[Pramāṇa](https://indike.org/pramana/) › [Indian literature](https://indike.org/pramana/in) › [Medicine](https://indike.org/pramana/in.med) › [Early and ascribed compendia](https://indike.org/pramana/in.med.samhita) › [The Compendium of Suśruta](https://indike.org/pramana/in.med.samhita.susruta) › 2.6 # The Compendium of Suśruta 2.6: ṣaṣṭho+adhyāyaḥ/ Suśrutasaṃhitā 2.6 - **Language:** Sanskrit ### ṣaṣṭho+adhyāyaḥ/ ### [2.6.1](https://indike.org/pramana/in.med.samhita.susruta.2.6.1) athātaḥ pramehanidānaṁ vyākhyāsyāmaḥ// ### [2.6.2](https://indike.org/pramana/in.med.samhita.susruta.2.6.2) yathovāca bhagavān dhanvantariḥ// ### [2.6.3](https://indike.org/pramana/in.med.samhita.susruta.2.6.3) divāsvapnāvyāyāmālasyaprasaktaṁ śītasnigdhamadhuramedyadravānnapānasevinaṁ puruṣaṁ jānīyāt pramehī bhaviṣyatīti// ### [2.6.4](https://indike.org/pramana/in.med.samhita.susruta.2.6.4) tasya †caivaṁpravṛttasyāparipakvā eva vātapittaśleṣmāṇo yadā medasā sahaikatvamupetya mūtravāhisrotāṁsyanusṛtyādho gatvā bastermukhamāśritya nirbhidyante tadā pramehāñjanayanti// ### [2.6.5](https://indike.org/pramana/in.med.samhita.susruta.2.6.5) teṣāṁ tu pūrvarūpāṇi hastapādataladāhaḥ snigdhapicchilagurutā gātrāṇāṁ madhuraśuklamūtratā tandrā sādaḥ pipāsā durgandhaśca śvāsastālugalajihvādanteṣu malotpattirjaṭilībhāvaḥ keśānāṁ vṛddhiśca nakhānām// ### [2.6.6](https://indike.org/pramana/in.med.samhita.susruta.2.6.6) tatrāvilaprabhūtamūtralakṣaṇāḥ sarva eva pramehā bhavanti// ### [2.6.7](https://indike.org/pramana/in.med.samhita.susruta.2.6.7) sarva eva sarvadoṣasamutthāḥ saha piḍakābhiḥ// ### [2.6.8](https://indike.org/pramana/in.med.samhita.susruta.2.6.8) tatra, †kaphādudakekṣuvālikāsurāsikatāśanairlavaṇapiṣṭasāndraśukraphenamehā daśa sādhyāḥ, doṣadūṣyāṇāṁ samakriyatvāt; pittānnīlaharidrāmlakṣāramañjiṣṭhāśoṇitamehāḥ ṣaḍ yāpyāḥ, doṣadūṣyāṇāṁ viṣamakriyatvāt; vātāt sarpirvasākṣaudrahastimehāścatvāro+asādhyatamāḥ, mahātyayikatvāt// ### [2.6.9](https://indike.org/pramana/in.med.samhita.susruta.2.6.9) tatra vātapittamedobhiranvitaḥ śleṣmā śleṣmapramehāñjanayati, vātakaphaśoṇitamedobhiranvitaṁ pittaṁ pittapramehān, kaphapittavasāmajjamedobhiranvito vāyurvātapramehān// ### [2.6.10](https://indike.org/pramana/in.med.samhita.susruta.2.6.10) tatra, śvetamavedanamudakasadṛśamudakamehī mehati; ikṣurasatulyamikṣuvālikāmehī; surātulyaṁ surāmehī; sarujaṁ sikatānuviddhaṁ sikatāmehī; śanaiḥ sakaphaṁ mṛtsnaṁ śanairmehī; viśadaṁ lavaṇatulyaṁ lavaṇamehī; hṛṣṭaromā piṣṭarasatulyaṁ piṣṭamehī; āvilaṁ sāndraṁ sāndramehī; śukratulyaṁ śukramehī; stokaṁ stokaṁ saphenamacchaṁ phenamehī mehati// ### [2.6.11](https://indike.org/pramana/in.med.samhita.susruta.2.6.11) ata ūrdhvaṁ pittanimittān vakṣyāmaḥ saphenamacchaṁ nīlaṁ nīlamehī mehati; sadāhaṁ haridrābhaṁ haridrāmehī; amlarasagandhamamlamehī; srutakṣārapratimaṁ kṣāramehī; mañjiṣṭhodakaprakāśaṁ mañjiṣṭhāmehī; śoṇitaprakāśaṁ śoṇitamehī mehati// ### [2.6.12](https://indike.org/pramana/in.med.samhita.susruta.2.6.12) ata ūrdhvaṁ vātanimittān vakṣyāmaḥ sarpiḥprakāśaṁ sarpirmehī mehati; vasāprakāśaṁ vasāmehī; kṣaudrarasavarṇaṁ kṣaudramehī; mattamātaṅgavadanuprabandhaṁ† hastimehī mehati// ### [2.6.13](https://indike.org/pramana/in.med.samhita.susruta.2.6.13) †makṣikopasarpaṇamālasyaṁ māṁsopacayaḥ pratiśyāyaḥ śaithilyārocakāvipākāḥ kaphaprasekacchardinidrākāsaśvāsāśceti śleṣmajānāmupadravāḥ; vṛṣaṇayoravadaraṇaṁ bastibhedo meḍhratodo hṛdi śūlamamlīkājvarātīsārārocakā vamathuḥ †paridhūpanaṁ dāho mūrcchā pipāsā nidrānāśaḥ pāṇḍurogaḥ pītaviṇmūtranetratvaṁ ceti paittikānāṁ; hṛdgraho laulyamanidrā stambhaḥ kampaḥ śūlaṁ baddhapurīṣatvaṁ ceti† vātajānām/ evamete viṁśati pramehāḥ sopadravā vyākhyātāḥ// ### [2.6.14](https://indike.org/pramana/in.med.samhita.susruta.2.6.14) tatra vasāmedobhyāmabhipannaśarīrasya tribhirdoṣaiścānugatadhātoḥ pramehiṇo daśa† piḍakā jāyante/ tadyathā śarāvikā, sarṣapikā, kacchapikā, jālinī, vinatā, putriṇī, masūrikā, alajī, vidārikā, vidradhikā ceti// ### [2.6.15](https://indike.org/pramana/in.med.samhita.susruta.2.6.15) śarāvamātrā tadrūpā nimnamadhyā śarāvikā/ gaurasarṣapasaṁsthānā tatpramāṇā ca sārṣapī// ### [2.6.16](https://indike.org/pramana/in.med.samhita.susruta.2.6.16) sadāhā kūrmasaṁsthānā jñeyā kacchapikā budhaiḥ/ jālinī tīvradāhā tu māṁsajālasamāvṛtā†// ### [2.6.17](https://indike.org/pramana/in.med.samhita.susruta.2.6.17) mahatī piḍakā nīlā piḍakā vinatā smṛtā†/ mahatyalpācitā jñeyā piḍakā sā tu putriṇī// ### [2.6.18](https://indike.org/pramana/in.med.samhita.susruta.2.6.18) masūrasamasaṁsthānā jñeyā sā tu masūrikā/ raktā sitā sphoṭavatī dāruṇā tvalajī bhavet// ### [2.6.19](https://indike.org/pramana/in.med.samhita.susruta.2.6.19) vidārīkandavadvṛttā kaṭhinā ca vidārikā/ vidradherlakṣaṇairyuktā jñeyā vidradhikā budhaiḥ// ### [2.6.20](https://indike.org/pramana/in.med.samhita.susruta.2.6.20) gude hṛdi śirasyaṁse pṛṣṭhe marmaṇi cotthitāḥ/ sopadravā †durbalāgreḥ piḍakāḥ parivarjayet// ### [2.6.21](https://indike.org/pramana/in.med.samhita.susruta.2.6.21) kṛtsnaṁ śarīraṁ niṣpīḍya medomajjavasāyutaḥ/ adhaḥ prakramate vayustenāsādhyāstu vātajāḥ// ### [2.6.22](https://indike.org/pramana/in.med.samhita.susruta.2.6.22) pramehapūrvarūpāṇāmākṛtiryatra dṛśyate/ kiṁciccāpyadhikaṁ mūtraṁ taṁ †pramehiṇamādiśet// ### [2.6.23](https://indike.org/pramana/in.med.samhita.susruta.2.6.23) kṛtsnānyardhāni vā yasmin pūrvarūpāṇi mānave/ pravṛttamūtramatyarthaṁ taṁ pramehiṇamādiśet†// ### [2.6.24](https://indike.org/pramana/in.med.samhita.susruta.2.6.24) piḍakāpiḍitaṁ gāḍhamupasṛṣṭamupadravaiḥ/ madhumehinamācaṣṭe sa cāsādhyaḥ prakīrtitaḥ// ### [2.6.25](https://indike.org/pramana/in.med.samhita.susruta.2.6.25) sa cāpi gamanāt sthānaṁ sthānadāsanamicchati/ āsanādvṛṇute śayyāṁ śayanāt †svapnamicchati// ### [2.6.26](https://indike.org/pramana/in.med.samhita.susruta.2.6.26) yathā hi †varṇānāṁ pañcānāmutkarṣāpakarṣakṛtena saṁyogaviśeṣeṇa śabalababhrukapilakapotamecakādīnāṁ varṇānāmanekeṣāmutpattirbhavati, evameva doṣadhātumalāhāraviśeṣeṇotkarṣāpakarṣakṛtena saṁyogaviśeṣeṇa pramehāṇāṁ nānākaraṇaṁ bhavati// ### [2.6.27](https://indike.org/pramana/in.med.samhita.susruta.2.6.27) bhavati cātra sarva eva pramehāstu kālenāpratikurvataḥ†/ madhumehatvamāyānti tadā+asādhyā bhavanti hi// ### [2.6.27\_1](https://indike.org/pramana/in.med.samhita.susruta.2.6.27_1) iti suśrutasaṁhitāyāṁ nidānasthāne pramehanidānaṁ nāma ṣaṣṭho+adhyāyaḥ //6// ## Commentaries (1) - [Nibandhasaṅgraha](https://indike.org/pramana/in.med.samhita.susruta!dalhana.64.3) — Ḍalhaṇa, Sanskrit ## Linked texts (3) - [Mādhavanidāna (Rugviniścaya)](https://indike.org/pramana/in.med.sangraha.madhavanidana.37.29) — Mādhavakara, Sanskrit - [Gadanigraha](https://indike.org/pramana/in.med.sangraha.gadanigraha.44.31) — Soḍhala, Sanskrit - [Mādhavacikitsā](https://indike.org/pramana/in.med.nidana.madhavacikitsa.41.3) — Mādhava Bhaṭṭa, Sanskrit --- Source: [https://indike.org/pramana/in.med.samhita.susruta.2.6](https://indike.org/pramana/in.med.samhita.susruta.2.6) · Pramāṇa