[Pramāṇa](https://indike.org/pramana/) › [Indian literature](https://indike.org/pramana/in) › [Medicine](https://indike.org/pramana/in.med) › [Early and ascribed compendia](https://indike.org/pramana/in.med.samhita) › [The Compendium of Suśruta](https://indike.org/pramana/in.med.samhita.susruta) › 4.12 # The Compendium of Suśruta 4.12: dvādaśo+adhyāyaḥ/ Suśrutasaṃhitā 4.12 - **Language:** Sanskrit ### dvādaśo+adhyāyaḥ/ ### [4.12.1](https://indike.org/pramana/in.med.samhita.susruta.4.12.1) athātaḥ pramehapiḍakācikitsitaṃ vyākhyāsyāmaḥ// ### [4.12.2](https://indike.org/pramana/in.med.samhita.susruta.4.12.2) yathovāca bhagavān dhanvantariḥ// ### [4.12.3](https://indike.org/pramana/in.med.samhita.susruta.4.12.3) śarāvikādyā nava piḍakāḥ prāguktāḥ; tāḥ prāṇavato+alpāstvaṅmāṃsaprāptā mṛdvyo+alparujaḥ kṣiprapākabhedinyaśca sādhyāḥ// ### [4.12.4](https://indike.org/pramana/in.med.samhita.susruta.4.12.4) tābhirupadrutaṃ pramehiṇamupacaret/ tatra pūrvarūpeṣvapatarpaṇaṃ vanaspatikaṣāyaṃ bastamūtraṃ copadiśet; evamakurvatastasaya madhurāhārasya mūtraṃ svedaḥ śleṣmā ca madhurībhavati pramehaścābhivyakto bhavati, tatrobhayataḥ saṃśodhanamāseveta; evamakurvatastasya doṣāḥ pravṛddhā māṃsaśoṇite pradūṣya śophaṃ janayantyupadravān vā kāṃścit, tatroktaḥ pratīkāraḥ sirāmokṣaśca; evamakurvatastasya śopho vṛddho+atimātraṃ rujo vidāhamāpadyate, tatra śastrapraṇidhānamuktaṃ vraṇakriyopasevā ca; evamakurvatastasya pūyo+abhyantaramavadāryotsaṅgaṃ mahāntamavakāśaṃ kṛtvā pravṛddho bhavatyasādhyaḥ; tasmādādita eva pramehiṇamupakramet// ### [4.12.5](https://indike.org/pramana/in.med.samhita.susruta.4.12.5) bhallātakabilvāmbupippalīmūlodakīryāvarṣābhūpunarnavācitrakaśaṭīsnuhīvaruṇakapuṣkaradantīpathyā daśapalonmitā yavakolakulatthāṃśca prāsthikān saliladroṇe niṣkvāthya caturbhāgāvaśiṣṭe+avatārya vacātrivṛtkampillakabhārgīniculaśuṇṭhīgajapippalīviḍaṅgarodhraśirīṣāṇāṃ bhāgairardhapalikairghṛtaprasthaṃ vipācayenmehaśvayathukuṣṭhagulmodarārśaḥplīhavidradhipiḍakānāṃ nāśanaṃ nāmnā dhānvantaram// ### [4.12.6](https://indike.org/pramana/in.med.samhita.susruta.4.12.6) durvirecyā hi madhumehino bhavanti medo+abhivyāptaśarīratvāt, tasmāttīkṣṇameteṣāṃ śodhanaṃ kurvīta/ piḍakāpīḍitāḥ sopadravāḥ sarva eva pramehā mūtrādimādhurye madhugandhasāmānyāt pāribhāṣikīṃ madhumehākhyāṃ labhante// ### [4.12.7](https://indike.org/pramana/in.med.samhita.susruta.4.12.7) na caitān kathaṃcidapi svedayet, medobahutvādeteṣāṃ viśīryate dehaḥ svedena// ### [4.12.8](https://indike.org/pramana/in.med.samhita.susruta.4.12.8) rasāyanīnāṃ ca daurbalyānnordhvamuttiṣṭhanti pramehiṇāṃ doṣāḥ, tato madhumehināmadhaḥkāye piḍakāḥ prādurbhavanti// ### [4.12.9](https://indike.org/pramana/in.med.samhita.susruta.4.12.9) apakvānāṃ tu piḍakānāṃ śophavat pratīkāraḥ, pakvānāṃ vraṇavaditi; tailaṃ tu vraṇaropaṇamevādau kurvīta, āragvadhādikaṣāyamutsādanārthe, śālasārādikaṣāyaṃ pariṣecane, pippalyādikaṣāyaṃ pānabhojaneṣu, pāṭhācitrakaśārṅgeṣṭākṣudrābṛhatīsārivāsomavalkasaptaparṇāragvadhakuṭajamūlacūrṇāni madhumithāṇi praśnīyāt// ### [4.12.10](https://indike.org/pramana/in.med.samhita.susruta.4.12.10) śālasārādivargakaṣāyaṃ caturbhāgāvaśiṣṭamavatārya parisrāvya punarupanīya sādhayet, sidhyati cāmalakarodhrapriyaṅgudantīkṛṣṇāyastāmracūrṇānyāvapet, etadanupadagdhaṃ lehībhūtamavatāryānuguptaṃ nidadhyāt, tato yathāyogamupayuñjīta, eṣa lehaḥ sarvamehānāṃ hantā// ### [4.12.11](https://indike.org/pramana/in.med.samhita.susruta.4.12.11) triphalānitrakatrikaṭukaviḍaṅgamustānāṃ nava bhāgāstāvanta eva kṛṣṇāyaścūrṇasya, tatsarvamaikadhyaṃ kṛtvā yathāyogaṃ mātrāṃ sarpirmadhubhyāṃ saṃsṛjyopayuñjīta, etannavāyasam; etena jāṭharyaṃ na bhavati, sanno+agnirāpyāyate, durnāmaśophapāṇḍukuṣṭharogāvipākakāsaśvāsapramehāśca na bhavanti// ### [4.12.12](https://indike.org/pramana/in.med.samhita.susruta.4.12.12) śālasārādiniryūhe caturthāṃśāvaśeṣite/ parisrute tataḥ śīte madhu mākṣikamāvapet// ### [4.12.13](https://indike.org/pramana/in.med.samhita.susruta.4.12.13) phāṇitībhāvamāpannaṃ guḍaṃ śodhitameva ca/ ślakṣṇapiṣṭāni cūrṇāni pippalyādigaṇasya ca// ### [4.12.14](https://indike.org/pramana/in.med.samhita.susruta.4.12.14) aikadhyamāvapet kumbhe saṃskṛte ghṛtabhāvaite/ pippalīcūrṇamadhubhiḥ pralipte+antaḥśucau dṛḍhe// ### [4.12.15](https://indike.org/pramana/in.med.samhita.susruta.4.12.15) ślakṣṇāni tīkṣṇalohasya tatra patrāṇi buddhimān/ khadirāṅgārataptāni bahuśaḥ sannipātayet// ### [4.12.16](https://indike.org/pramana/in.med.samhita.susruta.4.12.16) supidhānaṃ tu taṃ kṛtvā yavapalle nidhāpayet/ māsāṃstrīṃścaturo vā+api yāvadālohasaṃkṣayāt// ### [4.12.17](https://indike.org/pramana/in.med.samhita.susruta.4.12.17) tato jātarasaṃ taṃ tu prātaḥ prātaryathābalam/ niṣeveta yathāyogamāhāraṃ cāsya kalpayet// ### [4.12.18](https://indike.org/pramana/in.med.samhita.susruta.4.12.18) kārśyakṛdbalināmeṣa sannasyāgneḥ prasādhakaḥ/ śophanudgulmahṛt kuṣṭhamehapāṇḍvāmayāpahaḥ// ### [4.12.19](https://indike.org/pramana/in.med.samhita.susruta.4.12.19) plīhodaraharaḥ śīghraṃ viṣamajvaranāśanaḥ/ abhiṣyandāpaharaṇo lohāriṣṭo mahāguṇaḥ// ### [4.12.20](https://indike.org/pramana/in.med.samhita.susruta.4.12.20) pramehiṇo yadā mūtramapicchilamanāvilam/ viśadaṃ tiktakaṭukaṃ tadā++ārogyaṃ pracakṣate// ### [4.12.20\_1](https://indike.org/pramana/in.med.samhita.susruta.4.12.20_1) iti śrīsuśrutasaṃhitāyāṃ cikitsāsthāne pramehapiḍakācikitsitaṃ nāma dvādaśo+adhyāyaḥ //12// ## Commentaries (2) - [Nibandhasaṅgraha](https://indike.org/pramana/in.med.samhita.susruta!dalhana.96.3) — Ḍalhaṇa, Sanskrit - [Bhānumatī](https://indike.org/pramana/in.med.samhita.susruta!cakrapani) — Cakrapāṇidatta, Sanskrit ## Linked texts (1) - [Bṛhadāsavāriṣṭasaṃgraha](https://indike.org/pramana/in.med.cikitsa.kalpana.brhadasavaristasamgraha.70.1) — Kavirāj Devasīṃha Viṭṭhal, Sanskrit --- Source: [https://indike.org/pramana/in.med.samhita.susruta.4.12](https://indike.org/pramana/in.med.samhita.susruta.4.12) · Pramāṇa