[Pramāṇa](https://indike.org/pramana/) › [Indian literature](https://indike.org/pramana/in) › [Medicine](https://indike.org/pramana/in.med) › [Early and ascribed compendia](https://indike.org/pramana/in.med.samhita) › [The Compendium of Suśruta](https://indike.org/pramana/in.med.samhita.susruta) › 4.13 # The Compendium of Suśruta 4.13: trayodaśo+adhyāyaḥ/ Suśrutasaṃhitā 4.13 - **Language:** Sanskrit ### trayodaśo+adhyāyaḥ/ ### [4.13.1](https://indike.org/pramana/in.med.samhita.susruta.4.13.1) athāto madhumehacikitsitaṃ vyākhyāsyāmaḥ// ### [4.13.2](https://indike.org/pramana/in.med.samhita.susruta.4.13.2) yathovāca bhagavān dhanvantariḥ// ### [4.13.3](https://indike.org/pramana/in.med.samhita.susruta.4.13.3) madhumehitvamāpannaṃ bhiṣagbhiḥ parivarjitam/ yogenānena matimān pramehiṇamupācaret// ### [4.13.4](https://indike.org/pramana/in.med.samhita.susruta.4.13.4) māse śukre śucau caiva śailāḥ sūryāṃśutāpitāḥ/ jatuprakāśaṃ svarasaṃ śilābhyaḥ prasravanti hi// ### [4.13.5](https://indike.org/pramana/in.med.samhita.susruta.4.13.5) śilājatviti vikhyātaṃ sarvavyādhivināśanam/ trapvādīnāṃ tu lohānāṃ ṣaṇṇāmanyatamānvayam// ### [4.13.6](https://indike.org/pramana/in.med.samhita.susruta.4.13.6) jñeyaṃ svagandhataścāpi ṣaḍyoni prathitaṃ kṣitau/ lohādbhavati tadyasmācchilājatu jatuprabham// ### [4.13.7](https://indike.org/pramana/in.med.samhita.susruta.4.13.7) tasya lohasya tadvīryaṃ rasaṃ cāpi bibharti †tat/ trapusīsāyasādīni pradhānānyuttarottaram// ### [4.13.8](https://indike.org/pramana/in.med.samhita.susruta.4.13.8) yathā tathā prayoge+api śreṣṭhe śreṣṭhaguṇāḥ smṛtāḥ/ tatsarvaṃ tiktakaṭukaṃ kaṣāyānurasaṃ saram// ### [4.13.9](https://indike.org/pramana/in.med.samhita.susruta.4.13.9) kaṭupākyuṣṇavīryaṃ ca śoṣaṇaṃ chedanaṃ tathā/ teṣu yat kṛṣṇamalaghu snigdhaṃ niḥśarkaraṃ ca yat// ### [4.13.10](https://indike.org/pramana/in.med.samhita.susruta.4.13.10) gomūtragandhi yaccāpi tat pradhānaṃ pracakṣate/ tadbhāvitaṃ sāragaṇairhṛtadoṣo dinodaye// ### [4.13.11](https://indike.org/pramana/in.med.samhita.susruta.4.13.11) pibet sārodakenaiva ślakṣṇapiṣṭaṃ yathābalam/ jāṅgalena rasenānnaṃ tasmiñjīrṇe tu bhojayet// ### [4.13.12](https://indike.org/pramana/in.med.samhita.susruta.4.13.12) upayujya tulāmevaṃ girijādamṛtopamāt/ vapurvarṇabalopeto madhumehavivarjitaḥ// ### [4.13.13](https://indike.org/pramana/in.med.samhita.susruta.4.13.13) jīvedvarṣaśataṃ pūrṇamajaro+amarasannibhaḥ/ śataṃ śataṃ tulāyāṃ tu sahasraṃ daśataulike// ### [4.13.14](https://indike.org/pramana/in.med.samhita.susruta.4.13.14) bhallātakavidhānena parihāravidhiḥ smṛtaḥ/ mehaṃ kuṣṭhamapasmāramunmādaṃ ślīpadaṃ garam// ### [4.13.15](https://indike.org/pramana/in.med.samhita.susruta.4.13.15) śoṣaṃ śophārśasī gulmaṃ pāṇḍutāṃ viṣamajvaram/ apohatyacirātkālācchilājatu niṣevitam// ### [4.13.16](https://indike.org/pramana/in.med.samhita.susruta.4.13.16) na so+asti rogo yaṃ cāpi nihanyānna śilājatu/ śarkarāṃ cirasaṃbhūtāṃ bhinatti ca tathā+aśmarīm// ### [4.13.17](https://indike.org/pramana/in.med.samhita.susruta.4.13.17) bhāvanāloḍane cāsya kartavye bheṣajairhitaiḥ/ evaṃ ca mākṣikaṃ dhātuṃ tāpījamamṛtopamam// ### [4.13.18](https://indike.org/pramana/in.med.samhita.susruta.4.13.18) madhuraṃ kāñcanābhāsamamlaṃ vā rajataprabham/ piban hanti jarākuṣṭhamehapāṇḍvāmayakṣayān// ### [4.13.19](https://indike.org/pramana/in.med.samhita.susruta.4.13.19) tadbhāvitaḥ kapotāṃśca kulatthāṃśca vivarjayet/ pañcakarmaguṇātītaṃ śraddhāvantaṃ jijīviṣum// ### [4.13.20](https://indike.org/pramana/in.med.samhita.susruta.4.13.20) yogenānena matimān sādhayedapi kuṣṭhanam/ vṛkṣāstuvarakā ye syuḥ paścimārṇavabhūmiṣu// ### [4.13.21](https://indike.org/pramana/in.med.samhita.susruta.4.13.21) vīcītaraṅgavikṣepamārutoddhūtapallavāḥ/ teṣāṃ phalāni gṛhṇīyāt supakvānyambudāgame// ### [4.13.22](https://indike.org/pramana/in.med.samhita.susruta.4.13.22) †majjāṃ tebhyo+api saṃhṛtya śoṣayitvā vicūrṇya ca/ tilavat pīḍayeddroṇyāṃ srāvayedvā kusumbhavat// ### [4.13.23](https://indike.org/pramana/in.med.samhita.susruta.4.13.23) tattailaṃ saṃhṛtaṃ bhūyaḥ pacedātoyasaṃkṣayāt/ avatārya karīṣe ca pakṣamātraṃ nidhāpayet// ### [4.13.24](https://indike.org/pramana/in.med.samhita.susruta.4.13.24) snigdhaḥ svinno hṛtamalaḥ pakṣādūrdhvaṃ prayatnavān/ caturthabhaktāntaritaḥ śuklādau divase śubhe// ### [4.13.25](https://indike.org/pramana/in.med.samhita.susruta.4.13.25) mantrapūtasya tailasya pibenmātrāṃ yathābalam/ tatra mantraṃ pravakṣyāmi yenedamabhimantryate// ### [4.13.26](https://indike.org/pramana/in.med.samhita.susruta.4.13.26) majjasāra mahāvīrya sarvān dhātūn viśodhaya/ śaṅkhacakragadāpāṇistvāmājñāpayate+acyutaḥ// ### [4.13.27](https://indike.org/pramana/in.med.samhita.susruta.4.13.27) tenāsyordhvamadhaścāpi doṣā yāntyasakṛttataḥ/ asnehalavaṇāṃ sāyaṃ yavāgūṃ śītalāṃ pibet// ### [4.13.28](https://indike.org/pramana/in.med.samhita.susruta.4.13.28) pañcāhaṃ prapibettailamanena vidhinā naraḥ/ pakṣaṃ parihareccāpi mudgayūṣaudanāśanaḥ// ### [4.13.29](https://indike.org/pramana/in.med.samhita.susruta.4.13.29) pañcabhirdivasairevaṃ sarvakuṣṭhairvimucyate/ tadeva khadirakvāthe triguṇe sādhu sādhitam// ### [4.13.30](https://indike.org/pramana/in.med.samhita.susruta.4.13.30) nihitaṃ pūrvavat †pakṣāt pibenmāsamatandritaḥ/ tenābhyaktaśarīraśca kurvītāhāramīritam// ### [4.13.31](https://indike.org/pramana/in.med.samhita.susruta.4.13.31) bhinnasvaraṃ raktanetraṃ viśīrṇaṃ kṛmibhakṣitam/ anenāśu prayogeṇa sādhayet kuṣṭhinaṃ naram// ### [4.13.32](https://indike.org/pramana/in.med.samhita.susruta.4.13.32) sarpirmadhuyutaṃ pītaṃ tadeva khadirāmbunā/ pakṣimāṃsarasāhāraṃ karoti dviśatāyuṣam// ### [4.13.33](https://indike.org/pramana/in.med.samhita.susruta.4.13.33) tadeva nasye pañcāśaddivasānupayojitam/ vapuṣmantaṃ śrutidharaṃ karoti triśatāyuṣam// ### [4.13.34](https://indike.org/pramana/in.med.samhita.susruta.4.13.34) śodhayanti naraṃ pītā majjānastasya mātrayā/ mahāvīryastuvarakaḥ kuṣṭhamehāpahaḥ paraḥ// ### [4.13.35](https://indike.org/pramana/in.med.samhita.susruta.4.13.35) sāntardhūmastasya majjā tu dagdhaḥ kṣiptastaile saindhavaṃ cāñjanaṃ ca/ paillyaṃ hanyādarmanaktāndhyakācān nīlīrogaṃ taimiraṃ cāñjanena// ### [4.13.35\_1](https://indike.org/pramana/in.med.samhita.susruta.4.13.35_1) iti suśrutasaṃhitāyāṃ cikitsāsthāne madhumehacikitsitaṃ nāma trayodaśo+adhyāyaḥ //13// ## Commentaries (1) - [Nibandhasaṅgraha](https://indike.org/pramana/in.med.samhita.susruta!dalhana.97.35) — Ḍalhaṇa, Sanskrit --- Source: [https://indike.org/pramana/in.med.samhita.susruta.4.13](https://indike.org/pramana/in.med.samhita.susruta.4.13) · Pramāṇa