[Pramāṇa](https://indike.org/pramana/) › [Indian literature](https://indike.org/pramana/in) › [Medicine](https://indike.org/pramana/in.med) › [Early and ascribed compendia](https://indike.org/pramana/in.med.samhita) › [The Compendium of Suśruta](https://indike.org/pramana/in.med.samhita.susruta) › 3.2 # The Compendium of Suśruta 3.2: dvitīyo+adhyāyaḥ/ Suśrutasaṃhitā 3.2 - **Language:** Sanskrit ### dvitīyo+adhyāyaḥ/ ### [3.2.1](https://indike.org/pramana/in.med.samhita.susruta.3.2.1) athātaḥ †śukraśoṇitaśuddhiṁ śārīraṁ vyākhyāsyāmaḥ// ### [3.2.2](https://indike.org/pramana/in.med.samhita.susruta.3.2.2) yathovāca bhagavān dhanvantariḥ// ### [3.2.3](https://indike.org/pramana/in.med.samhita.susruta.3.2.3) vātapittaśleṣmaśoṇita-†kuṇapagravthipūtipūyakṣīṇamūtrapurīṣaretasaḥ\[†'kuṇapagandhi'iti pā+\] prajotpādane na samarthā bhavanti// ### [3.2.4](https://indike.org/pramana/in.med.samhita.susruta.3.2.4) teṣu vātavarṇavedanaṁ vātena, pittavarṇavedanaṁ pittena, śleṣmavarṇavedanaṁ śleṣmaṇā, śoṇitavarṇavedanaṁ kuṇapagandhyanalpaṁ ca raktena, granthibhūtaṁ śleṣmavātābhyāṁ, pūtipūyanibhaṁ pittaśleṣmabhyāṁ, kṣīṇaṁ prāguktaṁ pittamārutābhyāṁ, mūtrapurīṣagandhi sannipāteneti/ teṣu kuṇapagranthipūtipūyakṣīṇaretasaḥ kṛcchrasādhyāh, mūtrapurīṣaretasastvasādhyāḥ (†sādhyamanyacca\[†ayaṁ pāṭho hastalikhitapustake nopalabhayate\])iti// ### [3.2.5](https://indike.org/pramana/in.med.samhita.susruta.3.2.5) ārtavamapi tribhirdoṣaiḥ śoṇitacaturthaih pṛthagdvandvaiḥ samastaiścopasṛṣṭamabījaṁ bhavati; tadapi doṣavarṇavedanādibhirvijñeyam/ teṣu kuṇapagranthipūtipūyakṣīṇamūtrapurīṣaprakāśamasādhyaṁ sādhyamanyacceti// ### [3.2.6](https://indike.org/pramana/in.med.samhita.susruta.3.2.6) bhavanti cātra/ teṣvādyān śukradoṣāṁstrīn snehasvedādibhirjayet// kriyāviśeṣairmatimāṁstathā cottarav(b?)astibhiḥ// ### [3.2.7](https://indike.org/pramana/in.med.samhita.susruta.3.2.7) pāyayeta naraṁ sarpirbhiṣak kuṇaparetasi// dhātakīpuṣpakhadiradāḍimārjunasādhitam// ### [3.2.8](https://indike.org/pramana/in.med.samhita.susruta.3.2.8) pāyatedathavā sarpiḥ śālasārādisādhitam// granthibhūte †śaṭīsaiddhaṁ pālāśe vā+api bhasmani// ### [3.2.9](https://indike.org/pramana/in.med.samhita.susruta.3.2.9) parūṣakavaṭādibhyāṁ pūyaprakhye ca sādhitam// prāguktaṁ vakṣyate yacca tat kāryaṁ kṣīṇaretasi// ### [3.2.10](https://indike.org/pramana/in.med.samhita.susruta.3.2.10) viṭprabhe pāyayet siddhaṁ †citrakośīrahiṅgubhiḥ// \[†asyāgre+asnehādiśca kramaḥ kāryaḥ ṣaṭsvetāsu vijānatā' ityadhikaḥ pāṭhaḥ kvacidupalabhyate'\] snigdhaṁ vāntaṁ viriktaṁ ca nirūḍhamanuvāsitam// ### [3.2.11](https://indike.org/pramana/in.med.samhita.susruta.3.2.11) yojayecchukradoṣārtaṁ samyaguttarabastinā// sphaṭikābhaṁ dravaṁ snigdhaṁ madhuraṁ madhugandhi ca// ### [3.2.12](https://indike.org/pramana/in.med.samhita.susruta.3.2.12) śukramicchanti kecittu tailakṣaudranibhaṁ tathā// vidhimuttarabastyantaṁ kuryādārtavaśuddhaye// ### [3.2.13](https://indike.org/pramana/in.med.samhita.susruta.3.2.13) strīṇāṁ snehādiyuktānāṁ catasṛṣvārtavārtiṣu// kuryātkalkān picūṁścāpi pathyānyācamanāni ca// ### [3.2.14](https://indike.org/pramana/in.med.samhita.susruta.3.2.14) granthibhūte pibet pāṭhāṁ tryūṣaṇaṁ vṛkṣakāṇi ca// †durgandhipūyasaṅkāśe majjatulye tathā++ārtave// \[†'durgandhe pūyasaṅkāśe'iti pā+\] ### [3.2.15](https://indike.org/pramana/in.med.samhita.susruta.3.2.15) pibedbhadraśriyaḥ kvāthaṁ candanakvāthameva ca // śukradoṣaharāṇāṁ ca yathāsvamavacāraṇam// ### [3.2.16](https://indike.org/pramana/in.med.samhita.susruta.3.2.16) †yogānāṁ śuddhikaraṇaṁ śeṣāsvapyārtavārtiṣu//anne(nnaṁ) śāliyavaṁ madyaṁ hitaṁ māṁsaṁ ca pittalam// ### [3.2.17](https://indike.org/pramana/in.med.samhita.susruta.3.2.17) śaśāsṛkpratimaṁ yattuy yadvā lākṣārasopamam// tadārtavaṁ praśaṁsanti yadvāso na virañjayet// ### [3.2.18](https://indike.org/pramana/in.med.samhita.susruta.3.2.18) tadevātiprasaṅgena pranṛttamanṛtāvapi// asṛgdaraṁ †vijānīyādayo+anyadraktalakṣaṇāt\[†'vijānīyāduktaṁ lakṣaṇalakṣitam'iti pā+\]// ### [3.2.19](https://indike.org/pramana/in.med.samhita.susruta.3.2.19) asṛgdaro bhavet sarvaḥ sāṅgamardaḥ savedanaḥ// tasyātivṛttau daurbalyaṁ bhramo mūrcchā tamastṛṣā// ### [3.2.20](https://indike.org/pramana/in.med.samhita.susruta.3.2.20) dāhaḥ pralāpaḥ pāṇḍutvaṁ tandrā rogāśca vātajāḥ// taruṇyā hitasevinyāstamalpopadravaṁ bhiṣak// ### [3.2.21](https://indike.org/pramana/in.med.samhita.susruta.3.2.21) raktapittavidhānena yathāvat samupācaret// doṣairāvṛtamārgatvādārtavaṁ naśyati striyāḥ// ### [3.2.22](https://indike.org/pramana/in.med.samhita.susruta.3.2.22) tatra matsyakulatthāmlatilamāṣasurā hitāḥ// pāne mūtramudaśvicca dadhi śuktaṁ ca bhojane// ### [3.2.23](https://indike.org/pramana/in.med.samhita.susruta.3.2.23) kṣīṇaṁ prāgīritaṁ raktaṁ salakṣaṇacikitsitam// †tathā+apyatra vidhātavyaṁ vidhānaṁ naṣṭaraktavat// ### [3.2.24](https://indike.org/pramana/in.med.samhita.susruta.3.2.24) evamaduṣṭaśukraḥ śuddhārtavā ca// ### [3.2.25](https://indike.org/pramana/in.med.samhita.susruta.3.2.25) ṛtau prathamadivasāt prabhṛti brahmacāriṇī divāsvapnāñjanāśrupātasnānānulepanābhyaṅganakhacchedanapradhāvanahasanakathanātiśabdaśravaṇāvalekhanānilāyāsān pariharet/ kiṁ kāraṇaṁ? divā svapanytāḥ svāpaśīlaḥ, añjanādandhaḥ, rodanāddhikṛtadṛṣṭiḥ, snānānulepanāhuḥkhaśīlaḥ, tailābhyaṅgāt kuṣṭhī, nakhāpakartanāt kunakhī pradhāvanāccañcalaḥ, hasanācchyāvadantauṣṭhatālujihvāḥ, pralāpī cātikathanāt, atiśabdaśravaṇādbadhiraḥ, avalekhanāt khalatiḥ, mārutāyāsasevanādunmatto garbho bhavatītyevametān pariharet/ darbhasaṁstaraśāyinīṁ karatalaśarāvaparṇānyatamabhojinīṁ haniṣyaṁ, tryahaṁ ca bhartuḥ saṁrakṣet/ tataḥ śuddhasnātāṁ caturthe+†ahanyahatavāsāṁ samalaṅkṛtāṁ kṛtamaṅgalasvastivācanāṁ bhartāraṁ darśayet/ tat kasya hetoḥ?// ### [3.2.26](https://indike.org/pramana/in.med.samhita.susruta.3.2.26) pūrvaṁ paśyedṛtusnātā yādṛśaṁ naramaṅganā// tādṛśaṁ janayet putraṁ bhartāraṁ darśayedataḥ// ### [3.2.27](https://indike.org/pramana/in.med.samhita.susruta.3.2.27) tato vidhānaṁ purtīyamupādhyāyaḥ samācaret// karmānte ca kramaṁ hyenamārabheta vicakṣaṇaḥ// ### [3.2.28](https://indike.org/pramana/in.med.samhita.susruta.3.2.28) tato+aparāhṇe pumān māsaṁ brahmacārī sarpiḥsnigdhaḥ sarpiḥkṣīrābhyāṁ śālyodanaṁ bhuktvā māsaṁ brahmacāriṇīṁ tailasnigdhāṁ tailamāṣottarāhārāṁ nārīmupeyādrātrau sāmādibhir-†abhiviśvāsya; vikalpayaivaṁ caturthyāṁ ṣāṣṭhyāmaṣṭamyāṁ daśamyāṁ dvādaśyāṁ copeyāditi putrakāmaḥ// ### [3.2.29](https://indike.org/pramana/in.med.samhita.susruta.3.2.29) eṣūttarottaraṁ vidyādāyurārogyameva ca // prajāsaubhāgyamaiśvaryaṁ balaṁ ca divaseṣu vai// ### [3.2.30](https://indike.org/pramana/in.med.samhita.susruta.3.2.30) ataḥ paraṁ pañcamyāṁ saptamyāṁ navamyāmekādaśyāṁ ca strīkāmaḥ; trayodaśīprabhṛtayo nindyāḥ// ### [3.2.31](https://indike.org/pramana/in.med.samhita.susruta.3.2.31) tatra prathame divase ṛtumatyāṁ maithunagama(nama?)nāyuṣyaṁ puṁsāṁ bhavati, yaśca tatrādhīyate garbhaḥ sa prasavamāno †vimucyate; dvitīye+apyevaṁ sūtikāgṛhe vā; tṛtīye+apyevamasaṁpūrṇāṅgo+alpāyurvā bhavati; caturthe tu saṁpūrṇāṅgo dīrghāyuśca bhavati/ naca pravartamāne rakte bījaṁ praviṣṭaṁ guṇakaraṁ bhavati, yathā nadyāṁ pratisrotaḥ plāvidravyaṁ prakṣiptaṁ pratinivartate nordhnaṁ gacchati †tadvadeva draṣṭavyam/ tasmānniyamavatīṁ trirātraṁ pariharet/ ataḥ paraṁ māsādupeyāt// ### [3.2.32](https://indike.org/pramana/in.med.samhita.susruta.3.2.32) labdhagarbhāyāścaiteṣvahaḥsu lakṣmaṇāvaṭaśuṅgāsahadevāviśvadevānāmanyatamaṁ kṣīreṇābhiṣutya trīṁścaturovā bindūn dadyāddakṣiṇe nāsāpuṭe †putrakāmāyai\[†asyāgre+avāme duhitṛkāmāyai' ityadhikaṁ pathyate kvacitpustake/\], na ca tānniṣṭhīvet// ### [3.2.33](https://indike.org/pramana/in.med.samhita.susruta.3.2.33) dhruvaṁ caturṇāṁ sānnidhyādgarbhaḥ syādvidhipūrvakaḥ// ṛtukṣetrāmbubījānāṁ sāmagryādaṅkuro yathā// ### [3.2.34](https://indike.org/pramana/in.med.samhita.susruta.3.2.34) evaṁ jātā rūpavantaḥ †sattvavantaścirāyuṣaḥ// bhavantyṛṇasya moktāraḥ satputrāḥ putriṇe(ṇo) hitāḥ// ### [3.2.35](https://indike.org/pramana/in.med.samhita.susruta.3.2.35) tatra tejodhātuḥ sarvavarṇānāṁ prabhavaḥ, sa yadā garbhotoattāvabdhātuprāyo bhavati tadā garbhaṁ gauraṁ karoti, pṛthivīdhātuprāyaḥ kṛṣṇaṁ, pṛthivyākāśadhātuprāyaḥ kṛṣṇaśyāmaṁ, toyākāśadhātuprāyo gauraśyāmam/ yādṛgvarṇamāhāramupasevate garbhiṇī tādṛgvarṇaprasavā bhavtītyeke bhāṣante/ tatra dṛṣṭibhāgamapratipannaṁ tejo jātyandhaṁ karoti, tadeva raktānugataṁ raktākṣaṁ, pittānugataṁ piṅgākṣaṁ, śleṣmānugataṁ śuklākṣaṁ, vātānugataṁ vikṛtākṣamiti// ### [3.2.36](https://indike.org/pramana/in.med.samhita.susruta.3.2.36) bhavanti cātra/ ghṛtapiṇḍo yathaivāgnimāśritaḥ pranilīyate// visarpatyārtavaṁ nāryāstathā puṁsāṁsamāgame// ### [3.2.37](https://indike.org/pramana/in.med.samhita.susruta.3.2.37) bīje+antarvāyunā dnau jīvau kukṣimāgatau// yamāvityabhidhīyete dharmetarapuraḥsarau// ### [3.2.38](https://indike.org/pramana/in.med.samhita.susruta.3.2.38) pitroratyalpabījatvādāsekyaḥ puruṣo bhavet// sa śukraṁ prāśya labhate dhvajocchrāyamasaṁśayam// ### [3.2.39](https://indike.org/pramana/in.med.samhita.susruta.3.2.39) yaḥ pūtiyonau jāyeta sa saugandhikasaṁjñitaḥ// sa yoniśephasorgandhamādhrāya labhate balam// ### [3.2.40](https://indike.org/pramana/in.med.samhita.susruta.3.2.40) sve gude+abrahmacaryādyaḥ strīṣu puṁvat pravartate// kumbhīkaḥ sa ca vijñeya, īrṣyakaṁ śṛṇu cāparam// ### [3.2.41](https://indike.org/pramana/in.med.samhita.susruta.3.2.41) dṛṣṭvā vyavāyamanyeṣāṁ vyavāye yaḥ pravartate// īrṣyakaḥ sa ca vijñeyaḥ,ṣaṇḍakaṁ śṛṇu pañcamam// ### [3.2.42](https://indike.org/pramana/in.med.samhita.susruta.3.2.42) yo bhāryāyāmṛtau mohādaṅganeva pravartate// tataḥ strīceṣṭitākāro jāyate ṣaṇḍasaṁjñitaḥ// ### [3.2.43](https://indike.org/pramana/in.med.samhita.susruta.3.2.43) ṛtau puruṣavadvā+api pravartetāṅganā yadi// tatra kanyā yadi bhavet sā bhavennaraceṣṭitā// ### [3.2.44](https://indike.org/pramana/in.med.samhita.susruta.3.2.44) āsekyaśca sugandhī ca kumbhīkaścerṣyakastathā// saretasastvamī jñeyā aśukraḥ ṣaṇḍa(ṇḍha)saṁjñitaḥ// ### [3.2.45](https://indike.org/pramana/in.med.samhita.susruta.3.2.45) anayā viprakṛtyā tu teṣāṁ śukravahāḥ sirāḥ// harṣāt sphuṭatvamāyānti dhvajocchrāyastato bhavet// ### [3.2.46](https://indike.org/pramana/in.med.samhita.susruta.3.2.46) āhārācāraceṣṭābhiryādṛśībhiḥ samanvitau// strīpuṁsau samupeyātāṁ tayoḥ putro+api tādṛśaḥ// ### [3.2.47](https://indike.org/pramana/in.med.samhita.susruta.3.2.47) yadā nāryāvupeyātāṁ vṛṣasyantyau kathaṁcana// muñcantyau śukramanyonyamanasthistatra jāyate// ### [3.2.48](https://indike.org/pramana/in.med.samhita.susruta.3.2.48) ṛtusnātā tu yā nārī svapne maithunamāvahet// ārtavaṁ vāyurādāya kukṣau garbhaṁ karoti hi// ### [3.2.49](https://indike.org/pramana/in.med.samhita.susruta.3.2.49) māsi māsi vivardheta garbhiṇyā garbhalakṣaṇam// kalalaṁ jāyate tasyā varjitaṁ paitṛkairguṇaiḥ// ### [3.2.50](https://indike.org/pramana/in.med.samhita.susruta.3.2.50) sarpavṛścikakūṣmāṇḍavikṛtākṛtayaśca ye// garbhāstvete striyāścaiva jñeyāḥ pāpakṛtā bhṛśam// ### [3.2.51](https://indike.org/pramana/in.med.samhita.susruta.3.2.51) garbho vātaprakopeṇa dauhṛde vāvamānite// bhavet kubjaḥ kuṇiḥ paṅgurmūko minmina eva vā// ### [3.2.52](https://indike.org/pramana/in.med.samhita.susruta.3.2.52) mātāpitrostu nāstikyādaśubhaiśca purākṛtaiḥ// vātādīnāṁ ca kopena garbho vikṛtimāpnuyāt// ### [3.2.53](https://indike.org/pramana/in.med.samhita.susruta.3.2.53) malālpatvādayogācca vāyoḥ pkvāśayasya ca // vātamūtrapurīṣāṇi na garbhasthaḥ karoti hi// ### [3.2.54](https://indike.org/pramana/in.med.samhita.susruta.3.2.54) jarāyuṇā mukhe cchanne kaṇṭhe ca kalhaveṣṭite// vāyormārganirodhācca na garbhasthaḥ praroditi// ### [3.2.55](https://indike.org/pramana/in.med.samhita.susruta.3.2.55) niḥśvāsocchvāsasaṅkṣobhasvapnān garbho+adhigacchati// māturniśvasitocchvāsasaṅkṣobhasvapnasaṁbhavān// ### [3.2.56](https://indike.org/pramana/in.med.samhita.susruta.3.2.56) sanniveśaḥ śarīrāṇāṁ dantānāṁ patanodbhavau// taleṣvasaṁbhavo yaśca romṇāmetat svabhāvataḥ// ### [3.2.57](https://indike.org/pramana/in.med.samhita.susruta.3.2.57) bhāvitāḥ pūrvadeheṣu satataṁ śāstrabuddhayaḥ// bhavanti sattvabhūyiṣṭhāḥ pūrvajātismarā narāḥ// ### [3.2.58](https://indike.org/pramana/in.med.samhita.susruta.3.2.58) karmaṇā codito yena tadāpnoti punarbhave // abhyastāḥ pūrvadehe ye tāneva bhajate guṇān// ### [3.2.58\_1](https://indike.org/pramana/in.med.samhita.susruta.3.2.58_1) iti suśrutasaṁhitāyāṁ śārīrasthāne śukraśoṇitaśuddhiśārīraṁ nāma dvitīyo+adhyāyaḥ //2// ## Commentaries (1) - [Nibandhasaṅgraha](https://indike.org/pramana/in.med.samhita.susruta!dalhana.76.2) — Ḍalhaṇa, Sanskrit ## Linked texts (4) - [Śāntikamalākara](https://indike.org/pramana/in.niti.dharma.santi.santikamalakara.13.52) — Kamalākarabhaṭṭa 1587, Sanskrit - [Śūdrakamalākara](https://indike.org/pramana/in.niti.dharma.jati.sudrakamalakara.51.1-3) — Kamalākarabhaṭṭa, Sanskrit - [Vāgbhaṭamaṇḍana](https://indike.org/pramana/in.med.paribhasa.vagbhatamandana.28.30.4) — Narahari, Sanskrit - [Hastyāyurveda](https://indike.org/pramana/in.med.pasu.gaja.hastyayurveda.109.4) — Pālakāpya, Sanskrit --- Source: [https://indike.org/pramana/in.med.samhita.susruta.3.2](https://indike.org/pramana/in.med.samhita.susruta.3.2) · Pramāṇa