.2.2](https://indike.org/pramana/in.med.samhita.susruta.2.2) · Pramāṇa